Klɛŋklɛŋ afii 100 lɛ mli yinɔsaneŋmalɔ Flavius Josephus wie “Yakobo ni ji Yesu mɔ ni atsɛ lɛ Kristo lɛ nyɛmi lɛ gbele he” yɛ e-Wolo XX ni ji Jewish Antiquities lɛ mli. Woloŋlelɔi babaoo naa sane ni ewie nɛɛ akɛ eji anɔkwale. Kɛlɛ, amɛteŋ mɛi komɛi jeɔ sane kroko ni kɔɔ Yesu he ni yɔɔ nakai wiemɔ lɛ nɔŋŋ mli lɛ he ŋwane. Sane nɛɛ ni atsɛɔ lɛ Testimonium Flavianum lɛ kaneɔ akɛ:

“Nɛkɛ be nɛɛ mli lɛ nuu ko yɛ ni atsɛɔ lɛ Yesu, gbɔmɔ ko ni le nii waa, kɛ́ eja akɛ atsɛ lɛ gbɔmɔ, ejaakɛ efee naakpɛɛ nibii—ni etsɔɔ mɛi anɔkwale lɛ, ni mɛi babaoo sumɔɔ akɛ amɛbo lɛ toi kɛ́ eetsɔɔ nii. Egbala Yudafoi kɛ Jeŋmajiaŋbii babaoo kɛba emasɛi. Lɛ ji Kristo [lɛ]; ni beni Pilato bo susumɔi ni hii hiɛnaanɔbii ni fata wɔhe lɛ kɛɛ lɛ lɛ toi lɛ eha asɛŋ lɛ yɛ krɔɔs nɔ, mɛi ni sumɔ lɛ klɛŋklɛŋ lɛ kwaaa lɛ ejaakɛ ejie ehe kpo etsɔɔ amɛ akɛ hiɛkalɔ ekoŋŋ yɛ gbi ni ji etɛ lɛ nɔ, tamɔ bɔ ni gbalɔi lɛ gba lɛ pɛpɛɛpɛ kɛ naakpɛɛ nibii krokomɛi akpei nyɔŋma ni kɔɔ ehe lɛ; ni Kristofoi ni akɛ egbɛ́i fɔ̃ amɛnɔ lɛ etãko lolo yɛ wɔbei nɛɛ mli.”—Josephus—The Complete Works, ni William Whiston tsɔɔ shishi lɛ.

Kɛjɛ afi 1500 afii lɛ anaagbee mli kɛbaa lɛ, sane naataamɔ ko ni naa wa waa te shi yɛ mɛi ni kpɛlɛɔ sane ni aŋma lɛ nɔ kɛ mɛi ni je ŋwane akɛ Josephus ji mɔ ni ŋma lɛ ateŋ. French yinɔsaneŋmalɔ ko ni atsɛɔ lɛ Serge Bardet lɛ sumɔ akɛ efɛne kpɔ ni kɛ sane naataamɔ ni etee nɔ fe afii ohai ejwɛ ni eho nɛ lɛ ba lɛ. Eŋma eniiamlitaomɔ lɛ yɛ wolo ko ni gbɛ́i ji Le Testimonium Flavianum—Examen historique considérations historiographiques (The Testimonium Flavianum—A Historical Study With Historical Considerations) lɛ mli.

Josephus jeee niŋmalɔ ni yɔɔ Kristofoi ahemɔkɛyeli. Eji Yudafoi ayinɔsaneŋmalɔ; no hewɔ lɛ, sane naataamɔ lɛ fɛɛ damɔ Yesu ni ewie ehe akɛ eji “Kristo” lɛ nɔ. Bardet tsɔɔ mli akɛ, gbɛnaa gbɛ́i nɛɛ kɛ bɔ ni “Helabii lɛ kɛ gbɛ́i ni tamɔ nakai lɛ tsuɔ nii amɛhaa lɛ kpãa gbee pɛpɛɛpɛ.” Bardet kɛfata he akɛ, yɛ Yudanyo ni etsɔ Kristofonyo lɛ susumɔ naa lɛ, “jeee akɛ anyɛŋ akɛ wiemɔ ni ji Christos ni Josephus kɛtsu nii lɛ atsu nii,” shi eji odaseyeli ni tsɔɔ akɛ “mɛi ni piɛɔ saji amli lɛ etɔ̃ kwraa yɛ amɛhiɛ ni amɛku amɛshwie sane nɛɛ nɔ lɛ hewɔ.”

Ani eeenyɛ efee akɛ mɔ ko ni miitao esue bɔ ni Josephus ŋmaa nii ehaa lɛ ji mɔ ni ŋma yɛ sɛɛ mli? Bardet mu sane naa akɛ, kɛ́ akɛ yinɔsane kɛ nibii diɛŋtsɛ ni ana lɛ to he lɛ, anaa akɛ suemɔ ni tamɔ nɛkɛ lɛ yɛ naakpɛɛ waa diɛŋtsɛ. Ebaabi ni mɔ lɛ afee mɔ ko ni “le mɔ suemɔ fe mɔ fɛɛ mɔ yɛ yinɔsane mli,” yɛ gbɛ kroko nɔ lɛ mɔ ni feɔ enii tamɔ Josephus pɛpɛɛpɛ.

Kɛ́ nakai lɛ, mɛni hewɔ woloŋlelɔi lɛ jeɔ mɔ ni ŋma lɛ he ŋwane lɛ mɔ? Beni Bardet na nɔ tuuntu ni kɛ naagba lɛ ba lɛ, eŋma akɛ “mɛi ayiŋ etɛ̃ɛɛ amɛ yɛ Testimonium lɛ—ni yɔɔ srɔto yɛ blema niŋmai babaoo ahe lɛ—he, ejaakɛ mɛi jeɔ Testimonium lɛ he ŋwane.” Etee nɔ ewie akɛ, yiŋtoi srɔtoi ni ahiɛ yɛ afii ohai abɔ ni eho lɛ amli lɛ damɔ “susumɔi gbohii” anɔ, moŋ fe nɔ ni niŋmaa lɛ diɛŋtsɛ tsɔɔ lɛ ni haa ayɔseɔ anɔkwa ni nakai niŋmai lɛ ji lɛ.

Kɛ́ Bardet niiamlitaomɔ nɛɛ baatsake woloŋlelɔi nɛɛ asusumɔ yɛ Testimonium Flavianum lɛ he jio, etsakeŋ jio lɛ, abaana naa sɛɛ mli. Enɛ ekɔne Pierre Geoltrain ni ji Yudafoi ajamɔ kɛ Kristojamɔ he nilelɔ kpanaa lɛ yiŋ. Ekɛ be kplaŋŋ ena Testimonium lɛ akɛ aŋma sɛɛ mli ahɔ Josephus niŋmai lɛ amli, ni eyeɔ mɛi ni he ye akɛ eja lɛ po ahe fɛo. Shi etsake esusumɔ lɛ. Ekpɛlɛ nɔ akɛ nɔ ni Bardet ŋma lɛ ji nɔ ni ha etsake ejwɛŋmɔ lɛ. Amrɔ nɛɛ Geoltrain ewie akɛ, “kɛjɛ ŋmɛnɛ kɛyaa lɛ, mɔ ko akaka akɛ ebaawie akɛ nɔ ni Josephus eŋma lɛ jeee anɔkwale.”

Yɛ anɔkwale mli lɛ, Yehowa Odasefoi yɛ yiŋtoo ni fe fɛɛ ni amɛaadamɔ nɔ amɛhe Yesu amɛye akɛ lɛ ji Kristo lɛ—ni eyɛ Biblia lɛ diɛŋtsɛ mli.—2 Tim. 3:16.