YESU wie akɛ ashiŋ tɛi ni akɛma Yehowa sɔlemɔtsu lɛ ekome yɛ eko nɔ—gbalɛ nɛɛ ba mli beni Roma asraafoi ni Tito nyiɛ amɛhiɛ lɛ kpata Yerusalem hiɛ yɛ afi 70 Ŋ.B. lɛ. (Mat. 24:2) Sɛɛ mli lɛ, Nɔyelɔ Julian to eyiŋ akɛ ebaasaa ema sɔlemɔtsu lɛ ekoŋŋ.

Ale Julian akɛ Roma naagbee nɔyelɔ ni ji wɔŋjalɔ. Akɛ nilee ko ni mɛi susuɔ akɛ eji Kristofoi anilee lɛ tsɔse Konstantino Kpeteŋkpele lɛ nyɛmi bi nɛɛ. Shi beni awó lɛ nɔyelɔ yɛ afi 361 Ŋ.B. lɛ, ekpoo nakai tsɔsemɔ lɛ kɛ apasa Kristojamɔ ni yɔɔ ebeaŋ lɛ, ni ebatsɔ wɔŋjalɔ moŋ. Yinɔsane woji wieɔ ehe akɛ eji “Hemɔkɛyeli Kwalɔ.”

Julian nyɛ mɛi ni kɛɛ amɛji Kristofoi lɛ. Yiŋtoo kome hewɔ ni ekolɛ efee nakai ji akɛ, beni eye afii ekpaa lɛ, ena ni jamɔ mli hiɛnyiɛlɔi lɛ gbe epapa kɛ ewekumɛi krokomɛi. Sɔlemɔ he yinɔsaneŋmalɔi tsɔɔ akɛ, Julian wo Yudafoi lɛ hewalɛ ní amɛsaa amɛma sɔlemɔtsu lɛ ekoŋŋ kɛsusumɔ lɛ akɛ no baaha ana akɛ Yesu ji apasa gbalɔ. *

Anyɛŋ aje yiŋ ni Julian to akɛ ebaama sɔlemɔtsu lɛ ekoŋŋ lɛ he ŋwane. Yinɔsaneŋmalɔi biɔ kɛji eje tsumaa lɛ shishi lɛɛlɛŋ, ni kɛ́ nakai lɛ mɛni ha akpa tsu lɛ maa lɛ? Kɛlɛ, wɔyɛ nɔmimaa yɛ nɔ kome he. No ji akɛ, beni awó Julian nɔyelɔ lɛ, eshɛɛɛ afii enyɔ ni agbe lɛ, ni anyɛɛɛ ama sɔlemɔtsu lɛ.