Aram maŋtsɛ lɛ miigbɔbi Nyɔŋmɔ gbalɔ Elisha, ni etiu lɛ kɛtee Dotan maŋ ni yɔɔ gɔŋ nɔ ni atswa gbogbo awo he lɛ mli. Beni je na lɛ, Aram maŋtsɛ lɛ tsu okpɔŋɔi, shwiilii, kɛ ta babaoo kɛtee Dotan. Beni je tsɛreɔ lɛ, etabilɔi lɛ egba kɛbɔle maŋ lɛ.—2 Maŋ. 6:13, 14.

Beni Elisha tsulɔ lɛ hiɛ tsɛ̃ ni eje kpo lɛ, ena mɛi ni miiba amɛbamɔ gbalɔ lɛ. Kɛkɛ ni ebo ekɛɛ: “Ao, minuŋtsɔ! té wɔbaafee tɛŋŋ ko?” Elisha kɛɛ lɛ akɛ: “Kaashe gbeyei; ejaakɛ mɛi ni kɛ wɔ yɔɔ lɛ fá fe mɛi ni kɛ amɛ yɔɔ lɛ.” Kɛkɛ ni gbalɔ lɛ sɔle ekɛɛ: “Yehowa, miikpao fai, gbelemɔ ehiŋmɛii ni ena nii!” Amaniɛbɔɔ lɛ tsa nɔ akɛ: “Ni Yehowa gbele oblanyo lɛ hiŋmɛii, ni ena nii: ni naa, gɔŋ lɛ nɔ eyi tɔ kɛ la okpɔŋɔi kɛ shwiilii kɛbɔle Elisha kɛkpe.” (2 Maŋ. 6:15-17) Mɛni wɔbaanyɛ wɔkase yɛ sane nɛɛ kɛ saji krokomɛi ni tee nɔ yɛ Elisha shihilɛ mli lɛ mli?

Beni Arambii lɛ babɔle Elisha kɛkpe lɛ, etsui efãaa, ejaakɛ ekɛ ehe fɔ̃ Yehowa nɔ ni ena akɛ Nyɔŋmɔ miibu ehe. Eyɛ mli akɛ wɔkpaaa gbɛ akɛ Yehowa baafee naakpɛɛnii eha wɔ ŋmɛnɛ moŋ, shi wɔle akɛ eebu ewebii lɛ ahe akɛ kuu. Etamɔ nɔ ni la okpɔŋɔi kɛ shwiilii ebɔle wɔ hu wɔhe kɛkpe. Kɛ́ wɔheɔ enɛ wɔyeɔ ni wɔkɛ wɔhe fɔ̃ɔ Nyɔŋmɔ nɔ be fɛɛ be lɛ, ‘wɔbaahi shi shweshweeshwe,’ ni Yehowa baajɔɔ wɔ. (Lala 4:9) Nyɛhaa wɔkwɛa nɔ ni wɔbaanyɛ wɔkase kɛjɛ saji krokomɛi ni tee nɔ yɛ Elisha shihilɛ mli lɛ mli.

Be ko beni Elisha miihu lɛ, gbalɔ Elia baho ni eshɛ etade yuu lɛ efɔ̃ enɔ. Elisha le nɔ ni no tsɔɔ. Eŋmɛ mɛi okpɔlɔ, eshɛ enyɛ kɛ etsɛ, ni eshi etee eyabɔi Elia sɔɔmɔ. (1 Maŋ. 19:16, 19-21) Akɛni Elisha kɛ ehe ha akɛ ebaasɔmɔ Nyɔŋmɔ yɛ gbɛ fɛɛ gbɛ nɔ hewɔ lɛ, Yehowa hu kɛ lɛ tsu nii, ni sɛɛ mli lɛ ebaye Elia sɛɛ akɛ gbalɔ.

Eeenyɛ efee akɛ Elisha kɛ afii ekpaa sɔmɔ Elia. Yɛ nakai be lɛ mli lɛ, Elisha ji mɔ ni ‘fɔseɔ nu  eshwieɔ Elia niji anɔ.’ (2 Maŋ. 3:11) Yɛ nakai beaŋ lɛ, mɛi kɛ amɛniji ni yeɔ nii, shi jeee fakai kɛ kaklai kɛ awalei. Kɛ́ aye nii lɛ atã lɛ, tsulɔ fɔseɔ nu eshwieɔ enuŋtsɔ niji anɔ koni ekɛfɔ edɛ̃. Enɛ tsɔɔ akɛ nibii ni Elisha tsu lɛ ekomɛi ji nitsumɔ ni baa shi. Fɛɛ sɛɛ lɛ, ebu hegbɛ ni ená kɛsɔmɔ akɛ Elia tsulɔ lɛ akɛ hegbɛ kpele.

Ŋmɛnɛ lɛ, nakai nɔŋŋ hu Kristofoi babaoo kɛ amɛhe ewo be fɛɛ sɔɔmɔ nitsumɔ lɛ fãi srɔtoi amli. Nɔ ni tsirɛɔ amɛ ni amɛfeɔ enɛ ji hemɔkɛyeli kɛ shwelɛ ni amɛyɔɔ akɛ amɛkɛ amɛnyɛmɔ fɛɛ baasɔmɔ Yehowa bɔ ni amɛaanyɛ lɛ. Nitsumɔi lɛ ekomɛi biɔ ni amɛshi amɛshihilɛhe ni amɛyatsu nii yɛ Betel, amɛyamamɔ tsũi, kɛ ekrokomɛi—nitsumɔi ni ekolɛ mɛi pii buɔ akɛ ebaa shi. Esaaa akɛ Kristofonyo ko buɔ nitsumɔi nɛɛ eko kwraa akɛ ebaa shi, ejaakɛ eko fɛɛ eko jara wa yɛ Yehowa hiɛ.—Heb. 6:10.

Dani Nyɔŋmɔ ‘baaŋɔ Elia kɛya ŋwɛi yɛ lasuogbele mli lɛ,’ etsu gbalɔ lɛ kɛjɛ Gilgal kɛtee Betel. Elia kɛɛ Elisha ni eku esɛɛ, shi Elisha kɛɛ lɛ akɛ: “Mishiio!” Beni amɛnyiɛ gbɛ kɛyaa lolo lɛ, Elia kɛɛ Elisha shii enyɔ sɔŋŋ ní eku esɛɛ, shi ekpɛlɛɛɛ. (2 Maŋ. 2:1-6) Elisha kpɛtɛ Elia he gbagbalii taakɛ Rut hu kpɛtɛ Naomi gbagbalii lɛ. (Rut 1:8, 16, 17) Mɛni hewɔ? Eka shi faŋŋ akɛ, Elisha hiɛ sɔ hegbɛ ni Nyɔŋmɔ kɛha lɛ akɛ esɔmɔ Elia lɛ.

Elisha fee nɔkwɛmɔnɔ ni nɔ bɛ kɛha wɔ. Kɛ́ aha wɔ hegbɛ ko yɛ Nyɔŋmɔ asafo lɛ mli, ni wɔha ehi wɔjwɛŋmɔŋ akɛ wɔmiisɔmɔ Yehowa lɛ, wɔhiɛ baasɔ nakai hegbɛ lɛ waa. Hegbɛ ko bɛ ni fe sɔɔmɔ ni aaasɔmɔ Yehowa.—Lala 65:5; 84:11.

Beni amɛyaa lɛ, Elia kɛɛ Elisha akɛ: “Bi mi nɔ ni mifee mihao, dani aŋɔ mi kɛjɛ oŋɔɔ kɛya!” Tamɔ bɔ ni afii komɛi ni tsɔ hiɛ lɛ, Salomo bi ni aha lɛ nɔ ko ni baaye abua lɛ ni ejá Yehowa jogbaŋŋ lɛ, nakai nɔŋŋ Elisha hu fee. Ebi ni ‘Elia aha ni emumɔ lɛ mlijai enyɔ aba enɔ.’ (1 Maŋ. 3:5, 9; 2 Maŋ. 2:9) Yɛ Israel lɛ, kromɔbi ji mɔ ni ahaa lɛ gboshinii mlijai enyɔ. (5 Mose 21:15-17) Etamɔ nɔ ni Elisha miibi ni Elia ana lɛ akɛ emumɔŋ gboshiniyelɔ. Kɛfata he lɛ, Elisha miitao ni ená ekãa tamɔ Elia, mɔ ni ‘ye Yehowa he awuŋa’ lɛ.—1 Maŋ. 19:13, 14.

Mɛni Elia kɛɛ yɛ nɔ ni etsulɔ lɛ bi lɛ he? Gbalɔ lɛ kɛɛ lɛ akɛ: “Obi nɔ ko ni wa; shi kɛlɛ kɛji ooona mi ni aaŋɔmi kɛjɛ oŋɔɔ kɛya lɛ, aaaba mli nakai ahao; shi kɛ jeee nakai lɛ, ebaŋ mli nakai.” (2 Maŋ. 2:10) Eeenyɛ efee akɛ nɔ ni Elia kɛɛ lɛ tsɔɔ nibii enyɔ. Klɛŋklɛŋ lɛ, Nyɔŋmɔ pɛ baanyɛ atsɔɔ kɛji Elisha nine baashɛ nɔ ni ebi lɛ nɔ. Nɔ ni ji enyɔ lɛ, kɛ́ Elisha nine baashɛ nɔ ni ebi lɛ nɔ lɛ, esa akɛ ehiɛ efai shi ni etswa akɛ ebaahi Elia masɛi be fɛɛ be lɛ mli, ekɔɔɔ he eko nɔ ni baaba.

Beni Elisha bi ni aha Elia mumɔ lɛ mlijai enyɔ aba enɔ lɛ, mɛni Nyɔŋmɔ tsu yɛ he? Amaniɛbɔɔ lɛ kɛɛ akɛ: “Eba mli akɛ, beni amɛnyiɛ kɛyaa ni amɛwie lolo lɛ, naa la shwiili kɛ la okpɔŋɔi ba, ni amɛbagbala amɛyi enyɔ lɛ amɛmli; ni Elia tsɔ lasuogbele lɛ mli kɛtee ŋwɛi. Ni Elisha na.” * Yehowa eha Elisha nibimɔ lɛ hetoo. Elisha na ni aŋɔ Elia kɛmiiya ŋwɛi, aha lɛ Elia mumɔ lɛ mlijai enyɔ, ni ebatsɔ gbalɔ lɛ mumɔŋ gboshiniyelɔ.—2 Maŋ. 2:11-14.

Elisha kɔ atade yuu ni je Elia he egbee shi lɛ, ni ewo. Nakai atade lɛ ha ana akɛ Elisha etsɔ Nyɔŋmɔ gbalɔ agbɛnɛ. Nɔ kroko hu ni tsɔɔ akɛ etsɔ gbalɔ lɛ ji Yordan Faa lɛ ni egba mli enyɔ yɛ naakpɛɛ gbɛ nɔ lɛ.

Nɔ ni Elisha na beni aŋɔ Elia kɛtee ŋwɛi yɛ lasuogbele lɛ mli lɛ ná enɔ hewalɛ waa. Ejaakɛ mɔ fɛɛ mɔ ni baana shwiili kɛ la okpɔŋɔi lɛ naa baakpɛ ehe! Enɛɛmɛi ha Elisha na akɛ Yehowa etsu enibimɔ lɛ he nii. Kɛ́ Nyɔŋmɔ ha wɔsɔlemɔi ahetoo lɛ, wɔnaaa la shwiili kɛ la okpɔŋɔi. Shi wɔbaanyɛ wɔna akɛ Nyɔŋmɔ kɛ hewalɛ kpele miitsu nii koni eha afee esuɔmɔnaa nii. Ni kɛ́ wɔyɔse bɔ ni Yehowa jɔɔ egbɛjianɔtoo lɛ fã ni yɔɔ shikpɔŋ nɔ ŋmɛnɛ lɛ, belɛ wɔmiina eŋwɛi shwiili lɛ ni miinyiɛ.—Ezek. 10:9-13.

 Elisha na nibii pii ni ma nɔ mi kɛha lɛ akɛ Yehowa yɛ hewalɛ kpele. Nyɔŋmɔ mumɔ krɔŋkrɔŋ lɛ ye ebua gbalɔ lɛ ni efee naakpɛɛnii 16 sɔŋŋ—nɔ ni Elia fee lɛ toi enyɔ. * Be kroko ni Elisha saa na okpɔŋɔi kɛ la shwiilii ji be ni Arambii lɛ gba bɔle Dotan maŋ lɛ, taakɛ wɔwie kɛje sane nɛɛ shishi lɛ.

Eyɛ mli akɛ Elisha henyɛlɔi lɛ bɔle lɛ yɛ Dotan moŋ, shi etsui efãaa. Mɛni hewɔ? Ejaakɛ eyɛ hemɔkɛyeli ni mli wa yɛ Yehowa mli. Esa akɛ wɔ hu wɔná hemɔkɛyeli ni tamɔ nakai nɔŋŋ. No hewɔ lɛ, nyɛhaa wɔsɔlea wɔbia Nyɔŋmɔ mumɔ krɔŋkrɔŋ lɛ, koni wɔnyɛ wɔjie hemɔkɛyeli kɛ mumɔ lɛ yibii krokomɛi lɛ akpo.—Luka 11:13; Gal. 5:22, 23.

Nɔ ni tee nɔ yɛ Dotan lɛ ha hekɛnɔfɔɔ ni Elisha yɔɔ yɛ Yehowa kɛ eta bɔfoi ni anaaa amɛ ni buɔ wɔhe lɛ mli lɛ mli wa. Gbalɔ lɛ na akɛ Nyɔŋmɔ eha ŋwɛi bɔfoi ebɔle maŋ lɛ kɛ mɛi ni ebabɔ nsara amɛwo maŋ lɛ fɛɛ he kɛkpe. Nyɔŋmɔ here Elisha kɛ etsulɔ lɛ kɛtsɔ ehenyɛlɔi lɛ ahiŋmɛii ni eshwila lɛ nɔ. (2 Maŋ. 6:17-23) Yɛ nakai jaramɔ be lɛ, kɛ shihilɛi krokomɛi amli lɛ, Elisha tee nɔ ehe Yehowa eye ni ekɛ ehe fɔ̃ enɔ kwraa.

Nyɛhaa wɔ hu wɔkɛ wɔhe afɔ̃a Yehowa Nyɔŋmɔ nɔ taakɛ Elisha fee lɛ. (Abɛi 3:5, 6) Kɛ́ wɔfee nakai lɛ, ‘Nyɔŋmɔ baana wɔ mɔbɔ ni eeejɔɔ wɔ.’ (Lala 67:2) Eji anɔkwale akɛ la shwiilii kɛ okpɔŋɔi diɛŋtsɛ bɔleko wɔ. Shi kɛ ‘amanehulu kpeteŋkpele’ lɛ shɛ lɛ, Yehowa baabu nyɛmimɛi ni yɔɔ je lɛŋ fɛɛ lɛ ahe akɛ kuu. (Mat. 24:21; Kpoj. 7:9, 14) Kɛyashi nakai be lɛ baashɛ lɛ, nyɛhaa wɔkaia be fɛɛ be akɛ, “Nyɔŋmɔ ji wɔbobaahe!”—Lala 62:9.