1, 2. Mɛni esa akɛ wɔfee koni Nyɔŋmɔ asumɔ wɔsane?

MƐI babaoo sumɔɔ ni amɛle bɔ ni mɛi naa amɛ amɛhaa. Shi akɛ Kristofoi lɛ, ehe miihia ni wɔsusu bɔ ni Yehowa naa wɔ ehaa lɛ he waa. Nɔ hewɔ lɛ ji akɛ, lɛ ji Mɔ ni fe fɛɛ yɛ jeŋ muu lɛ fɛɛ mli, ni lɛ eŋɔɔ “wala nubu yɔɔ.”—Lala 36:10.

² Bɔfo Petro ha wɔle akɛ, kɛ́ wɔmiitao ni Yehowa asumɔ wɔsane lɛ, esa akɛ wɔná “jeŋbai krɔŋkrɔŋi” ni wɔkɛ wɔhe awo ‘Nyɔŋmɔjamɔ nifeemɔi amli.’ (Nyɛkanea 2 Petro 3:11.) Ja wɔhi shi yɛ hetsemɔ mli dani ‘wɔjeŋba’ baafee krɔŋkrɔŋ. Enɛ biɔ ni bɔ ni wɔsusuɔ nii ahe, bɔ ni wɔfeɔ wɔnii, kɛ bɔ ni wɔjáa Nyɔŋmɔ lɛ he atse. Agbɛnɛ hu, esa akɛ wɔha suɔmɔ kɛ bulɛ ni mli kwɔ ni wɔyɔɔ kɛha Nyɔŋmɔ lɛ atsirɛ wɔ ni wɔkɛ wɔhe awo ‘Nyɔŋmɔjamɔ nifeemɔi amli.’ No hewɔ lɛ, jeee wɔnifeemɔi lɛ pɛ Nyɔŋmɔ kwɛɔ, shi ekwɛɔ bɔ ni wɔbuɔ lɛ wɔhaa yɛ wɔtsui mli lɛ hu. Akɛni Yehowa ‘kaa tsui ekwɛɔ’ hewɔ lɛ, kɛji wɔjeŋba yɛ krɔŋŋ, ni lɛ pɛ wɔjáa lɛ, ele.—1 Kron. 29:17.

3. Mɛɛ saji esa akɛ wɔbi wɔhe?

³ Satan Abonsam, ni ji wɔhenyɛlɔ lɛ sumɔɔɔ ni wɔfeɔ nibii ni baaha Nyɔŋmɔ asumɔ wɔsane. Anɔkwa, eefee bɔ fɛɛ bɔ ni ebaanyɛ koni efite wɔ kɛ Yehowa teŋ wekukpaa lɛ. Elakaa wɔ be fɛɛ be koni wɔkpa Nyɔŋmɔ jamɔ. (Yoh. 8:44; 2 Kor. 11:13-15) No hewɔ lɛ, esa akɛ wɔbi wɔhe akɛ: ‘Mɛɛ gbɛi anɔ Satan tsɔɔ elakaa mɛi? Mɛni manyɛ mafee koni mikɛbaa wekukpaa ni kã mi kɛ Yehowa teŋ lɛ yi?’

4. Mɛni Satan sumɔɔ akɛ efee koni ekɛfite wekukpaa ni kã wɔ kɛ Nyɔŋmɔ teŋ lɛ, ni mɛni hewɔ?

⁴ Kaselɔ Yakobo kɛɛ akɛ: “Mɔ fɛɛ mɔ lɛ, lɛ diɛŋtsɛ ekɔnɔ ni gbalaa lɛ ni lakaa lɛ lɛ kaa lɛ. No sɛɛ lɛ akɔnɔ lɛ, kɛ́ eŋɔ hɔ lɛ, efɔɔ esha, ni esha lɛ hu, kɛ́ afee agbe naa lɛ efɔɔ gbele.” (Yak. 1:14, 15) Satan miitao ni efite wɔtsui, ni ji he ni wɔshwelɛi fɛɛ jɛɔ lɛ, koni efite wekukpaa ni kã wɔ kɛ Nyɔŋmɔ teŋ lɛ.

5, 6. (a) Mɛni Satan kɛtsuɔ nii koni ekɛfite wɔtsui? (b) Mɛɛ gbɛi etɛ Satan kɛtsuɔ nii koni eha wɔná shwelɛi gbohii yɛ wɔtsui mli?

⁵ Mɛni Satan kɛtsuɔ nii koni ekɛfite wɔtsui? Biblia lɛ kɛɔ akɛ: “Jeŋ muu lɛ fɛɛ kã mɔ fɔŋ lɛ mli.” (1 Yoh. 5:19) Nibii ni Satan kɛtsuɔ nii lɛ ekomɛi ji ‘nibii ni yɔɔ je lɛŋ’ lɛ. (Nyɛkanea 1 Yohane 2:15, 16.) Abonsam eto nibii ni yɔɔ je lɛ mli lɛ ahe gbɛjianɔ koni ekɛlaka mɛi, ni ekɛ nɔ ni fe afii akpei abɔ efee nakai. Akɛni wɔyɛ je nɛɛ mli hewɔ lɛ, esa akɛ wɔkwɛ wɔhe nɔ jogbaŋŋ yɛ eŋaatsɔi ni yɔɔ nigii lɛ ahe.—Yoh. 17:15.

⁶ Satan bɔɔ mɔdɛŋ akɛ ebaaha wɔná shwelɛi gbohii yɛ wɔtsui mli. Bɔfo Yohane tsɔɔ gbɛi etɛ ni etsɔɔ nɔ efeɔ nakai, nomɛi ji: (1) “heloo lɛ sɛɛdii nii lɛ,” (2) “hiŋmɛii lɛ asɛɛdii nii lɛ,” kɛ (3) “shihilɛ lɛ mli hewoo lɛ.” Satan kɛ gbɛi nɛɛ tsu nii kɛka Yesu yɛ ŋa lɛ nɔ. Akɛni Satan kɛ gbɛi nɛɛ etsu nii afii babaoo hewɔ lɛ, ŋmɛnɛ lɛ, ehe esa yɛ bɔ ni ekɛtsuɔ nii lɛ mli, ni ele amɛteŋ nɔ ni esa akɛ ekɛtsu nii yɛ mɔ fɛɛ mɔ nɔ. Dani wɔbaasusu bɔ ni wɔɔfee wɔbu wɔhe lɛ he lɛ, nyɛhaa wɔsusua bɔ ni Abonsam fee elaka Hawa shi enyɛɛɛ elaka Nyɔŋmɔ Bi lɛ he wɔkwɛa.

7. Mɛɛ gbɛ nɔ Satan kɛ “heloo lɛ sɛɛdii nii lɛ” ka Hawa?

⁷ Niyenii he miihia adesai fɛɛ koni amɛnyɛ amɛya nɔ amɛhi wala mli. Bɔlɔ lɛ to shikpɔŋ lɛ he gbɛjianɔ koni eba niyenii babaoo. Ekolɛ, Satan baatsɔ niyenii nɔ eka wɔ koni wɔfee nɔ ko ni Nyɔŋmɔ sumɔɔɔ. Nyɛhaa wɔsusua bɔ ni ekɛ enɛ ka Hawa lɛ he wɔkwɛa. (Nyɛkanea 1 Mose 3:1-6.) Satan kɛɛ Hawa akɛ, kɛ́ eye “ekpakpa kɛ efɔŋ lee tso lɛ” nɔ yibii lɛ eko lɛ egboŋ, shi moŋ gbi nɔ ni ebaaye eko lɛ ebaatsɔ tamɔ Nyɔŋmɔ. (1 Mose 2:9) Nɔ ni Abonsam tsɔɔ lɛ ji akɛ, jeee ja Hawa ebo Nyɔŋmɔ toi dani ebaaya nɔ ehi wala mli. Enɛ ji amale wulu diɛŋtsɛ! Beni Abonsam du nakai susumɔ lɛ ewo Hawa jwɛŋmɔ mli lɛ, Hawa baná hegbɛ akɛ ekɔ nibii enyɔ nɛɛ ateŋ ekome, akɛ: Ejie nakai susumɔ lɛ yɛ ejwɛŋmɔ mli, loo eya nɔ ejwɛŋ nɔ aahu ni no aha tso lɛ nɔ yibii  lɛ aba etsine. Eyɛ mli akɛ eyɛ hegbɛ akɛ eyeɔ trom lɛ mli tsei krokomɛi lɛ fɛɛ anɔ yibii lɛ eko moŋ, shi etee nɔ ejwɛŋ nɔ ni Satan edu ewo ejwɛŋmɔ mli yɛ tso lɛ ni ma trom lɛ teŋ lɛ he lɛ nɔ, ni “etse enɔ yibii lɛ eko ni eye.” Satan ha Hawa ná shwelɛ eha nɔ ni Nyɔŋmɔ egu lɛ yeli lɛ.

8. Mɛɛ gbɛ nɔ Satan kɛ “heloo lɛ sɛɛdii nii lɛ” ka Yesu, ni mɛni hewɔ enyɛɛɛ elaka lɛ lɛ?

⁸ Satan kɛ gbɛ nɛɛ nɔŋŋ tsu nii kɛka Yesu yɛ ŋa lɛ nɔ. Beni Yesu ehi ŋmaa shwaneshwane kɛ nyɔɔŋnyɔɔŋ gbii 40 lɛ, Satan kɛ niyenii ka lɛ. Satan kɛɛ akɛ: “Kɛji Nyɔŋmɔ bi jio lɛ, kɛɛmɔ tɛ nɛɛ ni etsɔ aboloo.” (Luka 4:1-3) Yesu baná hegbɛ akɛ ekɔ nibii enyɔ nɛɛ ateŋ ekome, akɛ: Ekɛ hewalɛ ni ekɛfeɔ naakpɛɛnii lɛ baatsu nii koni ená niyenii eye loo efeŋ nakai. Yesu le akɛ esaaa akɛ ekɛ ehewalɛ lɛ tsuɔ nii kɛha lɛ diɛŋtsɛ esɛɛnamɔ. Eyɛ mli akɛ no mli lɛ hɔmɔ miiye lɛ moŋ, shi ebu wekukpaa ni kã ekɛ Nyɔŋmɔ teŋ lɛ akɛ ehe miihia fe niyenii. Eha Abonsam hetoo akɛ: “Aŋma akɛ: ‘Jeee aboloo kɛkɛ nɔ gbɔmɔ tsɔɔ ni eyi náa wala, shi Nyɔŋmɔ wiemɔ fɛɛ wiemɔ nɔ moŋ ni.’”—Luka 4:4.

9. Mɛni ji “hiŋmɛii lɛ asɛɛdii nii lɛ,” ni mɛɛ gbɛ nɔ Satan tsɔ nɔ elaka Hawa?

⁹ Nɔ kroko ni Yohane tsɔɔ akɛ Satan kɛlakaa mɛi ji “hiŋmɛii lɛ asɛɛdii nii lɛ.” “Hiŋmɛii lɛ asɛɛdii nii lɛ” ji shwelɛ ni mɔ ko náa kɛhaa nɔ ko beni ehiŋmɛi egba nakai nii lɛ nɔ. Satan tsɔ gbɛ nɛɛ nɔ elaka Hawa, ni ekɛɛ lɛ akɛ: “Nyɛhiŋmɛii aaagbele.” Beni Hawa tee nɔ ekwɛ tso yibii ni agu eyeli lɛ, eba etsine waa. Hawa na akɛ tso lɛ ‘feɔ hiŋmɛii akɔnɔ.’

10. Mɛɛ gbɛ nɔ Satan kɛ “hiŋmɛii lɛ asɛɛdii nii lɛ” tsu nii kɛka Yesu, ni mɛni Yesu fee?

¹⁰ Mɛɛ gbɛ nɔ Satan kɛ “hiŋmɛii lɛ asɛɛdii nii lɛ” tsu nii kɛka Yesu? Satan ŋɔ “je nɛŋ maŋtsɛyelii lɛ fɛɛ etsɔɔ lɛ hiŋmɛitswaa; ni abonsam kɛɛ lɛ akɛ: Bo maŋɔ nɛkɛ hegbɛ nɛɛ fɛɛ kɛ amɛnunyam lɛ mahã.” (Luka 4:5, 6) Enyɛŋ efee akɛ Yesu kɛ ehiŋmɛii diɛŋtsɛ na shikpɔŋ lɛ nɔ maŋtsɛyelii lɛ yɛ hiŋmɛitswaa mli, shi Satan ha ena maŋtsɛyelii nɛɛ anunyam lɛ he ninaa kɛsusumɔ lɛ akɛ, no baaka Yesu. Kɛkɛ ni Satan kɛɛ lɛ akɛ: “Kɛji oookula shi ojá mi lɛ, fiaa kwa aaatsɔ onɔ.” (Luka 4:7) Yesu sumɔɔɔ akɛ etsɔɔ nɔ gbɔmɔ ni Satan taoɔ etsɔ lɛ yɛ gbɛ ko kwraa nɔ. Eha Satan hetoo oya nɔŋŋ akɛ: “Aŋma akɛ: ‘[Yehowa] o-Nyɔŋmɔ lɛ ojá, ni lɛ kɛkɛ osɔmɔ!’”—Luka 4:8.

11. Mɛɛ gbɛ nɔ Satan tsɔ elaka Hawa?

¹¹ Beni Yohane wieɔ je lɛŋ nibii lɛ ahe lɛ, naagbee nɔ ni etsĩ tã ji “shihilɛ lɛ mli hewoo lɛ.” Beni Adam kɛ Hawa  pɛ yɔɔ shikpɔŋ lɛ nɔ lɛ, amɛnyɛɛɛ amɛkɛ nibii ni amɛyɔɔ lɛ ashwã. Shi amɛwo amɛhe nɔ kɛ̃. Beni Satan kaa Hawa lɛ, eha Hawa nu he akɛ Nyɔŋmɔ kɛ nɔ ko ni esa akɛ Hawa aná lɛ etee lɛ. Abonsam kɛɛ lɛ akɛ, gbi nɔ ni eeeye “ekpakpa kɛ efɔŋ lee tso lɛ yibii lɛ” eko lɛ, ‘eeetsɔ tamɔ Nyɔŋmɔ, ni ebaale ekpakpa kɛ efɔŋ.’ (1 Mose 2:17; 3:5) No hewɔ lɛ, Satan miitao Hawa ana akɛ ebaanyɛ ehi shi ni Yehowa gbɛtsɔɔmɔ he ehiaaa lɛ. Eeenyɛ efee akɛ, henɔwomɔ ji nɔ ni ha Hawa he amale nɛɛ eye lɛ. Eye tso yibii ni agu eyeli lɛ, kɛjwɛŋmɔ lɛ akɛ egboŋ. Elaka ehe kwraa!

12. Mɛni ji gbɛ kroko ni Satan tsɔ nɔ eka Yesu, ni mɛni Yesu fee?

¹² Shi Yesu fee nɔkwɛmɔnɔ ni nɔ bɛ yɛ heshibaa gbɛfaŋ, efeee enii tamɔ Hawa! Satan ka akɛ ebaaka Yesu yɛ gbɛ kroko nɔ, shi Yesu kpoo akɛ ebaafee nɔ ko ni baaha ehe gbɛ́i, ní no aha eka Nyɔŋmɔ. Eji efee nakai kulɛ no baatsɔɔ akɛ eewo ehe nɔ! Shi yɛ no najiaŋ lɛ, Yesu ha lɛ hetoo ni yɔɔ faŋŋ akɛ: “Akɛɛ akɛ: ‘Kaaka [Yehowa] o-Nyɔŋmɔ lɛ!’”—Nyɛkanea Luka 4:9-12.

13, 14. Mɛɛ gbɛi anɔ Satan tsɔɔ elakaa wɔ ŋmɛnɛ?

¹³ Ŋmɛnɛ lɛ, Satan kɛ gbɛi ni etsɔ nɔ eka Hawa kɛ Yesu lɛ nɔŋŋ miitsu nii. Abonsam kɛ “heloo lɛ sɛɛdii nii” lɛ tsuɔ nii kɛkaa mɛi koni amɛkɛ amɛhe awo jeŋba sha mli loo amɛfee niyenii he fu loo amɛnu dãa fe nine. Ekɛ “hiŋmɛii lɛ asɛɛdii nii lɛ” tsuɔ nii kɛkaa mɛi koni amɛkwɛ mfonirii ni teɔ bɔlɛnamɔ akɔnɔ shi, titri lɛ yɛ Intanɛt lɛ nɔ. Ni ekɛ “shihilɛ lɛ mli hewoo lɛ” tsuɔ nii koni eha mɛi awo amɛhe nɔ ni amɛtao hegbɛ, amɛhe gbɛ́i, ni amɛtao heloonaa nibii babaoo.

¹⁴ ‘Nibii ni yɔɔ je lɛŋ’ lɛ tamɔ kpoŋ naa loo. Kɛ́ loo ko hiŋmɛi gba nɔ lɛ, egbalaa lɛ, shi eleee akɛ eyɛ kpoŋ naa. Satan kɛ nibii ni ekolɛ mɛi buɔ akɛ amɛji daa gbi hiamɔ nii lɛ tsuɔ nii kɛtsɔɔ amɛ koni amɛku Nyɔŋmɔ mla mli. Satan tsɔɔ gbɛi ni yɔɔ nigii nɛɛ anɔ koni eha wɔtiu nibii ni esaaa sɛɛ, ni ekɛfite wɔtsui hu. Eesumɔ ni wɔnu he akɛ wɔ diɛŋtsɛ wɔhiamɔ nii lɛ asɛɛ  ni wɔɔtiu kɛ ogbɔjɔ shihilɛ ni wɔɔná lɛ ahe miihia kwraa fe Nyɔŋmɔ suɔmɔnaa nii ni wɔɔfee. Ani Satan baanyɛ ekɛ tsɔne nɛɛ adu bo?

15. Taakɛ Yesu fee lɛ, mɛni esa akɛ wɔfee koni Satan akalaka wɔ?

¹⁵ Eyɛ mli akɛ Satan nyɛ elaka Hawa moŋ, shi enyɛɛɛ elaka Yesu. Be fɛɛ be ni Satan baaka Yesu lɛ, Yesu kɛɔ akɛ: “Aŋma akɛ” loo, “Akɛɛ akɛ,” kɛkɛ lɛ ejɛ Ŋmalɛ lɛ mli eha lɛ hetoo. Kɛ́ wɔkaseɔ Biblia lɛ, wɔbaale Ŋmalɛ lɛ mli jogbaŋŋ, ni ebaaha wɔkai ŋmalɛi ni baanyɛ aye abua wɔ kɛ́ wɔkɛ kaa kpe. (Lala 1:1, 2) Kɛ́ wɔkai Nyɔŋmɔ tsuji anɔkwafoi lɛ anɔkwɛmɔnɔ ni yɔɔ Ŋmalɛ lɛ mli lɛ, ebaaye ebua wɔ ni wɔye anɔkwa taakɛ amɛfee lɛ. (Rom. 15:4) Kɛ́ wɔná bulɛ ni mli kwɔ wɔha Yehowa, ni tsɔɔ akɛ wɔsumɔɔ nibii ni esumɔɔ, ni wɔnyɛɔ nibii ni enyɛɔ lɛ, no baabu wɔhe.—Lala 97:10.

16, 17. Mɛɛ gbɛ nɔ bɔ ni wɔkɛ ‘wɔjwɛŋmɔ’ tsuɔ nii wɔhaa lɛ baanyɛ aná nɔ gbɔmɔ ni wɔji lɛ nɔ hewalɛ?

¹⁶ Bɔfo Paulo wo wɔ hewalɛ koni wɔkɛ ‘wɔjwɛŋmɔ’ atsu nii, ni wɔtsɔmɔ gbɔmɛi ni susuɔ nii ahe tamɔ Nyɔŋmɔ, shi jeee tamɔ je lɛ feɔ lɛ. (Rom. 12:1, 2) Paulo wo wɔ ŋaa ni wɔkwɛ nibii ni wɔsusuɔ he lɛ jogbaŋŋ beni ekɛɛ akɛ: “Wɔkumɔɔ susumɔi kɛ nɔ fɛɛ nɔ ni kwɔ ni woɔ ehe nɔ eshiɔ Nyɔŋmɔ nilee lɛ, ni wɔŋɔɔ jwɛŋmɔ fɛɛ jwɛŋmɔ nom wɔhaa Kristo toiboo” lɛ. (2 Kor. 10:5) Bɔ ni wɔsusuɔ nii ahe lɛ náa bɔ ni wɔfeɔ wɔnii wɔhaa lɛ nɔ hewalɛ, no hewɔ lɛ ehe miihia ni ‘wɔya nɔ wɔjwɛŋ’ nibii ni tswaa mɔ emaa shi lɛ ahe.—Fil. 4:8.

¹⁷ Kɛ́ wɔmiitao wɔtsɔmɔ gbɔmɛi krɔŋkrɔŋi lɛ, esaaa akɛ wɔjwɛŋɔ nibii ni esaaa kɛ akɔnɔi gbohii anɔ. Esa akɛ wɔkɛ “tsui ni mli tse” asumɔ Yehowa. (1 Tim. 1:5) Shi tsui lɛ eyi tɔ kɛ kutumpɔo, ni ekolɛ wɔnaŋ bɔ ni ‘nibii ni yɔɔ je lɛŋ’ lɛ náa wɔnɔ hewalɛ ehaa. (Yer. 17:9) No hewɔ lɛ, ehe miihia ni wɔtsɔ nibii ni wɔkaseɔ yɛ Biblia lɛ mli lɛ anɔ ‘wɔka wɔ diɛŋtsɛ wɔhe wɔkwɛ akɛ wɔyɛ hemɔkɛyeli lɛ mli lo.’—2 Kor. 13:5.

18, 19. Mɛni hewɔ esa akɛ wɔbɔ mɔdɛŋ wɔtsɔmɔ gbɔmɛi ni Yehowa sumɔɔ akɛ wɔtsɔmɔ lɛ?

¹⁸ Nɔ kroko ni baaye abua wɔ koni wɔkpoo ‘nibii ni yɔɔ je lɛŋ’ lɛ ji, ni wɔha wiemɔi ni akɛ mumɔ tsirɛ Yohane ni eŋma akɛ: “Je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ” lɛ ahi wɔjwɛŋmɔŋ. (1 Yoh. 2:15-17) Etamɔ nɔ ni Satan nibii agbɛjianɔtoo lɛ baŋ naagbee. Shi ebaaba naagbee kɛ̃. Nibii ni yɔɔ Satan je lɛ mli lɛ fɛɛ baaho aya. Kɛ́ wɔha enɛ hi wɔjwɛŋmɔ mli lɛ, no baaye abua wɔ ni Abonsam akalaka wɔ.

¹⁹ Bɔfo Petro wo wɔ hewalɛ ni wɔfee nibii ni baaha Nyɔŋmɔ asumɔ wɔsane beni ‘wɔkwɛɔ gbɛ ni wɔshweɔ Nyɔŋmɔ gbi lɛ baa lɛ, no mli ni ŋwɛi aaahere kɛ la ni eeeshã, ni jeŋ shishijee nii hu aaasere yɛ la mli’ lɛ. (2 Pet. 3:12) Etsɛŋ ni nakai gbi lɛ baaba, ni Yehowa baakpata Satan je lɛ hiɛ kwraa. Kɛyashi nakai be lɛ baashɛ lɛ, Satan baaya nɔ ekɛ ‘nibii ni yɔɔ je lɛŋ’ lɛ aka wɔ taakɛ eka Hawa kɛ Yesu lɛ. Esaaa akɛ wɔfeɔ wɔnii tamɔ Hawa ni wɔdiɔ wɔkɔnɔi asɛɛ. Kɛ́ wɔfee nakai lɛ, no baatsɔɔ akɛ wɔkɛ Satan efee wɔnyɔŋmɔ. Esa akɛ wɔfee wɔnii tamɔ Yesu, ni wɔkpoo nibii fɛɛ ni Satan kɛkaa wɔ lɛ, ekɔɔɔ he eko bɔ ni amɛyɔɔ akɔnɔ ha. Nyɛhaa wɔ fɛɛ wɔtswaa wɔfai shi akɛ wɔbaatsɔmɔ gbɔmɛi ni Yehowa sumɔɔ akɛ wɔtsɔmɔ lɛ.