1, 2. Mɛni ye ebua Yehowa Odasefoi 230 ni amɛnyɛ amɛnyiɛ gbele nyiɛmɔ lɛ yɛ Jeŋ Ta II lɛ naagbee gbɛ?

BENI Nazibii lɛ yɔse akɛ aaye amɛnɔ kunim yɛ Jeŋ Ta II lɛ naagbee gbɛ lɛ, amɛfã akɛ akpata mɛi akpekpei abɔ ni eshwɛ yɛ yiwalɛ nsarai lɛ amli lɛ ahiɛ. Ato akɛ abaaha gboklɛfoi ni yɔɔ Sachsenhausen nsara lɛ mli lɛ anyiɛ kɛya lɛjiadaamɔhe ko, ni akɛ amɛ baawo meele mli ni ayashiu amɛ yɛ ŋshɔ lɛ mli. Sɛɛ mli lɛ, abatsɛ nyiɛmɔi ni tamɔ nɛkɛ lɛ akɛ, gbele nyiɛmɔi.

² Ato ni gboklɛfoi 33,000 ni jɛ Sachsenhausen nsara lɛ mli lɛ anyiɛ kilomitai 250 kɛya Lübeck, ni ji Germany lɛjiadaamɔhe ko lɛ. Yehowa Odasefoi 230 ni jɛ maji ekpaa anɔ lɛ fata gboklɛfoi nɛɛ ahe, ni aha Odasefoi lɛ nyiɛ akɛ kuu. Hɔmɔ kɛ hela eha gboklɛfoi nɛɛ fɛɛ egbɔjɔ. Te fee tɛŋŋ ni wɔnyɛmimɛi lɛ nyɛ amɛnyiɛ gbɛ kakadaŋŋ nɛɛ? Amɛteŋ mɔ kome kɛɛ akɛ: “Wɔtee nɔ wɔwowoo wɔhe hewalɛ koni wɔya nɔ wɔnyiɛ.” Suɔmɔ ni amɛyɔɔ kɛha amɛhe, kɛ “hewalɛ ní fá kɛteke nɔ” ni jɛ Nyɔŋmɔ ŋɔɔ lɛ ye ebua amɛ ni amɛnyɛ amɛnyiɛ.—2 Kor. 4:7.

3. Mɛni hewɔ ehe hiaa ni wɔwowoo wɔhe hewalɛ lɛ?

³ Eyɛ mli akɛ ŋmɛnɛ lɛ wɔnyiɛɛɛ gbele nyiɛmɔ moŋ, shi ehe miihia ni wɔmia wɔhiɛ kɛdamɔ naagbai babaoo anaa. Beni ato Nyɔŋmɔ Maŋtsɛyeli lɛ shishi yɛ afi 1914 lɛ sɛɛ lɛ, ashɛ Satan afɔ̃ kɛjɛ ŋwɛi kɛba shikpɔŋ lɛ nɔ, ni akɛni “ele akɛ be fioo kɛkɛ eyɔɔ” hewɔ lɛ, “egiri naakpa.” (Kpoj. 12:7-9, 12) Beni Harmagedon bɛŋkɛɔ nɛɛ, Satan kɛ shihilɛi ni mli wawai miika wɔ koni ekɛfite wekukpaa ni kã wɔ kɛ Yehowa teŋ lɛ. Nɔ ni fata enɛ he ji shihilɛ mli naagbai ni wɔkɛkpeɔ daa gbi lɛ. (Hiob 14:1; Jaj. 2:23) Bei komɛi lɛ, jaramɔ shihilɛi nɛɛ sɔŋŋ baanyɛ aha wɔgbɔjɔ aahu akɛ wɔnijiaŋ baaje wui, ekɔɔɔ he eko nɔ ni wɔbaafee yɛ naagbai lɛ ahe. Akɛ nɔkwɛmɔnɔ lɛ, nyɛmi nuu ko ni eye ebua  mɛi babaoo ni amɛtee nɔ amɛsɔmɔ Yehowa yɛ afii ni eho lɛ amli lɛ nijiaŋ je wui beni hela ko mɔ lɛ kɛ eŋa fɛɛ yɛ egbɔlɛ beaŋ lɛ. “Hewalɛ ní fá kɛteke nɔ” ni jɛ Yehowa ŋɔɔ he bahia nyɛmi nuu nɛɛ, ni nakai nɔŋŋ eji yɛ wɔ hu wɔgbɛfaŋ. Kɛfata he lɛ, ehe miihia ni wɔwowoo wɔhe hewalɛ.

4. Mɛɛ bɔfo Paulo ŋaawoo kɛ́ wɔbo toi lɛ ebaaye ebua wɔ koni wɔnyɛ wɔwo mɛi krokomɛi hewalɛ?

⁴ Kɛ́ wɔbo ŋaa ni bɔfo Paulo wo Hebri Kristofoi lɛ toi lɛ, no baaye abua wɔ koni wɔnyɛ wɔwo mɛi krokomɛi hewalɛ. Ewie akɛ: “Nyɛhaa wɔyɔseyɔsea wɔhe, koni wɔkanyakanyaa wɔhe ni wɔjie suɔmɔ kpo, ni wɔtsu nitsumɔi kpakpai, ni wɔkakwa wɔhe naabuamɔ, taakɛ bɔ ni mɛi komɛi fɔɔ feemɔ lɛ, shi moŋ wɔwowoo wɔhe ŋaa, ni titri lɛ akɛni nyɛnaa akɛ gbi lɛ miibɛŋkɛ nɛɛ.” (Heb. 10:24, 25, NW) Te wɔɔfee tɛŋŋ wɔkɛ ŋaawoo ni he hiaa nɛɛ atsu nii lɛ?

5. Kɛ́ akɛɛ ‘wɔyɔseyɔsee wɔhe’ lɛ, te atsɔɔ tɛŋŋ, ni mɛni enɛ biɔ ni wɔfee?

⁵ Kɛ́ akɛɛ ‘wɔyɔseyɔsee wɔhe’ lɛ etsɔɔ akɛ “esa akɛ wɔjwɛŋ mɛi krokomɛi ahe, ni wɔsusu amɛhiamɔ nii ahe.” Ani wɔbaanyɛ wɔkɛɛ akɛ wɔsusuɔ mɛi krokomɛi ahiamɔ nii ahe kɛji ŋamɔ kɛkɛ wɔŋaa amɛ yɛ Maŋtsɛyeli Asa lɛ nɔ loo wɔkɛ amɛ gbaa nibii ni he ehiaaa tsɔ lɛ pɛ ahe sane? Dabi kwraa. Wɔsumɔŋ akɛ ‘wɔkɛ wɔhe awo mɛi asaji amli’ ni ‘wɔwiewie mɛi ahe’ hu. (1 Tes. 4:11, Ga Biblia hee; 1 Tim. 5:13) Shi fɛɛ sɛɛ lɛ, kɛ́ wɔmiitao wɔwo wɔnyɛmimɛi lɛ hewalɛ lɛ, esa akɛ wɔle amɛ jogbaŋŋ—wɔle shihilɛi ni amɛkɛkpeɔ, amɛsui, amɛnyɛmɔi, amɛfatɔi, kɛ bɔ ni amɛyaa nɔ amɛhaa yɛ anɔkwale lɛ mli. Esa akɛ amɛna wɔ akɛ amɛnanemɛi, ni amɛná nɔmimaa akɛ wɔsumɔɔ amɛ. Enɛ biɔ ni wɔná be wɔha amɛ—jeee be ni amɛkɛ naagbai miikpe ni amɛnijiaŋ eje wui lɛ pɛ kɛkɛ, shi yɛ bei krokomɛi amli hu.—Rom. 12:13.

6. Mɛni baaye abua asafoŋ onukpa ko koni enyɛ ‘eyɔse’ mɛi ni atu awo edɛŋ lɛ?

⁶ Biblia lɛ woɔ asafoŋ onukpai ŋaa akɛ, ‘amɛlɛ Nyɔŋmɔ asafoku lɛ ni yɔɔ amɛteŋ lɛ,’ ni amɛfee nakai yɛ suɔmɔ kɛ tsuijurɔ naa. (1 Pet. 5:1-3) Te amɛaafee tɛŋŋ amɛkwɛ asafoku lɛ nɔ jogbaŋŋ kɛ́ amɛleee tooi ni atu awo amɛdɛŋ lɛ jogbaŋŋ lɛ? (Nyɛkanea Abɛi 27:23.) Kɛ́ asafoŋ onukpai ha amɛnyɛmimɛi héyelilɔi lɛ na akɛ amɛfee klalo akɛ amɛbaaye amɛbua amɛ, ni akɛ, amɛyɛ dekã kɛha amɛ lɛ, ewaŋ kɛhaŋ nyɛmimɛi lɛ akɛ amɛaabi amɛ ni amɛye amɛbua amɛ. Kɛfata he lɛ, ewaŋ kɛhaŋ nyɛmimɛi lɛ akɛ amɛaafɔse amɛtsuiŋ amɛshwie onukpai lɛ ahiɛ, ni enɛ baaha onukpai lɛ ‘ayɔse’ mɛi ni atu awo amɛdɛŋ lɛ, ni amɛkɛ yelikɛbuamɔ ni sa lɛ baaha amɛ.

7. Mɛni esa akɛ wɔha ehi wɔjwɛŋmɔŋ kɛ́ mɔ ko ni nijiaŋ eje wui lɛ wie wiemɔ “flafla” ko?

⁷ Paulo kɛɛ asafo ni yɔɔ Tesalonika lɛ akɛ: “Nyɛherea mɛi ni feɔ gbedee lɛ.” (Nyɛkanea 1 Tesalonikabii 5:14.) Mɛi ni ehao ni amɛnijiaŋ eje wui lɛ fata ‘mɛi ni efee gbedee’ lɛ ahe. Abɛi 24:10 lɛ kɛɔ akɛ: ‘Kɛ́ otɔ biti yɛ haomɔ gbi nɔ lɛ, belɛ ohewalɛ faŋ.’ Mɔ ko ni nijiaŋ eje wui waa lɛ wiemɔi baanyɛ afee “flafla.” (Hiob 6:2, 3) Kɛ́ wɔmiitao wɔye wɔbua mɛi ni tamɔ nɛkɛ lɛ, esa akɛ wɔha ehi wɔjwɛŋmɔ mli akɛ amɛbaanyɛ amɛwie nibii komɛi ni kɛ́ amɛhiɛ yɛ amɛhe nɔ lɛ amɛwieŋ. Nyɛmi yoo ko ni atsɛɔ lɛ Rachelle lɛ ná enɛ mli niiashikpamɔ beni emami he baye waa lɛ. Rachelle kɛɛ akɛ: “Bei pii lɛ minyɛ Awo wieɔ nibii ni esaaa kwraa. Shi kɛ́ ebalɛ nakai lɛ, mihaa nɔ gbɔmɔ diɛŋtsɛ ni minyɛ Awo ji lɛ hiɔ mijwɛŋmɔ mli—eji mɔ ko ni sumɔɔ mɔ, emli jɔ, ni ehaa mɔ nɔ. Mibayɔse akɛ, kɛ́ mɛi hao waa lɛ amɛwieɔ nibii komɛi ni kulɛ amɛwieŋ. Nɔ  ni ehiii fe fɛɛ ji, ni bo hu ooodãi mɔ lɛ sɛɛ kɛ wiemɔ gbonyo.” Abɛi 19:11 lɛ kɛɔ akɛ: “Gbɔmɔ ní yɔɔ jwɛŋmɔ lɛ, emli fũuu mra, ni ehiɛ ní ekuɔ efɔ̃ɔ nɔtɔ̃mɔ nɔ lɛ, ehiɛnyam ni.”

8. Namɛi titri esa akɛ ‘wɔma’ wɔsuɔmɔ lɛ ‘nɔ mi’ wɔha, ni mɛni hewɔ?

⁸ Te wɔɔfee tɛŋŋ ‘wɔyɔse’ mɔ ko ni tsui ekumɔ yɛ tsutsu esha ko ni efee lɛ hewɔ lɛ? Eyɛ mli akɛ mɔ lɛ ejaje etɔmɔ lɛ moŋ, shi ebaanyɛ enu he akɛ eyeɔ fɔ lolo yɛ nɔ ni efee lɛ hewɔ. Paulo ŋma nyɛmimɛi ni yɔɔ Korinto lɛ wolo yɛ mɔ ko ni etsake etsui ni yɔɔ amɛsafo lɛ mli lɛ he akɛ: “Nyɛkɛfaa lɛ moŋ ni nyɛshɛjea emii koni ŋkɔmɔyeli tuutu lɛ akaha enijiaŋ je wui. No hewɔ lɛ miikpa nyɛ fai ni nyɛma nyɛsuɔmɔ lɛ nɔ mi nyɛha lɛ.” (2 Kor. 2:7, 8, Ga Biblia hee) Wiemɔ ‘ama nɔ mi’ ni akɛtsu nii yɛ biɛ lɛ shishi ji, “ajie kpo atsɔɔ” loo “aha ana.” Wɔnyɛŋ wɔmu sane naa kɛkɛ akɛ mɔ lɛ le akɛ wɔsumɔɔ lɛ, ni akɛ wɔsusuɔ ehe. Esa akɛ wɔtsɔ wɔnifeemɔi anɔ wɔha ena enɛ.

9. Kɛ́ akɛɛ “wɔkanyakanyaa wɔhe ni wɔjie suɔmɔ kpo, ni wɔtsu nitsumɔi kpakpai” lɛ, mɛni etsɔɔ?

⁹ Paulo ŋma akɛ: “Nyɛhaa wɔyɔseyɔsea wɔhe, koni wɔkanyakanyaa wɔhe ni wɔjie suɔmɔ kpo, ni wɔtsu nitsumɔi kpakpai.” Wɔfeɔ enɛ kɛtsɔ yelikɛbuamɔ ni wɔkɛhaa wɔnyɛmimɛi lɛ koni amɛjie suɔmɔ kpo ni amɛfee nibii kpakpai lɛ nɔ. Akɛ nɔkwɛmɔnɔ lɛ, kɛ́ la ko miihe agbo lɛ, ekolɛ ehe baahia ni wɔta mli ni wɔhuu. (2 Tim. 1:6) Nakai nɔŋŋ wɔbaanyɛ wɔfee nibii komɛi ni baanyɛ akanya wɔnyɛmimɛi lɛ koni amɛya nɔ amɛkɛ ekãa asɔmɔ Nyɔŋmɔ. Gbɛi ni hi fe fɛɛ ni wɔbaanyɛ wɔtsɔ nɔ wɔfee enɛ lɛ ateŋ ekome ji, ni wɔjie wɔnyɛmimɛi lɛ ayi yɛ nibii kpakpai ni amɛfeɔ lɛ ahe.

10, 11. (a) Namɛi esa akɛ wɔjie amɛyi? (b) Okɛ nɔkwɛmɔnɔ ko ni tsɔɔ bɔ ni yijiemɔ baanyɛ aye abua mɔ ko ni ‘etɔ̃’ koni efee nɔ ni ja lɛ aha.

¹⁰ Yijiemɔ he miihia wɔ fɛɛ, kɛ́ wɔnijiaŋ  eje wui jio, wɔnijiaŋ ejeko wui jio. Asafoŋ onukpa ko ŋma akɛ: “Mitsɛ Ataa ejieko miyi shi kome po dã.” Ekɛfata he akɛ: “No hewɔ lɛ beni mida lɛ, minu he akɛ mibɔɔɔ mɔdɛŋ yɛ nɔ ko nɔ ko mli. . . . Eyɛ mli akɛ amrɔ nɛɛ miye afii 50 moŋ, shi kɛ́ minanemɛi lɛ ha mile akɛ miibɔ mɔdɛŋ akɛ asafoŋ onukpa lɛ, mihiɛ sɔɔ waa. . . . Mi diɛŋtsɛ miniiashikpamɔ lɛ eha mina bɔ ni ehe hiaa ni awo mɛi krokomɛi hewalɛ, ni mibɔɔ mɔdɛŋ akɛ mafee nakai.” Yijiemɔ baanyɛ akanya mɔ fɛɛ mɔ—gbɛgbalɔi, mɛi ni efɔ̃ nɔ yɛ afii amli, kɛ mɛi ni nijiaŋ eje wui fɛɛ.—Rom. 12:10.

¹¹ Kɛji ‘mɛi ni ji mumɔŋ gbɔmɛi lɛ miibɔ mɔdɛŋ akɛ amɛsaa mɔ ko ni etɔ̃,’ ni amɛjɛ suɔmɔ mli amɛjie eyi yɛ nibii kpakpai ni efee be ko ni eho lɛ ahe lɛ, no baaye abua lɛ ni etsake esusumɔ ni efee nɔ ni ja. (Gal. 6:1) Enɛ ye ebua nyɛmi yoo ko ni atsɛɔ lɛ Miriam lɛ. Eŋma akɛ: “Beni minanemɛi ni bɛŋkɛ mi kpaakpa lɛ shi asafo lɛ, ni yɛ nakai beaŋ nɔŋŋ lɛ mitsɛ ná yitsoŋ hela ko ni haa lá hoɔ mɔ yɛ e-ansɔ mli lɛ, egba minaa waa. Mihao waa. Mikɛ oblanyo ko ni jeee Odasefonyo bɔi nyiɛmɔ bɔni afee ni maná miishɛɛ yɛ bɔ ni mihao lɛ hewɔ.” Enɛ ha ebanu he akɛ Yehowa sumɔɔɔ lɛ dɔŋŋ, ni ekpɛ eyiŋ po akɛ ebaashi anɔkwale lɛ. Shi beni asafoŋ onukpa ko kai lɛ bɔ ni ebɔɔ mɔdɛŋ yɛ Yehowa sɔɔmɔ lɛ mli yɛ bei ni eho lɛ amli lɛ, ekanya lɛ waa. Asafoŋ onukpai lɛ ye amɛbua lɛ ni ena akɛ Yehowa sumɔɔ lɛ. Enɛ ha ebasumɔ Yehowa ekoŋŋ. Ekɛ oblanyo ni jeee Odasefonyo lɛ kpa nyiɛmɔ ni etee nɔ esɔmɔ Yehowa.

12. Kɛ́ wɔkɛ mɔ ko to mɛi krokomɛi ahe kɛwo lɛ hiɛgbele, wɔwie ehiɛ, loo wɔwie nɔ ko ni baaha enu he akɛ ebɔɔɔ mɔdɛŋ lɛ, mɛni baajɛ mli kɛba?

¹² Kɛ́ wɔkɛ mɔ ko to mɛi krokomɛi ahe kɛwo lɛ hiɛgbele, wɔwie ehiɛ akɛni eyeee mlai ni wɔ diɛŋtsɛ wɔwo lɛ anɔ, loo wɔwie nɔ ko ni baaha enu he akɛ ebɔɔɔ mɔdɛŋ lɛ, no kanyaŋ lɛ koni efee babaoo, shi moŋ ebaaha emia ehiɛ be kukuoo ko pɛ. Gbɛ ni hi fe fɛɛ ni wɔɔtsɔ nɔ wɔkanya nyɛmi ko koni efee babaoo ji, ni wɔjie eyi ni wɔye wɔbua lɛ ni ena akɛ suɔmɔ ni wɔyɔɔ kɛha Nyɔŋmɔ lɛ hewɔ wɔsumɔɔ akɛ wɔkɛ wɔnyɛmɔ fɛɛ asɔmɔ lɛ lɛ.—Nyɛkanea Filipibii 2:1-4.

13. Kɛ́ akɛɛ awo mɔ ko hewalɛ lɛ, mɛni etsɔɔ? (Kwɛmɔ mfoniri ni yɔɔ nikasemɔ lɛ shishijee lɛ.)

¹³ Akɛni ‘wɔmiina akɛ gbi lɛ miibɛŋkɛ’ hewɔ lɛ, esa akɛ ‘wɔwowoo wɔhe hewalɛ.’ Kɛ́ akɛɛ wɔwo wɔnyɛmimɛi lɛ hewalɛ lɛ, nɔ ni etsɔɔ ji, wɔwaje amɛ ni wɔshɛje amɛmii koni amɛya nɔ amɛsɔmɔ Nyɔŋmɔ. Wɔbaanyɛ wɔkɛ kanyamɔ ni akanyaa mɔ ko koni ejie suɔmɔ kpo ni etsu nitsumɔi kpakpai lɛ ato bɔ ni ataa la ni miihe agbo mli lɛ he, ni wɔbaanyɛ wɔkɛ hewalɛ ni awoɔ mɔ hu ato ŋai ni akɛwoɔ la lɛ mli koni etsɛ̃ waa lɛ he. No hewɔ lɛ, ebiɔ ni wɔwaje mɛi ni nijiaŋ eje wui lɛ, ni wɔshɛje amɛmii. Kɛ́ wɔná hegbɛ akɛ wɔbaawo mɛi ni tamɔ nɛkɛ lɛ hewalɛ lɛ, esa akɛ wɔjɛ suɔmɔ kɛ mlihilɛ mli wɔkɛ amɛ awie. (Abɛi 12:18) Kɛfata he lɛ, esa akɛ wɔhe “afee oya kɛ ninumɔ,” ni ‘wɔhumi shi kɛ wiemɔ.’  (Yak. 1:19) Kɛ́ wɔbo wɔnyɛmi Kristofonyo lɛ toi, ni wɔbɔ mɔdɛŋ akɛ wɔbaanu lɛ shishi lɛ, wɔbaanyɛ wɔna nɔ hewɔ ni enijiaŋ eje wui lɛ, ni wɔbaawie nɔ ko ni baaye abua lɛ.

14. Mɛɛ gbɛ nɔ asafoŋ onukpa ko tsɔ eye ebua nyɛmi nuu ko ni nijiaŋ eje wui?

¹⁴ Ha wɔsusu bɔ ni asafoŋ onukpa ko ni jieɔ mlihilɛ kpo lɛ nyɛ eye ebua nyɛmi nuu ko ni ekpa shiɛmɔyaa afii babaoo lɛ he wɔkwɛ. Beni asafoŋ onukpa lɛ boɔ nyɛmi nuu nɛɛ toi lɛ, eyɔse akɛ nyɛmi nuu lɛ yɛ suɔmɔ ni mli wa kɛha Yehowa lolo. Ekaseɔ Buu-Mɔɔ lɛ eko fɛɛ eko ni jeɔ kpo lɛ jogbaŋŋ, ni ebɔɔ mɔdɛŋ akɛ ebaaya asafoŋ kpeei be fɛɛ be. Shi asafoŋbii lɛ ekomɛi anifeemɔ ewo emli la, ni enijiaŋ eje wui. Asafoŋ onukpa lɛ bo lɛ toi jogbaŋŋ, ni ebɔ mɔdɛŋ akɛ ebaanu bɔ ni nyɛmi nuu lɛ nuɔ he ehaa lɛ shishi, ni ewieee eshiii lɛ, shi eha ele akɛ nyɛmimɛi lɛ sumɔɔ lɛ lolo. Fiofio lɛ, nyɛmi nuu lɛ bayɔse akɛ eha dɔlɛ nibii ni afee lɛ be ko ni eho lɛ miitsi lɛ kɛmiijɛ Nyɔŋmɔ ni esumɔɔ lɛ lɛ he. Asafoŋ onukpa lɛ fɔ̃ lɛ nine kɛtee shiɛmɔ. Yelikɛbuamɔ ni asafoŋ onukpa lɛ kɛha nyɛmi nuu lɛ ye ebua lɛ ni ebɔi shiɛmɔyaa ekoŋŋ, ni esaa ebatsɔ asafoŋ onukpa sɛɛ mli.

15. Mɛni wɔbaanyɛ wɔkase yɛ bɔ ni Yehowa kɛ mɛi ni nijiaŋ eje wui lɛ yeɔ ehaa lɛ mli?

¹⁵ Ekolɛ mɔ ni nijiaŋ eje wui lɛ he waŋ lɛ amrɔ nɔŋŋ loo ekpɛlɛŋ yelikɛbuamɔ ni wɔkɛhaa lɛ lɛ nɔ yɛ shishijee mli. Shi esa akɛ wɔya nɔ wɔye wɔbua lɛ. Paulo kɛɛ akɛ: “Nyɛhiɛa mɛi ni efee gbedee lɛ amli, nyɛtoɔ nyɛtsui shi nyɛhaa mɛi fɛɛ.” (1 Tes. 5:14, An American Translation) Yɛ nɔ najiaŋ ni wɔɔŋmɛɛ amɛhe lɛ, nyɛhaa ‘wɔhiɛa amɛ mli,’ ni wɔya nɔ wɔye wɔbua amɛ. Yehowa to etsui shi eha etsuji ni hi shi yɛ blema ni nijiaŋ je wui lɛ. Akɛ nɔkwɛmɔnɔ lɛ, Nyɔŋmɔ to etsui shi eha Elia, ni enu bɔ ni enuɔ he ehaa lɛ shishi. Yehowa ha gbalɔ lɛ nɔ ni he hiaa lɛ koni enyɛ eya nɔ esɔmɔ. (1 Maŋ. 19:1-18) Yehowa kɛ David he fa lɛ akɛni ejɛ etsuiŋ eshwa ehe lɛ hewɔ. (Lala 51:9, 19) Nyɔŋmɔ ye ebua mɔ ni ŋma Lala 73, ní shwɛ fioo kulɛ ekpa Nyɔŋmɔ sɔɔmɔ lɛ hu. (Lala 73:13, 16, 17) Yehowa toɔ etsui shi ehaa wɔ ni emli hi yɛ wɔnɔ, titri lɛ be mli ni wɔnijiaŋ eje wui. (2 Mose 34:6) Emusuŋtsɔlɛi lɛ tsɔɔ “ehee daa leebi,” ni “etãaa.” (Yaafo 3:22, 23) Yehowa miikpa gbɛ akɛ wɔbaakase bɔ ni ekɛ mɛi ni nijiaŋ eje wui lɛ yeɔ yɛ mlihilɛ mli lɛ.

16, 17. Beni nibii agbɛjianɔtoo nɛɛ baa enaagbee lɛ, mɛni esa akɛ wɔfee, ni mɛni hewɔ?

¹⁶ Gboklɛfoi 33,000 ni shi Sachsenhausen yiwalɛ nsara lɛ mli lɛ ateŋ mɛi akpei abɔ gboi. Shi Yehowa Odasefoi 230 lɛ ni shi nsara lɛ mli lɛ fɛɛ ayi ná wala. Bɔ ni amɛwowoo amɛhe hewalɛ ni amɛye amɛbua amɛhe lɛ ji nɔ titri ni ha amɛyi ná wala yɛ gbele nyiɛmɔ lɛ mli.

¹⁷ Ŋmɛnɛ lɛ, wɔnyiɛ “gbɛ . . . ni kɛ mɔ yaa wala mli lɛ” nɔ. (Mat. 7:14) Etsɛŋ, Yehowa jálɔi fɛɛ baabote jalɛ jeŋ hee lɛ mli. (2 Pet. 3:13) Nyɛhaa wɔyea wɔbuaa wɔhe beni wɔnyiɛ gbɛ ni kɛ mɔ yaa naanɔ wala mli lɛ nɔ lɛ.