1, 2. Mɛni hewɔ esaaa akɛ wɔshwaa Yehowa yɛ naagbai ni adesai kɛkpeɔ lɛ ahe lɛ? Okɛ enɛ he nɔkwɛmɔnɔ aha.

ŊƆƆ lɛ akɛ okɛ oŋa ehi shi kɛ miishɛɛ afii babaoo. Shi gbi ko beni ojɛ nitsumɔ oba shĩa lɛ, obana akɛ afee nɔ fɛɛ nɔ basaa yɛ shĩa lɛ. Akumɔ tsũ mli sɛii lɛ, ajwara plɛtei lɛ ni aboda tsɛŋsii ni akɛhoɔ nii lɛ, ni atserɛ kapɛti lɛ basabasa. Nyɛshĩa fɛfɛo lɛ etsɔ tumu. Ani obaabo akɛ, “Mɛni hewɔ miŋa fee enɛ?” Aloo obaabi moŋ akɛ, “Namɔ fee enɛ?” Ŋwanejee ko bɛ he akɛ, sanebimɔ ni ji enyɔ lɛ ji nɔ ni baaba ojwɛŋmɔ mli amrɔ nɔŋŋ. Mɛni hewɔ? Ejaakɛ ole akɛ osuɔlɔ lɛ efeŋ nɔ ko ni tamɔ nakai.

² Ŋmɛnɛ lɛ, wɔnaa akɛ yiwalɛ kɛ jeŋba sha efite adesai ashĩa ni ji shikpɔŋ lɛ, ni awo nɔ muji kpɔtɔɔ. Akɛ mɛi ni kaseɔ Biblia lɛ, wɔle akɛ Yehowa nyɛŋ afee nibii gbohii nɛɛ kɔkɔɔkɔ. Ebɔ wɔshikpɔŋ nɛɛ akɛ paradeiso fɛfɛo. (1 Mose 2:8, 15) Yehowa ji Nyɔŋmɔ ni yɔɔ suɔmɔ. (1 Yoh. 4:8) Biblia lɛ ni wɔkaseɔ lɛ eha wɔna mɔ tuuntu ni kɛ naagbai ni yaa nɔ yɛ je lɛŋ lɛ baa. Lɛ ji Satan Abonsam, “je lɛŋ lumɔ lɛ.”—Yoh. 14:30; 2 Kor. 4:4.

3. Mɛɛ gbɛ nɔ wɔbaanyɛ wɔsusu nii ahe yɛ gbɛ ni ejaaa nɔ?

³ Shi wɔnyɛŋ wɔshwa Satan yɛ naagbai ni wɔkɛkpeɔ lɛ fɛɛ he. Mɛni hewɔ? Ejaakɛ naagbai ni wɔkɛkpeɔ lɛ ekomɛi jɛ wɔ diɛŋtsɛ. (Nyɛkanea 5 Mose 32:4-6.) Eyɛ mli akɛ ekolɛ wɔbaakpɛlɛ enɛ nɔ moŋ, shi emuu ni wɔyeee lɛ baanyɛ aha wɔsusu wɔnaagbai lɛ ahe yɛ gbɛ ni ejaaa nɔ, ni ebaaha wɔfee nɔ ko ni esaaa. (Abɛi 14:12) Yɛ mɛɛ gbɛ nɔ? Yɛ nɔ najiaŋ ni wɔɔshwa wɔ diɛŋtsɛ wɔhe loo Satan lɛ, ekolɛ wɔbaashwa Yehowa moŋ. Wɔmli baanyɛ ‘awo Yehowa la’ po.—Abɛi 19:3.

4, 5. Mɛɛ gbɛ nɔ Kristofonyo ko ‘mli baanyɛ awo Yehowa la’?

⁴ Ani ‘wɔmli baanyɛ awo Yehowa la’ lɛɛlɛŋ? Hɛɛ, shi kɛ́ wɔfee nakai lɛ ekɛ wɔ shɛŋ he ko. (Yes. 41:11)  Mɛni wɔkpaa gbɛ akɛ wɔbaaná kɛji wɔfee nakai? Be ko lɛ, lala wiemɔ ŋmalɔ ko kɛɛ akɛ: “Oniji kɛlɛɛɛ bɔ ni obaanyɛ okɛ Nyɔŋmɔ anɔ.” Ekolɛ wɔwieŋ akɛ wɔkɛ Yehowa yɛ sane. Shi Abɛi 19:3 lɛ kɛɔ akɛ, gbɔmɔ buulufeemɔ “kɔ̃dɔ̃ɔ egbɛ, ni etsui mli woɔ Yehowa la.” Hɛɛ, mɔ ko mli baanyɛ awo Nyɔŋmɔ la yɛ etsui mli. Enɛ baanyɛ aje kpo yɛ gbɛ nigii nɔ. Mɔ ko baanyɛ abɛ Yehowa awo emli. Ni enɛ baaha mɔ lɛ atsi ehe kɛjɛ asafo lɛ he loo ekɛ gbɛjianɔi ni ato kɛha Yehowa jamɔ lɛ tsuŋ nii.

⁵ Mɛni baanyɛ aha ‘wɔmli awo Yehowa la’? Te wɔɔfee tɛŋŋ wɔtsi wɔhe kɛjɛ enɛ he lɛ? Ehe miihia ni wɔle sanebimɔi nɛɛ ahetoo. Ejaakɛ esaa wekukpaa ni kã wɔ kɛ Yehowa Nyɔŋmɔ teŋ lɛ he!

6, 7. Mɛni ha Israelbii ni hi shi yɛ Mose beaŋ lɛ wie amɛshi Yehowa lɛ?

⁶ Mɛni baanyɛ aha Yehowa tsulɔ anɔkwafo ko awie eshi e-Nyɔŋmɔ lɛ? Nyɛhaa wɔsusua otii enumɔ komɛi ahe, ni wɔkwɛ mɛi komɛi ni Biblia lɛ wie amɛhe akɛ amɛfee nakai.—1 Kor. 10:11, 12.

⁷ Wiemɔi ni jeɔ mɔ nijiaŋ wui baanyɛ aná wɔnɔ hewalɛ. (Nyɛkanea 5 Mose 1:26-28.) Akpɔ̃ Israelbii lɛ kɛjɛ nyɔŋyeli mli yɛ Mizraim. Yehowa ha haomɔi nyɔŋma ba nakai yiwalɔi lɛ anɔ, ni no sɛɛ lɛ, ekpata Farao kɛ eta lɛ fɛɛ hiɛ yɛ Ŋshɔ Tsuru lɛ mli. (2 Mose 12:29-32, 51; 14:29-31; Lala 136:15) Eshwɛ fioo ni Nyɔŋmɔ webii lɛ baabote Shiwoo Shikpɔŋ lɛ nɔ. Yɛ he ni Israelbii lɛ eshɛ nɛɛ fɛɛ sɛɛ lɛ, amɛwie amɛshi Yehowa. Mɛni ha amɛhemɔkɛyeli tã lɛ? Nijiaŋwujee wiemɔi ni mɛi ni yakpá shikpɔŋ lɛ shi lɛ ateŋ mɛi komɛi bawie lɛ ha amɛtsui fã. (4 Mose 14:1-4) Mɛni jɛ mli kɛba? Ahaaa yinɔ muu fɛɛ abote “shikpɔŋ kpakpa” lɛ nɔ. (5 Mose 1:34, 35) Ani bei komɛi lɛ wɔŋmɛɔ gbɛ ni nibii ni jeɔ mɔ nijiaŋ wui ni mɛi komɛi wieɔ lɛ gbɔjɔɔ wɔhemɔkɛyeli lɛ, ni ehaa wɔwieɔ wɔshiɔ nɔ ni Yehowa feɔ ehaa wɔ lɛ?

8. Mɛni ha Nyɔŋmɔ webii ni hi shi yɛ Yesaia beaŋ lɛ shwa Yehowa lɛ?

⁸ Shihilɛi ni mli wawai kɛ naagbai baanyɛ aje wɔnijiaŋ wui. (Nyɛkanea Yesaia 8:21, 22.) Yudafoi ni hi shi yɛ Yesaia beaŋ lɛ kɛ shihilɛ ko ni mli wa waa kpe. Amɛhenyɛlɔi ebabɔle amɛ kɛkpe. Anáaa niyenii. Hɔmɔ miiye mɛi babaoo. Ni nɔ ni fe fɛɛ lɛ, amɛbooo Yehowa toi dɔŋŋ, ni amɛfite wekukpaa ni kã amɛ kɛ Nyɔŋmɔ teŋ lɛ. (Amos 8:11) Nɔ najiaŋ ni amɛaatao yelikɛbuamɔ kɛjɛ Yehowa dɛŋ yɛ shihilɛ ni mli wa nɛɛ mli lɛ, amɛbɔi amɛ-Nyɔŋmɔ kɛ amɛmaŋ lɛ nɔ maŋtsɛ lɛ ‘loomɔ.’ Amɛshwa Yehowa yɛ amɛnaagbai lɛ ahe. Bei komɛi lɛ, kɛ́ wɔkɛ shihilɛ ko ni wa loo naagbai kpe lɛ, ani wɔkɛɔ yɛ wɔtsuiŋ akɛ, ‘Beni mihe fĩ mi lɛ, nɛgbɛ Yehowa yɔɔ?’

9. Mɛni ha Israelbii ni hi shi yɛ Ezekiel beaŋ lɛ ná susumɔ ni ejaaa lɛ?

⁹ Wɔleee anɔkwalei fɛɛ ni yɔɔ sane lɛ mli. Akɛni Israelbii ni hi shi yɛ Ezekiel beaŋ lɛ leee anɔkwalei lɛ fɛɛ hewɔ lɛ, amɛnu he akɛ Yehowa “yeee jalɛ sane.” (Ezek. 18:29, Ga Biblia hee) Etamɔ nɔ ni amɛmiikojo Nyɔŋmɔ, ni tsɔɔ akɛ, akɛni amɛleee anɔkwalei lɛ fɛɛ hewɔ lɛ, amɛdamɔ amɛ diɛŋtsɛ amɛtaomɔ nii ni amɛbuɔ akɛ enɔ kwɔlɔ fe Yehowa nɔ lɛ nɔ amɛkojo lɛ. Bei komɛi lɛ, kɛ́ wɔnuuu Biblia mli amaniɛbɔɔ ko loo bɔ ni nibii komɛi yaa nɔ yɛ wɔshihilɛ mli lɛ shishi lɛ, ani wɔnuɔ he yɛ wɔtsui mli akɛ Yehowa “yeee jalɛ sane”?—Hiob 35:2.

10. Mɛɛ gbɛ nɔ mɔ ko baanyɛ afee enii tamɔ Adam?

¹⁰ Wɔshwaa mɛi krokomɛi yɛ wɔtɔmɔi kɛ eshai ni wɔfee lɛ ahe. Yɛ  adesai aweku lɛ shishijee mli nɔŋŋ ni Adam shwa Nyɔŋmɔ yɛ lɛ diɛŋtsɛ etɔmɔ hewɔ. (1 Mose 3:12) Adam je gbɛ eku Nyɔŋmɔ mla lɛ mli, ni ele akɛ Nyɔŋmɔ baagbala etoi yɛ esha ni efee lɛ he moŋ, shi eshwa Yehowa. Yɛ gbɛ ko nɔ lɛ, ekɛɛ Yehowa eha lɛ yoo gbonyo. Kɛjɛ nakai beaŋ kɛbaa nɛɛ, mɛi komɛi hu eshwa Nyɔŋmɔ yɛ amɛ diɛŋtsɛ amɛtɔmɔi ahe taakɛ Adam fee lɛ. Nilee yɛ mli akɛ wɔɔbi wɔhe akɛ, ‘Bei komɛi lɛ, kɛ́ nɔ ni mikpaa gbɛ lɛ baaa mli loo mihao yɛ mi diɛŋtsɛ mitɔmɔi ahewɔ lɛ, ani no haa misusuɔ akɛ Yehowa taomɔ nii lɛ yɛ kpɛŋŋ tsɔ?’

11. Mɛni wɔbaanyɛ wɔkase kɛjɛ Yona sane lɛ mli?

¹¹ Wɔsusuɔ wɔ pɛ wɔhe. Beni Yehowa na Ninive maŋ lɛ mɔbɔ lɛ, egbá gbalɔ Yona naa waa. (Yona 4:1-3) Mɛni hewɔ? Beni hiɛkpatamɔ ni ejaje lɛ baaa mli lɛ, eeenyɛ efee akɛ, enu he akɛ ehiɛ eshwie shi. Yona kɛ ejwɛŋmɔ ma bɔ ni enuɔ he ehaa lɛ nɔ aahu akɛ, Ninivebii ni etsake amɛtsui lɛ anii efeee lɛ mɔbɔ po. Ani wɔ hu wɔbaasusu wɔ pɛ wɔhe aahu akɛ ‘wɔmli baawo Yehowa la’ yɛ naagbee lɛ ni ekɛbako lolo lɛ hewɔ? Kɛ́ wɔkɛ afii nyɔŋmai abɔ eshiɛ akɛ Yehowa gbi lɛ ebɛŋkɛ, ni mɛi komɛi ewie wɔhiɛ yɛ Biblia mli sane lɛ ni wɔjajeɔ lɛ hewɔ lɛ, ani wɔ hu wɔmli baawo Yehowa la?—2 Pet. 3:3, 4, 9.

12, 13. Mɛni esa akɛ wɔfee kɛji wɔkɛ Yehowa kpãaa gbee yɛ nɔ ko ni efee loo nɔ ko ni eŋmɛ gbɛ ni eba lɛ nakai lɛ he?

¹² Mɛni esa akɛ wɔfee kɛji wɔkɛ Yehowa kpãaa gbee yɛ nɔ ko ni efee loo nɔ ko ni eŋmɛ gbɛ ni eba lɛ nakai lɛ he? Kaimɔ akɛ nilee bɛ mli akɛ ooofee nakai. Ga Biblia hee lɛ tsɔɔ Abɛi 19:3 lɛ shishi akɛ: “Gbɔmɔ buulufeemɔ kɛ lɛ woɔ haomɔ mli, ni eshwaa Yehowa moŋ.” Beni enɛ yɔɔ wɔjwɛŋmɔŋ lɛ, nyɛhaa wɔsusua otii enumɔ komɛi ni baaye abua wɔ koni kɛ́ wɔhao lɛ wɔkashwa Yehowa lɛ ahe wɔkwɛa.

¹³ Kaatsi ohe kɛmiijɛ Yehowa he. Akɛni wɔyeee emuu lɛ hewɔ lɛ, kɛ́ wɔhiɛ wekukpaa ni kã wɔ kɛ Yehowa teŋ lɛ mli  kpɛŋŋ lɛ, wɔmli woŋ lɛ la. (Nyɛkanea Abɛi 3:5, 6.) Esa akɛ wɔkɛ wɔhe afɔ̃ Yehowa nɔ kwraa. Esaaa akɛ wɔbuɔ wɔhe jalɔ tuutu loo wɔfoɔ wɔ pɛ wɔnɔ mli. (Abɛi 3:7; Jaj. 7:16) Kɛ́ wɔfee nakai lɛ, ebaawa akɛ wɔɔshwa Yehowa kɛ́ wɔkɛ shihilɛ gbonyo ko kpe.

14, 15. Mɛni baaye abua wɔ koni susumɔi ni ejaaa ni mɛi krokomɛi hiɛ lɛ akana wɔnɔ hewalɛ?

¹⁴ Kaaha wiemɔi ni jeɔ mɔ nijiaŋ wui ná onɔ hewalɛ. Israelbii ni hi shi yɛ Mose beaŋ lɛ yɛ yiŋtoo babaoo ni amɛaadamɔ nɔ amɛhe amɛye akɛ Yehowa kɛ amɛ baayashɛ Shiwoo Shikpɔŋ lɛ nɔ shweshweeshwe. (Lala 78:43-53) Shi beni shikpálɔi nyɔŋma ni yeee anɔkwa lɛ kɛ amaniɛbɔɔ fɔŋ ba lɛ, “amɛkaiii enine lɛ,” ni tsɔɔ akɛ, amɛkaiii nɔ ni Yehowa efee eha amɛ lɛ. (Lala 78:42) Kɛ́ wɔjwɛŋ nibii kpakpai fɛɛ ni Yehowa efee eha wɔ lɛ anɔ lɛ, ebaaha wekukpaa ni yɔɔ wɔ kɛ lɛ teŋ lɛ mli awa. Kɛ́ ebalɛ nakai lɛ, wɔhaŋ susumɔi ni ejaaa ni mɛi krokomɛi hiɛ lɛ afite wɔ kɛ Yehowa teŋ.—Lala 77:12, 13.

¹⁵ Ni kɛ́ wɔná wɔnyɛmimɛi héyelilɔi lɛ ateŋ mɔ ko he jwɛŋmɔ gbonyo hu? No lɛ, ebaasa wɔ kɛ Yehowa teŋ wekukpaa lɛ he. (1 Yoh. 4:20) Beni Israelbii lɛ wie huhuuhu yɛ hegbɛ ni akɛha Aaron lɛ he lɛ, Yehowa ŋɔ lɛ akɛ lɛ amɛwieɔ amɛshiɔ lɛ. (4 Mose 17:25) Nakai nɔŋŋ kɛ́ wɔ hu wɔwie mɛi ni Yehowa kɛ amɛ tsuɔ nii kɛnyiɛɔ egbɛjianɔtoo lɛ fã ni yɔɔ shikpɔŋ lɛ nɔ lɛ hiɛ lɛ ahe huhuuhu lɛ, no baatsɔɔ akɛ wɔmiiwie wɔmiishi Yehowa.—Heb. 13:7, 17.

16, 17. Kɛ́ wɔkɛ naagbai miikpe lɛ, mɛni esa akɛ wɔkai?

¹⁶ Kaimɔ akɛ jeee Yehowa ji mɔ ni haa wɔkɛ naagbai kpeɔ. Eyɛ mli akɛ Israelbii ni hi shi yɛ Yesaia beaŋ lɛ fite amɛ kɛ Yehowa teŋ moŋ, shi Yehowa bɔ mɔdɛŋ akɛ eeesaa ekɛ amɛ teŋ ekoŋŋ. (Yes. 1:16-19) Ekɔɔɔ he eko naagba ni wɔkɛbaakpe lɛ, le ni wɔle akɛ Yehowa jwɛŋɔ wɔhe, ni eesumɔ ni eye ebua wɔ lɛ baanyɛ ashɛje wɔmii. (1 Pet. 5:7) Yɛ anɔkwale mli lɛ, ewo shi akɛ ebaaha wɔ nyɛmɔ ni he hiaa wɔ lɛ koni wɔnyɛ wɔkpee shihilɛ lɛ naa.—1 Kor. 10:13.

¹⁷ Kɛ́ aaye wɔ sane fɔŋ ko—taakɛ ebalɛ yɛ nuu anɔkwafo Hiob gbɛfaŋ—lɛ, esa akɛ wɔkai akɛ jeee Yehowa ji mɔ ni yeɔ wɔ nakai sane fɔŋ lɛ. Yehowa nyɛɔ jalɛ sane ni ayeee; esumɔɔ jalɛsaneyeli. (Lala 33:5) Taakɛ Hiob naanyo Elihu fee lɛ, eba akɛ wɔ hu wɔbaakɛɛ akɛ: “Enɛ akagbale Mawu akɛ eeefee nɔ̃ fɔŋ, kɛ Ofe lɛ hu akɛ eeefee nɔ ko ní ejaaa gbɛ.” (Hiob 34:10) Yehowa kɛ naagbai baaa wɔnɔ, moŋ lɛ, ekɛ “duromɔ nii kpakpai fɛɛ kɛ nikeenii ni hi kɛwula shi” haa wɔ.—Yak. 1:13, 17.

18, 19. Mɛni hewɔ esaaa ni wɔyiŋ feɔ wɔ kɔshikɔshi yɛ Yehowa he lɛ? Okɛ enɛ he nɔkwɛmɔnɔ aha.

¹⁸ Kaaha oyiŋ miifee bo kɔshikɔshi yɛ Yehowa he. Nyɔŋmɔ hi kɛwula shi, ni ejwɛŋmɔi lɛ kwɔ fe wɔnɔ lɛ. (Yes. 55:8, 9) No hewɔ lɛ, kɛ́ wɔbaa wɔhe shi ni wɔle he ni wɔnyɛmɔi yawaa lɛ, wɔbaana akɛ jeee nɔ fɛɛ nɔ wɔbaanu shishi. (Rom. 9:20) Jeee be fɛɛ be wɔbaale anɔkwalei fɛɛ ni kɔɔ sane ko he. Ŋwanejee ko bɛ he akɛ, ona bɔ ni abɛ nɛɛ ji anɔkwale ha akɛ: “Mɔ klɛŋklɛŋ ní jajeɔ esane lɛ, efeɔ tamɔ nɔ ni lɛ esane ja; shi kɛ́ mɔ ni ekɛna lɛ ba ni ebabɔi lɛ sanebimɔ lɛ, no dani akpaa lɛ shi.”—Abɛi 18:17, Ga Biblia hee.

¹⁹ Kɛ́ wɔnaanyo ko ni wɔheɔ lɛ wɔyeɔ waa lɛ fee nɔ ko ni shishijee mli lɛ wɔnuuu shishi loo wɔsusu akɛ esaaa lɛ, ani wɔbaaye wɔhe oyai kɛmu sane naa akɛ eye sane fɔŋ? Aloo wɔbaato wɔtsui shi kɛtao anɔkwale ni yɔɔ sane lɛ mli, titri lɛ kɛ́ wɔkɛ nakai mɔ lɛ ebɔ  afii babaoo? Kɛ́ wɔkɛ wɔnanemɛi ni yeee emuu lɛ yeɔ yɛ suɔmɔ mli yɛ gbɛ ni tamɔ nɛkɛ nɔ lɛ, enyiɛ nɔŋŋ esaaa ni wɔheɔ wɔŋwɛi Tsɛ lɛ, mɔ ni jwɛŋmɔ kɛ egbɛi kwɔ fe wɔnɔ lɛ wɔyeɔ!

20, 21. Mɛni hewɔ kɛ́ wɔkɛ naagbai kpe lɛ esa akɛ wɔshwa mɔ ni sa shwamɔ lɛ?

²⁰ Shwa mɔ ni sa shwamɔ lɛ. Mɛni hewɔ esa akɛ wɔfee nakai lɛ? Ejaakɛ wɔnaagbai lɛ ekomɛi baanyɛ ajɛ wɔ. Kɛ́ nakai ni lɛ, esa akɛ wɔkpɛlɛ nɔ. (Gal. 6:7) Kaashwa Yehowa yɛ naagbai lɛ ahe. Mɛni hewɔ nilee bɛ mli akɛ ooofee nakai lɛ? Susumɔ nɔkwɛmɔnɔ nɛɛ he okwɛ: Ekolɛ tsɔne ko nyɛɔ ejoɔ foi waa. Ŋɔɔ lɛ akɛ mɔ ko ni hiɛ tsɔne nɛɛ wo foi fe bɔ ni akpaa gbɛ beni enyiɛ gbɛ ko ni edɔ kɔntɔ̃ lɛ nɔ, kɛkɛ ni ená oshara. Ani esa akɛ ashwa mɔ ni fee tsɔne lɛ yɛ oshara nɛɛ he? Dabi kwraa! Nakai nɔŋŋ hu Yehowa eha wɔ fɛɛ heyeli. Shi ekɛ gbɛtsɔɔmɔi ni baaye abua wɔ ni wɔkpɛ wɔyiŋ yɛ nilee mli hu eha wɔ. No hewɔ lɛ, mɛni hewɔ esa akɛ wɔshwa wɔ-Bɔlɔ lɛ yɛ wɔ diɛŋtsɛ wɔtɔmɔi ahewɔ?

²¹ Jeee naagbai ni wɔkɛkpeɔ lɛ fɛɛ jɛ wɔ, akɛni wɔtɔ̃ tɔmɔi komɛi lɛ hewɔ. Nibii komɛi baa yɛ “be kɛ nibii ni aleee ni baa trukaa” lɛ hewɔ. (Jaj. 9:11, NW) Ni agbɛnɛ hu, esaaa ni wɔhiɛ kpaa anɔkwa sane nɛɛ nɔ akɛ, Satan Abonsam ji mɔ titri ni hɔ efɔŋfeemɔ sɛɛ. (1 Yoh. 5:19; Kpoj. 12:9) Lɛ ji henyɛlɔ lɛ—jeee Yehowa!—1 Pet. 5:8.

22, 23. Kɛ́ naagbai ni wɔkɛkpeɔ lɛ ha wɔnijiaŋ je wui lɛ, mɛni esa akɛ wɔkai?

²² Kɛ́ okɛ jaramɔ shihilɛi kɛ naagbai miikpe lɛ, kaimɔ Yoshua kɛ Kaleb nɔkwɛmɔnɔ lɛ. Akɛ mɛi ni tamɔɔɔ shikpálɔi nyɔŋma ni yeee anɔkwa lɛ, hii anɔkwafoi enyɔ nɛɛ kɛ wiemɔ kpakpa ba. (4 Mose 14:6-9) Amɛtsɔɔ akɛ amɛheɔ Yehowa amɛyeɔ. Fɛɛ sɛɛ lɛ, amɛkɛ Israelbii krokomɛi lɛ fɛɛ tsomlo yɛ ŋa lɛ nɔ afii 40. Ani Yoshua kɛ Kaleb wie amɛshi Nyɔŋmɔ loo amɛmli wo lɛ la, ni amɛnu he akɛ akɛ amɛ yeee jogbaŋŋ? Dabi. Amɛkɛ amɛhe fɔ̃ Yehowa nɔ. Ani ajɔɔ amɛ? Hɛɛ, ajɔɔ amɛ! Eyɛ mli akɛ hii enyɔ nɛɛ ayinɔbii lɛ fɛɛ gboi yɛ ŋa lɛ nɔ moŋ, shi amɛ lɛ, amɛyashɛ Shiwoo Shikpɔŋ lɛ nɔ. (4 Mose 14:30) Nakai nɔŋŋ kɛ́ wɔ hu “wɔnijiaŋ ejeee wui” yɛ Yehowa suɔmɔnaa nii ni wɔfeɔ lɛ mli lɛ, ebaajɔɔ wɔ.—Gal. 6:9; Heb. 6:10.

²³ Kɛ́ naagbai ni okɛkpeɔ, mɛi krokomɛi atɔmɔi, loo bo diɛŋtsɛ otɔmɔi eha onijiaŋ eje wui lɛ, mɛni esa akɛ ofee? Okɛ ojwɛŋmɔ ama Yehowa sui ni nɔ bɛ lɛ anɔ. Feemɔ nibii ni Yehowa ewo he shi lɛ ahe mfoniri yɛ ojwɛŋmɔŋ. Bi ohe akɛ, ‘Kɛ́ jeee Yehowa kulɛ, benɛ nɛgbɛ miyɔɔ?’ Hii emasɛi daa, ni kaaha otsui miiwo lɛ la kɔkɔɔkɔ!