Yehowa ‘Tereɔ Mijatsu lɛ Ehaa Mi Daa Nɛɛ’
Yɛ hela ko ni naa wa ni yeɔ mi lɛ fɛɛ sɛɛ lɛ, be fɛɛ be lɛ minuɔ he akɛ wɔŋwɛi Tsɛ ni yɔɔ suɔmɔ lɛ yeɔ ebuaa mi yɛ mishihilɛ mli. Ni nɔ ni fe afii 20 ni eho nɛ lɛ, mikɛ miishɛɛ esɔmɔ Yehowa akɛ daa gbɛgbalɔ.
Yɛ afi 1956 lɛ, afɔ mi kɛ hela ko (spina bifida) ni haa gbɛ bakãa mɔ mliteŋ wu lɛ mli. Hela nɛɛ haaa manyɛ manyiɛ jogbaŋŋ, ni eha miná helai krokomɛi hu.
Dani abaafɔ mi lɛ, maŋsɛɛ sɔɔlɔi komɛi ni ji Yehowa Odasefoi lɛ kɛ mifɔlɔi bɔi Biblia lɛ kasemɔ. Beni miji gbekɛ lɛ, shiɛlɔi fioo pɛ yɔɔ mimaŋ Usakos, yɛ Namibia, shi shiɛlɔi nɛɛ bɛ akutso kome mli; amɛyɛ akutsei ni etse amɛhe banee amli yɛ maŋ lɛ mli. Akɛni asafo ko bɛ jɛi yɛ nakai beaŋ hewɔ lɛ, wɔweku lɛ kaseɔ nibii ni atsɔɔ akɛ akase yɛ asafoŋ kpeei ashishi lɛ yɛ shĩa. Beni miná afii kpawo lɛ, afee mi opireshɛŋ ko bɔni afee ni manyɛ mashamɔ kɛtsɔ he kroko. Beni miye afii 14 lɛ, miná gbiligbili. Akɛni sɛkɛndre skul ni miyaa lɛ kɛ wɔshĩa lɛ jɛkɛ waa, ni ehe miihia ni mifɔlɔi akwɛ mi be fɛɛ be hewɔ lɛ, minyɛɛɛ magbe skul lɛ naa.
Fɛɛ sɛɛ lɛ, mibɔ mɔdɛŋ akɛ mawaje wekukpaa ni kã mi kɛ Yehowa teŋ lɛ. No mli lɛ, asafo lɛ woji lɛ babaoo bɛ mimaŋ wiemɔ ni ji Afrikaans lɛ mli. No hewɔ lɛ, mikase Blɔfo kanemɔ bɔni afee ni manyɛ makane asafo lɛ woji lɛ babaoo. Mibatsɔ Maŋtsɛyeli shiɛlɔ, ni abaptisi mi beni miye afii 19. Yɛ afii ejwɛ ni nyiɛ sɛɛ lɛ amli lɛ, helai srɔtoi babaoo mɔmɔ mi. Kɛfata he lɛ, akɛni wɔ fɛɛ wɔle wɔhe yɛ maŋ lɛŋ hewɔ lɛ, gbɔmɔ shemɔ haaa manyɛ mashiɛ kɛ ekãa.
Beni miye aaafee afii 22 lɛ, wɔshi Namibia kɛtee South Africa, ni jɛmɛ ji he ni mitee asafoŋ kpeei yɛ klɛŋklɛŋ kwraa. Enɛ ha mimii shɛ mihe waa! Shi etsɛɛɛ ni ayafee mi opireshɛŋ ekoŋŋ
Be ko sɛɛ lɛ, kpokpaa nɔkwɛlɔ ko ha wiemɔ ko ni kɔɔ gbɛgbamɔ nitsumɔ lɛ he. Ewiemɔ lɛ ta mitsuiŋ waa. Mile akɛ mibɛ gbɔmɔtsoŋ hewalɛ tsɔ moŋ, shi mile hu akɛ Yehowa eye ebua mi kɛtsɔmɔ naagbai babaoo amli. No hewɔ lɛ, miŋmala gbɛbimɔ wolo kɛha gbɛgbamɔ nitsumɔ lɛ nɔ nii. Shi mihelai lɛ ahewɔ lɛ, asafoŋ onukpai lɛ ekpɛlɛɛɛ nɔ.
Fɛɛ sɛɛ lɛ, mikɛ minyɛmɔ fɛɛ wo Maŋtsɛyeli shiɛmɔ nitsumɔ lɛ mli. Minyɛ Awo kɛ mɛi krokomɛi ye amɛbua mi ni minyɛ mikɛ ŋmɛlɛtswai ni ataoɔ yɛ gbɛgbalɔi adɛŋ lɛ shiɛ yɛ nyɔji ekpaa mli. Enɛ ha ana akɛ mitswa mifai shi lɛɛlɛŋ akɛ matsɔ daa gbɛgbalɔ, ni akɛ, mihelai lɛ nyɛŋ atsĩ minaa. Miŋmala gbɛbimɔ wolo kɛha gbɛgbamɔ nitsumɔ lɛ nɔ nii ekoŋŋ, ni akpɛlɛ nɔ. Mibatsɔ daa gbɛgbalɔ yɛ September 1, 1988.
Yehowa etee nɔ eye ebua mi akɛ daa gbɛgbalɔ. Anɔkwale lɛ ni mitsɔɔ mɛi moŋ fe ni mikɛ mijwɛŋmɔ aaama minaagbai lɛ anɔ lɛ ebu mihe ni ewaje wekukpaa ni kã mi kɛ Yehowa teŋ lɛ. Eŋɔɔ minaa waa akɛ miye mibua mɛi ni amɛjɔɔ amɛhe nɔ amɛha Yehowa ni abaptisi amɛ.
Eyɛ mli akɛ mikɛ gbɔmɔtsoŋ hewalɛnamɔ he naagbai miikpe lolo moŋ, shi Yehowa ‘tereɔ mijatsu lɛ ehaa mi daa nɛɛ.’ (Lala 68:20) Yɛ naagbai ni mikɛkpeɔ ni eyeɔ ebuaa mi koni mikpee naa lɛ sɛɛ lɛ, ehaa mináa miishɛɛ hu yɛ shihilɛ mli!
