Ani okane Buu-Mɔɔ srɔtoi ni ba nyɛsɛɛ nɛɛ jogbaŋŋ? Kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

Mɛɛ be Yesu ‘yashiɛ etsɔɔ mumɔi ni awo amɛ tsuŋ lɛ’? (1 Pet. 3:19)

Eeenyɛ efee akɛ Yesu tee eyajaje toigbalamɔ ni sa ni akɛbaaba mumɔi fɔji nɛɛ anɔ lɛ etsɔɔ amɛ yɛ eshitee lɛ sɛɛ.—6/15, baafa 23.

Mɛɛ naagbai etɛ haa ewaa akɛ gbalashihilɛ ni ji enyɔ nɔ lɛ aaaye omanye?

Nomɛi ji: mɔdɛŋ ni obɔɔ koni otsutsu gbãla lɛ akagba gbalashihilɛ ni obote mli amrɔ nɛɛ naa; ni okɛ onanemɛi ni okɛ amɛ ebɔ be kplaŋŋ shi amɛleko ohefatalɔ hee lɛ jogbaŋŋ lɛ aaashara; mɔdɛŋ ni obɔɔ koni oná hekɛnɔfɔɔ yɛ ohefatalɔ hee lɛ mli yɛ anɔkwa ni klɛŋklɛŋ mɔ lɛ eyayeee lɛ fɛɛ sɛɛ.—7/1, baafa 9-10.

Mɛɛ be Yesu baakojo mɛi akɛ gwaŋtɛŋi loo abotiai lɛ? (Mat. 25:32)

Yesu baakojo mɛi kɛ́ eba yɛ amanehulu kpeteŋkpele lɛ mli, beni akpata apasa jamɔ hiɛ lɛ.—7/15, baafa 6.

Mɛɛ be mlatɔlɔi ni atsĩ amɛtã yɛ abɛbua ni kɔɔ ŋmaa lɛ kɛ jwɛi lɛ he lɛ mli lɛ baafó ni amɛkpe amɛnyanyɔji ashishi lɛ? (Mat. 13:36, 41, 42)

Amɛbaafee nakai yɛ amanehulu kpeteŋkpele lɛ mli kɛ́ amɛna akɛ amɛnyɛɛɛ amɛjo hiɛkpatamɔ ni baa lɛ naa foi.—7/15, baafa 13.

Mɛɛ be Yesu wiemɔi ni kɔɔ nyɔŋ anɔkwafo kɛ hiɛshikalɔ lɛ he lɛ ba mli? (Mat. 24:45-47)

Amɛbaaa mli yɛ afi 33 Ŋ.B., shi moŋ amɛbɔi mli baa yɛ afi 1914 lɛ sɛɛ. Yɛ afi 1919 lɛ, aŋɔ nyɔŋ lɛ ato Nuŋtsɔ lɛ webii, ni ji Kristofoi fɛɛ ni akɛ mumɔŋ niyenii lɛɔ amɛ lɛ anɔ.—7/15, baafa 21-23.

Mɛɛ be Yesu baaŋɔ nyɔŋ anɔkwafo lɛ eto enii fɛɛ kwa nɔ lɛ?

No baaba nɔ wɔsɛɛ yɛ amanehulu kpeteŋkpele lɛ mli, beni nyɔŋ anɔkwafo lɛ etee ŋwɛi lɛ.—7/15, baafa 25.

Ani mɛi ni awie amɛhe yɛ Biblia lɛ mli shi atsĩii amɛgbɛ́i atã lɛ ji gbɔmɛi gbohii loo mɛi ni he ehiaaa?

Esaaa akɛ wɔmuɔ sane naa nakai. Jeee mɛi ni ehiii pɛ agbɛ́i ata atsĩii yɛ Biblia mli, shi mɛi komɛi hu yɛ ni amɛfee nibii kpakpai ni atsĩii amɛtã. (Rut 4:1-3; Mat. 26:18) Ŋwɛibɔfoi anɔkwafoi enyɔ pɛ atsĩ amɛgbɛ́i atã.—8/1, baafa 10.

Yɛ hewalɛ ni jɛ Nyɔŋmɔ ŋɔɔ lɛ sɛɛ lɛ, mɛni ye ebua Odasefoi 230 ni amɛnyɛ amɛnyiɛ gbɛ kakadaŋŋ kɛjɛ Sachsenhausen nsara lɛ mli lɛ?

Yɛ hɔmɔ kɛ hela eha amɛgbɔjɔ lɛ fɛɛ sɛɛ lɛ, amɛtee nɔ amɛwowoo amɛhe hewalɛ koni amɛya nɔ amɛnyiɛ.—8/15, baafa 18.

Mɛni hewɔ amaniɛbɔɔ ni kɔɔ Israelbii lɛ ni miifo Yordan Faa lɛ kɛya shiwoo shikpɔŋ lɛ nɔ lɛ he lɛ woɔ wɔ hewalɛ waa lɛ?

Eyɛ mli akɛ faa lɛ eyi ni eje ŋa moŋ, shi Yehowa ha faa lɛ wa damɔ shi koni ewebii lɛ afo. Enɛ ha hemɔkɛyeli kɛ hekɛnɔfɔɔ ni Israelbii lɛ yɔɔ yɛ emli lɛ mli bawa waa, ni nakai nɔŋŋ ebaanyɛ ewo wɔ hu hewalɛ.—9/15, baafa 16.

Mɛni bɔ ni Biblia lɛ wieɔ kɔla he babaoo lɛ haa wɔnaa?

Bɔ ni Biblia lɛ kɛ kɔla tsuɔ nii lɛ haa wɔnaa akɛ Nyɔŋmɔ nuɔ bɔ ni adesai feɔ amɛnii amɛhaa yɛ kɔla he lɛ shishi, ni etsɔɔ akɛ kɔla baanyɛ aye abua wɔ ni wɔkai nibii.—10/1, baafa 14-15.

Mɛɛ gbɛ nɔ gbalɛ ni yɔɔ Mika 5:5 ni kɔɔ lumɛi kɛ nɔkwɛlɔi ahe lɛ baa mli ŋmɛnɛ?

Wɔná wɔle akɛ, ‘nɔkwɛlɔi kpawo kɛ lumɛi kpaanyɔ’ ni atsĩ amɛtã yɛ Mika 5:5 lɛ kɔɔ asafoŋ onukpai ni wajeɔ Nyɔŋmɔ webii lɛ kɛha tutuamɔ ni akɛbaaba amɛnɔ wɔsɛɛ lɛ ahe.—11/15, baafa 20.

Mɛɛ yiŋtoi komɛi ahewɔ Nyɔŋmɔ he hiaa wɔ?

Esa akɛ wɔná gbɛtsɔɔmɔ kpakpa kɛ shihilɛ mli naagbai lɛ anaa tsabaa, ni Nyɔŋmɔ ji mɔ ni kɛ enɛɛmɛi fɛɛ haa. Eyeɔ ebuaa wɔ koni wɔná shihilɛ kpakpa ni wɔná miishɛɛ hu, ni ebaaye eshiwoi ni yɔɔ e-Wiemɔ lɛ mli lɛ anɔ koni wɔnine ashɛ enɛɛmɛi fɛɛ nɔ.—12/1, baafa 4-6.