YƐ AFI 1800 afii lɛ amli be ni mɛi bɔi shika tsuru tsaa yɛ California yɛ U.S.A. lɛ, kɛ́ shitsalɔ ko nine shɛ shika tsuru lɛ eko nɔ lɛ, eboɔ akɛ: “Eureka!” Wiemɔ nɛɛ shishi ji, “Mina!” Shi no mli lɛ, Charles Taze Russell kɛ enanemɛi Biblia Kaselɔi lɛ ena nɔ ko ni jara wa kwraa fe shika tsuru, no ji Biblia mli anɔkwale lɛ. Ni amɛshwe waa akɛ amɛbaahã mɛi krokomɛi ale anɔkwale nɛɛ.

Be ni shɛɔ afi 1914 lɛ, mɛi akpekpei abɔ ni yɔɔ maŋtiasei wuji amli lɛ ekwɛ ““Photo-Drama of Creation” sini ní International Bible Students Association (I.B.S.A.) lɛ fee, ní heɔ ŋmɛlɛtswai kpaanyɔ lɛ. Mfonirii ni akɛ kɔlai etɛŋ ni yɔɔ fɛo yɛ sini nɛɛ mli, ni akɛ saŋku lalai ni ŋɔɔŋɔi ewo mli, ni mɔ ko gbaa nibii ni yaa nɔ lɛ. Sini ni damɔ Biblia lɛ nɔ nɛɛ gbaa nibii ni etee nɔ kɛjɛ adebɔɔ shishijee mli kɛ nibii fɛɛ ni baaya nɔ kɛyashi Yesu Kristo Afii Akpe Nɔyeli lɛ baaba naagbee.—Kpoj. 20:4. *

Shi mɛi ni yɔɔ akrowai kɛ maji bibii amli lɛ hu? Yɛ amɛhewɔ lɛ, yɛ August 1914 lɛ, I.B.S.A. lɛ fee “Photo-Drama” sini lɛ henɔ ko ni anyɛɔ akɛyaa he fɛɛ he, ni atsɛ lɛ akɛ “Eureka Drama.” Afee lɛ srɔtoi etɛ, ni eko fɛɛ eko yɛ wiemɔi srɔtoi amli. Yɛ klɛŋklɛŋ nɔ ni atsɛ lɛ akɛ “Eureka X” lɛ mli lɛ, anuɔ saŋku lalai lɛ kɛ mɔ ni gbaa nibii ni yaa nɔ lɛ gbee pɛ, shi sini fataaa he. Yɛ nɔ ni ji enyɔ ni atsɛ lɛ akɛ “Eureka Y” lɛ mli lɛ, anuɔ rikɔdiŋ lɛ fɛɛ yɛ mli, ni mfonirii ni atɛŋ lɛ fɛfɛo ní eko nyiɛ eko sɛɛ hu yɛ mli. Yɛ nɔ ni ji etɛ ni atsɛ lɛ akɛ “Eureka Family Drama,” ní abaanyɛ abo toi yɛ shĩa lɛ mli lɛ, anuɔ mɔ ni gbaa nibii ni yaa nɔ lɛ gbee yɛ hei komɛi, ni lalai hu yɛ mli. Ni asafo lɛ hɔɔ gramafon plɛtei kɛ nibii krokomɛi ni akɛjieɔ sini lɛ kɛ jara ni waaa.

Biblia Kaselɔi lɛ nyɛɔ amɛkɛ sini lɛ henɔ ni afee nɛɛ yaa akrowai amli ní ehe ehiaaa ni amɛtao nibii wujiwuji ni akɛjieɔ sini, ni enɛ hãa amɛnyɛɔ amɛshiɛɔ Maŋtsɛyeli lɛ he sane kpakpa lɛ yɛ hei po ni anuko anɔkwale lɛ he yɛ. Abaanyɛ atswa “Eureka X” lɛ leebi, shwane, loo gbɛkɛ. Yɛ hei ni sarawa hewalɛ bɛ lɛ, abaanyɛ akɛ kanei ni akɛ carbide suɔ lɛ ajie “Eureka Y” lɛ. Abɔ amaniɛ yɛ Finnish Buu-Mɔɔ lɛ mli akɛ: “Wɔnyɛɔ wɔjieɔ mfonirii nɛɛ yɛ he fɛɛ he.” Nakai pɛpɛɛpɛ eji!

Yɛ nɔ najiaŋ ni Biblia Kaselɔi lɛ baayahai shwɛmɔhei wuji ni ayakwɛ “Eureka Drama” lɛ yɛ jɛi lɛ, amɛtaoɔ hei ni aheŋ amɛ shika ko, tamɔ skul tsũi amli, saneyelihei, hei ni awoɔ oketekei yɛ, kɛ mɛi ashĩai amli.  Bei pii lɛ, ajieɔ drama lɛ yɛ agbó naa, ni akɛ mama yɛŋ haa tsũ ko he koni akwɛ yɛ nɔ. Nyɛmi nuu ko ni atsɛɔ lɛ Anthony Hambuch lɛ wie akɛ: “Okwaafoi kalaa sɛi yɛ amɛŋmɔji amli ni mɛi taraa nɔ kɛ́ nifeemɔ lɛ miiya nɔ.” Anthony Hambuch kuu lɛ yɛ shwiili ko ni amɛkɛ tsɔji ni akɛjieɔ drama lɛ, amɛbaagii, nibii ni akɛhoɔ nii, kɛ nibii krokomɛi fɛɛ woɔ mli.

Bei komɛi lɛ, mɛi fioo pɛ yaa nifeemɔ lɛ shishi, shi bei komɛi hu lɛ, mɛi babaoo yaa. Yɛ United States lɛ, be ni ajie drama lɛ yɛ maŋ ko kɛ emli bii 150 mli yɛ skul ko mli lɛ, mɛi 400 sɔŋŋ tee shishi. Yɛ he kroko hu lɛ, mɛi komɛi nyiɛɔ kilomitai 8 kɛyakwɛɔ “Eureka Drama” lɛ. Yɛ Sweden lɛ, nyɛmi yoo ko ni atsɛɔ lɛ Charlotte Ahlberg lɛ akutsoŋbii lɛ bua amɛhe naa yɛ eshĩa bibioo lɛ mli, ni amɛbo rikɔdiŋ lɛ toi, ni nɔ ni amɛnu lɛ “ta amɛtsuiŋ waa.” Be ni ajie drama lɛ yɛ he ko ni atsaa shika tsuru yɛ, yɛ Australia lɛ, mɛi aaafee 1,500 tee amɛyakwɛ. Buu-Mɔɔ lɛ bɔ amaniɛ akɛ, yɛ sɛkɛndre skul srɔtoi kɛ kɔlejii amli lɛ, “tsɔɔlɔi lɛ kɛ skulbii lɛ anaa kpɛ amɛhe waa yɛ bɔ ni asha mfonirii lɛ, kɛ bɔ ni gramafon plɛtei lɛ yɔɔ hã lɛ he.” Yɛ hei po ni ajieɔ sini yɛ lɛ, “Eureka Drama” lɛ he gbɛ́i yɛ jɛi waa.

Be ni Biblia Kaselɔi asafoi lɛ tsu wielɔi koni amɛyahã wiemɔ yɛ hei srɔtoi, ní amɛto Biblia kasemɔ kui ashishi lɛ, amɛkɛ “Eureka Drama” lɛ tsu nii waa. Anyɛŋ atsɔɔ mɛi abɔ ni kwɛ “Eureka Drama” lɛ. Akɛ “Eureka Drama” lɛ henɔi srɔtoi lɛ ekomɛi tsu nii waa. Kɛ̃lɛ, yɛ afi 1915 lɛ, yɛ kui 86 ni yajieɔ “Eureka Drama” lɛ amɛtsɔɔ mɛi lɛ mli lɛ, amɛteŋ 14 pɛ babuɔ amɛnitsumɔ lɛ he akɔntaa daa. Be ni abɔɔ amaniɛ yɛ bɔ ni nitsumɔ lɛ tee nɔ ehã yɛ afi 1915 mli lɛ he, ni atsɔɔ bɔ ni nine nyɛɛɛ ashɛ mɛi ayibɔ ni kwɛɔ “Eureka Drama” lɛ nɔ lɛ, awie akɛ mɛi ni fa fe akpekpe kome ekwɛ “Eureka Drama” lɛ. Mɛi aaafee 30,000 bi ni ahã amɛ Biblia kasemɔ woji.

Ekolɛ mɛi babaoo kaiŋ “Eureka Drama” lɛ dɔŋŋ moŋ, shi kɛjɛ Australia kɛyashi Argentina, South Africa kɛyashi British Ŋshɔkpɔi lɛ anɔ, India kɛ Caribbean Ŋshɔkpɔi lɛ anɔ fɛɛ lɛ, eeenyɛ efee akɛ mɛi akpekpei abɔ kwɛ drama ni yɔɔ fɛo nɛɛ. Ni amɛteŋ mɛi babaoo na Biblia mli anɔkwale ni jara wa fe shika tsuru lɛ, no hewɔ lɛ, amɛ hu amɛbaanyɛ amɛbo akɛ, “Eureka!”