1. Mɛni Katolikbii kɛ Protɛstantbii ahiɛnyiɛlɔi lɛ feɔ kɛ́ aawu ta?

ANI Nyɔŋmɔ miisumɔ ni Kristofoi aya ta ni amɛyagbe mɛi ni jɛ maji krokomɛi anɔ? Yɛ afii 100 ni eho nɛ lɛ mli lɛ, mɛi babaoo ni tsɛɔ amɛhe Kristofoi lɛ egbegbee amɛhe yɛ ta mli. Katolikbii egbegbee Katolikbii, ni Protɛstantbii hu egbegbee Protɛstantbii. Katolikbii kɛ Protɛstantbii ahiɛnyiɛlɔi lɛ jɔɔ asraafoi kɛ amɛtawuu nibii lɛ po anɔ. Be ni awuɔ Jeŋ Ta II lɛ, gbɔmɔgbee ni yaa nɔ yɛ mɛi ni tsɛɔ amɛhe Kristofoi nɛɛ ateŋ lɛ tee nɔ shii abɔ.

2, 3. Mɛni Yehowa Odasefoi fee be ni awuɔ Jeŋ Ta II kɛ no sɛɛ? Mɛni hewɔ amɛfee nakai?

² Mɛni Yehowa Odasefoi fee be ni awuɔ Jeŋ Ta II lɛ? Amɛkɛ amɛhe wooo mli. Amɛkɛ amɛhe wooo tai kɛ basabasafeemɔi ni tee nɔ yɛ majimaji ateŋ lɛ eko eko mli. Mɛni hewɔ? Ejaakɛ amɛmiisumɔ ni amɛbo Yesu tsɔɔmɔi lɛ toi, ní amɛkase bɔ ni ejie suɔmɔ kpo etsɔɔ mɛi krokomɛi lɛ. Yesu wie akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yoh. 13:35) Agbɛnɛ hu, Odasefoi lɛ kɛ shishitoo mlai ni yɔɔ nɔ ni Paulo kɛɛ Korintobii lɛ mli lɛ tsu nii.—Nyɛkanea 2 Korintobii 10:3, 4.

³ Biblia lɛ ji nɔ ni tsɔɔ anɔkwa Kristofoi nɔ ni ja kɛ nɔ ni  ejaaa, no hewɔ lɛ, amɛhenilee eŋmɛɛɛ amɛ gbɛ ní amɛya ta loo amɛkase tawuu. Akɛni Yehowa Odasefoi baa amɛjeŋ akɛ anɔkwa Kristofoi hewɔ lɛ, awa amɛteŋ mɛi akpei abɔ yi. Awo amɛteŋ onukpai kɛ gbekɛbii, hii kɛ yei tsuŋ, ahã mɛi komɛi tsu nitsumɔ dɛŋdɛŋ yɛ nsarai amli, ni agbe amɛteŋ mɛi komɛi po. Nakai eba lɛ yɛ Jeŋ Ta II lɛ mli be ni Nazibii lɛ yeɔ Germany nɔ lɛ. Yɛ Yehowa Odasefoi lɛ ayi ni awa yɛ Yuropa lɛ fɛɛ sɛɛ lɛ, amɛhiɛ kpaaa amɛnitsumɔ akɛ amɛshiɛ Yehowa Maŋtsɛyeli lɛ he sane kpakpa lɛ nɔ kɔkɔɔkɔ. Amɛtee nɔ amɛshiɛ be fɛɛ be ni hegbɛ lɛ aaaba—be ni awo amɛ tsuŋ, be ni akɛ amɛ etee nsarai amli, kɛ be ni atswa amɛnaneshi tu po. * Afii komɛi asɛɛ be ni agbegbee mɛi waa yɛ Rwanda yɛ afi 1994 koni akɛbule weku ko shishi lɛ, Odasefoi lɛ kɛ amɛhe wooo mli. Agbɛnɛ hu, amɛkɛ amɛhe wooo ta ni tee nɔ ni gbála maŋ ni tsutsu lɛ atsɛɔ lɛ Yugoslavia lɛ mli lɛ mli.

4. Kɛ́ mɛi na akɛ Yehowa Odasefoi kɛ amɛhe wooo tai amli lɛ, mɛni bei pii lɛ amɛwieɔ?

⁴ Akɛni Yehowa Odasefoi kɛ amɛhe wooo tai amli hewɔ lɛ, yɛ jeŋ fɛɛ lɛ mɛi babaoo wieɔ akɛ, Odasefoi lɛ sumɔɔ Nyɔŋmɔ kɛ amɛnaanyo gbɔmɔ lɛɛlɛŋ, ni amɛji anɔkwa Kristofoi. Mɛɛ nibii krokomɛi ahewɔ mɛi heɔ amɛyeɔ akɛ Yehowa Odasefoi ji anɔkwa Kristofoi lɛ?

5. Mɛɛ tsakemɔ ehe bahia ni Yesu kaselɔi lɛ afee?

⁵ Yesu hã mɛi le faŋŋ akɛ, Nyɔŋmɔ Maŋtsɛyeli lɛ he sane kpakpa lɛ ni abaashiɛ lɛ ji nitsumɔ ni he hiaa fe fɛɛ yɛ shikpɔŋ lɛ nɔ. Be ni eje esɔɔmɔ nitsumɔ lɛ shishi sɛɛ etsɛɛɛ lɛ, ehala kaselɔi 12 koni amɛje nitsumɔ ni sɛɛ mli lɛ abaatsu yɛ shikpɔŋ muu lɛ fɛɛ nɔ lɛ shishi. No sɛɛ lɛ, Yesu tsɔse kaselɔi 70 krokomɛi hu. (Luka 6:13; 10:1) Etsɔse mɛi nɛɛ koni amɛshiɛ sane kpakpa lɛ amɛhã Yudafoi lɛ tsutsu, shi sɛɛ mli lɛ, ekɛɛ amɛ ni amɛshiɛ amɛhã jeŋmaji lɛ hu. Kɛhã ekaselɔi ni ji Yudafoi lɛ, shiɛmɔ ni amɛaashiɛ amɛhã mɛi ni jeee Yudafoi lɛ bafee tsakemɔ wulu diɛŋtsɛ!—Bɔf. 1:8.

6. Mɛni hã Petro yɔse faŋŋ akɛ Nyɔŋmɔ ebuuu maŋ ko akɛ efe maŋ kroko?

⁶ Klɛŋklɛŋ jeŋmajiaŋnyo ni afoko lɛ ketia ni batsɔ Kristofonyo ji Kornelio. Yehowa tsu bɔfo Petro koni eya Kornelio shĩa lɛ ní eyashiɛ ehã lɛ. Petro yɔse faŋŋ akɛ Nyɔŋmɔ ebuuu maŋ ko akɛ efe maŋ kroko. Yehowa miisumɔ ni jeŋmajiaŋbii lɛ hu anine ashɛ anɔkwale lɛ nɔ. No hewɔ lɛ, Petro hã abaptisi Kornelio kɛ eweku lɛ. (Bɔf. 10:9-48) Kɛjɛ nakai gbi lɛ nɔ kɛyaa lɛ, Petro kɛ Yesu kaselɔi krokomɛi lɛ shiɛ amɛhã jeŋmajiaŋbii lɛ.

7, 8. Mɛni Yehowa Odasefoi feɔ koni mɛi anine ashɛ sane kpakpa lɛ nɔ? (Kwɛmɔ mfoniri ni yɔɔ nikasemɔ lɛ shishijee lɛ.)

⁷ Yɛ wɔgbii nɛɛ amli hu lɛ, mɛi ni kwɛɔ Yehowa Odasefoi lɛ anitsumɔ lɛ nɔ lɛ toɔ gbɛjianɔ koni ashiɛ sane kpakpa lɛ ni atsɔɔ mɛi anii yɛ jeŋ fɛɛ. Amrɔ nɛɛ ayɛ Yehowa Odasefoi aaafee akpekpei kpaanyɔ yɛ jeŋ fɛɛ. Amɛkɛ ekãa shiɛɔ yɛ wiemɔi ni fa fe 600 mli, ni wiemɔi abɔ ni ashiɛɔ yɛ mli lɛ miiya nɔ eefa. Amɛshiɛɔ yɛ shĩa fɛɛ shĩa kɛ gbɛjegbɛi ahe. Bei komɛi lɛ, amɛtoɔ woji ni yɔɔ wiemɔ srɔtoi amli amɛshwieɔ okpɔlɔi kɛ shwiilii anɔ kɛyeɔ odase. Ewaaa akɛ mɛi aaayɔse Yehowa Odasefoi, ejaakɛ amɛ pɛ amɛtsɔɔ gbɛi nɛɛ anɔ amɛshiɛɔ.

⁸ Yehowa gbɛjianɔtoo lɛ etsɔse nyɛmimɛi hii kɛ yei ni fa fe 2,900, ni amɛmiitsɔɔ Biblia lɛ kɛ Biblia kasemɔ woji ashishi. Atsɔɔ woji lɛ ashishi kɛyaa wiemɔi ni mɛi fioo ko pɛ wieɔ lɛ po amli. Akɛ nɔkwɛmɔnɔ lɛ, amrɔ nɛɛ Yehowa Odasefoi  ni yɔɔ Spain lɛ tsɔɔ woji ashishi kɛyaa Catalan mli. Nyɛsɛɛ nɛɛ po lɛ, mɛi babaoo ebɔi Catalan wiemɔ yɛ Valencia kɛ Alicante maŋtiasei lɛ amli, Balearic Ŋshɔkpɔi lɛ anɔ, kɛ Andorra maŋ lɛ mli. Ŋmɛnɛ lɛ, mɛi akpekpei abɔ wieɔ Catalan. Akɛni Yehowa Odasefoi tsɔɔ woji lɛ ashishi hewɔ lɛ, Cataloniabii lɛ anine shɛɔ woji anɔ yɛ amɛwiemɔ lɛ mli, ni amɛfeɔ asafoŋ kpeei hu yɛ amɛwiemɔ lɛ mli.

9, 10. Mɛɛ nɔkwɛmɔnii tsɔɔ akɛ Yehowa gbɛjianɔtoo lɛ miitao ni mɛi fɛɛ ale anɔkwale lɛ?

⁹ Yɛ jeŋ fɛɛ lɛ, aatsɔɔ Biblia woji ashishi, ni aatsɔɔ mɛi anii yɛ amɛ diɛŋtsɛ amɛwiemɔ mli. Akɛ nɔkwɛmɔnɔ lɛ, mɛi babaoo wieɔ Spanish yɛ Mexico, shi amɛteŋ mɛi pii wieɔ wiemɔi krokomɛi hu. Wiemɔi nɛɛ ateŋ ekome ji Maya. Ahã nyɛmimɛi ni tsɔɔ woji ashishi kɛyaa Maya mli lɛ eyahi maŋ lɛ mli he ni awieɔ Maya yɛ waa lɛ. Akɛni wiemɔ shishitsɔɔlɔi lɛ kɛ mɛi wieɔ Maya, ni daa gbi lɛ amɛnuɔ ni mɛi miiwie hewɔ lɛ, ehãa amɛtsɔɔ woji kɛ nibii krokomɛi ashishi yɛ gbɛ ni ewaaa akɛ mɛi ni wieɔ Maya lɛ baanu shishi lɛ nɔ. Nɔkwɛmɔnɔ kroko hu ji Nepali, ni ji wiemɔ ni Nepalbii wieɔ lɛ. Awieɔ wiemɔi aaafee 120 yɛ nakai maŋ lɛ nɔ. Mɛi ni fa fe akpekpei 29 yɛ Nepal. Amɛteŋ mɛi ni fa fe akpekpei 10 amaŋ wiemɔ ji Nepali, ni mɛi babaoo hu wieɔ wiemɔ kroko kɛ Nepali. Wɔnyɛmimɛi lɛ tsɔɔ Biblia woji ashishi kɛyaa Nepali mli.

¹⁰ Wiemɔ shishitsɔɔmɔ nitsumɔ ni atsuɔ yɛ jeŋ fɛɛ ŋmɛnɛ lɛ yeɔ odase akɛ, Yehowa gbɛjianɔtoo lɛ kɛ sɔ̃ ni kã enɔ akɛ eshiɛ sane kpakpa lɛ yɛ jeŋ fɛɛ lɛ shwɛɛɛ kwraa. Yehowa Odasefoi ejara dɛhiɛmɔ woji, woji bibii, kɛ woji tɛtrɛbii akpekpei abɔ yaka. Moŋ lɛ, Odasefoi lɛ diɛŋtsɛ tsuɔ onia kɛfiɔ nitsumɔ nɛɛ sɛɛ. Amɛkɛ nɔ ni Yesu wie akɛ, “yaka nyɛná, yaka nyɛŋɔhãa” lɛ tsuɔ nii.—Mat. 10:8.

11, 12. Akɛni wɔshiɛɔ ní wɔtsɔɔ nii yɛ jeŋ fɛɛ hewɔ lɛ, mɛni mɛi babaoo kɛɔ?

¹¹ Akɛni Yehowa Odasefoi heɔ amɛyeɔ akɛ amɛna anɔkwale lɛ hewɔ lɛ, amɛkɛ nibii wuji shãa afɔle koni amɛnyɛ amɛshiɛ amɛhã mɛi ni jɛ maji kɛ majianɔ wiemɔi srɔtoi anɔ. Odasefoi babaoo ehã amɛshihilɛ efee mlɛo, amɛkase wiemɔ kroko, ni amɛtsake amɛhe amɛwo mɛi lɛ ashihilɛ mli. Akɛni wɔshiɛɔ ní wɔtsɔɔ nii yɛ jeŋ fɛɛ hewɔ lɛ, mɛi babaoo kɛɔ akɛ Yehowa Odasefoi ji mɛi tuuntu ni nyiɛɔ Yesu Kristo nanemaahei lɛ asɛɛ.

 ¹² Odasefoi lɛ feɔ enɛɛmɛi fɛɛ akɛni amɛheɔ amɛyeɔ akɛ amɛna anɔkwale lɛ hewɔ. Shi mɛni tuuntu hewɔ wɔnyɛmimɛi hii kɛ yei lɛ ekomɛi heɔ amɛyeɔ akɛ amɛna anɔkwale lɛ?—Nyɛkanea Romabii 14:17, 18.

13. Te feɔ tɛŋŋ Yehowa webii lɛ nyɛɔ amɛbaa amɛjeŋ yɛ gbɛ ni wooo egbɛjianɔtoo lɛ he muji lɛ nɔ lɛ?

¹³ Wɔnyɛmimɛi hii kɛ yei lɛ yɛ nibii babaoo ni hãa amɛheɔ amɛyeɔ akɛ amɛna anɔkwale lɛ. Nyɛmi nuu ko ni kɛ afii babaoo esɔmɔ Yehowa lɛ wie akɛ: “Kɛ́ mɔ ko fee nɔ ko ni baanyɛ awo Yehowa gbɛjianɔtoo lɛ he muji lɛ, akuneɔ lɛ loo agbalaa etoi, ekɔɔɔ he eko mɔ ni eji.” Te feɔ tɛŋŋ Yehowa webii lɛ nyɛɔ amɛbaa amɛjeŋ yɛ gbɛ ni wooo egbɛjianɔtoo lɛ he muji lɛ nɔ lɛ? Amɛteŋ mɔ fɛɛ mɔ bɔɔ mɔdɛŋ akɛ ebaabo nɔ ni Nyɔŋmɔ ewie yɛ Biblia lɛ mli lɛ toi, ni amɛkaseɔ Yesu kɛ ekaselɔi lɛ. Odasefoi lɛ ateŋ mɛi fioo ko pɛ ehiii shi yɛ Nyɔŋmɔ shishitoo mlai ni kɔɔ nɔ ni ja kɛ nɔ ni ejaaa he lɛ anaa, ni no hewɔ lɛ, ashwie amɛ kɛjɛ asafo lɛ mli. Shi amɛteŋ mɛi babaoo baa amɛjeŋ bɔ ni sa Yehowa hiɛ. Mɛi ni tsutsu lɛ amɛfeɔ nibii ni Nyɔŋmɔ sumɔɔɔ lɛ etsake, ni agbɛnɛ amɛmiifee nibii ni Nyɔŋmɔ sumɔɔ.—Nyɛkanea 1 Korintobii 6:9-11.

14. Mɛni mɛi babaoo fee be ni ashwie amɛ kɛjɛ asafo lɛ mli lɛ? Mɛni ejɛ mli kɛba?

¹⁴ Biblia lɛ fãa Kristofoi akɛ amɛjie mɛi ni booo Nyɔŋmɔ toi lɛ kɛjɛ asafo lɛ mli. Miishɛɛ sane ji akɛ, amɛteŋ mɛi akpei abɔ eshwa amɛhe yɛ amɛnifeemɔ lɛ hewɔ, ni ahe amɛ kɛba asafo lɛ mli ekoŋŋ. (Nyɛkanea 2 Korintobii 2:6-8.) Akɛni be fɛɛ be lɛ, Odasefoi lɛ hãa Biblia lɛ tsɔɔ amɛ bɔ ni sa akɛ amɛba amɛjeŋ hewɔ lɛ, amɛfeee nɔ ko ni baawo asafo lɛ he muji. Enɛ hãa amɛnáa nɔmimaa akɛ amɛgbɛjianɔtoo lɛ ji nɔ ni Nyɔŋmɔ kpɛlɛɔ nɔ. Eyɛ mli akɛ jamɔi babaoo ŋmɛɔ amɛmli bii lɛ gbɛ ni amɛyeɔ amɛtsuinaa sane moŋ, shi Odasefoi lɛ hiɔ shi yɛ Yehowa shishitoo mlai lɛ anaa. Enɛ hewɔ lɛ, mɛi babaoo heɔ amɛyeɔ akɛ Yehowa Odasefoi lɛ ji mɛi ni ena anɔkwale lɛ.

15. Mɛni hewɔ nyɛmi nuu ko heɔ eyeɔ akɛ ena anɔkwale lɛ?

¹⁵ Mɛni hewɔ Odasefoi krokomɛi hu heɔ amɛyeɔ akɛ amɛna anɔkwale lɛ? Nyɛmi nuu ko ni eye afii 54 lɛ esɔmɔ Yehowa kɛjɛ eblahiiaŋ. Etsɔɔ mli akɛ, akulashiŋi, loo nibii etɛ komɛi ji nɔ ni wajeɔ ehemɔkɛyeli lɛ, ni nomɛi ji: (1) Nyɔŋmɔ yɛ, (2) Biblia lɛ jɛ Nyɔŋmɔ ŋɔɔ, ni (3) Yehowa Odasefoi ji mɛi ni feɔ Nyɔŋmɔ suɔmɔnaa nii yɛ shikpɔŋ lɛ nɔ ŋmɛnɛ. Ewie akɛ: “Yɛ afii abɔ ni mikɛkase nii lɛ amli lɛ, be fɛɛ be lɛ, mikaa akulashiŋi etɛ nɛɛ mikwɛɔ akɛ amɛmamɔ shi shiŋŋ lo. Afi fɛɛ afi lɛ, mináa odaseyelii babaoo ni tsɔɔ akɛ akulashiŋi nɛɛ ateŋ eko fɛɛ eko ma shi shiŋŋ, ni enɛ wajeɔ mihemɔkɛyeli lɛ ni ehãa miheɔ miyeɔ akɛ, wɔna anɔkwale lɛ lɛɛlɛŋ.”

16. Mɛni hewɔ nyɛmi yoo ko heɔ eyeɔ akɛ ena anɔkwale lɛ?

 ¹⁶ Nyɛmi yoo ko ni ebote gbalashihilɛ mli ni tsuɔ nii yɛ Yehowa Odasefoi anitsumɔhe yitso ni yɔɔ New York lɛ tsɔɔ nɔ ni hãa eheɔ eyeɔ akɛ ena anɔkwale lɛ. Etsɔɔ mli akɛ, Yehowa gbɛjianɔtoo lɛ pɛ ji gbɛjianɔtoo ni tsɔɔ mɛi Yehowa gbɛ́i lɛ. Gbɛ́i nɛɛ jeɔ kpo aaafee shii 7,000 yɛ Biblia lɛ mli. Ŋmalɛ ni yɔɔ 2 Kronika 16:9 lɛ hu woɔ lɛ hewalɛ waa. Jɛmɛ kɛɔ akɛ: “Yehowa yɔɔ nɛɛ, ehiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehãa mɛi ní amɛtsui ehi kɛwula shi yɛ egbɛfaŋ lɛ.” Ewie akɛ: “Anɔkwale lɛ etsɔɔ mi bɔ ni mafee maná tsui ni hi kɛwula shi, koni Yehowa ajie ehewalɛ lɛ kpo yɛ migbɛfaŋ daa. Wekukpaa ni yɔɔ mi kɛ Yehowa teŋ lɛ jara wa waa kɛhã mi. Nɔ ni Yesu feɔ koni wɔle Nyɔŋmɔ jogbaŋŋ lɛ yeɔ ebuaa mi waa, ni mihiɛ sɔɔ enɛ.”

17. Mɛni hewɔ amrɔ nɛɛ nyɛmi nuu ko ni tsutsu ko lɛ eheee eyeee akɛ Nyɔŋmɔ yɛ lɛ heɔ eyeɔ akɛ ena anɔkwale lɛ?

¹⁷ Nyɛmi nuu ko ni tsutsu lɛ eheee eyeee akɛ Nyɔŋmɔ yɛ lɛ wie akɛ: “Adebɔɔ hãa minaa akɛ Nyɔŋmɔ miisumɔ ni wɔná shihilɛ kpakpa, no hewɔ lɛ eŋmɛŋ gbɛ ni mɛi apiŋ kɛya naanɔ. Kɛfata he lɛ, be ni mɛi yaa nɔ amɛfeɔ nibii ni esaaa Nyɔŋmɔ hiɛ lɛ, hemɔkɛyeli, ekãa, kɛ suɔmɔ ni Yehowa webii yɔɔ lɛ mli miiya nɔ eewa. Yehowa mumɔ lɛ pɛ baanyɛ afee naakpɛɛ nɔ ko ni tamɔ nɛkɛ yɛ wɔgbii nɛɛ amli.”—Nyɛkanea 1 Petro 4:1-4.

18. Mɛni hewɔ nyɛmimɛi hii enyɔ komɛi heɔ amɛyeɔ akɛ amɛna anɔkwale lɛ? Te no hãa onuɔ he ohãa tɛŋŋ?

¹⁸ Nyɛmi nuu kroko hu ni kɛ afii babaoo ehi anɔkwale lɛ mli lɛ tsɔɔ nɔ hewɔ ni eheɔ eyeɔ akɛ ena anɔkwale lɛ. Ewie akɛ: “Nibii ni mikase yɛ afii ni eho lɛ amli lɛ ehã mina akɛ Odasefoi lɛ bɔɔ mɔdɛŋ akɛ amɛbaanyiɛ klɛŋklɛŋ afii 100 lɛ mli Kristofoi lɛ ananemaahei lɛ asɛɛ kpaakpa. Mifã gbɛ kɛtee jeŋ lɛŋ hei srɔtoi, ni no ehã mina ekomefeemɔ ni yɔɔ Yehowa Odasefoi ateŋ yɛ jeŋ fɛɛ lɛ. Biblia mli anɔkwale lɛ ehã mitsui enyɔ mimli, ni miyɛ miishɛɛ.” Nyɛmi nuu ko ni eye fe afii 60 lɛ hu wie akɛ, Yehowa Odasefoi heɔ Yesu nɔ amɛyeɔ diɛŋtsɛ. Etsɔɔ mli akɛ: “Wɔkase Yesu shihilɛ kɛ esɔɔmɔ nitsumɔ lɛ he nii jogbaŋŋ, ni no ehã wɔhiɛ esɔ enɔkwɛmɔnɔ lɛ. Wɔfee tsakemɔi yɛ wɔshihilɛ mli bɔ ni afee ni wɔtsɔ Kristo Yesu nɔ wɔtsi wɔbɛŋkɛ Nyɔŋmɔ kpaakpa. Wɔna akɛ Kristo kpɔmɔ afɔle lɛ ji nɔ ni abaadamɔ nɔ ahere wɔyiwala. Ni wɔle akɛ atee lɛ shi kɛjɛ gbohii ateŋ. Wɔyɛ odaseyeli ni abaanyɛ amu afɔ̃ nɔ ni tsɔɔ akɛ mɛi komɛi na akɛ atee lɛ shi.”—Nyɛkanea 1 Korintobii 15:3-8.

19, 20. (a) Mɛni Paulo kɛɛ asafo ni yɔɔ Roma lɛ akɛ eji Yesu sɛɛnyiɛlɔi fɛɛ asɔ̃? (b) Mɛni esa akɛ Yehowa tsuji fɛɛ afee?

¹⁹ Anɔkwa Kristofoi sumɔɔ mɛi krokomɛi waa. No hewɔ ni esa akɛ wɔhã mɛi krokomɛi ale anɔkwale lɛ ni wɔkase lɛ. Paulo kɛɛ asafo ni yɔɔ Roma lɛ akɛ, eji Yesu anɔkwa sɛɛnyiɛlɔi lɛ asɔ̃ akɛ amɛshiɛ. Eŋma akɛ: “Kɛji okɛ onaabu jaje akɛ Yesu ji Nuŋtsɔ lɛ, ní ohe oye yɛ otsui mli akɛ Nyɔŋmɔ tée lɛ shi kɛjɛ gbohii ateŋ lɛ, aaahere oyiwala. Ejaakɛ tsui akɛheɔ ayeɔ kɛshɛɔ jalɛ he, ni naabu akɛjajeɔ kɛshɛɔ yiwalaheremɔ he.”—Rom. 10:9, 10.

²⁰ Yehowa Odasefoi heɔ amɛyeɔ akɛ amɛna anɔkwale lɛ, ni amɛle akɛ eji hegbɛ ni amɛná akɛ amɛbaashiɛ Nyɔŋmɔ Maŋtsɛyeli lɛ he sane kpakpa lɛ amɛhã mɛi krokomɛi. No hewɔ lɛ, kɛfee oti ni ma ohiɛ akɛ obaatsɔɔ mɛi krokomɛi Biblia mli anɔkwalei lɛ, ní ohi shi yɛ gbɛ ni baahã ana akɛ oheɔ oyeɔ akɛ ona anɔkwale lɛ nɔ.