1, 2. Namɛi baanyɛ aná Lalai Amli Lala wolo lɛ he sɛɛ? Ni mɛni hewɔ? (Kwɛmɔ mfoniri ni yɔɔ nikasemɔ lɛ shishijee lɛ.)

AYEMFORO lɛ miikwɛ ayemforo wu lɛ hiɛ, ni ayemforo wu lɛ hu miikwɛ ehiɛ, ni amɛmiiŋmɔ mugɛɛ. Mɔ fɛɛ mɔ miina akɛ amɛsumɔɔ amɛhe waa. Nyɛmi nuu ni hã amɛyookpeemɔ lɛ he wiemɔ lɛ yɔse bɔ ni amɛkɛ suɔmɔ emɔmɔ amɛniji amli lɛ, ni ebi ehe akɛ: ‘Ani amɛsuɔmɔ lɛ mli baaya nɔ awa be ni afii lɛ hoɔ yaa lɛ? Aloo fiofio lɛ, amɛsuɔmɔ lɛ he baajɔ?’ Kɛ́ wu ko kɛ ŋa ko sumɔɔ amɛhe waa lɛ, amɛnyɛɔ amɛdamɔɔ naagbai ni mli wawai po anaa. Shi dɔlɛ sane ji akɛ, gbalashihilɛ mli bii babaoo náaa miishɛɛ, ni no hewɔ lɛ amɛtseɔ gbãla. Enɛ hewɔ lɛ, ekolɛ obaabi ohe akɛ, ‘Ani suɔmɔ baanyɛ ahi shi daa?’

² Be ni Maŋtsɛ Salomo yɔɔ shihilɛ mli po lɛ, no mli lɛ ewa akɛ nuu kɛ yoo aaaná anɔkwa suɔmɔ amɛhã amɛhe. Mɛni hewɔ? Salomo tsɔɔ mli akɛ: “Mɛi akpe mli lɛ, mina nuu kome pɛ . . . , shi minaaa yoo kome nɛkɛ yɛ amɛteŋ. Naa, nɔ ni kɛkɛ ni mina ji akɛ Nyɔŋmɔ bɔ gbɔmɔ adesa koni ehi shi krɔŋŋ; shi gbɔmɔ adesa ni eto ŋai srɔtoi.” (Jajelɔ 7:26-29,  Ga Biblia hee) No mli lɛ, maŋsɛɛ yei ni bɛ jeŋba, ni jáa Baal, yɛ Israelbii lɛ ateŋ. Enɛ hã Israel hii kɛ yei lɛ ateŋ mɛi babaoo kɛ amɛhe wo jeŋba sha mli. * (Kwɛmɔ shishigbɛ niŋmaa lɛ.) Shi, aaafee afii 20 dani be nɛɛ baashɛ lɛ, Maŋtsɛ Salomo ŋma lala wiemɔ ko ni kɔɔ nuu ko kɛ yoo ko ni sumɔɔ amɛhe waa lɛ he. Kɛ́ wɔbote gbalashihilɛ mli jio, wɔboteko mli jio, Lalai Amli Lala wolo lɛ baanyɛ aye abua wɔ ni wɔnu nɔ ni anɔkwa suɔmɔ ji, kɛ bɔ ni wɔɔfee wɔjie lɛ kpo lɛ shishi jogbaŋŋ.

3. Mɛni hewɔ nuu kɛ yoo baanyɛ aná anɔkwa suɔmɔ amɛhã amɛhe lɛ?

³ Kanemɔ Lalai Amli Lala 8:6. Awie suɔmɔ he yɛ ŋmalɛ lɛ mli akɛ “Yehowa lalilɛi.” Mɛni hewɔ? Ejaakɛ suɔmɔ ji Yehowa su titri, ni ebɔ wɔ kɛ nyɛmɔ ni wɔbaanyɛ wɔkɛkase esuɔmɔ lɛ. (1 Mose 1:26, 27) Be ni Yehowa bɔ klɛŋklɛŋ nuu ni ji Adam lɛ, ehã lɛ ŋa fɛfɛo ko. Be ni Adam na Hawa klɛŋklɛŋ kwraa lɛ, emii shɛ ehe aahu akɛ efo lala kɛtsɔɔ bɔ ni enuɔ he ehãa. Akɛni Yehowa bɔ Hawa kɛjɛ Adam mli hewɔ lɛ, eka shi faŋŋ akɛ Hawa nu he akɛ ebɛŋkɛ ewu lɛ kpaakpa. (1 Mose 2:21-23) Kɛjɛ shishijee mli tɔ̃ɔ lɛ, Yehowa to gbɛjianɔ koni nuu kɛ yoo anyɛ aná anɔkwa suɔmɔ ni hiɔ shi daa amɛhã amɛhe.

4, 5. Mɛni he sane ni yɔɔ Lalai Amli Lala lɛ mli lɛ kɔɔ?

⁴ Lalai Amli Lala wolo lɛ tsɔɔ suɔmɔ ni nuu ko kɛ yoo ko baanyɛ aná ahã amɛhe lɛ mli fɛfɛo. Lala nɛɛ kɔɔ bɔ ni oblayoo ko ni jɛ akrowa ni ji Shunem, loo Shulam lɛ, kɛ oblanyo tookwɛlɔ ko ná suɔmɔ amɛhã amɛhe lɛ he. Bɔ ni amɛsane lɛ tee lɛ nɛ: Oblayoo lɛ miitsu nii yɛ enyɛmimɛi hii lɛ aweintrom lɛ mli, yɛ he ko ni bɛŋkɛ he ni Maŋtsɛ Salomo kɛ esraafoi lɛ ebabɔ nsara yɛ lɛ. Salomo hiɛ gba oblayoo lɛ nɔ, ni efã ni etsuji lɛ ayaŋɔ lɛ kɛba nsara lɛ mli. Kɛkɛ ni ekɛɛ oblayoo lɛ bɔ ni ehe yɔɔ fɛo hã, ni eke lɛ nibii babaoo. Shi no mli lɛ, oblayoo lɛ miisumɔ tookwɛlɔ ko, ni ema nɔ mi doo akɛ eesumɔ ni ekɛ esuɔlɔ lɛ ahi shi. (Lalai Amli Lala 1:4-14) Tookwɛlɔ lɛ yatao lɛ, ni etee nsara lɛ mli. Be ni ena lɛ lɛ, amɛwie nibii kɛtsɔɔ akɛ amɛsumɔɔ amɛhe waa.—Lalai Amli Lala 1:15-17.

⁵ Be ni Salomo kuɔ esɛɛ eyaa Yerusalem lɛ, eŋɔ oblayoo lɛ efata ehe kɛtee, ni tookwɛlɔ lɛ hu nyiɛ oblayoo lɛ sɛɛ. (Lalai Amli Lala 4:1-5, 8, 9) Nibii ni Salomo wie loo efee lɛ ateŋ ekome folo po hãaa oblayoo lɛ aŋmɛɛ suɔmɔ ni eyɔɔ kɛhã tookwɛlɔ lɛ he. (Lalai Amli Lala 6:4-7; 7:1-10) No hewɔ lɛ, Salomo ŋmɛɛ oblayoo lɛ he ni eku esɛɛ kɛtee shĩa. Sane lɛ ba naagbee be ni Shulam oblayoo nɛɛ tsɛ esuɔlɔ lɛ, ní ejo foi kɛba eŋɔɔ “tamɔ soŋãi” loo adowa lɛ.—Lalai Amli Lala 8:14.

6. Mɛni hewɔ ewa akɛ aaale mɔ ni wieɔ lɛ yɛ Lalai Amli Lala lɛ mli lɛ?

⁶ Lala ni Salomo fo nɛɛ ji lala ko ni ŋɔɔ waa. No hewɔ ni atsɛɔ lɛ “lalai amli lala” lɛ. (Lalai Amli Lala 1:1) Shi be ni Salomo foɔ lala nɛɛ, etsĩii mɛi ni wieɔ lɛ agbɛ́i atã. Ewieee lala lɛ he saji pii. Efee nakai bɔ ni afee ni mɛi ajwɛŋmɔ aya lala lɛ ŋɔɔmɔ kɛ emli wiemɔi lɛ anɔ. Eyɛ mli akɛ atsĩii mɛi ni wieɔ lɛ agbɛ́i atã moŋ, shi lala lɛ mli wiemɔi lɛ hãa  anaa mɔ ni wieɔ lɛ. *—Kwɛmɔ shishigbɛ niŋmaa lɛ.

7, 8. Mɛni tookwɛlɔ lɛ kɛ oblayoo lɛ fee kɛtsɔɔ akɛ amɛsumɔɔ amɛhe? Okɛ enɛ he nɔkwɛmɔnii ahã.

⁷ Oblayoo lɛ kɛ tookwɛlɔ lɛ kɛkɛɛ amɛhe nibii kɛtsɔɔ akɛ amɛsumɔɔ amɛhe waa. Ekolɛ, nibii ni amɛwie kɛtsɔɔ ‘suɔmɔ’ ni amɛyɔɔ kɛhã amɛhe lɛ ekomɛi baafee wɔhiɛ yaa, ejaakɛ aŋma sane nɛɛ aaafee afii 3000 ni eho nɛ. (Lalai Amli Lala 1:2) Eyɛ mli akɛ esoro bɔ ni nibii yɔɔ yɛ amɛbeaŋ moŋ, shi wɔnaa akɛ amɛsumɔɔ amɛhe waa. Akɛ nɔkwɛmɔnɔ lɛ, tookwɛlɔ lɛ wie akɛ oblayoo lɛ hiŋmɛii tamɔ “okpo hiŋmɛii,” ni tsɔɔ akɛ kɛ́ ekwɛ ehiŋmɛii lɛ, enaa akɛ ehe jɔ, ni emli hi, ni enɛ hã esumɔ lɛ waa. (Lalai Amli Lala 1:15) Oblayoo lɛ hu kɛɛ lɛ akɛ ehiŋmɛii yɛ fɛo tamɔ okpo hiŋmɛii. (Kanemɔ Lalai Amli Lala 5:12.) Oblayoo lɛ na bɔ ni tookwɛlɔ lɛ hiŋmɛii yɛɔ, ní ehiŋmɛi ajaŋmalatɛ lɛ edĩ fɛfɛo yɛ mli lɛ tamɔ okpo diŋ ní miiju ehe yɛ fufɔ mli lɛ.

⁸ Tookwɛlɔ lɛ kɛ oblayoo lɛ kɛkɛɛ amɛhe saji ni tsɔɔ bɔ ni amɛhe yɔɔ fɛo hã yɛ kponɔgbɛ, shi jeee no pɛ he amɛwie. Akɛ nɔkwɛmɔnɔ lɛ, tookwɛlɔ lɛ sumɔɔ bɔ ni oblayoo lɛ kɛ mɛi wieɔ yɛ mlihilɛ mli lɛ. (Kanemɔ Lalai Amli Lala 4:7, 11.) No hewɔ lɛ, ekɛɛ lɛ akɛ: “Ayemforo [loo miyemforo], onaabui tsereɔ wo shwieɔ shi; wo kɛ fufɔ yɛ olilɛi shishi.” Tookwɛlɔ lɛ na oblayoo lɛ wiemɔi lɛ akɛ amɛŋɔɔ ni amɛhi tamɔ fufɔ kɛ wo ni ŋɔɔ waa. Be ni tookwɛlɔ lɛ kɛɛ oblayoo lɛ akɛ “ohe yɛ fɛo kɛyi shi” ni “kpa ko kpa ko bɛ ohe” lɛ, jeee bɔ ni ehe yɔɔ fɛo yɛ kponɔgbɛ lɛ kɛkɛ he ewieɔ, shi moŋ eewie sui kpakpai ni eyɔɔ lɛ hu he.

9. (a) Mɛɛ suɔmɔ srɔtoi esa akɛ wumɛi kɛ ŋamɛi ajie lɛ kpo? (b) Mɛni hewɔ esa akɛ wumɛi kɛ ŋamɛi afee nibii kɛtsɔɔ bɔ ni amɛsumɔɔ amɛhe amɛhãa lɛ?

⁹ Ŋmɛnɛ lɛ, wumɛi kɛ ŋamɛi ni sɔmɔɔ Yehowa lɛ enaaa gbalashihilɛ akɛ gbeekpamɔ ko kɛkɛ ni aba. Amɛsumɔɔ amɛhe waa, ni amɛfeɔ nibii kɛtsɔɔ akɛ amɛsumɔɔ amɛhe. Shi mɛɛ suɔmɔ esa akɛ amɛná amɛhã amɛhe? Ani eji suɔmɔ ni fooo lɛ pɛ enɔ mli, ní Biblia lɛ woɔ wɔ hewalɛ ni wɔjie lɛ kpo wɔtsɔɔ mɛi fɛɛ lɛ? (1 Yohane 4:8) Ani eji suɔmɔ ni weku mli bii jieɔ lɛ kpo amɛtsɔɔ amɛhe lɛ? Suɔmɔ ni nanemɛi enyɔ ni bɛŋkɛ amɛhe kpaakpa lɛ jieɔ lɛ kpo amɛtsɔɔ amɛhe lɛ? (Yohane 11:3) Aloo nuu kɛ yoo teŋ suɔmɔ? (Abɛi 5:15-20) Yɛ anɔkwale mli lɛ, esa akɛ gbalashihilɛ mli bii ajie suɔmɔ srɔtoi nɛɛ fɛɛ eko kpo amɛtsɔɔ amɛhe. Amɛbaanyɛ amɛtsɔ amɛwiemɔi kɛ amɛnifeemɔi anɔ amɛhã amɛhefatalɔi lɛ ana akɛ amɛsumɔɔ amɛ, koni amɛmii ashɛ amɛhe yɛ amɛgbalashihilɛ lɛ mli. Ehe miihia ni amɛfee nakai, ekɔɔɔ he eko bɔ ni amɛbɛ dekã yɛ shihilɛ  mli hã. Yɛ hei komɛi lɛ, yookpeemɔ gbi lɛ nɔ dani nuu lɛ kɛ yoo lɛ leɔ amɛhe. No hewɔ lɛ, be ni amɛyaa nɔ amɛleɔ amɛhe, ní suɔmɔ ni yɔɔ amɛteŋ lɛ mli waa lɛ, ehe miihia ni amɛkɛɛkɛɛ amɛhe nibii ni tsɔɔ akɛ amɛsumɔɔ amɛhe. Enɛ baahã amɛbɛŋkɛ amɛhe kpaakpa, ni ebaawaje amɛgbalashihilɛ lɛ.

10. Kɛ́ gbalashihilɛ mli bii fee nibii kɛtsɔɔ akɛ amɛsumɔɔ amɛhe lɛ, mɛɛ gbɛ kroko nɔ ewajeɔ amɛgbalashihilɛ lɛ?

¹⁰ Kɛ́ gbalashihilɛ mli bii fee nibii kɛtsɔɔ akɛ amɛsumɔɔ amɛhe lɛ, amɛwajeɔ amɛgbalashihilɛ lɛ yɛ gbɛ kroko nɔ. Yɛ lala lɛ mli lɛ, Maŋtsɛ Salomo hã oblayoo lɛ shika hewulamɔ nii ni akɛ jwiɛtɛi ehɔlɔ mli. Ejie eyi, ni ewie akɛ ehe yɛ fɛo “tamɔ nyɔɔŋtsere, ni ehe tse akɛ hulu.” (Lalai Amli Lala 1:9-11; 6:10) Shi no mli lɛ, oblayoo lɛ kɛ etsui fɛɛ ehã tookwɛlɔ lɛ momo. Mɛni ye ebua lɛ ni etee nɔ eye esuɔlɔ lɛ anɔkwa? Be ni amɛteŋ gbala lɛ, mɛni ekɛshɛje emii? (Kanemɔ Lalai Amli Lala 1:2, 3.) Ekai bɔ ni tookwɛlɔ lɛ suɔmɔ wiemɔi lɛ hã ená miishɛɛ. Esuɔmɔ lɛ “hi fe wein,” ni enɛ shɛje oblayoo lɛ mii be ni eyɔɔ maŋtsɛwe lɛ, tamɔ “mu-kɛ-ŋma” ni afɔse ashwie eyiteŋ. (Lala 23:5; 104:15) Ehe miihia ni yɛ be kɛ beaŋ lɛ, wumɛi kɛ ŋamɛi afee nibii kɛtsɔɔ akɛ amɛsumɔɔ amɛhe, ejaakɛ no baahã amɛsuɔmɔ lɛ mli awa. Ni kɛ́ amɛkai nibii nɛɛ, no baaye abua amɛ ni amɛya nɔ amɛsumɔ amɛhe waa.

11. Mɛni Shulam oblayoo lɛ kɛɛ yei ni yɔɔ Salomo maŋtsɛwe lɛ? Mɛni wɔkaseɔ yɛ mli?

¹¹ Kɛ́ obaasumɔ ni obote gbalashihilɛ mli lɛ, mɛni obaanyɛ okase yɛ Shulam oblayoo lɛ he? Oblayoo lɛ sumɔɔɔ Maŋtsɛ Salomo, ni ekɛ hiɛdɔɔ kɛɛ yei ni yɔɔ maŋtsɛwe lɛ akɛ: “Nyɛkahosoa ni nyɛkatsiɛa misuɔmɔ lɛ hiɛ, kɛyashi be ni lɛ diɛŋtsɛ esumɔɔ.” (Lalai Amli Lala 2:7; 3:5) No hewɔ lɛ, ani eja gbɛ akɛ wɔkɛ mɔ fɛɛ mɔ kɛkɛ baaje nyiɛmɔ ni tsɔɔ gbalashihilɛ hiɛ lɛ shishi? Dabi, moŋ lɛ nilee yɛ mli akɛ wɔɔto wɔtsui shi ni wɔmɛ kɛyashi wɔbaaná mɔ ko ni wɔbaanyɛ wɔsumɔ lɛ kɛ wɔtsui fɛɛ, koni wɔkɛ lɛ abote gbalashihilɛ mli.

12. Mɛni hã Shulam oblayoo lɛ sumɔ tookwɛlɔ lɛ?

¹² Mɛni hã Shulam oblayoo lɛ sumɔ tookwɛlɔ lɛ? Ehe fee oblayoo lɛ fɛo tamɔ “soŋãi” loo adowa. Eniji yɛ hewalɛ tamɔ “shika gai,” ni eshuɔji yɛ fɛo ni amɛyɛ hewalɛ tamɔ “tɛi yɛji akulashiŋi.” Shi jeee ehewalɛ kɛ ehefɛo lɛ pɛ kɛkɛ oblayoo lɛ na. Oblayoo lɛ na akɛ tookwɛlɔ lɛ sumɔɔ Yehowa, ni eyɛ sui kpakpai hu. No hewɔ ni eshwɛɛɛ ehe kwraa lɛ. Etamɔ ‘akututso yɛ kooŋtsei ateŋ’ hã lɛ.—Lalai Amli Lala 2:3, 9; 5:14, 15.

13. Mɛni hewɔ tookwɛlɔ lɛ sumɔ Shulam oblayoo lɛ?

¹³ Shulam oblayoo lɛ he yɛ fɛo waa.  Eyɛ mli akɛ Maŋtsɛ Salomo yɛ ‘maŋnyɛmɛi 60, hemɛi 80, kɛ oblayei ni aleee amɛyibɔ’ moŋ, shi lɛ po etsui mɔ oblayoo nɛɛ. Ani ehefɛo lɛ pɛ hewɔ tookwɛlɔ lɛ sumɔ lɛ lɛ? Dabi. Oblayoo lɛ sumɔɔ Yehowa hu, ni eyɛ sui kpakpai. Akɛ nɔkwɛmɔnɔ lɛ, eba ehe shi, ni ekɛ ehe to “Sharon fɔfɔi,” ni ji fɔfɔi ko ni námɔ waaa kwraa lɛ he. Shi tookwɛlɔ lɛ na lɛ akɛ esoro lɛ kwraa, tamɔ ‘oflɔ́ fɔfɔi yɛ ŋmei ateŋ.’—Lalai Amli Lala 2:1, 2; 6:8.

14. Kɛ́ obaasumɔ ni obote gbalashihilɛ mli lɛ, mɛni obaanyɛ okase yɛ tookwɛlɔ lɛ kɛ Shulam oblayoo lɛ he?

¹⁴ Yehowa efã etsuji akɛ amɛbote gbalashihilɛ mli “yɛ Nuŋtsɔ lɛ mli.” (1 Korintobii 7:39) Enɛ tsɔɔ akɛ kɛ́ wɔkɛ mɔ ko baanyiɛ kɛhã gbalashihilɛ, loo wɔkɛ mɔ ko baabote gbalashihilɛ mli lɛ, esa akɛ mɔ lɛ afee Yehowa tsulɔ ni abaptisi lɛ. Mɛɛ gbɛ nɔ enɛ baaye abua ni gbalashihilɛ lɛ aye omanye? Gbalashihilɛ mli bii kɛ daa gbi shihilɛ mli naagbai baakpe. Shi kɛ́ amɛyi enyɔ lɛ fɛɛ lɛ, wekukpaa kpakpa yɛ amɛkɛ Yehowa teŋ lɛ, amɛtoiŋ baajɔ amɛ, ni amɛbaaná miishɛɛ. No hewɔ lɛ, kɛ́ obaasumɔ ni obote gbalashihilɛ mli lɛ, kasemɔ tookwɛlɔ lɛ kɛ Shulam oblayoo lɛ. Taomɔ mɔ ko ni yɔɔ sui kpakpai, ní sumɔɔ Yehowa waa.

15. Mɛɛ gbɛ nɔ bɔ ni Shulam oblayoo lɛ ye anɔkwa lɛ ji nɔkwɛmɔnɔ kpakpa kɛhã Kristofoi ni miitao amɛbote gbalashihilɛ mli lɛ?

¹⁵ Kanemɔ Lalai Amli Lala 4:12. Mɛni hewɔ tookwɛlɔ lɛ wie akɛ Shulam oblayoo lɛ tamɔ “trom ni aŋmɛ naa” lɛ? Kɛ́ aŋmɛ trom ko naa lɛ, jeee mɔ fɛɛ mɔ kɛkɛ nyɛɔ eboteɔ mli. Oblayoo lɛ tamɔ trom ni aŋmɛ naa, ejaakɛ tookwɛlɔ lɛ pɛ ji mɔ ni esumɔɔ. Eto eyiŋ akɛ ekɛ lɛ baabote gbalashihilɛ mli, no hewɔ lɛ ekpoo maŋtsɛ lɛ nibimɔ lɛ. Ehãaa nɔ ko nɔ ko atsake ejwɛŋmɔ. Etsɔ tamɔ “gbogbo,” shi jeee “agbó” ní mɔ fɛɛ mɔ kɛkɛ baanyɛ agbele. (Lalai Amli Lala 8:8-10) Nakai nɔŋŋ esa akɛ Kristofoi enyɔ ni eto amɛyiŋ akɛ amɛbaabote gbalashihilɛ mli lɛ aye amɛhe anɔkwa. Esaaa akɛ amɛnáa suɔmɔ amɛhãa mɔ kroko.

16. Kɛ́ okɛ mɔ ko miinyiɛ kɛhã gbalashihilɛ lɛ, mɛni obaanyɛ okase kɛjɛ Lalai Amli Lala wolo lɛ mli?

¹⁶ Be ni tookwɛlɔ lɛ kɛɛ oblayoo lɛ  akɛ amɛyashara shi lɛ, enyɛmimɛi hii lɛ eŋmɛɛɛ lɛ gbɛ. Moŋ lɛ, amɛtsu lɛ ni eyabu amɛweintromi lɛ ahe. Mɛni hewɔ amɛfee nakai? Ani amɛheee amɛnyɛmi yoo lɛ amɛyeee? Ani amɛyasusu akɛ ekɛ tookwɛlɔ lɛ miitao afee nɔ ko ni esaaa? Dabi. Oblayoo lɛ nyɛmimɛi hii lɛ miitao abu ehe koni ekɛ ehe akayawo shihilɛ ko ni baanyɛ aka lɛ ní efee nɔ ko ni esaaa lɛ mli. (Lalai Amli Lala 1:6; 2:10-15) Kɛ́ okɛ mɔ ko miinyiɛ kɛhã gbalashihilɛ lɛ, mɛɛ gbɛ nɔ nyɛbaanyɛ nyɛtsi nyɛhe kɛjɛ shihilɛi ni baanyɛ ahã nyɛkɛ nyɛhe awo bɔlɛnamɔ jeŋba sha mli lɛ ahe? Nyɛtsɔa hiɛ nyɛkpɛa nyɛyiŋ yɛ nibii ni nyɛfeŋ lɛ ahe koni nyɛnyiɛmɔ lɛ afee nɔ ni hiɛ yɔɔ nyam. Ekaba kɔkɔɔkɔ akɛ nyɛyi enyɔ lɛ pɛ nyɛbaahi he ko ni mɔ ko enaaa nyɛ. Nyɛfea nibii ni tsɔɔ akɛ nyɛsumɔɔ nyɛhe, shi nyɛfea nakai yɛ gbɛ ni he tse nɔ.

17, 18. Mɛɛ gbɛ nɔ oná nɔ ni wɔkase yɛ Lalai Amli Lala wolo lɛ mli lɛ he sɛɛ?

¹⁷ Yehowa miisumɔ ni gbalashihilɛi fɛɛ asɛɛ atsɛ. Eesumɔ ni wumɛi kɛ ŋamɛi asumɔ amɛhe. Ŋwanejee ko bɛ he akɛ kɛ́ mɛi bote gbalashihilɛ mli lɛ, amɛsumɔɔ amɛhe waa. Shi kɛ́ amɛgbãla lɛ baahi shi daa lɛ, esa akɛ amɛhã amɛsuɔmɔ lɛ aya nɔ emli awa, tamɔ la ni miitso be fɛɛ be, ní gbooo.—Marko 10:6-9.

¹⁸ Kɛ́ obaasumɔ ni obote gbalashihilɛ mli lɛ, taomɔ mɔ ko ni obaanyɛ okɛ otsui fɛɛ ahã. Kɛ́ oná mɔ lɛ, nyɛbɔa mɔdɛŋ ni nyɛhãa suɔmɔ ni nyɛyɔɔ kɛhã nyɛhe lɛ mli awaa. Taakɛ wɔkase yɛ Lalai Amli Lala wolo lɛ mli lɛ, nuu kɛ yoo baanyɛ aná anɔkwa suɔmɔ ni hiɔ shi daa amɛhã amɛhe, ejaakɛ suɔmɔ tamɔ “Yehowa lalilɛi.”—Lalai Amli Lala 8:6.