YƐ APRIL 28, 2013 lɛ, afee kpee krɛdɛɛ ko yɛ Nagoya, yɛ Japan. Anthony Morris ni ji Gbɛtsɔɔmɔ Kuu lɛ mli nyo lɛ tswa sane ko ni yɔɔ miishɛɛ he adafi, akɛ ajie wolo hee ko kpo yɛ Japanese mli, ni eyitso ji The Bible—The Gospel According to Matthew. Mɛi ni fa fe 210,000 ba kpee lɛ, loo asha ahã amɛ be ni nifeemɔ lɛ yaa nɔ lɛ. Be ni amɛnu adafitswaa nɛɛ, amɛmii shɛ amɛhe waa, ni amɛtswa amɛdɛ̃ aahu.

Mateo Sanekpakpa ni yɔɔ New World Translation lɛ mli lɛ ji nɔ ni akɛfee wolo nɛɛ. Kɛ̃lɛ, wolo nɛɛ, ni hiɛ baafai 128 lɛ yɛ srɔto kwraa. Nyɛminuu Morris tsɔɔ mli akɛ aje gbɛ afee wolo nɛɛ ni akɛye abua mɛi ni yɔɔ Japan lɛ. Mɛni hãa esoroɔ wolo nɛɛ? Mɛni hewɔ ehe bahia ni akala? Ani mɛi enya he?

Bɔ ni ato niŋmai lɛ anaa yɛ wolo hee nɛɛ mli lɛ hã mɛi anaa kpɛ amɛhe waa. Abaanyɛ ato Japanese niŋmai lɛ anaa kɛjɛ ŋwɛi kɛyi shi loo kɛjɛ abɛku kɛya ninejurɔ. Kɛ́ okwɛ Japanese woji srɔtoi, ní wɔ diɛŋtsɛ wɔwoji lɛ hu fata he lɛ amli lɛ, obaana ni ato niŋmai lɛ anaa kɛjɛ abɛku kɛtee ninejurɔ. Shi, ato niŋmai ni yɔɔ wolo hee nɛɛ mli lɛ anaa kɛjɛ ŋwɛi kɛyi shi, taakɛ afɔɔ feemɔ yɛ Japanese adafitswaa woji kɛ woji krokomɛi ni abuɔ waa lɛ amli lɛ. Kɛ́ ato niŋmai lɛ anaa nakai lɛ, Japanbii babaoo nyaa ekanemɔ he. Agbɛnɛ hu, ajie saji ni akɛwoɔ baafai lɛ ayiteŋgbɛ yɛ Biblia lɛ mli lɛ, ni afee amɛ saneyitsei bibii yɛ wolo lɛ mli, koni mɔ ni kaneɔ lɛ ana otii titrii lɛ faŋŋ.

Be ni nyɛmimɛi ni yɔɔ Japan lɛ anine shɛ Matthew wolo lɛ nɔ lɛ, amɛbɔi kanemɔ amrɔ nɔŋŋ. Nyɛmi yoo ko ni eye fe afii 80 lɛ wie akɛ: “Mikane Mateo wolo lɛ shii abɔ, shi bɔ ni ato niŋmai lɛ anaa kɛjɛ ŋwɛi kɛyi shi lɛ, kɛ saneyitsei bibii lɛ ye ebua mi ni minu Gɔŋ nɔ Shiɛmɔ lɛ shishi jogbaŋŋ.” Nyɛmi yoo oblayoo ko ŋma akɛ: “Mikane Matthew wolo lɛ yɛ shitamɔ kome mli. Yɛ woji pii ni mikaneɔ lɛ amli lɛ, ato niŋmai lɛ anaa kɛjɛ abɛku kɛmiiya ninejurɔ, shi Japanbii pii nyaa woji ni ato emli niŋmai lɛ anaa kɛjɛ ŋwɛi kɛyi shi lɛ akanemɔ he.”

Mɛni hewɔ Biblia mli wolo kome nɛɛ he yɔɔ sɛɛnamɔ waa kɛhã Japanbii lɛ? Eyɛ mli akɛ Japanbii babaoo leee Biblia lɛ he nɔ ko tsɔ moŋ, shi amɛmiisumɔ ni amɛkane. No hewɔ lɛ, wolo nɛɛ baahã mɛi ni enako Biblia lɛ dã lɛ hegbɛ ní amɛná emli woji lɛ ekome ní amɛkane.

Mɛni hewɔ ahala Mateo wolo lɛ? Kɛ́ Japanbii babaoo nu wiemɔ ni ji “Biblia” lɛ, amɛjwɛŋmɔ yaa Yesu Kristo nɔ. No hewɔ ni ahala Mateo wolo lɛ, ejaakɛ aŋma Yesu wekutɔkpãa, efɔmɔ, e-Gɔŋ nɔ Shiɛmɔ ni ehe gbɛ́i lɛ, kɛ egbalɛ ni kɔɔ naagbee gbii lɛ ahe lɛ he sane yɛ nakai wolo lɛ mli. Japanbii pii nyaa saji nɛɛ ahe.

 Shiɛlɔi ni yɔɔ Japan lɛ kɛ wolo hee nɛɛ bɔi hamɔ yɛ shĩa fɛɛ shĩa shiɛmɔ nitsumɔ lɛ mli, kɛ agbɛnɛ hu, be ni amɛfeɔ sɛɛkuukɛsaramɔi lɛ, ni amɛfee enɛ kɛ ekãa. Nyɛmi yoo ko ŋma akɛ: “Amrɔ nɛɛ, miná gbɛ kroko ni manyɛ matsɔ nɔ mikɛ Nyɔŋmɔ Wiemɔ lɛ ahã mɛi ni yɔɔ wɔshikpɔŋkuku lɛ mli lɛ. Anɔkwa, gbi ni afee kpee krɛdɛɛ lɛ nɔ nɔŋŋ lɛ, minyɛ mihã mɔ ko Matthew wolo lɛ eko shwane mli!”

Mɛɛ gbɛ nɔ shiɛlɔi tsɔɔ amɛkɛ wolo hee nɛɛ hãa mɛi? Japanbii babaoo enu wiemɔi tamɔ “agbó fintɔŋŋ,” ‘adiagbai yɛ kpolotoi ahiɛ,’ kɛ “nyɛkafea yeyeeye yɛ wɔ́ he kɔkɔɔkɔ” lɛ pɛŋ. (Mateo 6:34; 7:6, 13) Kɛ́ amɛná amɛle akɛ Yesu Kristo ji mɔ ni wie wiemɔi nɛɛ, amɛnaa kpɛɔ amɛhe. Kɛ́ amɛna wiemɔi nɛɛ yɛ Matthew wolo lɛ mli lɛ, amɛteŋ mɛi babaoo kɛɔ akɛ: “Mishwe waa ni makane Biblia lɛ, kɛ́ hooo kwraa lɛ shi kome.”

Kɛ́ shiɛlɔi ku amɛsɛɛ amɛtee mɛi ni ŋɔ Matthew wolo lɛ eko lɛ aŋɔɔ lɛ, shĩatsɛmɛi lɛ fɔɔ wiemɔ akɛ, be ni amɛnine shɛ wolo lɛ nɔ nɔŋŋ ni amɛkane efã ko loo wolo muu lɛ fɛɛ po. Nuu ko ni eye fe afii 60 lɛ kɛɛ shiɛlɔ ko akɛ: “Mikane lɛ shii abɔ, ni ehã mimii shɛ mihe. Ofainɛ tsɔɔmɔ mi Biblia lɛ mli saji babaoo.”

Akɛ Matthew wolo lɛ hãa yɛ maŋ odaseyeli nitsumɔ lɛ mli hu. Odasefonyo ko ni miitsu maŋ odaseyeli nitsumɔ lɛ kɛ e-mail adrɛs ni eyɔɔ lɛ hã yoo ko ni ŋɔ wolo lɛ eko lɛ. Ŋmɛlɛtswaa kome sɛɛ lɛ, yoo lɛ ŋma nyɛmi yoo lɛ kɛtsɔ e-mail lɛ nɔ, ni ekɛɛ lɛ akɛ ekane wolo lɛ fã ko ni eetao ele babaoo. No sɛɛ otsi lɛ, akɛ yoo lɛ bɔi Biblia lɛ kasemɔ, ni no sɛɛ etsɛɛɛ lɛ, ebɔi asafoŋ kpeei yaa.

Akɛ Matthew wolo lɛ nɔ ni fa fe 1,600,000 emaje asafoi ni yɔɔ Japan lɛ. Daa nyɔɔŋ nɔ lɛ, Odasefoi ni yɔɔ jɛmɛ lɛ hãa wolo nɛɛ akpei nyɔŋmai abɔ. Wolo nɛɛ hiɛkpamɔ wiemɔ lɛ hãa wɔnaa bɔ ni mɛi ni fee wolo lɛ nuɔ he amɛhãa. Efã ko kaneɔ akɛ: “Wɔheɔ wɔyeɔ akɛ, kɛ́ okane wolo nɛɛ, ebaahã oná Biblia lɛ he miishɛɛ waa.”