Okɛ Miishɛɛ kɛ Ekãa Atsu Shiɛmɔ Nitsumɔ lɛ Daa
SANE kpakpa lɛ shiɛmɔ ji nitsumɔ ni he hiaa fe fɛɛ ni atsuɔ yɛ shikpɔŋ lɛ nɔ ŋmɛnɛ. Eji hegbɛ kpele akɛ wɔɔdamɔ Yehowa najiaŋ yɛ nitsɔɔmɔ nitsumɔ nɛɛ mli. Shi bei komɛi lɛ, ewaa kɛhãa gbɛgbalɔi kɛ shiɛlɔi akɛ amɛaaya nɔ amɛtsu shiɛmɔ nitsumɔ lɛ kɛ miishɛɛ. Mɛni hewɔ?
Mɛni baanyɛ aye abua bo ni oya nɔ oshiɛ sane kpakpa lɛ kɛ miishɛɛ?
Shiɛlɔi komɛi náaa mɛi amɛkɛgba sane kɛ́ amɛmiitsu shĩa fɛɛ shĩa shiɛmɔ nitsumɔ lɛ, ejaakɛ amɛyaninaaa mɛi pii yɛ shĩa. Ni kɛ́ amɛyanina mɛi yɛ shĩa po lɛ, ekolɛ mɛi lɛ naaa Maŋtsɛyeli sane lɛ he miishɛɛ, loo amɛmli baanyɛ fũɔ po. Shiɛlɔi komɛi hu yɛ shikpɔŋkuku agbo, ni mɛi ni yɔɔ mli lɛ boɔ amɛ toi, shi amɛnuɔ he akɛ amɛnyɛŋ amɛtsu shikpɔŋkuku lɛ mli nii amɛgbe naa kɔkɔɔkɔ. Mɛi krokomɛi hu anijiaŋ eje wui, ejaakɛ amɛkɛ afii babaoo eshiɛ, shi loloolo lɛ naagbee lɛ bako.
Wɔkɛ naagbai ni baanyɛ afite miishɛɛ ni wɔyɔɔ yɛ shiɛmɔ nitsumɔ lɛ mli lɛ baakpe. Satan Abonsam, ni ji “mɔ fɔŋ lɛ,” ji mɔ ni yeɔ jeŋ ni wɔyɔɔ mli nɛɛ nɔ, no hewɔ lɛ wɔle akɛ wɔnaŋ sane kpakpa lɛ shiɛmɔ mlɛo.
Ekɔɔɔ he eko naagbai ni okɛbaakpe yɛ shiɛmɔ nitsumɔ lɛ mli lɛ, ná nɔmimaa akɛ Yehowa baaye abua bo ni oye amɛnɔ. Shi mɛni obaanyɛ ofee koni oya nɔ okɛ ekãa kɛ miishɛɛ ashiɛ sane kpakpa lɛ? Hã wɔsusu ŋaawoi komɛi ahe wɔkwɛ.
YE OBUA SHIƐLƆI HEI
Daa afi lɛ, abaptisiɔ mɛi akpei abɔ akɛ Yehowa Odasefoi. Kɛji abaptisi bo etsɛko lɛ, obaanyɛ okase nibii babaoo kɛjɛ mɛi ni kɛ afii babaoo eshiɛ lɛ adɛŋ. Ni kɛ́ okɛ afii babaoo eshiɛ lɛ, ani obaanyɛ oye obua kɛtsɔse shiɛlɔi hei? Kɛ́ ofee nakai lɛ, otsui baanyɔ omli waa.
Yesu le akɛ dani ekaselɔi lɛ baanyɛ abatsɔmɔ tsɔɔlɔi ni he esa lɛ, ehe miihia ni etsɔse amɛ. No hewɔ lɛ, etsɔɔ amɛ bɔ ni ashiɛɔ. (Luka 8:1) Tsɔsemɔ ni tamɔ nakai nɔŋŋ he miihia shiɛlɔi hei ŋmɛnɛ, koni amɛbatsɔmɔ tsɔɔlɔi ni he esa.
Esaaa akɛ wɔsusuɔ akɛ shiɛmɔ kɛkɛ ni shiɛlɔ hee ko baaya lɛ pɛ baanyɛ ahã ele bɔ ni atsɔɔ nii. Esa akɛ mɔ ko ajɛ mlihilɛ kɛ suɔmɔ mli etsɔse lɛ. Luka 6:40) Ni kɛ́ shiɛlɔ hee lɛ na akɛ mɔ ko yɛ ni baaye abua lɛ lɛ, ebaaná ekãa. Kɛ́ shiɛlɔ ni he esa lɛ jie mɔ hee lɛ yi ni ewo lɛ ŋaa lɛ, no hu baaye abua lɛ.
OKƐ MƆ NI OKƐNYIƐ SHIƐMƆ NƆ LƐ AGBA SANE
Bei komɛi lɛ, yɛ mɔdɛŋ ni obaabɔ ni okɛ mɛi awie lɛ fɛɛ sɛɛ lɛ, onaŋ mɔ ko ni okɛ lɛ agba sane jogbaŋŋ; mɔ pɛ ni obaaná ji mɔ ni okɛnyiɛ shiɛmɔ nɔ lɛ. Kaimɔ akɛ Yesu tsu ekaselɔi lɛ “enyɔnyɔɔnyɔ.” (Luka 10:1) Enɛ hã amɛnyɛ amɛwo amɛhe hewalɛ ni amɛye amɛbua amɛhe be ni amɛshiɛɔ lɛ. Kɛ́ wɔkɛ wɔnyɛmimɛi miitsu nii yɛ shiɛmɔ nitsumɔ lɛ mli lɛ, eji hegbɛ kpele ni wɔná ni ‘wɔkɛaawowoo wɔhe hewalɛ.’
Mɛɛ saji nɛkɛ nyɛbaanyɛ nyɛgba? Ani nyɛteŋ mɔ ko ená niiashikpamɔ ko ni woɔ mɔ hewalɛ yɛ shiɛmɔ nitsumɔ lɛ mli nyɛsɛɛ nɛɛ? Ani okase nɔ ko ni yɔɔ miishɛɛ be ni ofeɔ aŋkro nikasemɔ loo weku nikasemɔ lɛ? Ani nɔ ko ni onu yɛ asafoŋ kpee ko shishi lɛ ewo bo hewalɛ? Ekolɛ onako hegbɛ okɛ mɔ ni okɛnyiɛ shiɛmɔ nɔ lɛ agba sane koni okɛle lɛ jogbaŋŋ. Obaanyɛ obi lɛ bɔ ni fee ni eba anɔkwale lɛ mli. Mɛni hã eyiŋ tsɔ akɛ Yehowa asafo lɛ nɛ? Mɛɛ hegbɛi loo niiashikpamɔi ená pɛŋ? Ekolɛ obaanyɛ ogba lɛ bo diɛŋtsɛ oniiashikpamɔi lɛ ekomɛi. Kɛ́ okɛ mɔ ko tsu nii yɛ shiɛmɔ nitsumɔ lɛ mli lɛ, eji hegbɛ fɛfɛo ní nyɛná ní ‘nyɛkɛaatswatswaa nyɛhe nyɛma shi,’ ekɔɔɔ he eko bɔ ni mɛi baafee amɛnii amɛhã yɛ shikpɔŋkuku lɛ mli.
FEEMƆ AŊKRO NIKASEMƆ NI MƆƆ SHI BE FƐƐ BE
Kɛ́ wɔbaaya nɔ wɔná miishɛɛ yɛ shiɛmɔ nitsumɔ lɛ mli lɛ, ehe miihia ni wɔfee aŋkro nikasemɔ ni mɔɔ shi be fɛɛ be. “Nyɔŋ anɔkwafo kɛ hiɛshikalɔ lɛ” ehã wɔ saji srɔtosrɔtoi babaoo ni wɔbaanyɛ wɔkase. (Mateo 24:45) Nyɛhãa wɔkwɛa sane ko ni he hiaa ni wɔbaanyɛ wɔsusu he be ni wɔfeɔ aŋkro nikasemɔ lɛ. No ji: Mɛni hewɔ shiɛmɔ nitsumɔ lɛ he hiaa waa lɛ? Akrabatsa ni yitso ji, “ Mɛni Hewɔ Esa akɛ Okɛ Miishɛɛ kɛ Ekãa Atsu Shiɛmɔ Nitsumɔ lɛ Daa Lɛ?” hãa wɔnaa yiŋtoi komɛi ahewɔ ni shiɛmɔ nitsumɔ lɛ he hiaa waa lɛ.
Kɛ́ osusu otii ni awie he yɛ akrabatsa lɛ mli lɛ ahe lɛ, ebaatsirɛ bo ni oya nɔ okɛ ekãa ashiɛ. Obaanyɛ oŋmala Ŋmalɛ naa yiŋtoi krokomɛi ahewɔ ni ehe miihia ni okɛ ekãa ashiɛ lɛ oshwie shi be ni ofeɔ aŋkro nikasemɔ lɛ. No sɛɛ lɛ, jwɛŋmɔ nɔ. Kɛ́ ofee nakai lɛ, ebaahã omii ashɛ ohe babaoo yɛ shiɛmɔ nitsumɔ lɛ mli.
KAA GBƐI KROKOMƐI NI ATSƆƆ NƆ ASHIƐƆ LƐ OKWƐ
Be fɛɛ be lɛ, Yehowa asafo lɛ tsɔɔ wɔ gbɛi srɔtoi ni wɔbaanyɛ wɔtsɔ nɔ wɔya wɔhiɛ yɛ shiɛmɔ nitsumɔ lɛ mli. Akɛ nɔkwɛmɔnɔ lɛ, yɛ shĩa fɛɛ shĩa shiɛmɔ nitsumɔ lɛ sɛɛ lɛ, wɔbaanyɛ wɔka shiɛmɔ gbɛi krokomɛi tamɔ woloŋmaa, tɛlifoŋ nɔ odaseyeli, gbɛjegbɛi ahe odaseyeli, maŋ odaseyeli, odase ni ayeɔ be ni anyiɛɛɛ shiɛmɔ nɔ, loo odase ni ayeɔ yɛ shikpɔŋkukuji ni nitsumɔhei yɔɔ mli lɛ amli wɔkwɛ. Ekolɛ wɔbaanyɛ wɔto gbɛjianɔ hu ni wɔyashiɛ yɛ hei ni Odasefoi faaa yɛ, loo hei ni Odasefonyo ko kwraa bɛ.
Ani oyɛ he miishɛɛ akɛ obaaka shiɛmɔ gbɛ ko ni okɛtsuko nii pɛŋ lɛ okwɛ? Mɛi ni efee nakai lɛ ateŋ mɛi babaoo eye omanye. Susumɔ nɔkwɛmɔnii etɛ komɛi ahe okwɛ.
Nyɛmi yoo ko ni atsɛɔ lɛ April lɛ kɛ gbɛtsɔɔmɔ ko ni je kpo yɛ Wɔ Maŋtsɛyeli Sɔɔmɔ lɛ mli, ni kɔɔ bɔ ni aaafee aje Biblia mli nikasemɔi ashishi lɛ tsu nii. Ebi mɛi etɛ ni yɔɔ he ni etsuɔ nii yɛ lɛ kɛji amɛbaasumɔ ni ekɛ amɛ akase Biblia lɛ. April naa kpɛ ehe ni emii shɛ ehe be ni mɛi etɛ lɛ fɛɛ kpɛlɛ ni ekɛ amɛ akase nii, ní amɛbɔi asafoŋ kpeei baa lɛ.
Awoɔ wɔ hewalɛ hu ni wɔtao mɛi ni baanya saji pɔtɛi komɛi ahe yɛ wɔwoji tɛtrɛbii lɛ amli. Kpokpaa nɔkwɛlɔ ko ni yɔɔ United States lɛ kɛ sane ko ni je kpo yɛ Awake! lɛ mli, ni kɔɔ tsɔne tai he lɛ hã
shwapotsɛmɛi fɛɛ ni hɔɔ tai yɛ akutso ko mli lɛ. Agbɛnɛ hu ekɛ eŋa kɛ sane ko ni je kpo yɛ Awake! lɛ mli, ni yitso ji, “Understanding Your Doctor” (Odatrɛfonyo lɛ Shishi ni Ooonu) lɛ tsɔɔ datrɛfoi fe 100. Be ni kpokpaa nɔkwɛlɔ lɛ kɛ eŋa lɛ bale mɛi ni yɔɔ shikpɔŋkuku lɛ mli jogbaŋŋ lɛ, amɛnyɛ amɛfee sɛɛkuukɛsaramɔi babaoo.Nyɛmi yoo ko ni atsɛɔ lɛ Judy lɛ ŋma wolo emaje asafo lɛ yitso lɛ kɛtsɔɔ bɔ ni ehiɛ esɔ hewalɛwoo ni akɛhã wɔ akɛ wɔka tɛlifoŋ nɔ odaseyeli wɔkwɛ lɛ. Ewie akɛ, enyɛ awo ní eye afii 86, ní hela fɔɔ lɛ mɔmɔ lɛ, shiɛɔ ehãa mɛi kɛtsɔɔ tɛlifoŋ nɔ be fɛɛ be. Enɛ hã ekɛ yoo ko ni eye afii 92 lɛ je Biblia mli nikasemɔ shishi!
Kɛ́ wɔkɛ ŋaawoi ni akɛhãa yɛ wɔwoji lɛ amli lɛ tsu nii lɛ, ewoɔ yibii kpakpai. No hewɔ lɛ, kaa okwɛ! Amɛbaanyɛ amɛye amɛbua bo ni oya nɔ okɛ miishɛɛ kɛ ekãa atsu shiɛmɔ nitsumɔ lɛ.
OKƐ OTII NI OBAANYƐ OSHƐ HE AMAMƆ OHIƐ
Mɛni tsɔɔ akɛ wɔye omanye yɛ shiɛmɔ nitsumɔ lɛ mli? Jeee woji abɔ ni wɔhãa, Biblia mli nikasemɔi abɔ ni wɔfeɔ, loo mɛi abɔ ni wɔyeɔ wɔbuaa ni amɛbatsɔmɔɔ Yehowa Odasefoi lɛ ni tsɔɔ akɛ wɔye omanye. Susumɔ Noa he okwɛ. Noa náaa mɔ kome po abafata eweku lɛ he kɛsɔmɔ Yehowa! Fɛɛ sɛɛ lɛ, wɔbaanyɛ wɔwie kɛ nɔmimaa akɛ Noa ye omanye yɛ shiɛmɔ nitsumɔ lɛ mli. Nɔ ni he hiaa ji ni wɔkɛ anɔkwayeli baasɔmɔ Yehowa.
Shiɛlɔi babaoo ena akɛ, kɛ́ amɛmii baashɛ amɛhe yɛ shiɛmɔ nitsumɔ lɛ mli lɛ, ehe baahia ni amɛkɛ otii ni amɛbaanyɛ amɛshɛ he amamɔ amɛhiɛ. Mɛni ji otii nɛɛ ekomɛi? Atsĩ fioo komɛi atã yɛ akrabatsa ni yitso ji “ Okɛ Otii ni Obaanyɛ Oshɛ he Amamɔ Ohiɛ” lɛ mli.
Bi Yehowa ni eye ebua bo koni oshiɛmɔ nitsumɔ lɛ amɔ shi, ní ewo yibii. Kɛ́ oshɛ otii ni okɛmamɔ ohiɛ lɛ ahe lɛ, otsui baanyɔ omli, ejaakɛ ole akɛ okɛ onyɛmɔ fɛɛ miishiɛ sane kpakpa lɛ.
Eji anɔkwale akɛ sane kpakpa lɛ shiɛmɔ kaaa shi akɔɔɔ. Shi nibii babaoo yɛ ni obaanyɛ ofee koni miishɛɛ kɛ ekãa ni okɛtsuɔ shiɛmɔ nitsumɔ lɛ naa akaba shi. Okɛ mɔ ni okɛnyiɛ shiɛmɔ nɔ lɛ agba sane ni tswaa mɔ emaa shi, feemɔ aŋkro nikasemɔ ni mɔɔ shi be fɛɛ be, kaa ŋaawoi ni nyɔŋ anɔkwafo kɛ hiɛshikalɔ lɛ kɛhãa lɛ okwɛ, ni okɛ otii ni obaanyɛ oshɛ he amamɔ ohiɛ. Nɔ ni fe fɛɛ lɛ, kaimɔ akɛ Yehowa Nyɔŋmɔ ehã bo hegbɛ kpele akɛ oshiɛ sane kpakpa lɛ akɛ e-Dasefoi lɛ ateŋ mɔ kome. (Yesaia 43:10) Kɛ́ otee nɔ okɛ ekãa tsu shiɛmɔ nitsumɔ lɛ, obaaná miishɛɛ babaoo!