Nyɔŋmɔ tsuji oshijafoi komɛi ewie nibii ni tamɔ nakai. Amɛle akɛ Yehowa miisumɔ ni etsuji abote gbalashihilɛ mli “yɛ Nuŋtsɔ lɛ mli pɛ,” ni tsɔɔ akɛ, eesumɔ ni amɛkɛ mɛi ni ji anɔkwa Kristofoi pɛ ahi shi. (1 Korintobii 7:39) Kɛ́ nakai lɛ, mɛni hewɔ amɛwieɔ nibii ni tamɔ nakai?

Ekolɛ, Kristofoi ni wieɔ nibii ni tamɔ nakai lɛ nuɔ he akɛ nyɛmimɛi yei oshijafoi ayi fa fe nyɛmimɛi hii oshijafoi. Ni lɛɛlɛŋ, nakai sane lɛ ji yɛ maji pii anɔ. Akɛ nɔkwɛmɔnɔ lɛ, yɛ Korea lɛ, kɛ́ ohala nyɛmimɛi oshijafoi 100 lɛ, amɛteŋ mɛi 57 ji yei, ni mɛi 43 ni eshwɛ lɛ ji hii. Ni yɛ Colombia lɛ, amɛteŋ mɛi 66 ji yei, ni mɛi 34 ni eshwɛ lɛ ji hii.

Agbɛnɛ hu yɛ hei komɛi lɛ, shika kɛ nibii krokomɛi ni fɔlɔi ni jeee Odasefoi lɛ heɔ dani amɛkɛ amɛbiyei hãa gbala lɛ fa tsɔ, ni ekolɛ nyɛmimɛi hii lɛ ashika shɛŋ nɔ ni fɔlɔi lɛ biɔ lɛ. Enɛ hewɔ lɛ, nyɛmimɛi yei komɛi sheɔ gbeyei akɛ amɛnaŋ wu ni ji Kristofonyo. *—Kwɛmɔ shishigbɛ niŋmaa lɛ.

Kɛji oná susumɔi ni tamɔ nakai pɛŋ lɛ, ná nɔmimaa akɛ Yehowa nuɔ oshihilɛ lɛ shishi, ni ele bɔ ni onuɔ he ohãa lɛ jogbaŋŋ.—2 Kronika 6:29, 30.

Fɛɛ sɛɛ lɛ, Yehowa fãa wɔ yɛ Biblia lɛ mli akɛ, wɔbote gbalashihilɛ mli yɛ Nuŋtsɔ lɛ mli pɛ. Mɛni hewɔ? Ejaakɛ ele nɔ ni hi hã wɔ, ni eesumɔ ni ebu wɔhe. Esumɔɔɔ ni wɔkpɛɔ yiŋ gbohii komɛi ni baaye wɔ awui loo ni baafite wɔmiishɛɛ. Yɛ Nehemia beiaŋ lɛ, Yudafoi pii kɛ yei ni jáaa Nyɔŋmɔ bote  gbalashihilɛ mli. No hewɔ lɛ, Nehemia tsɛ amɛjwɛŋmɔ yisɛɛ kɛtee Solomon nɔkwɛmɔnɔ gbonyo lɛ nɔ. Ewie yɛ Solomon he akɛ, “e-Nyɔŋmɔ lɛ sumɔɔ lɛ, ni Nyɔŋmɔ wo lɛ maŋtsɛ yɛ Israel muu lɛ fɛɛ nɔ; kɛ̃lɛ lɛ po maŋsɛɛ yei lɛ hã efee esha.” (Nehemia 13:23-26) Yehowa le akɛ ekaimɔi lɛ hi hã wɔ, ni no hewɔ ekɛɔ Kristofoi akɛ amɛbote gbalashihilɛ mli yɛ Nuŋtsɔ lɛ mli pɛ lɛ. (Lala 19:8-11; Yesaia 48:17, 18) Kwɛ bɔ ni wɔdaa Yehowa shi waa akɛ ejɛ suɔmɔ mli ewo wɔ ŋaa kpakpa ni tamɔ nɛkɛ! Kɛ́ wɔboɔ lɛ toi akɛ wɔ-Nɔyelɔ lɛ, wɔbaakpɛlɛ nɔ akɛ eyɛ hegbɛ ni etsɔɔ wɔ nɔ ni esa akɛ wɔfee.—Abɛi 1:5.

Ekã shi faŋŋ akɛ, osumɔŋ ni ohi ‘kɔɔŋtso ko ni eŋmɛɛɛ pɛpɛɛpɛ’ shishi, ni tsɔɔ akɛ, osumɔŋ ni okɛ mɔ ko ni sumɔɔɔ Yehowa abote gbalashihilɛ mli. Mɔ ko ni tamɔ nakai lɛ baanyɛ ahã okpa Nyɔŋmɔ jamɔ. (2 Korintobii 6:14) Nyɔŋmɔ ŋaawoi lɛ hi be fɛɛ be, ni Kristofoi ni yɔɔ ŋmɛnɛ lɛ ateŋ mɛi babaoo ejɛ nilee mli amɛhala akɛ amɛbaabo Yehowa toi. Shi mɛi komɛi hu eyafeee nakai.

Nyɛmi yoo ko ni jɛ Australia, ni atsɛɔ lɛ Maggy lɛ, kɛ mɔ ko ni jeee anɔkwa Kristofonyo bɔi nyiɛmɔ kɛhã gbalashihilɛ. * (Kwɛmɔ shishigbɛ niŋmaa lɛ.) Ewie akɛ: “Mifolɔ asafoŋ kpeei babaoo amli koni manyɛ mahi emasɛi kɛkɛ. Miishɛɛ ni miyɔɔ kɛhã mumɔŋ nibii lɛ nɔ bagbɔ kwraa.” Oblayoo kroko ko ni jɛ India, ni atsɛɔ lɛ Ratana lɛ, kɛ oblanyo ko ni ekɛyaa skul ni miikase Biblia lɛ bɔi nyiɛmɔ kɛhã gbalashihilɛ. Asomoaŋ, nyiɛmɔ ni oblanyo lɛ taoɔ ekɛ lɛ anyiɛ lɛ hewɔ ekaseɔ Biblia lɛ. Naagbee lɛ, Ratana kpa Yehowa sɔɔmɔ ni ekɛ ehe yadɔmɔ jamɔ kroko bɔ ni afee ni enyɛ ekɛ nakai oblanyo lɛ abote gbalashihilɛ mli.

Be ni Ndenguè ni jɛ Cameroon lɛ ná afii 19 lɛ, ekɛ nuu ko ni jáaa Yehowa lɛ bote gbalashihilɛ mli. Dani nuu lɛ baakpee lɛ lɛ, ewo lɛ shi akɛ ebaaŋmɛ lɛ gbɛ ni eya nɔ ehi shi akɛ Odasefonyo. Shi amɛyookpeemɔ lɛ sɛɛ otsii enyɔ pɛ kɛkɛ ni ewu lɛ kɛɛ lɛ akɛ ekaya asafoŋ kpeei dɔŋŋ. Ndenguè wie akɛ: “Mihe bafee shoo ni mifo daa. Mibayɔse akɛ mibɛ mi diɛŋtsɛ mishihilɛ nɔ hewalɛ dɔŋŋ. Mishwa mihe waa.”

Kristofoi komɛi ahefatalɔi ni sɔmɔɔɔ Yehowa lɛ amli hi ni amɛnuɔ nii ashishi. Shi kɛ́ oyaná hefatalɔ ni tamɔ nakai po lɛ, te onifeemɔ lɛ baasa wekukpaa ni kã okɛ Yehowa teŋ lɛ he tɛŋŋ? Ni kɛ́ okai akɛ oku ohiɛ oshwie ŋaa ní Yehowa wo bo ni baahã oná miishɛɛ lɛ nɔ lɛ, te obaanu he tɛŋŋ? Nɔ ni fe fɛɛ lɛ, te Yehowa baanu he tɛŋŋ yɛ nɔ ni ofee lɛ he?—Abɛi 1:33.

Nyɛmimɛi hii kɛ yei ni jɛ je lɛŋ hei srɔtoi, ní kɛ ŋaa ni Yehowa ewo akɛ abote gbalashihilɛ mli “yɛ Nuŋtsɔ lɛ mli pɛ” lɛ etsu nii lɛ, ena faŋŋ akɛ nilee yɛ mli waa akɛ aaafee nakai. Nyɛmimɛi oshijafoi, hii kɛ yei fɛɛ, etswa amɛfai shi akɛ amɛkɛ mɛi ni jáa Yehowa baabote gbalashihilɛ mli, koni Yehowa tsui anyɔ emli. Nyɛmi yoo ko ni yɔɔ Japan, ni atsɛɔ lɛ Michiko lɛ, tswa efai shi akɛ ebaabo Nyɔŋmɔ toi, eyɛ mli akɛ ewekumɛi nyɛ enɔ ni ekɛ nuu ko ni sumɔɔɔ Yehowa lɛ abote gbalashihilɛ mli. Nɔ ni fite sane lɛ kwraa ji akɛ, ena ni anɔkwa Kristofoi miikpee enanemɛi lɛ ekomɛi, shi lɛ lɛ ekã he eji oshijafo. Michiko wie be ni ekɛhi shi akɛ oshijafo lɛ he akɛ: “Mitee nɔ mikɛɛ mihe akɛ, Yehowa ji ‘miishɛɛ Nyɔŋmɔ,’ no hewɔ lɛ, jeee gbalamlibotemɔ nɔ wɔmiishɛɛ damɔ.” Ekɛfata he akɛ: “Miheɔ miyeɔ hu akɛ ehãa wɔ nibii ni kã wɔtsui nɔ. No hewɔ lɛ, kɛ́ wɔmiitao wɔbote gbalashihilɛ mli, ni wɔnáaa hefatalɔ po lɛ, ehi akɛ wɔɔya nɔ wɔhi shi oshija kɛyashi wɔbaaná eko.” (1 Timoteo 1:11) Sɛɛ mli lɛ, Michiko kɛ nyɛmi nuu ko ni bɔɔ mɔdɛŋ waa bote gbalashihilɛ mli, ni eyɛ miishɛɛ waa akɛ ebo Yehowa ŋaawoo lɛ toi.

Nyɛmimɛi hii komɛi hu hi shi oshija kɛyashi amɛná hefatalɔ ni sa. Akɛ nɔkwɛmɔnɔ lɛ, nyɛmi nuu ko ni jɛ Australia, ni atsɛɔ lɛ Bill lɛ, wie akɛ bei komɛi lɛ ená yei ni jeee Odasefoi ahe miishɛɛ. Kɛ̃lɛ, ekɛ amɛteŋ mɔ ko kwraa ebɔɔɔ gbagbalii, ejaakɛ esumɔɔɔ ni ekɛ ehe woɔ shihilɛ ko ni baahã ekɛ ‘mɔ ko ni heee yeee lɛ ayaje kɔɔŋtso kome shishi’ lɛ mli. Ebi nyɛmimɛi yei enyɔoo ko suɔmɔ, shi amɛkpɛlɛɛɛ nɔ amɛhãaa lɛ. Bill hi shi oshija afii 30 dani ená nyɛmi yoo ko ni sumɔɔ lɛ ni ekɛ lɛ hi shi. Ewie akɛ: “Mishwako mihe. Minuɔ he akɛ Yehowa ejɔɔ mi,  ejaakɛ wɔfeɔ ekome kɛyaa shiɛmɔ, wɔfeɔ ekome kɛkaseɔ nii, ni wɔfeɔ ekome kɛjáa Yehowa. Kɛ́ mikɛ miŋa lɛ nanemɛi kpe lɛ, wɔnáa miishɛɛ, ejaakɛ amɛ fɛɛ amɛjáa Yehowa. Wɔkɛ Biblia mli shishitoo mlai tsuɔ nii yɛ wɔgbalashihilɛ lɛ mli.”

Be ni oboɔ Yehowa ŋaawoo lɛ toi, ni omɛɔ ni oná hefatalɔ ni jáa lɛ lɛ, mɛni obaanyɛ ofee? Obaanyɛ osusu nɔ hewɔ ni oboteko gbalashihilɛ mli lɛ he. Kɛ́ onuɔ he akɛ Yehowa famɔ lɛ toi ni otaoɔ obo lɛ hewɔ oboteko gbalashihilɛ mli lɛ, no lɛ ná nɔmimaa akɛ Yehowa tsui nyɔɔ emli yɛ gbɛ ni okɔ lɛ he. (1 Samuel 15:22; Abɛi 27:11) Agbɛnɛ hu, yaa nɔ osɔle ohã Yehowa be fɛɛ be, ni okɛɛ lɛ bɔ ni onuɔ he ohãa diɛŋtsɛ. (Lala 62:9) Kɛ́ otee nɔ ofee bɔ fɛɛ bɔ ni ooonyɛ kɛwuu oshi kai kɛ akɔnɔi fɔji lɛ, wekukpãa ni yɔɔ okɛ Yehowa teŋ lɛ mli baaya nɔ awa gbi fɛɛ gbi. Ná nɔmimaa akɛ Yehowa susuɔ nibii ni oshweɔ kɛ nibii ni he hiaa bo lɛ ahe, ejaakɛ osane kã etsui nɔ. Yehowa woko mɔ ko shi akɛ ebaahã lɛ wu loo ŋa. Shi kɛ́ gbalashihilɛ ji nɔ diɛŋtsɛ ni he hiaa bo lɛ, Yehowa le gbɛ ni hi fe fɛɛ ni ebaanyɛ etsɔ nɔ eduro bo nɔ ni he hiaa bo lɛ.—Lala 145:16; Mateo 6:32.

Bei komɛi lɛ, obaanu he tamɔ David, mɔ ni wie akɛ: “Ohe afee oya ni ohere mi nɔ, Yehowa! Mimumɔ etɔ biti po: Kaaŋɔ ohiɛ otee mi.” (Lala 143:5-7, 10) Onijiaŋ akaje wui. Mɛɛ Yehowa koni etsɔɔ bo nɔ ni etaoɔ ni ofee. Bo lɛ toi kɛtsɔ Biblia lɛ ni obaakane ni ojwɛŋ nɔ jogbaŋŋ lɛ nɔ. Kɛ́ ofee nakai lɛ, obaale nɔ ni Yehowa taoɔ ni ofee kɛ bɔ ni eye ebua etsuji ni hi shi yɛ blema lɛ. Ni no baawaje bo koni oya nɔ oye efamɔi anɔ.

Akɛ oshijafo lɛ, mɛni ekoŋŋ obaanyɛ ofee koni oya nɔ oná miishɛɛ be ni omɛɔ Yehowa lɛ? Yaa nɔ owaje wekukpãa ni yɔɔ okɛ Yehowa teŋ lɛ, ni ofee nibii ni baahã oná gbɛ́i kpakpa. Feemɔ mɛi gbɔ, hã ohiɛ adɔ kɛ nitsumɔ, okɛ mɔ fɛɛ mɔ ahi shi jogbaŋŋ, ni oye Yehowa anɔkwa. Sui nɛɛ baahã oná miishɛɛ wɔsɛɛ kɛ́ obote gbalashihilɛ mli. (1 Mose 24:16-21; Rut 1:16, 17; 2:6, 7, 11; Abɛi 31:10-27) Taomɔ Maŋtsɛyeli lɛ klɛŋklɛŋ kɛtsɔ shiɛmɔ nitsumɔ lɛ kɛ asafoŋ nitsumɔi krokomɛi ni okɛ ohe baawo mli be fɛɛ be lɛ nɔ. Nakai ni ooofee lɛ baabu ohe koni okayafee nɔ ko ni esaaa. Bill, ni atsĩ etã kɛtsɔ hiɛ lɛ, wie be ni ekɛhi shi akɛ oshijafo lɛ he akɛ: “Amɛho oya! Mikɛ be lɛ tsu nii yɛ Yehowa sɔɔmɔ lɛ mli akɛ gbɛgbalɔ.”

Yehowa famɔ akɛ abote gbalashihilɛ mli “yɛ Nuŋtsɔ lɛ mli pɛ” lɛ be hoko, ni ehe yɛ sɛɛnamɔ. Kɛ́ ohala akɛ okɛ anɔkwa Kristofonyo baabote gbalashihilɛ mli lɛ, no tsɔɔ akɛ owoɔ Yehowa, ni no baahã omii ashɛ ohe. Biblia lɛ kɛɔ akɛ: “Ajɔɔ gbɔmɔ ni sheɔ Yehowa gbeyei, ni enáa ekitãi lɛ ahe tsui jogbaŋŋ lɛ! Ninámɔ kɛ nifalɛ aaahi ewe lɛ, ni ejalɛ lɛ hiɔ shi kɛyaa naanɔ.” (Lala 112:1, 3) Belɛ, tswaa ofai shi akɛ obaabo Nyɔŋmɔ famɔ akɛ abote gbalashihilɛ mli “yɛ Nuŋtsɔ lɛ mli pɛ” lɛ toi.