1. (a) Mɛni Nyɔŋmɔ webii le yɛ tsɔsemɔ he kɛjɛ blema? Ni mɛɛ gbɛ nɔ enɛ kɔɔ wɔhe ŋmɛnɛ? (b) Mɛni he wɔbaasusu yɛ nikasemɔ nɛɛ mli?

KƐJƐ blema lɛ, Nyɔŋmɔ webii le akɛ, kɛ́ atsɔse mɛi ni amɛle nɔ ko feemɔ jogbaŋŋ lɛ, amɛyeɔ omanye yɛ efeemɔ mli. Akɛ nɔkwɛmɔnɔ lɛ, Biblia lɛ wieɔ Abram tsuji lɛ ahe akɛ ‘amɛle ta he nii.’ Enɛ hewɔ lɛ, amɛnyɛ amɛye omanye be ni amɛtee amɛyakpɔ̃ Lot lɛ. (1 Mose 14:14-16) Awie yɛ lalɔi ni lá kɛjie Yehowa yi yɛ Maŋtsɛ David gbii lɛ amli lɛ ahe akɛ, amɛkase Yehowa lalai lɛ alamɔ, ni ‘amɛle lɛ jogbaŋŋ.’ (1 Kronika 25:7) Ekã shi faŋŋ akɛ, eji atsɔseee mɛi nɛɛ kulɛ, amɛnyɛŋ amɛle nibii srɔtoi nɛɛ afeemɔ jogbaŋŋ. Ŋmɛnɛ lɛ, wɔ hu wɔmiiwu wɔmiishi Satan kɛ eje lɛ. (Efesobii 6:11-13) Agbɛnɛ hu, wɔmiijie Yehowa yi kɛtsɔ egbɛ́i lɛ he sane ni wɔgbaa mɛi krokomɛi lɛ nɔ. (Hebribii 13:15, 16) Kɛ̃lɛ, taakɛ eji yɛ Nyɔŋmɔ tsuji ni hi shi yɛ blema lɛ agbɛfaŋ lɛ, ja atsɔse wɔ dani wɔbaanyɛ wɔye omanye yɛ nibii nɛɛ afeemɔ mli. Yehowa kɛ sɔ̃ efɔ̃ asafoŋ onukpai lɛ anɔ akɛ amɛtsɔse mɛi krokomɛi. (2 Timoteo 2:2) Mɛɛ gbɛi anɔ asafoŋ onukpai komɛi etsɔ amɛtsɔse nyɛmimɛi hii koni amɛnyɛ amɛye amɛbua kɛkwɛ Yehowa webii lɛ?

2. Dani asafoŋ onukpa ko baatsɔɔ nikaselɔ lɛ nii lɛ, mɛni ekolɛ ehe baahia ni efee? Ni mɛni hewɔ?

² Abaanyɛ akɛ asafoŋ onukpai ato okwaafoi ahe. Dani okwaafonyo ko baadũ dumɔwui lɛ, ekolɛ ehe baahia ni ekɛ nibii komɛi afutu sũ lɛ, koni dumɔnii lɛ anyɛ awo jogbaŋŋ. Nakai nɔŋŋ ekolɛ ehe baahia ni asafoŋ onukpa ko kɛ nikaselɔ ko asusu Biblia mli shishitoo mlai komɛi ahe dani etsɔɔ lɛ nii, koni no aye abua nikaselɔ lɛ ni ekɛ nɔ ni ebaatsɔɔ lɛ lɛ atsu nii.—1 Timoteo 4:6.

3. (a) Mɛɛ gbɛ nɔ asafoŋ onukpa ko baanyɛ ekɛ Yesu wiemɔi ni yɔɔ Marko 12:29, 30 lɛ atsu nii be ni ekɛ nikaselɔ ko gbaa sane lɛ? (b) Kɛ́ nikaselɔ lɛ nu ni asafoŋ onukpa lɛ miisɔle eehã lɛ lɛ, mɛɛ gbɛ nɔ ebaanyɛ ená enɔ hewalɛ?

³ Akɛ tsɔɔlɔ lɛ, ehe miihia ni ole bɔ ni anɔkwale lɛ ená nikaselɔ lɛ susumɔi kɛ ehenumɔi anɔ hewalɛ ehã. Obaanyɛ obi lɛ akɛ, ‘Mɛɛ gbɛ nɔ ohe nɔ ni ojɔɔ ohã Yehowa lɛ esa yiŋ srɔtoi ni okpɛɔ yɛ shihilɛ mli lɛ ahe?’ Obaanyɛ odamɔ hetoo ni ebaahã lɛ nɔ okɛ lɛ asusu nɔ ni mɔ ko baanyɛ afee kɛtsɔɔ akɛ eesɔmɔ Yehowa kɛ etsui muu fɛɛ lɛ he. (Kanemɔ Marko 12:29, 30.) Obaanyɛ okɛ lɛ asɔle ni obi Yehowa koni ehã lɛ mumɔ krɔŋkrɔŋ lɛ, koni ená tsɔsemɔ ni okɛbaahã lɛ lɛ he sɛɛ. Kɛ́ nyɛmi nuu lɛ nu ni oosɔle oohã lɛ lɛ, ebaanyɛ ewo lɛ hewalɛ ni efee babaoo!

4. (a) Tsɔɔmɔ Biblia mli saji komɛi ni baanyɛ aye abua nikaselɔ ko ni eya ehiɛ. (b) Kɛ́ asafoŋ onukpai miitsɔse mɛi lɛ, mɛɛ oti esa akɛ amɛkɛma amɛhiɛ?

⁴ Kɛ́ obɔi nikaselɔ lɛ tsɔsemɔ lɛ, ehi akɛ okɛ lɛ baasusu Biblia lɛ mli saji ni baahã ena nɔ hewɔ ni esa akɛ wɔye wɔbua mɛi krokomɛi, wɔfee mɛi ni anyɛɔ amuɔ afɔ̃ɔ amɛnɔ, ni wɔba wɔhe shi lɛ ahe. (1 Maŋtsɛmɛi 19:19-21; Nehemia 7:2; 13:13; Bɔfoi 18:24-26) Sui nɛɛ ahe miihia nikaselɔ lɛ tamɔ bɔ ni nibii ni okwaafonyo lɛ kɛfutuɔ sũ lɛ he hiaa dumɔnii lɛ. Sui nɛɛ baahã nikaselɔ lɛ aya ehiɛ oyayaayai. Asafoŋ onukpa ko ni jɛ France, ni atsɛɔ lɛ Jean-Claude lɛ wie akɛ, kɛ́ eetsɔse nikaselɔ ko lɛ, oti ni ekɛmaa ehiɛ ji, ni eye ebua nikaselɔ lɛ koni enyɛ edamɔ Biblia mli shishitoo mlai anɔ ekpɛ eyiŋ. Ewie hu akɛ, etaoɔ hegbɛi koni ekɛ nikaselɔ lɛ afee ekome kɛkane ŋmalɛ kome ko, bɔ ni afee ni ‘enyɛ egbele nikaselɔ lɛ hiŋmɛii’ ni ena ‘naakpɛɛ nii’ ni yɔɔ Nyɔŋmɔ Wiemɔ lɛ mli lɛ. (Lala 119:18) Mɛɛ gbɛi krokomɛi anɔ wɔbaanyɛ wɔtsɔ wɔye wɔbua nikaselɔi?

5. (a) Mɛni hewɔ ehe miihia ni akɛ nikaselɔ lɛ agba otii ni ekɛmamɔ ehiɛ yɛ Yehowa sɔɔmɔ lɛ mli lɛ ahe sane lɛ? (b) Mɛni hewɔ esa akɛ asafoŋ onukpai atsɔse nyɛmimɛi hii kɛjɛ amɛblahiiaŋ lɛ? (Kwɛmɔ shishigbɛ niŋmaa lɛ.)

⁵ Bi nikaselɔ lɛ otii ni ekɛmamɔ ehiɛ yɛ Yehowa sɔɔmɔ lɛ mli. Kɛ́ ekɛ oti ko emako ehiɛ lɛ, ye obua lɛ ni ekɛ eko ni ebaanyɛ eshɛ he ama ehiɛ. Okɛ miishɛɛ agba lɛ oti ko ni okɛma ohiɛ lɛ he sane, ni otsɔɔ lɛ bɔ ni oná miishɛɛ be ni oshɛ nakai oti lɛ he lɛ. Enɛ feemɔ waaa, shi ebaanyɛ eye ebua nikaselɔ lɛ. Asafoŋ onukpa ko ni atsɛɔ lɛ Victor, ni sɔmɔɔ akɛ gbɛgbalɔ yɛ Afrika maji lɛ eko nɔ lɛ wie akɛ: “Be ni miji oblanyo lɛ, asafoŋ onukpa ko bi mi otii ni mikɛmamɔ mihiɛ lɛ ahe saji. Saji ni ebi mi lɛ hã mikɛ hiɛdɔɔ susu bɔ ni misɔmɔɔ Yehowa mihãa lɛ he.” Asafoŋ onukpai ni yɔɔ niiashikpamɔ lɛ wieɔ akɛ, ehe miihia ni atsɔse nyɛmimɛi hii kɛjɛ amɛblahiiaŋ, ekolɛ kɛjɛ be ni amɛbaaye afii 13 loo nɔ. Abaanyɛ ahã amɛ nitsumɔ yɛ asafo lɛ mli yɛ afii ni amɛye lɛ naa. Kɛ́ atsɔse nyɛmimɛi hii kɛjɛ amɛblahiiaŋ lɛ, no baanyɛ aye abua amɛ ni amɛhã amɛjwɛŋmɔ ahi otii ni amɛkɛmamɔ amɛhiɛ lɛ anɔ. Ni kɛ́ amɛdara ni nibii bɔi amɛjwɛŋmɔ gbalamɔ po lɛ, amɛjwɛŋmɔ baaya nɔ ahi otii nɛɛ anɔ.—Kanemɔ Lala 71:5, 17. * (Kwɛmɔ shishigbɛ niŋmaa lɛ.)

6. Mɛɛ gbɛ ko ni he hiaa waa Yesu tsɔ nɔ etsɔse mɛi?

 ⁶ Kɛ́ ootao ni nikaselɔ lɛ aná shwelɛ akɛ ebaasɔmɔ lɛ, jeee nɔ ni esa akɛ efee lɛ pɛ kɛkɛ esa akɛ okɛɛ lɛ. Esa akɛ ogbala nɔ hewɔ ni esa akɛ efee nakai lɛ hu mli otsɔɔ lɛ. Yesu, ni ji Tsɔɔlɔ Kpele lɛ kɛɛ ebɔfoi lɛ ni amɛyashiɛ. Shi dani ebaafee nakai lɛ, etsɔɔ amɛ nɔ hewɔ ni esa akɛ amɛbo lɛ toi. Ekɛɛ amɛ akɛ: “Aŋɔ hegbɛ fɛɛ ahã mi yɛ ŋwɛi kɛ shikpɔŋ lɛ nɔ. No hewɔ lɛ, nyɛyaa nyɛyafea mɛi ni jɛ jeŋmaji lɛ fɛɛ mli lɛ kaselɔi.” (Mateo 28:18, 19) Mɛni obaanyɛ ofee kɛtsɔɔ akɛ ookase Yesu?

7, 8. (a) Mɛni asafoŋ onukpai baanyɛ afee kɛtsɔɔ akɛ amɛmiikase gbɛ ni Yesu tsɔ nɔ etsɔse mɛi lɛ? (b) Mɛni hewɔ ehe miihia ni ajie nikaselɔi ayi lɛ? (d) Mɛni asafoŋ onukpai baanyɛ afee kɛtsɔse mɛi krokomɛi? (Kwɛmɔ akrabatsa ni yitso ji, “ Bɔ ni Obaafee Otsɔse Mɛi.”)

⁷ Kɛ́ okɛ nitsumɔ ko wo nyɛmi nuu ko dɛŋ lɛ, jɛɛ Biblia lɛ mli ogbala nɔ hewɔ ni nakai nitsumɔ lɛ he hiaa lɛ mli otsɔɔ lɛ. Kɛ́ ofee nakai lɛ, ooye oobua lɛ ni ena akɛ kɛ́ ahã lɛ nitsumɔ ko lɛ, esa akɛ esusu Biblia mli shishitoo mlai ni kɔɔ nakai nitsumɔ lɛ he lɛ ahe, ní ehã no atsirɛ lɛ ni etsu he nii. Akɛ nɔkwɛmɔnɔ lɛ, ŋɔɔ lɛ akɛ okɛɛ nyɛmi nuu ko akɛ, be fɛɛ be ni abaaba asafoŋ kpee lɛ, ekwɛ ni he ni atsɔɔ kɛbaa Maŋtsɛyeli Asa lɛ nɔ lɛ afee falefale koni mɔ ko akapila. Obaanyɛ okɛ lɛ akane Tito 2:10 lɛ, ni otsɔɔ lɛ nɔ hewɔ ni enitsumɔ lɛ baahã mɛi pii anya Maŋtsɛyeli sane lɛ he. Agbɛnɛ hu, hã esusu nyɛmimɛi ni egbɔlɔ ni yɔɔ nyɛsafo lɛ mli lɛ ahe, koni ena bɔ ni amɛbaaná enitsumɔ lɛ he sɛɛ. Kɛ́ okɛ lɛ susu nii ahe yɛ nɛkɛ gbɛ nɔ lɛ, ebaana akɛ jeee kɛɛmɔ ni akɛɛ etsu nɔ ko lɛ pɛ hewɔ esa akɛ etsu, shi moŋ bɔ ni mɛi baaná he sɛɛ lɛ titri hewɔ esa akɛ etsu. Kɛ́ ena bɔ ni nyɛmimɛi lɛ náa enitsumɔ lɛ he sɛɛ lɛ, no baahã ená he miishɛɛ akɛ ebaasɔmɔ amɛ.

⁸ Kɛ́ nikaselɔ lɛ kɛ ŋaa ko ni owo lɛ lɛ tsu nii lɛ, kaimɔ ni ojie eyi. Mɛni hewɔ enɛ feemɔ he hiaa lɛ? Wɔbaanyɛ wɔkɛ yijiemɔ ato nu he. Taakɛ bɔ ni nu hãa tsei daraa ni amɛfeɔ frɔ̃frɔ̃ lɛ, nakai nɔŋŋ yijiemɔ hu yeɔ ebuaa nikaselɔi ni amɛyaa amɛhiɛ yɛ Yehowa sɔɔmɔ lɛ mli.—Okɛto Mateo 3:17 lɛ he.

9. (a) Mɛni hewɔ ekolɛ ebaawa kɛhã asafoŋ onukpai ni yɔɔ maji ni shikatsɛmɛi fa yɛ jɛmɛ lɛ anɔ lɛ akɛ amɛaatsɔse mɛi? (b) Mɛni hewɔ nyɛmimɛi oblahii komɛi kɛ Nyɔŋmɔ sɔɔmɔ yeee klɛŋklɛŋ gbɛhe yɛ amɛshihilɛ mli lɛ?

⁹ Ekolɛ ebaawa kɛhã asafoŋ onukpai ni sɔmɔɔ yɛ maji ni shikatsɛmɛi fa yɛ jɛmɛ lɛ anɔ lɛ akɛ amɛaawo nyɛmimɛi hii ni abaptisi amɛ ni eye afii 20 kɛmiimɔ 30 lɛ hewalɛ ni amɛfee babaoo yɛ asafo lɛ mli. Asafoŋ onukpai ni yɔɔ niiashikpamɔ ni sɔmɔɔ yɛ maji aaafee 20 amli lɛ tsɔɔ nɔ hewɔ ni nyɛmimɛi oblahii komɛi sumɔɔɔ ni amɛfeɔ babaoo yɛ asafo lɛ mli lɛ. Amɛteŋ mɛi babaoo wie akɛ, be ni nyɛmimɛi hii nɛɛ ekomɛi ji gbekɛbii lɛ, amɛfɔlɔi wooo amɛ hewalɛ ni amɛkɛ mumɔŋ otii amamɔ amɛhiɛ. Nyɛmimɛi lɛ ekomɛi po yɛ ni no mli lɛ amɛmiitao ni amɛfee babaoo, shi amɛfɔlɔi wo amɛ hewalɛ ni amɛya yunivɛsiti ni amɛtao nitsumɔi wuji yɛ je lɛ mli! No hewɔ lɛ, kɛjɛ amɛgbekɛbiiashi tɔ̃ɔ lɛ, amɛkɛ Nyɔŋmɔ sɔɔmɔ yeee klɛŋklɛŋ gbɛhe yɛ amɛshihilɛ mli.—Mateo 10:24.

10, 11. (a) Mɛɛ gbɛ nɔ asafoŋ onukpa ko baanyɛ eye ebua nyɛmi nuu ko fiofio ni etsake ejwɛŋmɔ? (b) Mɛɛ ŋmalɛi asafoŋ onukpa ko baanyɛ ekɛye ebua nyɛmi nuu ko ni sumɔɔɔ ni efeɔ babaoo yɛ asafo lɛ mli lɛ? Ni mɛni hewɔ ŋmalɛi nɛɛ sa lɛ? (Kwɛmɔ shishigbɛ niŋmaa lɛ.)

¹⁰ Kɛ́ etamɔ nɔ ni nyɛmi nuu ko sumɔɔɔ ni efeɔ babaoo yɛ asafo lɛ mli lɛ, ebaabi mɔdɛŋbɔɔ kɛ tsuishitoo dani  obaanyɛ oye obua lɛ ni etsake ejwɛŋmɔ. Shi obaanyɛ ofee kɛ̃. Kɛ́ tso ko miikpa afã lɛ, okwaafonyo baanyɛ ajaje lɛ fiofio koni edamɔ shi jaŋŋ. Nakai nɔŋŋ fiofio lɛ, obaanyɛ oye obua nyɛmi nuu lɛ koni ená he miishɛɛ akɛ ebaafee babaoo yɛ asafo lɛ mli. Shi te obaafee tɛŋŋ otsu enɛ he nii?

¹¹ Okɛ nyɛmi nuu lɛ abɔ naanyo. Hã ele akɛ ehe miihia asafo lɛ. Kɛkɛ lɛ, be ni be shwieɔ mli lɛ, obaanyɛ okɛ lɛ ata shi, ni okɛ lɛ asusu ŋmalɛi ni baaye abua lɛ ni esusu ehe nɔ ni ejɔɔ ehã Yehowa lɛ he lɛ ahe. (Jajelɔ 5:4; Yesaia 6:8; Mateo 6:24, 33; Luka 9:57-62; 1 Korintobii 15:58; 2 Korintobii 5:15; 13:5) Bɔɔ mɔdɛŋ ni oshɛ etsui he. Bi lɛ saji tamɔ: ‘Be ni ojɔɔ ohe nɔ ohã Yehowa lɛ, mɛni owo lɛ shi akɛ obaafee? Be ni abaptisi bo lɛ, te osusuɔ akɛ Yehowa nu he tɛŋŋ?’ (Abɛi 27:11) ‘Te Satan nu he tɛŋŋ?’ (1 Petro 5:8) Kɛ́ okɛ nyɛmi nuu lɛ susu ŋmalɛi ni tamɔ nɛkɛ ahe lɛ, ebaanyɛ eta etsuiŋ waa, ni ehã etsake ejwɛŋmɔ.—Kanemɔ Hebribii 4:12. * (Kwɛmɔ shishigbɛ niŋmaa lɛ.)

12, 13. (a) Akɛ nikaselɔ lɛ, mɛɛ su Elisha jie lɛ kpo? (b) Mɛɛ gbɛ nɔ Yehowa jɔɔ Elisha yɛ enɔkwayeli lɛ hewɔ?

¹² Nyɛmimɛi oblahii, nyɛyelikɛbuamɔ he miihia asafo lɛ! Mɛɛ su baaye abua nyɛ ni nyɛye omanye yɛ Yehowa sɔɔmɔ lɛ mli? Nyɛhãa wɔsusua nibii komɛi ni tee nɔ yɛ nikaselɔ ko shihilɛ mli lɛ he wɔkwɛa, koni no aye abua wɔ ni wɔná sanebimɔ nɛɛ hetoo. Nikaselɔ nɛɛ ji Elisha.

¹³ Aaafee afii 3,000 ni eho nɛ lɛ, gbalɔ Elia bi Elisha ni ebaye ebua lɛ. No mli lɛ Elisha ji oblanyo. Etee amrɔ nɔŋŋ, ni ekɛ anɔkwayeli tsu nitsumɔi ni baa shi ehã gbalɔ Elia. (2 Maŋtsɛmɛi 3:11) Elia kɛ aaafee afii ekpaa tsɔse Elisha. No sɛɛ be ni eshwɛ fioo ni nitsumɔ ni Elia tsuɔ yɛ Israel lɛ baaba naagbee lɛ, ehã Elisha le akɛ ebaanyɛ eshi lɛ agbɛnɛ. Shi Elisha kɛɛ lɛ shii etɛ sɔŋŋ akɛ: “Mishiio!” Elisha tswa efai shi akɛ ebaahi etsɔɔlɔ lɛ masɛi kɛyashi enaŋ lɛ dɔŋŋ. Enɔkwayeli lɛ hewɔ lɛ, Yehowa jɔɔ lɛ; be ni Yehowa ŋɔɔ Elia kɛyaa yɛ ahum ko ni naa wa mli lɛ, ehã ena.—2 Maŋtsɛmɛi 2:1-12.

14. (a) Te nikaselɔi ni yɔɔ ŋmɛnɛ lɛ baafee tɛŋŋ amɛkase Elisha? (b) Mɛni hewɔ ehe miihia waa ni nikaselɔi aye anɔkwa lɛ?

¹⁴ Akɛ nikaselɔ lɛ, te obaafee tɛŋŋ okase Elisha? Kaashashao shi kwraa akɛ obaatsu nitsumɔ fɛɛ nitsumɔ ni akɛbaahã bo lɛ, kɛ́ ebaa shi po. Kaimɔ akɛ otsɔɔlɔ lɛ ji onaanyo. Hã ele akɛ ohiɛ sɔɔ nɔ ni efeɔ ehãa bo lɛ, ní okɛ onifeemɔ atsɔɔ akɛ oosumɔ ni eya nɔ etsɔɔ bo nii. Nɔ ni fe fɛɛ lɛ, okɛ anɔkwayeli atsu nitsumɔ ni akɛwo odɛŋ lɛ. Mɛni hewɔ? Ejaakɛ kɛ́ asafoŋ onukpai lɛ na akɛ okɛ anɔkwayeli miitsu nitsumɔ ni akɛwo odɛŋ lɛ, amɛbaaná nɔmimaa akɛ Yehowa miisumɔ ni atu sɔ̃i krokomɛi awo odɛŋ yɛ asafo lɛ mli.—Lala 101:6; kanemɔ 2 Timoteo 2:2.

15, 16. (a) Mɛni Elisha fee kɛtsɔɔ akɛ ebuɔ etsɔɔlɔ lɛ? (Kwɛmɔ mfoniri ni yɔɔ nikasemɔ lɛ shishijee lɛ.) (b) Mɛni hewɔ gbalɔi krokomɛi nyɛ amɛmu amɛfɔ̃ Elisha nɔ lɛ?

¹⁵ Nɔ kroko ni nyɛmimɛi hii ni yɔɔ ŋmɛnɛ lɛ baanyɛ akase yɛ Elisha sane lɛ mli ji akɛ, ehe miihia ni amɛbu asafoŋ onukpai ni kɛ afii babaoo esɔmɔ lɛ. Be ni Elia kɛ Elisha eyasara gbalɔi akuu ko ni  yɔɔ Yeriko lɛ sɛɛ lɛ, amɛnyiɛ kɛba Yordan Faa lɛ naa. Kɛkɛ ni “Elia jie etade lɛ ni ekota, ni ekɛtswa nu lɛ mli, ni emli gba kɛtee biɛ kɛ biɛ.” Amɛyi enyɔ lɛ fɛɛ amɛnyiɛ shikpɔŋ gbiŋ nɔ kɛfo Yordan, ni be ni amɛyaa lɛ amɛgba sane. Elisha bo nɔ fɛɛ nɔ ni etsɔɔlɔ lɛ kɛɔ lɛ lɛ toi jogbaŋŋ, ni etee nɔ ekase nii kɛjɛ eŋɔɔ. Ebuuu ehe akɛ ele nɔ fɛɛ nɔ. Kɛkɛ ni aŋɔ Elia yɛ ahum ko ni naa wa mli kɛtee, ni Elisha ku esɛɛ etee Yordan Faa lɛ naa. Be ni eshɛ faa lɛ naa lɛ, ekɛ Elia atade lɛ tswa nu lɛ mli ni ekɛɛ: “Nɛgbɛ Yehowa, Elia Nyɔŋmɔ lɛ, yɔɔ?” Shi kome ekoŋŋ lɛ, nu lɛ mli gba kɛtee biɛ kɛ biɛ.—2 Maŋtsɛmɛi 2:8-14.

¹⁶ Ani okadi klɛŋklɛŋ naakpɛɛ nii ni Elisha fee lɛ? Etamɔ naagbee nɔ ni Elia fee lɛ pɛpɛɛpɛ. Mɛni no tsɔɔ wɔ? Elisha ekɛɛɛ akɛ, amrɔ nɛɛ ni Elia etee, ni aŋɔ ehegbɛ lɛ ahã lɛ hewɔ lɛ, esa akɛ etsake nibii ahiɛ. Moŋ lɛ, enyiɛ Elia nɔkwɛmɔnɔ lɛ sɛɛ pɛpɛɛpɛ, ni no hã ana akɛ ebuɔ etsɔɔlɔ lɛ. Enɛ hã gbalɔi krokomɛi nyɛ amɛmu amɛfɔ̃ enɔ. (2 Maŋtsɛmɛi 2:15) Elisha kɛ afii 60 sɔŋŋ sɔmɔ akɛ gbalɔ, ni Yehowa duro lɛ hewalɛ ni enyɛ efee naakpɛɛ nii babaoo fe bɔ ni Elia fee lɛ po. Akɛ nikaselɔ lɛ, mɛni obaanyɛ okase yɛ Elisha sane lɛ mli?

17. (a) Mɛɛ gbɛ nɔ nikaselɔi baanyɛ akase su ni Elisha jie lɛ kpo lɛ? (b) Sɛɛ mli lɛ, ekolɛ mɛni Yehowa baaye ebua nikaselɔi anɔkwafoi ní amɛfee?

¹⁷ Kɛ́ atu sɔ̃i awo odɛŋ yɛ asafo lɛ mli lɛ, kaasusu akɛ esa akɛ otsake nibii ahiɛ. Kaimɔ akɛ, hiamɔ nii ko ni yɔɔ asafo lɛ mli, loo gbɛtsɔɔmɔ ko ni jɛ Yehowa gbɛjianɔtoo lɛ dɛŋ lɛ hewɔ afeɔ tsakemɔi. Kaate shi kɛkɛ ni otsake nibii ahiɛ. Elisha nyiɛ Elia nɔkwɛmɔnɔ lɛ sɛɛ pɛpɛɛpɛ, ni enɛ hã gbalɔi krokomɛi nyɛ amɛmu amɛfɔ̃ enɔ, ni amɛna akɛ ebuɔ etsɔɔlɔ lɛ. Kɛ́ bo hu otee nɔ onyiɛ nɔkwɛmɔnɔ ni damɔ Biblia lɛ nɔ ni otsɔɔlɔ lɛ efee ehã bo lɛ sɛɛ lɛ, no tsɔɔ akɛ obuɔ asafoŋ onukpai ni kɛ afii pii esɔmɔ lɛ, ni nyɛmimɛi lɛ baamu amɛfɔ̃ onɔ. (Kanemɔ 1 Korintobii 4:17.) Be ni onáa niiashikpamɔ lɛ, obaafee tsakemɔi ni baaye abua onyɛmimɛi lɛ koni amɛkɛ Yehowa gbɛjianɔtoo lɛ ni miiya ehiɛ be fɛɛ be lɛ anyiɛ. Sɛɛ mli lɛ, ekolɛ Yehowa baaye ebua bo ni ofee nibii ni fe nɔ ni otsɔɔlɔi lɛ fee lɛ po, taakɛ efee ehã Elisha lɛ pɛpɛɛpɛ.—Yohane 14:12.

18. Mɛni hewɔ amrɔ nɛɛ ji be ni ehe miihia ni atsɔse nyɛmimɛi hii ni yɔɔ asafo lɛ mli lɛ?

¹⁸ Eba akɛ, nikasemɔ nɛɛ kɛ nɔ ni tsɔ hiɛ lɛ baaye abua asafoŋ onukpai babaoo ni amɛna akɛ, esa akɛ amɛhe be kɛtsɔse nyɛmimɛi hii. Ni wɔmiikpa gbɛ akɛ, nyɛmimɛi hii pii baaŋmɛ gbɛ ni atsɔse amɛ koni amɛkɛ nibii ni amɛbaakase lɛ aye abua Yehowa webii lɛ. Enɛ baawaje asafoi ni yɔɔ je lɛŋ fɛɛ lɛ, ni no baaye abua wɔteŋ mɔ fɛɛ mɔ ni eya nɔ eye Nyɔŋmɔ anɔkwa yɛ be ni sa kadimɔ waa ni kã wɔhiɛ lɛ mli.