KƐ́ AKƐ oliv tso lɛ to tsenedru tso ni yɔɔ Lebanon lɛ he lɛ, oliv tso lɛ jeee nɔ ko kwraa. Shi naakpɛɛ sane ji akɛ, oliv tsei nyɛɔ amɛkwɛ̃ɔ ni amɛdaa yɛ hei ni tsei krokomɛi nyɛɛɛ akwɛ̃ yɛ. Oliv tsei komɛi yɛ ni eye afii 1,000. Tso nɛɛ shishifãi yaa sũ lɛ mli tɔ̃ɔ, ni kɛ́ ehiɛ kpãtã po, ebaanyɛ etsɛ̃ ekoŋŋ. Kɛ́ eshishifãi yɛ sũ lɛ mli kome too lɛ, ebaatsɛ̃ ekoŋŋ.

Nuu anɔkwafo Hiob ná nɔmimaa akɛ kɛ́ egbo po lɛ, ebaaba wala mli ekoŋŋ. (Hiob 14:13-15) Ekɛ tso fee hiɛnɔkamɔ ni eyɔɔ akɛ Nyɔŋmɔ baanyɛ atee lɛ shi lɛ he nɔkwɛmɔnɔ. Eeenyɛ efee akɛ, tso ni Hiob kɛfee nɔkwɛmɔnɔ lɛ ji oliv tso lɛ. Ewie akɛ: “Tso tete, hiɛnɔkamɔ yɛ hã lɛ akɛ kɛji afo lɛ lɛ, eeehere ekoŋŋ.” Kɛ́ nugbɔ enɛɛɛ be kpalaŋŋ lɛ, oliv tsoku ko baanyɛ agbĩ. Shi kɛ́ nugbɔ nɛ pɛ, ebaahere ekoŋŋ, ní etsɛ̃rɛ̃ “niji tamɔ tso ní atɛo.”—Hiob 14:7-9.

Taakɛ bɔ ni okwaafonyo ko shweɔ ni oliv tso ko ni yɔɔ eŋmɔ lɛ mli, ní afo lɛ, asaa atsɛ̃ ekoŋŋ lɛ, Yehowa Nyɔŋmɔ hu miishwe ni etsuji kɛ mɛi krokomɛi babaoo ni egboi lɛ aba wala mli ekoŋŋ. (Mateo 22:31, 32; Yohane 5:28, 29; Bɔfoi 24:15) Ŋwanejee ko bɛ he akɛ, wɔkɛ miishɛɛ baahere mɛi ni abaatee amɛ shi lɛ atuu!