1, 2. Mɛni Yesu fee kɛtsɔɔ akɛ esumɔɔ adesai waa?

YƐ NIBII ni Yehowa bɔ lɛ fɛɛ ateŋ lɛ, ekromɔ Bi lɛ ji mɔ titri ni hãa anaa akɛ, enilee lɛ mli kwɔ waa. Kromɔ Bi nɛɛ hi e-Tsɛ lɛ masɛi akɛ “ŋaalɔ.” Bo lɛ feemɔ bɔ ni Yesu mii baashɛ ehe, ní etsui anyɔ emli be ni e-Tsɛ ‘saa ŋwɛi lɛ,’ ni etoɔ “shikpɔŋ lɛ shishi lɛ” he mfoniri okwɛ. Shi yɛ nibii ni e-Tsɛ bɔ lɛ fɛɛ ateŋ lɛ, Yesu ná “gbɔmɛi abii ahe miishɛɛ” waa. (Abɛi 8:22-31) Anɔkwa, esumɔɔ adesai kɛjɛ shishijee tɔ̃ɔ.

² Sɛɛ mli lɛ, Yesu jɛ esuɔmɔ mli eshi ŋwɛi, ni eba shikpɔŋ lɛ nɔ akɛ adesa koni eŋɔ ewala ehã akɛ “kpɔmɔnɔ kɛkpɔ̃ mɛi babaoo.” (Mateo 20:28; Filipibii 2:5-8) Enɛ hãa wɔnaa faŋŋ akɛ, esumɔɔ e-Tsɛ lɛ, eyeɔ lɛ anɔkwa, ni esumɔɔ adesai waa. Be ni Yesu yɔɔ shikpɔŋ lɛ nɔ lɛ, Nyɔŋmɔ hã lɛ hewalɛ ni ekɛfee naakpɛɛ nii. Naakpɛɛ nii nɛɛ hu hãa wɔnaa suɔmɔ ni mli wa ni eyɔɔ kɛhã adesai, kɛ nibii kpakpai ni etsɛŋ ebaafee ehã amɛ lɛ.

3. Mɛni he wɔbaasusu yɛ nikasemɔ nɛɛ mli?

³ Be ni Yesu yɔɔ shikpɔŋ lɛ nɔ lɛ, eshiɛ “Nyɔŋmɔ  Maŋtsɛyeli lɛ he sane kpakpa lɛ.” (Luka 4:43) Ele akɛ, Maŋtsɛyeli nɛɛ baatse e-Tsɛ gbɛ́i lɛ he, ni ehã adesai anaagbai asɛɛ afo. Be ni Yesu shiɛɔ lɛ, efee naakpɛɛ nii babaoo. Naakpɛɛ nii srɔtoi ni efee lɛ hãa wɔnaa akɛ, esusuɔ mɛi ahe waa. Esa akɛ wɔsusu naakpɛɛ nii ni efee lɛ ahe. Mɛni hewɔ? Ejaakɛ amɛhãa wɔnáa nɔmimaa akɛ, wɔsɛɛ lɛ nibii baahi. No hewɔ lɛ, nyɛhãa wɔsusua naakpɛɛ nii ni Yesu fee lɛ ateŋ ejwɛ ahe wɔkwɛa.

4. Gbaa nɔ ni tee nɔ yɛ Yesu kɛ kpitiyelɔ ko teŋ lɛ.

⁴ Be ni Yesu shiɛɔ lɛ, etee Galilea kpokpaa lɛ nɔ. Ekɛ nuu ko ni miiye hela ko ni naa wa waa kpe yɛ maji ni yɔɔ nakai kpokpaa lɛ nɔ lɛ ateŋ ekome mli. Nuu lɛ miiye kpiti. (Marko 1:39, 40) Anɔkwa, Luka, ni eji datrɛfonyo lɛ wie akɛ, “kpiti eshwie ehe fɛɛ.” (Luka 5:12) Biblia lɛ kɛɔ akɛ, be ni nuu nɛɛ na Yesu lɛ, “ekɛ ehiɛ bu shi ni ekpa lɛ fai ekɛɛ: ‘Nuŋtsɔ, kɛ́ oosumɔ lɛ, obaanyɛ ohã mihe atse.’” Nuu lɛ le akɛ Yesu yɛ hewalɛ ni ebaanyɛ ekɛtsa lɛ, shi no mli lɛ eetao ele kɛji Yesu miisumɔ ni etsa lɛ. Mɛni hewɔ? Ejaakɛ Farisifoi lɛ ebuuu mɛi ni miiye kpiti lɛ amɛhãaa nɔ ko, ni nuu lɛ le enɛ. Shi mɛni he Yesu susu be ni ena nuu ni eeenyɛ efee akɛ eje kpa nɛɛ? Te ekɛ lɛ baaye ahã tɛŋŋ? Kɛ́ bo ni kulɛ, mɛni obaafee?

5. Mɛni hewɔ Yesu jɛ esuɔmɔ mli etsa nuu kpitiyelɔ lɛ?

⁵ Yɛ Mose Mla lɛ naa lɛ, esa akɛ mɔ ko ni miiye kpiti lɛ abolɔ akɛ, “Mihe tseee! mihe tseee!” Shi, eeenyɛ efee akɛ, nuu nɛɛ efeee nakai. (3 Mose 13:43-46) Fɛɛ sɛɛ lɛ, Yesu mli fuuu lɛ. Moŋ lɛ, emusuŋ tsɔ lɛ yɛ ehewɔ, ni ená he miishɛɛ akɛ ebaaye ebua lɛ. Wɔleee nɔ ni tee nɔ yɛ Yesu jwɛŋmɔ mli, shi wɔle akɛ enu he ehã nuu lɛ waa. No hewɔ lɛ, efee nɔ ko ni mɔ ko mɔ ko kpaaa gbɛ akɛ ebaafee. Eta nuu lɛ he. Yesu musuŋ tsɔ lɛ, ni ekɛ nɔmimaa kɛɛ lɛ akɛ: “Miisumɔ! Ohe atse.” Nɔŋŋ kɛkɛ ni “kpiti lɛ tã” yɛ nuu lɛ he. (Luka 5:13) Eyɛ faŋŋ akɛ, Yehowa ji mɔ ni duro Yesu hewalɛ ni ekɛfee naakpɛɛ nii kpele nɛɛ. Ni naakpɛɛ nii nɛɛ hãa wɔnaa akɛ Yesu sumɔɔ adesai asane waa.—Luka 5:17.

6. Mɛni sa kadimɔ yɛ naakpɛɛ nii ni Yesu fee lɛ ahe? Ni mɛni no tsɔɔ wɔ?

⁶ Nyɔŋmɔ hã Yesu hewalɛ ni ekɛfee naakpɛɛ nii kpelei babaoo. Jeee kpiti pɛ Yesu tsa. Etsa helai srɔtoi pii hu. Biblia lɛ kɛɔ akɛ, “be ni asafoku lɛ na akɛ mumuii miiwie, ni kpajelɔi ahe miiwa amɛ, ni akpakei miinyiɛ, ni shwilafoi miina nii lɛ, amɛnaa kpɛ amɛhe.” (Mateo 15:31) Kɛ́ Yesu miitsa mɔ ko ni egbɔmɔtso lɛ henɔ ko ekpa nitsumɔ lɛ, ehe ehiaaa ni ená adesa kroko ni yɔɔ hewalɛ nɔ ni ekɛye najiaŋ, moŋ lɛ, enyɛɔ etsaa nakai gbɔmɔtso henɔ lɛ, ni etsuɔ nii ekoŋŋ. Mɛi ni Yesu tsa lɛ ahe wa amɛ amrɔ nɔŋŋ, ni enyɛ etsa mɛi ni bɛ emasɛi po. (Yohane 4:46-54) Mɛni no tsɔɔ wɔ? No tsɔɔ wɔ akɛ, Yesu Kristo, ni ji wɔ-Maŋtsɛ lɛ miisumɔ ni ehã helai fɛɛ sɛɛ afo, ni ebaanyɛ efee nakai hu. Kɛ́ wɔkane bɔ ni Yesu kɛ mɛi ye ehã lɛ he sane lɛ, no hãa wɔnáa nɔmimaa  akɛ, yɛ jeŋ hee lɛ mli lɛ, ebaana “ohiafo kɛ mɔ ni efi lɛ lɛ mɔbɔ.” (Lala 72:13) Yesu baaye abua mɛi fɛɛ ni naa nɔ lɛ, ejaakɛ eesumɔ ni efee nakai.

7, 8. Mɛni Yesu fee dani etee Betesda kpaakpo lɛ he lɛ?

⁷ Be ni Yesu tsa kpitiyelɔ lɛ sɛɛ nyɔji fioo komɛi lɛ, eshi Galilea kɛtee Yudea koni eyashiɛ Nyɔŋmɔ Maŋtsɛyeli lɛ he sane kpakpa lɛ yɛ jɛmɛ hu. Eeenyɛ efee akɛ, mɛi akpei abɔ bo sane ni Yesu shiɛ lɛ toi, ni suɔmɔ ni ejie kpo etsɔɔ amɛ lɛ ta amɛtsuiŋ waa. Yesu ná he miishɛɛ waa akɛ ebaaye ebua ohiafoi kɛ mɛi ni efi amɛ lɛ, ní ehã amɛ hiɛnɔkamɔ.—Yesaia 61:1, 2; Luka 4:18-21.

⁸ Yɛ Nisan nyɔɔŋ lɛ mli lɛ, Yesu tee Yerusalem kɛhã Hehoo lɛ. No mli lɛ, mɛi pii eba jɛmɛ kɛhã gbi jurɔ krɛdɛɛ nɛɛ. Yesu yana nuu ko ni nyɛɛɛ anyiɛ yɛ kpaakpo ko ni atsɛɔ lɛ Betesda lɛ he. Kpaakpo nɛɛ yɛ sɔlemɔwe lɛ kooyi.

9, 10. (a) Mɛni hewɔ mɛi tee Betesda kpaakpo lɛ he lɛ? (b) Mɛni Yesu fee yɛ kpaakpo lɛ he? Ni mɛni wɔkaseɔ yɛ mli? (Kwɛmɔ mfoniri ni yɔɔ nikasemɔ lɛ shishijee lɛ.)

⁹ Helatsɛmɛi pii keɔ kɛyaa Betesda kpaakpo lɛ he, ejaakɛ amɛsusuɔ akɛ kɛ́ ata nu lɛ mli, ni amɛgbee mli lɛ, amɛhe baawa amɛ. Bo diɛŋtsɛ feemɔ bɔ ni jɛmɛ baafee tsukutsuku lɛ he mfoniri okwɛ, ni helatsɛmɛi babaoo ni efee shwɛm, ni eyoyoro, miibɔ mɔdɛŋ fɛɛ ni amɛaanyɛ koni amɛhe awa amɛ kɛkɛ. Yesu eye emuu, ni hela mɔɔɔ lɛ, no hewɔ lɛ mɛni kɛ lɛ tee jɛmɛ? Suɔmɔ ni eyɔɔ kɛhã mɛi lɛ ni hã etee jɛmɛ. Ni biɛ ji he ni ekɛ nuu lɛ yakpe yɛ. No mli lɛ, hela lɛ kɛ nuu lɛ efɔ̃ shi afii 38 sɔŋŋ.—Kanemɔ Yohane 5:5-9.

¹⁰ Yesu bi nuu lɛ kɛji eesumɔ ni enyiɛ ekoŋŋ. Feemɔ bɔ ni nuu lɛ fee ehiɛ mɔbɔmɔbɔ be ni ehãa Yesu hetoo lɛ he mfoniri okwɛ. Nuu lɛ kɛɛ lɛ akɛ eesumɔ ni ehe awa lɛ, shi mɔ ko bɛ ni baawo lɛ awo kpaakpo lɛ mli. Kɛkɛ ni Yesu kɛɛ nuu lɛ ni efee nɔ ko ni akpaaa gbɛ akɛ mɔ ko ni miiye hela ni eyeɔ lɛ baanyɛ afee. Ekɛɛ nuu lɛ akɛ ewo esaa lɛ ni enyiɛ. Nɔŋŋ ni nuu lɛ wo esaa lɛ ni ebɔi nyiɛmɔ! Naakpɛɛ nii nɛɛ hãa wɔnaa nɔ ni Yesu baafee yɛ jeŋ hee lɛ mli, ni ehãa wɔnaa akɛ esumɔɔ adesai asane waa. Yesu tao mɛi ni yelikɛbuamɔ he miihia amɛ lɛ. Esa akɛ enɔkwɛmɔnɔ lɛ awo wɔ hewalɛ ni wɔya nɔ wɔtao mɛi ni yɔɔ wɔshikpɔŋkuku lɛ mli, ni nibii gbohii ni yaa nɔ yɛ je lɛ mli ehã amɛhao lɛ asɛɛgbɛ.

11. Mɛɛ gbɛ nɔ Marko 5:25-34 lɛ hãa wɔnaa akɛ Yesu na mli ehã mɛi ni bɛ hewalɛ lɛ?

¹¹ Kanemɔ Marko 5:25-34. Hela ni yɔɔ hiɛgbele nɛɛ ehi yoo lɛ he afii 12 sɔŋŋ. Hela lɛ sa nɔ fɛɛ nɔ ni efeɔ yɛ shihilɛ mli lɛ he, ni esa jamɔ ni ejaa Nyɔŋmɔ lɛ po he. Yoo lɛ kɛ hela lɛ enyiɛ helatsalɔi pii anɔ, ni efite edɛŋ nii fɛɛ, ni kɛ̃lɛ ehiko hãko lɛ, moŋ lɛ,  emli ewo wu. Gbi ko lɛ, ekpɛ eyiŋ akɛ ebaatao tsamɔ yɛ he kroko. No hewɔ lɛ, enyiɛ kɛtsɔ asafoku ko teŋ ni eyata Yesu atade lɛ he. (3 Mose 15:19, 25) Yesu yɔse akɛ hewalɛ eje emli, no hewɔ lɛ ebi akɛ, “Namɔ ta mitadei lɛ anɔhaanɔi lɛ ahe lɛ?” Yoo lɛ ‘she gbeyei ni ehe kpokpo, ni eba ebagbee ehiɛ ni egba lɛ anɔkwale lɛ fɛɛ.’ Yesu na akɛ Yehowa ji mɔ ni etsa yoo lɛ, no hewɔ lɛ ejɛ mlihilɛ mli ekɛɛ yoo lɛ akɛ: “Biyoo, ohemɔkɛyeli ehã ohe ewa bo. Yaa yɛ toiŋjɔlɛ mli, ni hela ni ehã opiŋ nɛɛ akagba onaa dɔŋŋ.”

12. (a) Kɛbashi he ni wɔshɛ nɛɛ, mɛni obaanyɛ owie yɛ Yesu he? (b) Mɛɛ gbɛ nɔ wɔbaanyɛ wɔkase Yesu?

¹² Kɛ́ wɔkane bɔ ni Yesu kɛ mɛi fɛɛ, titri lɛ mɛi ni bɛ hewalɛ lɛ, ye yɛ mlihilɛ mli lɛ he sane lɛ, ani wɔmii shɛɛɛ wɔhe? Yesu efeee enii tamɔ Satan, mɔ ni miisumɔ ni wɔnu he akɛ wɔhe bɛ sɛɛnamɔ, ni mɔ ko mɔ ko sumɔɔɔ wɔsane lɛ. Naakpɛɛ nii ni Yesu fee lɛ hãa wɔnaa akɛ, esusuɔ wɔ kɛ wɔnaagbai lɛ ahe diɛŋtsɛ. Eŋɔɔ wɔnaa waa akɛ wɔyɛ Maŋtsɛ kɛ Osɔfonukpa ni sumɔɔ wɔsane! (Hebribii 4:15) Bei komɛi lɛ, ewa kɛhã wɔ akɛ wɔbaanu mɛi ni hela emɔ amɛ be kplaŋŋ lɛ ashishi, titri lɛ kɛ hela mɔko wɔ. Shi susumɔ Yesu he okwɛ. Eyɛ mli akɛ hela mɔko lɛ dã moŋ, shi enu he ehã helatsɛmɛi. Nyɛhãa wɔbɔa mɔdɛŋ fɛɛ ni wɔbaanyɛ ni wɔkase lɛ.—1 Petro 3:8.

13. Mɛni Lazaro shitee lɛ tsɔɔ wɔ yɛ Yesu he?

¹³ Kɛ́ Yesu na ni mɛi miiye awerɛho lɛ, edɔɔ lɛ waa diɛŋtsɛ. Akɛ nɔkwɛmɔnɔ lɛ, be ni enaanyo Lazaro gbo, ni ena ni ewekumɛi kɛ enanemɛi miifo lɛ, “ewerɛ ho ehe yɛ emli ni ehao.” (Kanemɔ Yohane 11:33-36.) Yesu fo, tsɛ ele akɛ ebaatee Lazaro shi. Efeee lɛ hiɛgbele akɛ ebaahã mɛi krokomɛi ana lɛ ni eefo. Yesu sumɔɔ Lazaro kɛ eweku lɛ aahu akɛ, ekɛ hewalɛ ni Nyɔŋmɔ kɛduro lɛ lɛ tee lɛ shi!—Yohane 11:43, 44.

14, 15. (a) Mɛni hãa wɔnaa akɛ Yehowa miisumɔ ni ehã amanehulu sɛɛ afo? (b) Mɛni wiemɔ ni ji, “gbohii akaimɔ bui” lɛ tsɔɔ wɔ?

 ¹⁴ Biblia lɛ kɛɔ akɛ Yesu tamɔ e-Tsɛ Yehowa pɛpɛɛpɛ. (Hebribii 1:3) No hewɔ lɛ, naakpɛɛ nii ni Yesu fee lɛ tsɔɔ wɔ akɛ, Yehowa hu miisumɔ ni ejie hela, piŋmɔ, kɛ gbele kɛya. Etsɛŋ, Yehowa kɛ Yesu baatee mɛi pii ashi. Yesu wie akɛ, “ŋmɛlɛtswaa lɛ miiba, be mli ni mɛi fɛɛ ni yɔɔ gbohii akaimɔ bui lɛ amli lɛ” baate shi.—Yohane 5:28, 29.

¹⁵ Yesu kɛ wiemɔ ni ji, “gbohii akaimɔ bui” tsu nii, ni tsɔɔ akɛ Nyɔŋmɔ baanyɛ akai mɛi ni egboi lɛ. Nyɔŋmɔ Ofe lɛ, mɔ ni bɔ nɔ fɛɛ nɔ ni yɔɔ je lɛ mli lɛ, baanyɛ akai wɔsuɔlɔi ni egboi lɛ asubaŋ kɛ amɛhe nɔ fɛɛ nɔ. (Yesaia 40:26) Jeee akɛ Yehowa baanyɛ akai amɛ kɛkɛ; eesumɔ ni efee nakai. Gbohiiashitei srɔtoi ni abɔ he amaniɛ yɛ Biblia lɛ mli lɛ hãa wɔnaa nɔ ni baaya nɔ yɛ jeŋ hee lɛ mli.

16. Mɛɛ hegbɛ Nyɔŋmɔ tsuji babaoo baaná wɔsɛɛ?

¹⁶ Kɛ́ wɔtee nɔ wɔye Yehowa anɔkwa lɛ, ebaabaa wɔyi kɛfo amanehulu kpeteŋkpele lɛ. Mɛɛ naakpɛɛ nii kpele enɛ baaji nɛkɛ! Harmagedon ta lɛ sɛɛ nɔŋŋ lɛ, wɔbaana naakpɛɛ nii babaoo. Nakai beiaŋ lɛ, adesai fɛɛ ahe baawa amɛ. (Yesaia 33:24; 35:5, 6; Kpojiemɔ 21:4) Feemɔ he mfoniri, ni mɛi ni wo hiŋmɛi glasei miishɛrɛ amɛmiishwie, shwilafoi miina nii, obubuafoi miinyiɛ, toimulɔi miinu nii, ni mɛi ni tara shwiilii amli hu ahe ewa amɛ. Yehowa le akɛ, esa akɛ mɛi fɛɛ ni baafo Harmagedon lɛ aná gbɔmɔtsoŋ hewalɛ kpakpa, ejaakɛ amɛbaatsu nii waa. Amɛji mɛi ni baasaa shikpɔŋ lɛ nɔ ni amɛhã etsɔ paradeiso fɛfɛo.—Lala 115:16.

17, 18. (a) Mɛni hewɔ Yesu fee naakpɛɛ nii srɔtoi? (b) Mɛni hewɔ esa akɛ ofee bɔ fɛɛ bɔ ni obaanyɛ koni onyɛ oya jeŋ hee lɛ mli lɛ?

¹⁷ Ŋmɛnɛ lɛ, kɛ́ “asafoku kpele” lɛ mli bii lɛ kane Biblia lɛ, ni amɛna bɔ ni Yesu tsa helai srɔtoi lɛ, ewoɔ amɛ hewalɛ waa. (Kpojiemɔ 7:9) Naakpɛɛ nii ni Yesu fee lɛ maa nɔ mi ehãa wɔ akɛ, wɔsɛɛ lɛ helai fɛɛ sɛɛ bafo. Kɛfata he lɛ, amɛhãa wɔnaa akɛ, Nyɔŋmɔ kromɔ Bi lɛ sumɔɔ adesai asane. (Yohane 10:11; 15:12, 13) Musuŋtsɔlɛ kpele ni Yesu jie lɛ kpo lɛ hãa wɔnaa akɛ, Yehowa sumɔɔ etsuji lɛ ateŋ mɔ fɛɛ mɔ sane waa.—Yohane 5:19.

¹⁸ Ŋmɛnɛ lɛ, piŋmɔ, nɔnaa, kɛ gbele ehe shi yɛ je lɛŋ he fɛɛ he. (Romabii 8:22) No hewɔ esa akɛ Nyɔŋmɔ kɛ jeŋ hee lɛ aba lɛ. Nyɔŋmɔ ewo shi akɛ, yɛ jeŋ hee lɛ mli lɛ, adesai fɛɛ ahe baawa amɛ. Yɛ nɔ ni aŋma yɛ Maleaki 3:20 lɛ naa lɛ, wɔle akɛ ‘wɔbaahuru tamɔ tsinabii ni agbele amɛyi,’ ejaakɛ Yehowa baatsa wɔhelai fɛɛ ni wɔbaaye emuu. Nyɛhãa wɔhiɛ asɔa nɔ ni Yehowa ewo shi akɛ ebaafee ehã wɔ lɛ, ni wɔhã hemɔkɛyeli ni wɔyɔɔ yɛ emli lɛ mli awa, koni no atsirɛ wɔ ni wɔfee bɔ fɛɛ bɔ ni wɔbaanyɛ koni wɔnyɛ wɔya jeŋ hee lɛ mli. Naakpɛɛ nii ni Yesu fee lɛ hãa wɔnaa bɔ ni adesai ahe baajɔ amɛ kwraa yɛ enɔyeli lɛ shishi. Enɛ shɛjeɔ wɔmii waa!