KƐJƐ afi 1992 lɛ, Gbɛtsɔɔmɔ Kuu lɛ ehala asafoŋ onukpai ni yɔɔ niiashikpamɔ, ni eda yɛ mumɔŋ, koni amɛye amɛbua Gbɛtsɔɔmɔ Kuu lɛ ajinafoi akui srɔtoi lɛ. * (Kwɛmɔ shishigbɛ niŋmaa lɛ.) Yelikɛbualɔi nɛɛ ji “gwantɛŋi krokomɛi” lɛ mli bii, ni amɛyeɔ amɛbuaa Gbɛtsɔɔmɔ Kuu lɛ waa. (Yohane 10:16) Amɛyaa kpee ni ajinafoi akuu ni akɛ amɛ ewo mli lɛ feɔ daa otsi lɛ eko. Ahãa amɛyataoɔ saji amli koni amɛwo ŋaa yɛ nɔ ni abaanyɛ afee he. Shi yɛ naagbee lɛ, Gbɛtsɔɔmɔ Kuu lɛ mli bii ni yɔɔ ajinafoi akui lɛ amli lɛ ji mɛi ni kpɛɔ yiŋ yɛ nɔ ni abaafee he. Kɛkɛ lɛ, yelikɛbualɔi lɛ ekwɛ koni atsu yiŋkpɛɛ lɛ he nii. Nyɛmimɛi nɛɛ jɛɔ amɛsuɔmɔ mli amɛtsuɔ nɔ fɛɛ nɔ ni akɛbaawo amɛdɛŋ akɛ amɛtsu lɛ. Amɛkɛ Gbɛtsɔɔmɔ Kuu lɛ mli bii lɛ fãa gbɛ kɛyaa kpeei krɛdɛi kɛ majimaji ateŋ kpeei. Bei komɛi lɛ, ahãa amɛyasaraa nitsumɔhe niji lɛ akɛ nitsumɔhe yitso najiaŋdamɔlɔi.

Nyɛmi nuu ko ni esɔmɔ akɛ yelikɛbualɔ kɛjɛ afi 1992 lɛ wie akɛ, “Kɛ́ mitsu nitsumɔ ni akɛwo midɛŋ lɛ, Gbɛtsɔɔmɔ Kuu lɛ nyɛɔ amɛkɛ amɛjwɛŋmɔ fɛɛ maa mumɔŋ nibii anɔ.” Nyɛmi nuu kroko ni kɛ afii 20 esɔmɔ akɛ yelikɛbualɔ lɛ wie akɛ, “Misusuuu kɔkɔɔkɔ akɛ maná hegbɛ kpele ni tamɔ nɛkɛ.”

Gbɛtsɔɔmɔ Kuu lɛ ehã yelikɛbualɔi lɛ nitsumɔ pii, ni amɛhiɛ sɔɔ deŋme ni nyɛmimɛi hii anɔkwafoi nɛɛ gboɔ lɛ. Nyɛhãa wɔ fɛɛ ‘wɔyaa nɔ wɔbua mɛi ni tamɔ nɛkɛ akɛ mɛi ni sa woo.’—Filipibii 2:29.