Mɛɛ Be Nyɔŋmɔ Maŋtsɛyeli Lɛ Baaba?
Mɛɛ Be Nyɔŋmɔ Maŋtsɛyeli Lɛ Baaba?
“NUŊTSƆ, ani nɛkɛ be nɛɛ mli obaatee maŋtsɛyeli lɛ shi oma shi oha Israel lɛ?” (Bɔfoi lɛ Asaji 1:6) No mli lɛ, bɔfoi lɛ shwe akɛ amɛle be mli ni Yesu baatee e-Maŋtsɛyeli lɛ shi ema shi. Ŋmɛnɛ lɛ, aaafee afii 2,000 sɛɛ nɛ lɛ, mɛi kã he amɛmiishwe akɛ amɛle sane nɛɛ, ni ji: Mɛɛ be Nyɔŋmɔ Maŋtsɛyeli lɛ baaba?
Akɛni Maŋtsɛyeli lɛ ji sane titri ni Yesu shiɛmɔ lɛ kɔɔ he hewɔ lɛ, ekolɛ obaakpa gbɛ akɛ ekɛ mɛi susu sanebimɔ nɛɛ he. Ni lɛɛlɛŋ hu, efee nakai! Ewie be pɔtɛɛ ko ni etsɛ lɛ akɛ ‘be ni eba emaŋtsɛyeli lɛ mli’ lɛ he shii abɔ. (Mateo 24:37) Nakai ba ni Kristo eba lɛ kɛ Mesia Maŋtsɛyeli ni abaato shishi lɛ yɛ tsakpãa kpaakpa. Mɛni ji nɛkɛ ba ni Kristo eba nɛɛ? Nyɛhaa wɔsusua anɔkwalei ejwɛ komɛi ni Biblia lɛ jieɔ lɛ kpo ni kɔɔ ba ni Kristo eba lɛ he lɛ ahe wɔkwɛa.
1. Ba ni Kristo eba lɛ baaje shishi yɛ egbele sɛɛ be kplaŋŋ mli. Yesu kɛ abɛbua ko ha, ni yɛ abɛbua lɛ mli lɛ ekɛ ehe to ablade ko ni “dom etee maŋsɛɛ shɔŋŋ ni eyaŋɔ emaŋtsɛyeli” lɛ he. (Luka 19:12) Mɛɛ gbɛ nɔ nakai abɛbua ni ji gbalɛ lɛ ba mli? Ojogbaŋŋ, bɔ ni ebalɛ nɛ, Yesu gbo ni atée lɛ shi; kɛkɛ ni efã gbɛ kɛtee “maŋsɛɛ shɔŋŋ,” ni ji ŋwɛi. Taakɛ Yesu gba yɛ abɛbua kroko ni tamɔ nɔ ni tsɔ hiɛ lɛ nɔŋŋ mli lɛ, ebaaku esɛɛ eba emaŋtsɛyeli lɛ mli ‘yɛ be kplaŋŋ sɛɛ.’—Mateo 25:19.
Beni Yesu etee ŋwɛi afii komɛi asɛɛ lɛ, bɔfo Paulo ŋma akɛ: “[Yesu] lɛ, . . . ni eshã eshai ahe afɔle shikome nyɔŋlo lɛ, eyata Nyɔŋmɔ ninejurɔ nɔ; ni nɔ ni eshwɛ ji akɛ, eemɛ ‘kɛyashi beyinɔ ní aaaŋɔ ehenyɛlɔi lɛ afee enajiashi maaŋoo.’” (Hebribii 10:12, 13) No hewɔ lɛ, beni Yesu yashɛ ŋwɛi lɛ, emɛ be kplaŋŋ. Be ni ekɛmɛɔ nɛɛ ba naagbee beni Yehowa Nyɔŋmɔ wó e-Bi lɛ akɛ Mesia Maŋtsɛyeli ni ajɛ jeeŋmɔ beebe awo he shi lɛ nɔ Maŋtsɛ lɛ. Nakai beaŋ ji be ni ba ni Kristo eba lɛ je shishi. Ani adesai ni yɔɔ shikpɔŋ lɛ nɔ lɛ baana nifeemɔ ni sa kadimɔ waa nɛɛ?
2. Adesai kɛ amɛhiŋmɛii enaŋ ba ni Kristo eba lɛ. Kaimɔ akɛ Yesu kɛ ba ni eba lɛ he okadi ha. (Mateo 24:3) Ani ehe baahia ni ekɛ enɛ he okadi aha, kɛji akɛ adesai kɛ amɛhiŋmɛii baana ba ni eba lɛ? Ákɛ nɔkwɛmɔnɔ lɛ: Ŋɔɔ lɛ akɛ oofã gbɛ koni oyakwɛ ŋshɔ lɛ. Ekolɛ obaana okadii ni tsɔɔ mɔ gbɛ yɛ gbɛ lɛ nɔ, shi be mli ni oyashɛ ŋshɔ lɛ naa, ni odamɔ ŋshɔ nui ni bua shi babaoo ni efee tamɔ nɔ ni ekɛ ŋwɛi ekpe lɛ naa lɛ, ani obaakpa gbɛ akɛ obaana tao ko ni akɛ niŋmaa okadii wuji eŋma yɛ nɔ akɛ “Ŋshɔ,” ni miitsɔɔ bo akɛ ŋshɔ lɛ nɛ? Ekã shi faŋŋ akɛ ofeŋ nakai! Mɛni hewɔ esa akɛ aha bo okadi ko ni miitsɔɔ bo nɔ ko ni obaanyɛ okɛ ohiŋmɛi ana yɛ gbɛ ni waaa nɔ?
Yesu kɛ okadi ni baatsɔɔ be ni eba emaŋtsɛyeli lɛ mli lɛ ha, jeee ni ekɛtsɔɔ nɔ ko ni adesai baanyɛ amɛkɛ amɛhiŋmɛii ana, shi moŋ koni ekɛye ebua amɛ ni amɛyɔse nɔ ko ni baaba yɛ ŋwɛi. No hewɔ lɛ, Yesu kɛɛ akɛ: “Nyɔŋmɔ maŋtsɛyeli lɛ baaa taakɛ nɔ ko ni anaa.” (Luka 17:20) Belɛ, te aaafee tɛŋŋ ni okadi lɛ aaaha mɛi ni yɔɔ shikpɔŋ lɛ nɔ lɛ ale akɛ ba ni Kristo eba lɛ eje shishi?
3. Naagbai ni mli wawai ni baaba shikpɔŋ lɛ nɔ lɛ baakadi ba ni Yesu eba lɛ. Yesu kɛɛ akɛ nibii ni baakadi ba ni eba akɛ Maŋtsɛ yɛ ŋwɛi lɛ ekomɛi ji tai, hɔ̃ji, shikpɔŋhosomɔi, tsɛŋemɔ-helai, kɛ mlakwamɔ. (Mateo 24:7-12; Luka 21:10, 11) Mɛni baaha shihilɛi gbohii nɛɛ fɛɛ aba? Biblia lɛ tsɔɔ akɛ, Satan ni ji “je nɛŋ lumɔ lɛ” egiri naakpa ejaakɛ ele akɛ amrɔ nɛɛ ni Kristo eba akɛ Maŋtsɛ lɛ, be ni eshwɛ kɛha lɛ lɛ faaa dɔŋŋ. (Yohane 12:31; Kpojiemɔ 12:9, 12) Wɔnaa girimɔ ni Satan egiri kɛ ba ni Kristo eba lɛ ahe odaseyelii babaoo yɛ wɔbei nɛɛ amli. Odaseyelii nɛɛ eje kpo faŋŋ bɔ ni anako ehenɔ dã yɛ je lɛŋ fɛɛ, titri lɛ, kɛjɛ afi 1914, ni ji afi ni yinɔsaneŋmalɔi kpɛlɛ nɔ akɛ eji be ni je lɛ shihilɛ tsake kwraa lɛ nɔ kɛbaa nɛɛ.
Ekolɛ enɛɛmɛi fɛɛ baafee tamɔ adafitswaa gbohii komɛi ni akɛhaa, shi jeee nakai kwraa eji. Etsɔɔ akɛ Mesia Maŋtsɛyeli lɛ miiye nɔ amrɔ nɛɛ yɛ ŋwɛi. Etsɛŋ ni nakai nɔyeli lɛ baaye shikpɔŋ lɛ fɛɛ nɔ. Shi te aaafee tɛŋŋ ni mɛi aaale nakai Maŋtsɛyeli lɛ he sane bɔni afee ni amɛkpɛlɛ enɔyeli lɛ nɔ ni amɛbatsɔ eshishibii?
4. Sanekpakpa lɛ ni ashiɛɔ yɛ je lɛŋ fɛɛ lɛ kadiɔ ba ni Yesu eba lɛ. Yesu kɛɛ akɛ ba ni eba lɛ baatamɔ “Noa gbii lɛ.” * (Mateo 24:37-39) Jeee adeka kpɛlɔ kɛkɛ ji Noa; eji “jalɛ shiɛlɔ” hu. (2 Petro 2:5) Noa bɔ mɛi kɔkɔ akɛ Nyɔŋmɔ miiba ebakojo amɛ. Yesu wie akɛ esɛɛnyiɛlɔi ni yɔɔ shikpɔŋ lɛ nɔ lɛ hu baabɔ mɛi kɔkɔ nakai nɔŋŋ beni eba lɛ. Egba akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.”—Mateo 24:14.
Taakɛ wɔna yɛ sane ni tsɔ hiɛ lɛ mli lɛ, Nyɔŋmɔ Maŋtsɛyeli lɛ baakpata je nɛŋ nɔyelii lɛ fɛɛ ahiɛ. Shiɛmɔ nitsumɔ lɛ hɛleɔ mɛi ashi akɛ etsɛŋ ni ŋwɛi nɔyeli nɛɛ baafee shihilɛ fɔŋ nɛɛ he nɔ ko, ni ehaa mɛi fɛɛ náa hegbɛ koni amɛje hiɛkpatamɔ ni baa lɛ mli ni amɛbatsɔmɔ Maŋtsɛyeli lɛ shishibii. Belɛ, sanebimɔ ni he hiaa waa lɛ ji akɛ, Te obaafee onii yɛ kɔkɔbɔɔ nɛɛ he oha tɛŋŋ?
Ani Nyɔŋmɔ Maŋtsɛyeli lɛ Baafee Sanekpakpa Kɛha Bo?
Shɛɛ sane ni Yesu shiɛ lɛ ji nɔ ni kɛ hiɛnɔkamɔ ni nɔ bɛ haa. Beni atse atua yɛ Eden sɛɛ afii akpei komɛi ni eho nɛ lɛ, Yehowa Nyɔŋmɔ to eyiŋ akɛ ebaato nɔyeli ko ni baajaje nibii ni etɔ̃tɔ̃ lɛ shishi ema shi, ni nɔyeli nɛɛ baaha adesai anɔkwafoi aku sɛɛ ahi shi taakɛ Nyɔŋmɔ to eyiŋ eha amɛ kɛjɛ shishijee lɛ ekoŋŋ—shihilɛ kɛmiiya naanɔ yɛ paradeiso mli yɛ shikpɔŋ nɛɛ nɔ. Ani nɔ ko yɛ ni baanyɛ aha oná miishɛɛ fe nilee ni oná akɛ nɔyeli ni awo he shi kɛjɛ blema beebe lɛ miiye nɔ amrɔ nɛɛ yɛ ŋwɛi lɛ? Nɔyeli nɛɛ jeee yiŋsusumɔ folo ko kɛkɛ, shi eji nɔ ko ni yɔɔ diɛŋtsɛ!
Amrɔ nɛɛ, mɔ ni Nyɔŋmɔ ewó lɛ Maŋtsɛ lɛ miiye nɔ yɛ ehenyɛlɔi ateŋ. (Lala 110:2) Eji Nyɔŋmɔ suɔmɔnaa nii akɛ etao mɛi fɛɛ ni taoɔ ni amɛle mɔ ni eji diɛŋtsɛ ni amɛja lɛ “yɛ mumɔŋ kɛ anɔkwale mli” lɛ asɛɛ gbɛ, ni Mesia lɛ miitsu e-Tsɛ lɛ suɔmɔnaa nii nɛɛ he nii yɛ jeŋ fɔŋ ni etse ehe kɛjɛ Nyɔŋmɔ he nɛɛ mli. (Yohane 4:24) Mɛi fɛɛ ni jɛ hewolonɔ sui, kɛ shihilɛi srɔtoi amli, onukpai kɛ gbekɛbii fɛɛ baanyɛ aná hiɛnɔkamɔ akɛ amɛbaahi shi kɛya naanɔ yɛ Nyɔŋmɔ Maŋtsɛyeli nɔyeli lɛ shishi. (Bɔfoi lɛ Asaji 10:34, 35) Wɔmiiwo bo hewalɛ ni oŋɔ hegbɛ ni nɔ bɛ ni akɛha bo nɛɛ. Kasemɔ Nyɔŋmɔ Maŋtsɛyeli lɛ he nii amrɔ nɛɛ, koni onyɛ ohi shi yɛ ejalɛ nɔyeli lɛ shishi kɛya naanɔ!—1 Yohane 2:17.
[Shishigbɛ niŋmaa]
^ kk. 10 Yesu wiemɔi nɛɛ yeɔ buaa kɛjajeɔ susumɔ ni ejaaa ni anáa yɛ bɔ ni atsɔɔ wiemɔ ni ji ‘be ni eba emaŋtsɛyeli lɛ mli’ lɛ shishi aha yɛ gbɛ ni ejaaa nɔ yɛ Biblia shishitsɔɔmɔi komɛi amli lɛ. Biblia shishitsɔɔmɔi komɛi tsɔɔ wiemɔ nɛɛ shishi akɛ “ebaa,” “be ni ebaa,” loo “esɛɛkuu,” ni enɛɛmɛi fɛɛ tsɔɔ be kukuoo ko nifeemɔ. Shi kadimɔ akɛ, Yesu kɛ ba ni eba lɛ etooo Nu Afua ni ba yɛ Noa gbii lɛ amli lɛ, ni ji nifeemɔ ko ni ba shikome kɛkɛ yɛ be ko mli lɛ he, shi moŋ ekɛto “Noa gbii lɛ,” ni ji be kplaŋŋ ko ni sa kadimɔ waa lɛ he. Taakɛ nakai blema bei lɛ ji lɛ, beni Kristo eba lɛ baafee be kplaŋŋ ko ni mɛi kɛ amɛhe baawo daa gbi shihilɛ mli nifeemɔi amli aahu akɛ, amɛbaaku amɛhiɛ amɛshwie kɔkɔbɔi ni akɛhaa lɛ nɔ.
[Mfonirii ni yɔɔ baafa 8, 9]
Adafitswai ni ehiii ni wɔnuɔ daa gbi lɛ tsɔɔ akɛ etsɛŋ ni nibii kpakpai baaba
[He ni Sane lɛ Jɛ]
Tũ ni akɛtswiaa kɔɔyɔŋ lɛji: U.S. Army photo