Mɛni Ji Nyɔŋmɔ Maŋtsɛyeli Lɛ?

MƐNI ji sane titri ni Yesu shiɛ lɛ? Yesu diɛŋtsɛ tsɔɔ mli akɛ no ji Nyɔŋmɔ Maŋtsɛyeli lɛ. (Luka 4:43) Kɛ́ Yesu kɛ mɛi miiwie lɛ, amɛnuɔ ni eetsĩ Maŋtsɛyeli lɛ tã shii abɔ. Ani saji nɛɛ ha amɛhiɛ fee amɛ yaa loo amɛhe jɔ̃ amɛhe? Ani amɛbi lɛ nɔ ni Maŋtsɛyeli nɛɛ ji? Dabi. Atsiii sanebimɔi ni tamɔ nakai tã yɛ Sanekpakpai lɛ amli. No hewɔ lɛ, ani Nyɔŋmɔ Maŋtsɛyeli lɛ ji nɔ ko ni mɛi ni hi shi yɛ nakai beaŋ lɛ ateŋ mɛi babaoo le he nɔ ko?

Anɔkwa sane ji akɛ, blema Ŋmalɛi lɛ ni Yudafoi lɛ buɔ lɛ akɛ eyɛ krɔŋkrɔŋ lɛ ha ale nɔ ni nakai Maŋtsɛyeli lɛ ji, etsɔɔ nɔ ni eji lɛ mli fitsofitso ni eha ale nɔ ni ebaatsu. Ŋmɛnɛ lɛ, wɔbaanyɛ wɔtsɔ Biblia lɛ nɔ wɔkase Maŋtsɛyeli lɛ he nii babaoo, taakɛ Yudafoi lɛ fee lɛ. Nyɛhaa wɔsusua anɔkwalei kpawo komɛi ni Biblia lɛ tsɔɔ wɔ yɛ Maŋtsɛyeli lɛ he lɛ ahe. Ajie anɔkwalei nɛɛ amli klɛŋklɛŋ etɛ lɛ kpo aha Yudafoi ni hi shi yɛ Yesu beaŋ lɛ kɛ mɛi ni hi shi dani eba lɛ. Kristo loo ebɔfoi lɛ ha ale etɛ ni nyiɛ sɛɛ lɛ yɛ klɛŋklɛŋ afii 100 lɛ mli. Nɔ ni ji naagbee nɔ lɛ efee faŋŋ yɛ wɔbei nɛɛ amli.

1. Nyɔŋmɔ Maŋtsɛyeli lɛ ji nɔyeli ni yɔɔ diɛŋtsɛ, ni baahi shi kɛya naanɔ. Klɛŋklɛŋ gbalɛ ni yɔɔ Biblia lɛ mli lɛ ha ale akɛ Nyɔŋmɔ baatsu mɔ ko ni ebakpɔ̃ adesai anɔkwafoi lɛ. Atsɛ́ mɔ nɛɛ akɛ “seshi” lɛ. Lɛ ji mɔ ni baajie naagbai fɛɛ ni jɛ Adam, Hawa, kɛ Satan atuatsemɔ lɛ mli kɛba lɛ fɛɛ kɛya. (1 Mose 3:15)  Be kplaŋŋ sɛɛ lɛ, akɛɛ anɔkwafo Maŋtsɛ David miishɛɛ sane ko ni kɔɔ “seshi” nɛɛ loo Mesia lɛ he. Mesia lɛ baatsɔ Maŋtsɛyeli ko nɔ Maŋtsɛ. Maŋtsɛyeli nɛɛ baafee nɔ ni yɔɔ srɔto yɛ ekrokomɛi lɛ fɛɛ ahe, ni ebaahi shi kɛya naanɔ.—2 Samuel 7:12-14.

2. Nyɔŋmɔ Maŋtsɛyeli lɛ baajie adesai anɔyelii lɛ fɛɛ kɛya. Ajie jeŋ hewalɛi ni baaye nɔ kɛtsara nɔ he ninaa ko kpo atsɔɔ gbalɔ Daniel, ni amɛnɔyeli lɛ baaya nɔ yɛ yinɔi lɛ amli kɛbashi wɔbei nɛɛ amli. Kadimɔ bɔ ni ninaa nɛɛ ba naagbee kɛ wiemɔi ni yɔɔ miishɛɛ nɛɛ, akɛ: “Nɛkɛ maŋtsɛmɛi nɛɛ [ni ji adesai ni yeɔ nɔ yɛ naagbee bei nɛɛ amli lɛ] ayinɔ lɛ Nyɔŋmɔ ní yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.” No hewɔ lɛ, abaakpata maŋtsɛyelii, loo nɔyelii ni yɔɔ je nɛŋ lɛ fɛɛ kɛ amɛtawuu nibii, amɛyiwalɛ nifeemɔi, kɛ amɛjuu-kɛfɔ̃ lɛ ahiɛ kɛya naanɔ. Taakɛ Daniel gbalɛ lɛ tsɔɔ lɛ, etsɛŋ ni Nyɔŋmɔ Maŋtsɛyeli lɛ baaye shikpɔŋ muu lɛ fɛɛ nɔ. (Daniel 2:44, 45) Ákɛ Maŋtsɛyeli ni yɔɔ diɛŋtsɛ lɛ, ebaafee nɔyeli pɛ ni baaye shikpɔŋ lɛ nɔ. *

3. Nyɔŋmɔ Maŋtsɛyeli lɛ baafo tai, helai, hɔmɔ, kɛ gbele po sɛɛ. Biblia mli gbalɛi ni yɔɔ miishɛɛ lɛ haa aleɔ nɔ ni Nyɔŋmɔ Maŋtsɛyeli lɛ baafee yɛ shikpɔŋ nɛɛ nɔ. Nakai nɔyeli lɛ baatsu nɔ ko ni adesai agbɛjianɔtoo ko nyɛko amɛtsu loo amɛnyɛŋ amɛtsu kɔkɔɔkɔ lɛ he nii. Susumɔ he okwɛ—ni akpata tawuu nibii fɛɛ ahiɛ kɛmiiya naanɔ! “Ehãa tai asɛɛ foɔ kɛyaa shikpɔŋ lɛ naagbeehei lɛ.” (Lala 46:10) Datrɛfoi, helatsamɔhei, loo hela ko hela ko ehiŋ shi dɔŋŋ. “Maŋbii lɛ ateŋ mɔ ko ekɛɛŋ akɛ: Migbɔjɔ [loo “mihe miiye,” NW]!” (Yesaia 33:24) Hɔ̃ji bɛ dɔŋŋ, niyenii baabu, ni abaaná niyenii kpakpai babaoo ni haa mɔ hewalɛ aye. “Shikpɔŋ lɛ nɔ aaaba abele babaoo.” (Lala 72:16) Yarafeemɔi, kpeshii, gɔɔi, hei ni akɛ gbohii yatoɔ dani afuɔ amɛ, loo awerɛhoyeli ni nibii nɛɛ kɛbaa lɛ eko eko ehiŋ shi dɔŋŋ. Naagbee lɛ, abaajie gbele ni ji wɔhenyɛlɔ kpele lɛ kɛya kwraa. Nyɔŋmɔ ‘baami gbele kɛaatee naanɔ; ni Nuŋtsɔ Yehowa aaatsumɔ hiɛaŋ fɛɛ yaafonui.’—Yesaia 25:8.

4. Nyɔŋmɔ Maŋtsɛyeli lɛ yɛ Nɔyelɔ ni Nyɔŋmɔ ehala lɛ. Jeee Mesia lɛ diɛŋtsɛ hala ehe akɛ ebaafee Nɔyelɔ, ni asaŋ jeee adesai ni yeee emuu hu ji mɛi ni hala lɛ. Yehowa Nyɔŋmɔ diɛŋtsɛ hala lɛ. Sabalai ni ji Mesia kɛ Kristo lɛ po maa enɛ nɔ mi. Wiemɔi enyɔ nɛɛ fɛɛ shishi ji “Mɔ ni Afɔ lɛ Mu.” No hewɔ lɛ, Yehowa efɔ Maŋtsɛ nɛɛ mu, loo ehala lɛ kɛha enitsumɔ krɛdɛɛ lɛ. Nyɔŋmɔ wie yɛ ehe akɛ: “Naa, mitsulɔ mɔ ni mihiɛ emli, mɔ ni mihala ní mináa ehe tsui lɛ! Mikɛ Mimumɔ lɛ eshwie enɔ, ni ekɛ kojomɔ aaatee ayaha jeŋmaji lɛ.” (Yesaia 42:1; Mateo 12:17, 18) Namɔ yɔɔ ni le Nɔyelɔ ni hi fe fɛɛ kɛha wɔ fe wɔ-Bɔlɔ lɛ?

5. Nyɔŋmɔ Maŋtsɛyeli lɛ nɔ Maŋtsɛ lɛ eha adesai fɛɛ ena akɛ eji mɔ ni sa. Yesu ni jɛ Nazaret lɛ ha ana akɛ lɛ ji Mesia ni agba ehe sane afɔ̃ shi lɛ. Afɔ́ lɛ yɛ weku ni Nyɔŋmɔ etsɔɔ lɛ mli. (1 Mose 22:18; 1 Kronika 17:11; Mateo 1:1) Beni eyɔɔ shikpɔŋ lɛ nɔ lɛ, eha gbalɛi babaoo ni kɔɔ Mesia lɛ he ni aŋma he saji ashwie shi afii ohai abɔ kɛtsɔ hiɛ lɛ ba mli. Agbɛnɛ hu, akpɛlɛ enɔ kɛjɛ ŋwɛi akɛ Mesia lɛ. Yɛ mɛɛ gbɛ nɔ? Ojogbaŋŋ, Nyɔŋmɔ wie kɛjɛ ŋwɛi, ni etsɛ lɛ akɛ Lɛ diɛŋtsɛ e-Bi; ŋwɛibɔfoi ha ale akɛ Yesu ji Mesia ni agba ehe sane afɔ̃ shi lɛ; ni Yesu tsɔ Nyɔŋmɔ hewalɛ lɛ nɔ efee naakpɛɛ nibii babaoo—bei pii lɛ yɛ mɛi ohai abɔ loo akpei abɔ ahiɛ. * Yesu ha ana nɔ̃ Nɔyelɔ ni ebaaji lɛ shii abɔ. Jeee akɛ Yesu yɛ hewalɛ ni ekɛaaye ebua mɛi kɛkɛ, shi eyɛ he miishɛɛ hu akɛ eeefee nakai. (Mateo 8:1-3) Efeee ŋkomeŋfa, emusuŋ tsɔɔ lɛ, eyɛ ekãa, ni ebaa ehe shi. Nibii ni efee beni eyɔɔ shikpɔŋ lɛ nɔ lɛ ahe saji yɛ Biblia lɛ mli ni mɛi fɛɛ baanyɛ amɛkane.

6. Nyɔŋmɔ Maŋtsɛyeli lɛ yɛ mɛi 144,000 ni baafata Kristo he kɛye nɔ. Yesu wie akɛ mɛi krokomɛi baafata ehe kɛye nɔ yɛ ŋwɛi, ni ebɔfoi  lɛ hu fata mɛi nɛɛ ahe. Etsɛ́ kuu nɛɛ akɛ “asafoku bibioo.” (Luka 12:32) Sɛɛ mli lɛ, akɛɛ bɔfo Yohane akɛ asafoku bibioo nɛɛ ayibɔ baafee mɛi 144,000. Amɛbaatsu nitsumɔ ko ni yɔɔ miishɛɛ yɛ ŋwɛi, no ji akɛ amɛbaafata Kristo he kɛye nɔ akɛ maŋtsɛmɛi ni amɛbaasɔmɔ akɛ osɔfoi.—Kpojiemɔ 5:9, 10; 14:1, 3.

7. Amrɔ nɛɛ Nyɔŋmɔ Maŋtsɛyeli lɛ miiye nɔ yɛ ŋwɛi, ni efee klalo akɛ ebaaye shikpɔŋ lɛ fɛɛ nɔ. Naagbee anɔkwa sane nɛɛ ji anɔkwalei ni yɔɔ miishɛɛ fe fɛɛ lɛ ateŋ ekome ni wɔbaanyɛ wɔkase he nii. Biblia lɛ kɛ odaseyelii babaoo haa kɛmaa nɔ mi akɛ Yesu nine eshɛ ehegbɛ akɛ Maŋtsɛ yɛ ŋwɛi lɛ nɔ. Amrɔ nɛɛ eeye nɔ yɛ ŋwɛi, ni etsɛŋ ni ebaalɛɛ enɔyeli lɛ mli kɛkpele shikpɔŋ muu lɛ fɛɛ nɔ, ni ebaaha gbalɛi ni yɔɔ miishɛɛ fɛɛ ni wɔtsi tã kɛtsɔ hiɛ lɛ aba mli. Shi te wɔɔfee tɛŋŋ wɔná nɔmimaa akɛ Nyɔŋmɔ Maŋtsɛyeli lɛ miiye nɔ amrɔ nɛɛ? Ni mɛɛ be ebaaje shishi eye shikpɔŋ lɛ nɔ?

[Shishigbɛ niŋmai]