Nɔ ko ni Mɛi Biɔ Yɛ Je Lɛŋ He Fɛɛ He

SUSUMƆ enɛ he okwɛ, mɛi akpekpei ohai abɔ, kɛ́ wɔɔkɛɛ lɛ, mɛi akpekpei toi akpei abɔ fɛɛ miibi nɔ̃ kome too lɛ nɔŋŋ. Amɛmiibi mɔ ni yɔɔ hegbɛ ni nɔ kwɔ fe fɛɛ yɛ jeŋ muu lɛ fɛɛ mli lɛ ni etsu nibimɔ pɔtɛɛ ko he nii eha amɛ. Kɛlɛ, amɛteŋ mɛi fioo ko pɛ le nɔ tuuntu ni amɛbiɔ lɛ. Ani nɔ ko tamɔ nakai miiya nɔ lɛɛlɛŋ? Anɔkwa sane ji akɛ nɔ ko ni tamɔ nakai miiya nɔ daa. Mɛni ji nɔ ni mɛi nɛɛ fɛɛ biɔ lɛ? Amɛmiibi ni Nyɔŋmɔ Maŋtsɛyeli lɛ aba!

Akɔntaabuu ko tsɔɔ akɛ jamɔi aaafee 37,000 yɛ ni tsɛɔ amɛhe Kristofoi, ni amɛheɔ amɛyeɔ akɛ Yesu Kristo ji amɛ-Hiɛnyiɛlɔ. Jamɔi nɛɛ amlibii lɛ ayibɔ fa fe akpekpei toi akpei enyɔ. Amɛteŋ mɛi babaoo fɔɔ sɔlemɔ ni afɔɔ lɛ tsɛmɔ akɛ Wɔtsɛ ni Yɔɔ Ŋwɛi loo Nuŋtsɔ lɛ Sɔlemɔ lɛ kɛɛmɔ. Ani ole sɔlemɔ nɛɛ kɛɛmɔ? Taakɛ Yesu tsɔɔ esɛɛnyiɛlɔi lɛ, ejeɔ shishi akɛ: “Wɔtsɛ ni yɔɔ ŋwɛi, ogbɛi lɛ he atse; omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.”—Mateo 6:9, 10.

Afii ohai abɔ nɛ ni sɔlemɔyalɔi kɛ bulɛ etĩ wiemɔi nɛɛ amli shii abɔ yɛ amɛsɔlemɔ tsũi amli. Wekui feɔ ekome kɛtĩɔ sɔlemɔ nɛɛ mli shii abɔ, ni aŋkroaŋkroi hu feɔ nakai nɔŋŋ yɛ bei ni hi kɛ bei ni ehiii fɛɛ mli. Amɛjɛɔ amɛtsui muu fɛɛ mli amɛkɛɔ sɔlemɔ nɛɛ, ni amɛkɛ henumɔi ni mli wa po feɔ nakai. Mɛi babaoo ekase sɔlemɔ nɛɛ amɛwo amɛyitsoŋ ni amɛkɛɔ lɛ kɛkɛ ni amɛsusuuu shishinumɔ ni ehiɛ lɛ he. Jeee mɛi ni kɛɔ akɛ Kristofoi ji amɛ lɛ pɛ ji mɛi ni eshwe koni Nyɔŋmɔ Maŋtsɛyeli lɛ aba, ni amɛsɔle yɛ he.

Abiɔ Nɔ ko ni Tamɔ Nakai Nɔŋŋ yɛ Jamɔi ni Jeee Kristofoi Ajamɔ Mli

Sɔlemɔ ko ni ale jogbaŋŋ yɛ Yudafoi ajamɔ lɛ mli ji Kaddish ni afɔɔ kɛɛmɔ yɛ yarafeemɔ shishi lɛ. Eyɛ mli akɛ sɔlemɔ nɛɛ kɔɔɔ gbele loo ŋkɔmɔyeli he moŋ, shi afɔɔ sɔlemɔ nɛɛ kɛɛmɔ beni mɔ ko egbo. Sɔlemɔ lɛ kɛɔ akɛ: “[Nyɔŋmɔ] ato e-Maŋtsɛyeli lɛ shishi yɛ owala beaŋ . . .  eha eba oya.” * Sɔlemɔ kroko ni asɔleɔ yɛ blema kpeehei  lɛ wieɔ hiɛnɔkamɔ ni mɛi yɔɔ yɛ Mesia ni jɛ David we lɛ Maŋtsɛyeli lɛ mli lɛ he.

Jamɔi krokomɛi ni jeee Kristofoi ajamɔ lɛ hu ená Nyɔŋmɔ Maŋtsɛyeli lɛ he miishɛɛ. The Times of India lɛ bɔ amaniɛ akɛ jamɔŋ hiɛnyiɛlɔ ko ni jɛ India ni ehé gbɛi waa ni hi shi yɛ afi 1800 afii lɛ amli ni bɔ mɔdɛŋ akɛ eha Hindubii, Muslimbii, kɛ Kristofoi akpã gbee yɛ hemɔkɛyelii ahe lɛ wie akɛ: “Ja boka kɛ anai efee ekome dani Nyɔŋmɔ maŋtsɛyeli lɛ diɛŋtsɛ baaba.” Islambii akɔleji ko ni yɔɔ Strathfield yɛ Australia lɛ atsɔɔlɔ nukpa lɛ ŋma kɛyaha adafitswaa wolo ko nyɛsɛɛ nɛɛ akɛ: “Taakɛ Muslimbii fɛɛ heɔ amɛyeɔ lɛ, mi hu miheɔ miyeɔ [akɛ] Yesu baaba ni ebato Nyɔŋmɔ Maŋtsɛyeli lɛ diɛŋtsɛ ema shi.”

Ŋwanejee ko bɛ he akɛ, amrɔ nɛɛ mɛi ni hiɛ kã Nyɔŋmɔ Maŋtsɛyeli lɛ nɔ ni amɛsɔleɔ yɛ he lɛ ayibɔ shɛɔ akpekpei toi akpei abɔ. Shi susumɔ anɔkwa sane ko he okwɛ.

Eeenyɛ efee akɛ ole akɛ, ákɛ Yehowa Odasefoi ni ji mɛi ni feɔ wolo nɛɛ lɛ, wɔbaa shĩai ni yɔɔ okutso lɛ mli lɛ amli ni wɔkɛ mɛi bagbaa Biblia lɛ he sane. Kɛbashi beni wɔŋmaa wolo nɛɛ, no mli lɛ wɔmiitsu nitsumɔ nɛɛ yɛ maji 236 nɔ yɛ wiemɔi ni fe 400 mli yɛ je lɛŋ fɛɛ. Saneyitso titri ni wɔshiɛɔ yɛ he ji Nyɔŋmɔ Maŋtsɛyeli lɛ. Yɛ anɔkwale mli lɛ, kadimɔ akɛ wolo tɛtrɛɛ nɛɛ gbɛi fɛɛ ji Buu-Mɔɔ Eetswa Yehowa Maŋtsɛyeli He Adafi. Bei pii lɛ, wɔbiɔ mɛi kɛji amɛsɔleɔ koni nakai Maŋtsɛyeli lɛ aba. Amɛteŋ mɛi pii haa hetoo akɛ hɛɛ. Shi kɛlɛ, kɛ́ wɔbi amɛ akɛ mɛni ji nakai Maŋtsɛyeli lɛ, hetooi ni mɛi nɛɛ ateŋ mɛi pii haa lɛ tsɔɔ akɛ, amɛmiikɛɛ akɛ “Mileee,” aloo akɛ, hetooi ni amɛkɛhaa lɛ bɛ faŋŋ ni nɔmimaa bɛ he.

Mɛni hewɔ mɛi babaoo sɔleɔ kɛbiɔ nɔ ko ni amɛleee nɔ̃ tuuntu ni eji lɛ? Ani hwanyaŋŋ ni Nyɔŋmɔ Maŋtsɛyeli lɛ yɔɔ ni eshishinumɔ hu wa lɛ hewɔ ebaalɛ nakai? Dabi. Atsɔɔ nɔ ni Maŋtsɛyeli lɛ ji lɛ mli fitsofitso ni aha efee faŋŋ yɛ Biblia lɛ mli. Kɛfata he lɛ, Maŋtsɛyeli lɛ he shɛɛ sane ni yɔɔ Biblia lɛ mli lɛ baanyɛ aha oná hiɛnɔkamɔ diɛŋtsɛ yɛ jaramɔ bei nɛɛ amli. Wɔbaana bɔ ni Biblia lɛ tsɔɔ hiɛnɔkamɔ nɛɛ mli ehaa yɛ sane ni nyiɛ sɛɛ lɛ mli. No sɛɛ lɛ, wɔbaana be mli ni abaaha Yesu sɔlemɔ akɛ Maŋtsɛyeli lɛ aba lɛ hetoo.

[Shishigbɛ niŋmaa]