Maŋtsɛyeli Asai ni Amamɔɔ Koni Akɛjie Yehowa Yi

“Minaa kpɛ mihe. Misusuko he pɛŋ akɛ wɔbaaná he ko ni yɔɔ fɛo tamɔ nɛkɛ ni wɔkpe yɛ jɛmɛ kɛjie Yehowa yi. Onyɛŋ okɛ shika ahé miishɛɛ ni miná lɛ kɔkɔɔkɔ!”—MARIA, MEXICO.

YEHOWA ODASEFOI sumɔɔ ni amɛkpe kutuu kɛkase Nyɔŋmɔ Wiemɔ ni ji Biblia lɛ. (Lala 27:4; Hebribii 10:23-25) Ni titri lɛ, amɛnáa enɛ feemɔ he miishɛɛ kɛji amɛnyɛ amɛná jamɔhei ni sa ni amɛkpe kutuu yɛ jɛmɛ. Yɛ nyɛsɛɛ afii nɛɛ amli lɛ, amɛmamɔ jamɔhei heei akpei abɔ yɛ maji babaoo anɔ yɛ je lɛŋ fɛɛ, ni atsɛɔ jamɔhei nɛɛ akɛ Maŋtsɛyeli Asai.

Mɛni eha amamɔɔ tsũi babaoo nɛɛ? Namɛi tsuɔ nitsumɔ nɛɛ? Ni mɛɛ hewalɛ tsumaa nitsumɔ nɛɛ náa yɛ nitsulɔi lɛ anɔ? Bɔni afee ni oná sanebimɔi nɛɛ ahetoo lɛ, susumɔ nitsumɔi ni yaa nɔ yɛ Mexico kɛ Belize lɛ ahe okwɛ.

Maŋtsɛyeli Asai Heei Akpei Abɔ Ahe Miihia!

Yɛ afii ni eho lɛ amli lɛ, no mli lɛ Yehowa Odasefoi ni yɔɔ Mexico lɛ kpeɔ yɛ he fɛɛ he ni amɛbaaná—yɛ abɔɔi amli, Odasefoi ashĩai amli, tsũi ni akɛ nibii toɔ mli, tsũi ni lɔlei mamɔɔ mli, loo asai ni ahàiɔ amli. Nakai beaŋ lɛ, Odasefoi anɔkwafoi nɛɛ fɔɔ he susumɔ akɛ ebaahi jogbaŋŋ kɛ́ amɛ diɛŋtsɛ amɛmamɔ amɛ-Maŋtsɛyeli Asai.

Beni shɛɔ afi 1994 lɛ, no mli lɛ ayɛ Odasefoi 388,000 yɛ Mexico. Niiamlipɛimɔ ko ni afee lɛ tsɔɔ akɛ, kɛji mɛi nɛɛ fɛɛ baaná amɛ diɛŋtsɛ amɛ jamɔhei lɛ, belɛ ebaabi ni aná Maŋtsɛyeli Asai heei 3,300 sɔŋŋ. Mɛɛ nitsumɔ ni da po enɛ ji nɛkɛ!

Nakai beaŋ lɛ, asafoi komɛi ni yɔɔ jɛmɛ ni baanyɛ lɛ eje shishi amɛmiimamɔ amɛ diɛŋtsɛ amɛ-Maŋtsɛyeli Asai. Shi yɛ afii enumɔ sɛɛ lɛ, ebafee faŋŋ akɛ kɛji abaanyɛ atsu hiamɔ ni yɔɔ lɛ he nii jogbaŋŋ lɛ, no lɛ ebaabi ni wɔmamɔ asai babaoo yɛ be kukuoo mli. Te atsuɔ hiamɔ nii nɛɛ ahe nii ahaa tɛŋŋ?

Nitsulɔi Gbɛfalɔi ni He Esa ni Kɛ Amɛhe Eha

Yɛ afi 1999 mli lɛ, ato gbɛjianɔ hee ko shishi kɛha asai amaamɔ. Ato Maŋtsɛyeli Asai Amaamɔ Kui ashishi yɛ Mexico maŋ lɛ mli fɛɛ. Yehowa Odasefoi ni yɔɔ maŋ lɛŋ he fɛɛ he—ni amɛteaŋ mɛi babaoo yɛ tsumaa hesaai lɛ—kɛ amɛhe ha ni amɛye amɛbua kɛtsu nitsumɔ ni yɔɔ miishɛɛ nɛɛ. Amrɔ nɛɛ, ayɛ kui nɛɛ 35 yɛ Mexico, ni ayɛ kuu kome hu yɛ Belize.

Bei pii lɛ, nitsulɔi ni kɛ amɛhe eha, ni ji hii kɛ yei aaafee kpaanyɔ yɔɔ Maŋtsɛyeli Asai Amaamɔ Kui nɛɛ eko fɛɛ eko mli, ni amɛkɛ amɛbe fɛɛ tsuɔ nii ní awooo amɛ nyɔmɔ. Nitsulɔi ni yɔɔ miishɛɛ ni yɔɔ kui nɛɛ amli lɛ jɛɔ he kome kɛyaa he kroko yɛ maŋ lɛŋ ni amɛkwɛɔ tsumaa nitsumɔi lɛ anɔ. Amɛteŋ mɔ fɛɛ mɔ kɛ ŋmɛlɛtswai kpaanyɔ tsuɔ nii kɛjɛ Ju kɛyashi Sohaa, kɛ agbɛnɛ hu Hɔɔ  komɛi. Daa leebi 7:00 lɛ, amɛsusuɔ Biblia mli ŋmalɛ ko he, kɛkɛ lɛ no sɛɛ lɛ amɛye leebi niyenii. Mɔ fɛɛ mɔ yɛ he miishɛɛ akɛ ebaatsu nitsumɔ fɛɛ nitsumɔ ni akɛbaawo edɛŋ. Yei lɛ hu tsuɔ nitsumɔi ni hii lɛ tsuɔ lɛ eko, ákɛ nɔkwɛmɔnɔ lɛ, amɛtswaa ŋtayaai, ni amɛkɛ pɛnte hu shaa gbogboi ahe.

Asafo ni amaa asa lɛ ahaa amɛ lɛ haa nitsulɔi gbɛfalɔi ni kɛ amɛhe eha lɛ wɔɔhei, amɛyeɔ amɛbuaa amɛ kɛ amɛtadei ahe fɔmɔ, ni amɛhoɔ nii amɛhaa amɛ. Kɛfata ekome ni nitsulɔi nɛɛ kɛ Odasefoi ni amaa asa lɛ ahaa amɛ lɛ feɔ kɛtsuɔ nii kutuu lɛ he lɛ, amɛnáa hegbɛ hu ni amɛkɛ amɛ bɔɔ yɛ Kristofoi akpeei ashishi kɛ shĩa-kɛ-shĩa shiɛmɔ nitsumɔ lɛ mli.

Jɔɔmɔi ni Jɛɔ Mɔ He ni Ekɛhaa lɛ Mli Kɛbaa

Te nitsulɔi ni kɛ amɛhe eha nɛɛ nuɔ nitsumɔ ni amɛtsuɔ nɛɛ he amɛhaa tɛŋŋ? Daniel ni kɛ tsumaa kuu nɛɛ etsu nii nɔ ni fe afii etɛ nɛ lɛ kɛɛ akɛ: “Eji anɔkwale akɛ wɔtsuɔ nii yɛ hulu nɔ kɛ fɛ̃i mli, wɔyeɔ niyenii ni wɔyeko eko dã, wɔfãa gbɛ kpitiokpitio, wɔkɛ wɔwekui lɛ ateŋ jɛkɛɔ, ni bei pii lɛ wɔnaaa ŋmɛnɛŋmɛnɛ beaŋ nibii ni haa shihilɛ feɔ nɔ ni yɔɔ miishɛɛ lɛ eko.” Ekɛfata he akɛ: “Shi kɛ́ wɔkɛ naagbai ni wɔkɛkpeɔ lɛ to jɔɔmɔi ni wɔnáa lɛ ahe lɛ, naagbai lɛ jeee nɔ ko kwraa.”

Mɛni ji jɔɔmɔi nɛɛ ekomɛi? Nitsulɔi ni kɛ amɛhe eha nɛɛ ateŋ mɛi babaoo kaseɔ tsũmaa mli hesaai heei. Shi nitsulɔi nɛɛ ateŋ mɔ kome ni atsɛɔ lɛ Carlos, ni kwɛɔ kuu wuji lɛ ateŋ ekome nɔ lɛ, tsɔɔ nɔ ni esusuɔ akɛ no ji jɔɔmɔ ni fe fɛɛ. Ewie akɛ: “Wɔbatsɔmɔ tamɔ weku ko kɛ emlibii 20. Wɔyeɔ nii kutuu, wɔfeɔ ekome kɛtsuɔ nii, kɛkaseɔ nii, ni wɔfeɔ ekome hu kɛsɔleɔ. Wɔbatsɔmɔ nanemɛi ni sumɔɔ amɛhe waa diɛŋtsɛ.”

Tsumaa kui lɛ amlibii lɛ hu kɛ asafoi ni amaa asai lɛ ahaa amɛ lɛ náa naanyobɔɔ ni yɔɔ gbagbalii mli ŋɔɔmɔ. José, ni eye ebua kɛmamɔ asai fe 100 lɛ kɛɛ akɛ: “Kɛ́ Odasefoi ni amamɔɔ Maŋtsɛyeli Asai ahaa amɛ lɛ na akɛ amɛgbɛkpamɔ akɛ amɛbaaná maŋtsɛyeli asa hee lɛ eba mli lɛ, miishɛɛ yaafonui ni tsereɔ kɛjɛɔ amɛhiŋmɛiiaŋ kɛ amɛhiɛ ŋmɔlɔŋmɔlɔ su ni amɛkɛtsɔɔ akɛ amɛhiɛ esɔ enɛ lɛ haa mimii shɛɔ mihe waa.” Ekɛfata he akɛ: “Wɔmii shɛɔ wɔhe kɛji wɔna akɛ gbɛfaŋnɔ fioo ni wɔtsuɔ yɛ tsũi ni amamɔɔ kɛha jamɔ krɔŋŋ lɛ mli lɛ ewo mɛi krokomɛi ahemɔkɛyeli mli hewalɛ lɛ.”

Nɔ ni Anyɛ Atsu lɛ yɛ Naakpɛɛ!

Jamɔhei nɛɛ bɛ haŋtsii, ni awulaaa amɛ kɛ ojarawa nibii hu koni akɛsa mɛi ahiɛ. Nɔ ni tamɔɔɔ nakai lɛ, amaa Maŋtsɛyeli Asai nɛɛ bɔ ni bɛ haŋtsii, ni enɛ haa anyɛɔ amaa tsũi lɛ oya ni afiteee shika babaoo tsɔ yɛ he. Hei ni ebaahi lɛ, akɛ tsumaa nibii ni yɔɔ hei ni amaa asai lɛ yɛ lɛ kɛ gbɛ̀i anɔ ni atsɔɔ amaa tsũi yɛ jɛmɛ lɛ tsuɔ nii. Yɛ nɛkɛ gbɛ nɔ lɛ, anyɛɔ akɛ aaafee otsii ekpaa pɛ maa asa hee kome!

Beni shɛɔ afi 2007 lɛ, no mli lɛ asafoi fɛɛ ni yɔɔ Belize lɛ ená amɛ diɛŋtsɛ amɛ-Maŋtsɛyeli Asa hee—ni kɛ abu naa lɛ, fɛɛ feɔ 17. Kɛjɛ afi 1999 lɛ kɛbaa nɛɛ, amamɔ asai ni fa fe 1,400 sɔŋŋ yɛ Mexico!

 Eyɛ mli akɛ atsu nitsumɔi babaoo moŋ, shi asai babaoo ahe miihia lolo. (Mateo 9:37) Amrɔ nɛɛ Odasefoi abɔ ni yɔɔ Mexico lɛ ayi efa babaoo kɛteke 600,000—amɛ fɛɛ amɛkpeɔ shii etɛ yɛ otsi mli koni ajɛ Nyɔŋmɔ Wiemɔ lɛ mli atsɔɔ amɛ nii. No hewɔ lɛ, asai heei aaafee 2,000 ahe miihia lolo. Eji adesai ahewalɛ naa pɛ ajɛɔ atsuɔ nitsumɔ ni mɛi ni kɛ amɛhe eha nɛɛ tsuɔ lɛ he nii kulɛ, no lɛ anyɛŋ ashɛ oti nɛɛ he kɔkɔɔkɔ. Shi taakɛ asai babaoo ni anyɛ amamɔ lɛ tsɔɔ lɛ, yɛ Yehowa Nyɔŋmɔ yelikɛbuamɔ naa lɛ, “aaanyɛ nii fɛɛ afee.”—Mateo 19:26.

[Akrabatsa/Mfoniri ni yɔɔ baafa 22]

“Amɛyeɔ Amɛwiemɔi Anɔ”

Jeee Yehowa Odasefoi asafo ni yɔɔ heko ni amaa Maŋtsɛyeli Asa yɛ lɛ pɛ ji mɛi ni tsumaa nitsumɔ lɛ baanyɛ aná amɛshihilɛ nɔ hewalɛ. Ákɛ nɔkwɛmɔnɔ lɛ, beni amaa Maŋtsɛyeli Asa ko yɛ Belize lɛ, nuu ko kɛɛ eŋa ni yaa Pentekost Sɔlemɔ lɛ akɛ, kɛ́ Yehowa Odasefoi lɛ gbe “amɛsɔlemɔtsu” lɛ naa lɛ, ebaasumɔ ni ekɛ amɛ aya amɛkpeei lɛ. Mɛni ha ená shwelɛ ni tamɔ nɛkɛ? Ekɛɛ akɛ: “Miina akɛ Nyɔŋmɔ kɛ amɛ yɛ.” Ekɛfata he akɛ: “Kɛ́ amɛmiitsu nii kutuu lɛ, amɛnɔɔɔ. Ni amɛyeɔ amɛwiemɔi anɔ hu.”

[Mfoniri]

Maŋtsɛyeli Asa ni yɔɔ Orange Walk, Belize

[Akrabatsa/Mfonirii ni yɔɔ baafa 23]

Mɔdɛŋ ni Abɔɔ yɛ Jeŋ Fɛɛ

Ato Maŋtsɛyeli Asai Amaamɔ Kui ahe gbɛjianɔ yɛ maji 120 anɔ. Maji ni mɛi ni kɛ amɛhe eha kɛtsuɔ nitsumɔ nɛɛ yɛ miishɛɛ mli yɛ jɛmɛ lɛ ateŋ fioo komɛi ji nɔ ni ato naa yɛ shishigbɛ lɛ:

Angola, Bolivia, Croatia, Dominican Republic, Ethiopia, Fiji, Ghana, Hong Kong, India, Jamaica, Kazakhstan, Liberia, Moldova, Nigeria, Papua New Guinea, Rwanda, Tuvalu, Ukraine, Venezuela, Zambia.

[Mfonirii]

Maŋtsɛyeli Asa ni yɔɔ Tlaxcala, Mexico

Maŋtsɛyeli Asai Amaamɔ Kuu ko ni yɔɔ Mexico lɛ mli bii

[Mfoniri ni yɔɔ baafa 23]

Maŋtsɛyeli Asa ni yɔɔ Acapulco, Mexico