Tsi Obɛŋkɛ Nyɔŋmɔ

Tookwɛlɔ ni Susuɔ Ohe

Mateo 18:12-14

‘ANI Nyɔŋmɔ susuɔ mihe?’ Kɛji akɛ obi ohe sane ni tamɔ nɛkɛ pɛŋ lɛ, ná ole akɛ jeee bo pɛ obi sane ni tamɔ nakai. Wɔteaŋ mɛi babaoo kɛ amanehului kɛ naagbai ekpe yɛ shihilɛ mli pɛŋ, ni bei komɛi lɛ, enɛ haa wɔyiŋ feɔ wɔ kɔshikɔshi kɛji jeŋ muu kpele nɛɛ fɛɛ Bɔlɔ lɛ susuɔ wɔhe. Ehe miihia ni wɔle enɛ akɛ, Ani Yehowa Nyɔŋmɔ susuɔ wɔhe akɛ aŋkroaŋkroi? Beni Yesu ni le Yehowa jogbaŋŋ fe mɔ fɛɛ mɔ lɛ yɔɔ shikpɔŋ lɛ nɔ lɛ, ekɛ abɛbua ko tsu nii kɛha sanebimɔ nɛɛ hetoo.

Beni Yesu kɛ bɔ ni Yehowa susuɔ mɔ he ehaa lɛ toɔ bɔ ni tookwɛlɔ ko kwɛɔ etooi lɛ he lɛ, ekɛɛ akɛ: “Kɛji mɔ ko yɛ tooi oha ni amɛteŋ ekome du gbɛ lɛ: ani eshiŋ nyɔŋmai nɛɛhu kɛ nɛɛhu lɛ yɛ gɔji lɛ anɔ, ní eya eyatao nɔ ni edu gbɛ lɛ? Ni kɛji eba mli akɛ ena lɛ lɛ, lɛɛlɛŋ, miikɛɛ nyɛ akɛ, emii shɛɔ ehe yɛ no he fe nyɔŋmai nɛɛhu kɛ nɛɛhu lɛ ni eduko gbɛ lɛ. Nakai nɔŋŋ ni nyɛtsɛ ni yɔɔ ŋwɛi lɛ sumɔɔɔ akɛ bibii nɛɛ ateŋ mɔ kome laajeɔ.” (Mateo 18:12-14) Nyɛhaa wɔsusua bɔ ni Yesu tsɔɔ hedɔɔ ni Yehowa yɔɔ kɛha Ejálɔi lɛ ateŋ mɔ fɛɛ mɔ lɛ he wɔkwɛa.

Tookwɛlɔ lɛ nuɔ he akɛ gbɛnaa nii kã enɔ akɛ ekwɛ toi lɛ ateŋ eko fɛɛ eko. Kɛji tooi lɛ eko du gbɛ lɛ, ebaale nɔ ni elaaje lɛ. Ele tooi lɛ eko fɛɛ eko kɛ gbɛi ni ekɛha lɛ lɛ. (Yohane 10:3) Tookwɛlɔ ni yɔɔ suɔmɔ lɛ baaya nɔ etao too ni elaaje lɛ aahu kɛyashi ebaana lɛ ní ekɛ lɛ abafata ekrokomɛi lɛ ahe. Kɛ́ etee koni eyatao too ni elaaje lɛ, no etsɔɔɔ akɛ ekɛ tooi 99 ni eshi yɛ sɛɛ lɛ awala ewo oshara mli. Bei pii lɛ, tookwɛlɔi srɔtoi hiɔ he kome, ni amɛhaa amɛtooku lɛ futuɔ kɛyeɔ nii. * No hewɔ lɛ, tookwɛlɔ ni yaa eyataoɔ too ni elaaje lɛ nyɛɔ eshiɔ etooi ni eshwɛ yɛ sɛɛ lɛ ehaa enanemɛi tookwɛlɔi lɛ koni amɛkwɛ amɛ amɛha lɛ. Kɛ́ tookwɛlɔ lɛ yana too ni elaaje lɛ akɛ epilako lɛ, enáa miishɛɛ waa. Ewoɔ too ni gbeyei emɔ lɛ nɛɛ efɔ̃ɔ ekɔŋ nɔ, ni ekɛ lɛ bafataa tooku lɛ he shweshweeshwe.—Luka 15:5, 6.

Beni Yesu tsɔɔ abɛbua nɛɛ mli lɛ, ekɛɛ akɛ Nyɔŋmɔ sumɔɔɔ akɛ “bibii nɛɛ ateŋ mɔ kome laajeɔ.” Mra mli lɛ, Yesu etsɔ hiɛ ebɔ ekaselɔi lɛ kɔkɔ yɛ “bibii nɛɛ ateŋ mɔ kome ni heɔ [enɔ] yeɔ” lɛ nane ni mɔ ko baatɔ̃tɔ̃ lɛ he. (Mateo 18:6) Belɛ, mɛni Yesu abɛbua lɛ tsɔɔ wɔ yɛ Yehowa he? Ehaa wɔnaa akɛ eji Tookwɛlɔ ni susuɔ etooi lɛ ateŋ eko fɛɛ eko he waa diɛŋtsɛ, ni mɛi ni fata he hu ji “bibii nɛɛ”—ni ji mɛi ni je lɛ naa amɛ tamɔ mɛi ni he bɛ sɛɛnamɔ ko lɛ. Hɛɛ, yɛ Nyɔŋmɔ hiɛ lɛ, ejálɔi lɛ ateŋ mɔ fɛɛ mɔ he yɛ sɛɛnamɔ kɛha lɛ, ni esumɔɔ amɛteŋ mɔ fɛɛ mɔ hu.

Kɛji akɛ oosumɔ ni oná nɔmimaa akɛ ojara wa kɛha Nyɔŋmɔ lɛ, mɛni hewɔ okaseee Tookwɛlɔ Kpeteŋkpele, ni ji Yehowa Nyɔŋmɔ lɛ he nii babaoo, kɛ bɔ ni ooofee otsi obɛŋkɛ lɛ? Nakai ni obaafee lɛ baaha oná hekɛnɔfɔɔ ni tamɔ nɔ ni bɔfo Petro, mɔ ni nu ni Yesu diɛŋtsɛ kɛ abɛbua nɛɛ ni kɔɔ too ni elaaje lɛ he lɛ miiha lɛ, ná lɛ nɔŋŋ eko. Petro ŋma yɛ sɛɛ mli akɛ: “Nyɛŋɔa nyɛhaomɔ fɛɛ nyɛfɔa [Nyɔŋmɔ] nɔ, ejaakɛ lɛ ejwɛŋɔ nyɛnɔ.”—1 Petro 5:7.

[Shishigbɛ niŋmaa]