Amaniɛbɔɔ ni Jɛ Dominican Republic

“Ajieko Suɔmɔ ni Tamɔ Nɛkɛ Kpo Atsɔko Mi Pɛŋ”

NIURKA tsu eklɛŋklɛŋ Biblia mli nifeemɔ he nii yɛ wɔsafo lɛ mli otsi nɛɛ. Eŋmala nɔ ni ebaawie lɛ yɛ Braille mli, ni ekase ewo eyitsoŋ. Mifata ehe kɛtee wiemɔ kpoku lɛ nɔ, ni mifee minii tamɔ mɔ ko ni miitao ekase Biblia mli anɔkwalei lɛ. Miwieɔ miwoɔ maikrofoŋ mli ni enuɔ migbee kɛtsɔ tsɔne ni hɔ etoiŋ ni yeɔ buaa lɛ koni enu nii lɛ nɔ. Beni wɔgbe nifeemɔ lɛ naa lɛ, toibolɔi ni hiɛ sɔ enifeemɔ lɛ tswa amɛdɛ̃ waa, ni Niurka nu amdɛ̃tswaa lɛ po he. Bɔ ni efee ehiɛ ŋmɔlɔŋmɔlɔ lɛ tsɔɔ akɛ ená miishɛɛ waa ni etsui hu enyɔ emli. Mi hu mimii shɛ mihe. Mɛɛ jɔɔmɔ po eji nɛkɛ akɛ mɔ kɛ ehe aaawo maŋsɛɛ sanekpakpa shiɛmɔ nitsumɔ lɛ mli!

Mikaiɔ gbi klɛŋklɛŋ ni mikɛ Niurka kpe lɛ. Afii enyɔ nɛ ni mikɛ lɛ kpe. Mina lɛ klɛŋklɛŋ kwraa beni wɔkɛ ŋmɛlɛtswaa fã eta tsɔne mli kɛfo gbɛjegbɛ ko ni awoko nɔ kootaa lɛ sɛɛ. No mli lɛ eta tsu bibioo ko ni akɛ tso kɛ ŋãi ŋtayaai ma, ni akɛ ziŋele ni edɔ ŋkanale ewo lɛ ablanaa lɛ nɔ. Abotiai, kpɛŋkpɛlɛi, kɛ gbeei miibolɔ yɛ jɛmɛ, ni wɔnu amɛhe fu hu. No mli lɛ Niurka ta shi mɔbɔmɔbɔ ni ema eyi shi, ni tsɔɔ akɛ etamɔ mɔ ko ni ehe efee shoo ni ehao. No mli lɛ eye afii 34 shi kɛ okwɛ lɛ lɛ, etamɔ mɔ ko ni eda fe nakai.

Mitswa ekɔŋ nɔ ma blɛoo, kɛkɛ ni etsɔ ehe ekwɛ wɔhiɛ kɛ ehiŋmɛi ni eshwila afii 11 nɛ lɛ. Mibolɔ miwo etoiŋ kɛjie mi kɛ mɔ ni mikɛ lɛ shiɛɔ lɛ shi mitsɔɔ lɛ. Wɔná wɔle sɛɛ mli akɛ, Niurka miiye hela ko ni atsɛɔ lɛ Marfan syndrome, ni ji hela ni anaa kɛjɛɔ fɔmɔ mli ni haa epiŋɔ waa lɛ. Nakai beaŋ nɔŋŋ lɛ Niurka miiye sikli hela ni biɔ ni ekwɛ sikli falɛ ni yɔɔ elá lɛ mli lɛ jogbaŋŋ.

Beni mikɛ Biblia wo edɛŋ lɛ, eyɔse nɔ ni eji ni ekɛɛ mi akɛ, beni ehiŋmɛi naa nii lɛ, no mli lɛ esumɔɔ Biblia lɛ kanemɔ waa. Te mafee tɛŋŋ matsɔɔ mɔ nɛɛ ni ehe efee shoo, ni baa ehe shi, ni yɔɔ kpoo nɛɛ Nyɔŋmɔ Wiemɔ lɛ mli anɔkwalei ni haa mɔ tsui nyɔɔ emli lɛ nii lɛ? Akɛni ele niŋmaa okadii loo alfabɛtai lɛ hewɔ lɛ, mikɛ niŋmaa okadii ni akɛ rɔba fee lɛ bɔi edɛŋ woo. Etsɛɛɛ kɛkɛ ni ele okadii lɛ. No sɛɛ lɛ beni mikɛ minine feɔ alfabɛtai lɛ ahe okadii lɛ, emɔɔ minine mli ekwɛɔ, ni kɛtsɔ nakai feemɔ nɔ lɛ, ekase niŋmaa okadii nɛɛ fɛɛ kɛ nɔ ni amɛtsɔɔ yɛ Amerika Mumuii Awiemɔ mli. Fiofio lɛ, ekase okadii krokomɛi hu. Akɛni kpaako mi diɛŋtsɛ hu mikaseɔ mumuii awiemɔ nɛɛ hewɔ lɛ, ehe bahia ni mikɛ ŋmɛlɛtswai abɔ akase kɛtsɔ hiɛ dani mikɛ lɛ ayakase nii. Shi no mli lɛ, mi kɛ Niurka fɛɛ yɛ shwelɛ ni mli wa kɛha nikasemɔ nɛɛ, no hewɔ lɛ wɔhe basa yɛ mumuii awiemɔ lɛ kasemɔ mli oyayaayai.

Yelikɛbuamɔ nɔ̃ ko ni bawo Niurka hiɛyaa lɛ mli hewalɛ ji beni nitsumɔhe ko ni feɔ mɛi ejurɔ lɛ bake lɛ tsɔne bibioo ko ni haa anuɔ nii jogbaŋŋ  ni akɛwoɔ toiŋ lɛ. Eyɛ mli akɛ tsɔne lɛ jeee ehee moŋ, shi eye ebua lɛ jogbaŋŋ. Beni ekɛ nɔ ni fe afii nyɔŋma sɔŋŋ ehi shi akɛ shwilafo kɛ mɔ ni nuuu nii jogbaŋŋ sɛɛ lɛ, etse ehe banee kɛjɛ mɛi ahe. Shi Yehowa mumɔ lɛ kanya ejwɛŋmɔ kɛ etsui fɛɛ, ni ená nilee, hiɛnɔkamɔ, kɛ suɔmɔ babaoo. Bei fioo ko sɛɛ lɛ, Niurka kɛ tso bɔi nyiɛmɔ ni eyashiɛɔ Biblia mli anɔkwale lɛ etsɔɔ mɛi krokomɛi yɛ ekutso lɛ mli.

Niurka kɛ enyɛkwɛ kɛ enyɛkwɛ lɛ bii enyɔ kaseɔ Biblia lɛ. Etsɔɔ hiɛ ekaseɔ nii lɛ jogbaŋŋ ewoɔ eyitsoŋ dani eyaa amɛŋɔɔ. Niurka haa mɛi ni ekɛ kaseɔ nii lɛ kaneɔ kuku ni akaseɔ lɛ mli, ni lɛ hu ekaneɔ sanebimɔ lɛ yɛ e-Braille wolo lɛ mli. Kɛji amɛha sanebimɔ lɛ hetoo lɛ, shiɛlɔ ni fata ehe kɛtee shiɛmɔ lɛ tĩɔ hetoo lɛ mli ehaa Niurka kɛtsɔ etoiŋ ni ewieɔ waa ewoɔ loo Niurka nine mli ni emɔɔ ekɛfeɔ mumuii awiemɔ mli okadii lɛ nɔ.

Asafo muu lɛ fɛɛ yeɔ amɛbuaa Niurka ni amɛwoɔ lɛ hewalɛ. Enyɛmimɛi Kristofoi hii lɛ ateŋ mɛi babaoo yeɔ amɛbuaa lɛ kɛyaa Kristofoi akpeei kɛ kpeei krokomɛi fɛɛ. Mɛi krokomɛi hu fataa ehe kɛyaa shiɛmɔ. Nyɛsɛɛ nɛɛ Niurka kɛɛ mi akɛ: “Ajieko suɔmɔ ni tamɔ nɛkɛ kpo atsɔko mi pɛŋ.” Eekpa gbɛ akɛ abaabaptisi lɛ yɛ wɔkpokpaa wulu nɔ kpee ni baanyiɛ sɛɛ lɛ shishi.

Beni wɔyi gbɛ ni yaa Niurka shĩa lɛ nɔ lɛ, wɔna lɛ ni eta shi yɛ ablanaa lɛ nɔ yɛ hulu lɛ nɔ, ni ewo eyitso nɔ kɛmiikwɛ ŋwɛi kɛ ehiɛ ŋmɔlɔŋmɔlɔ. Mibi lɛ nɔ hewɔ ni eŋmɔɔ lɛ. Ni eto he eha mi akɛ: “No mli lɛ miisusu wɔsɛɛ be beni shikpɔŋ lɛ etsɔ paradeiso lɛ he. Ni miifee he mfoniri yɛ mijwɛŋmɔŋ akɛ miyɛ jɛmɛ momo.”

[Mfoniri ni yɔɔ baafa 25]

Niurka kɛ wɔsafo lɛ mlibii lɛ ekomɛi yɛ Maŋtsɛyeli Asa lɛ hiɛ

[Mfoniri ni yɔɔ baafa 25]

Niurka kɛ mɛi krokomɛi gbaa nibii ni ekase lɛ ahe sane