Tsi Obɛŋkɛ Nyɔŋmɔ

Mɔ ni Nyɛɔ Ekɛ Mɔ Baa Wala Mli Ekoŋŋ Lɛ

Luka 7:11-15

ANI gbele ebaŋɔ osuɔlɔ ko? Kɛji ohetoo ji hɛɛ lɛ, belɛ no tsɔɔ akɛ otsɔ shihilɛi ni haa mɔ yeɔ awerɛhoo waa lɛ ateŋ ekome mli. Wɔ-Bɔlɔ lɛ nuɔ awerɛho ni oyeɔ lɛ shishi. Ni jeee akɛ Nyɔŋmɔ nuɔ bo shishi kɛkɛ, shi akɛ ebaanyɛ efo nibii ni gbele kɛbaa lɛ asɛɛ. Ekɛ gbohiiashitee ni ba yɛ blema beaŋ lɛ ahe amaniɛbɔɔ eha wɔ yɛ Biblia lɛ mli, koni ekɛ no atsɔɔ akɛ jeee wala Halɔ kɛkɛ ji lɛ, shi moŋ eji mɔ ni nyɛɔ ekɛ mɔ Baa wala mli Ekoŋŋ. Nyɛhaa wɔsusua gbohiiashitee ni ekɛ hewalɛ ha e-Bi Yesu Kristo ni etsu he nii lɛ ateŋ ekome he wɔkwɛa. Aŋma naakpɛɛ nifeemɔ nɛɛ he sane yɛ Luka 7:11-15 lɛ.

Enɛ ba mli yɛ afi 31 Ŋ.B. No mli lɛ Yesu efã gbɛ kɛtee Galilea maŋtiase ni ji Nain lɛ mli. (Kuku 11) Eeenyɛ efee akɛ beni eyashɛ maŋ lɛ klotia lɛ, no mli lɛ je miihe ana. Biblia lɛ bɔɔ amaniɛ akɛ: “Shi beni eshɛ maŋ lɛ agbó lɛ naa etã lɛ, naa, awó gbonyo ko kɛmiije kpo, ni enyɛ bi kome ji lɛ, ni okulafo ji yoo lɛ; ni maŋ lɛŋ bii pii fata ehe.” (Kuku 12) Ani obaanyɛ ofee nakai nyɛ ni ji yoo okulafo lɛ awerɛhoyeli lɛ he mfoniri yɛ ojwɛŋmɔŋ? Beni ebi kome pɛ ni eyɔɔ lɛ gbo lɛ, no bafee nɔ ni ji shii enyɔ nɔ ni eŋmɛɛ mɔ ko ni baaha lɛ ehiamɔ nii koni ebu ehe yɛ shihilɛ mli.

Yesu gbala ejwɛŋmɔ kɛtee nyɛ ni yeɔ awerɛho, ni ekolɛ enyiɛ adeka ni akɛ ebi ni egbo lɛ ewo mli lɛ masɛi lɛ nɔ. Amaniɛbɔɔ lɛ tee nɔ akɛ: “Beni Nuŋtsɔ lɛ na lɛ lɛ, emusuŋ tsɔ lɛ yɛ ehe, ni ekɛɛ lɛ akɛ: Kaafó!” (Kuku 13) Shihilɛ ni haoɔ mɔ waa ni okulafo lɛ kɛkpe lɛ ta Yesu tsuiŋ waa. Ekolɛ nakai beaŋ lɛ Yesu miisusu lɛ diɛŋtsɛ emami ni ekolɛ yɛ nakai beaŋ lɛ ewu egbo, ni etsɛŋ ni ebaaye lɛ hu ehe awerɛho lɛ he.

Yesu tsi ebɛŋkɛ—shi jeee ni ekɛ ehe awo nifeemɔ ni yaa nɔ lɛ mli. Ekɛ nifeemɔ ko tsɔɔ hegbɛ ni eyɔɔ lɛ, ni “ebata adeka lɛ he” ni eha mɛi babaoo lɛ wá damɔ shi. Kɛkɛ ni ekɛ gbee ni tsɔɔ akɛ eji mɔ ko ni aha lɛ hewalɛ yɛ gbele nɔ lɛ kɛɛ akɛ: “Oblanyo, miikɛɛo akɛ: Tee shi! Ni mɔ ni egbo lɛ te shi etá shi, ni ebɔi wiemɔ; ni eŋɔ lɛ eha enyɛ.” (Kukuji 14, 15) Beni nakai oblanyo lɛ gbo lɛ eje enyɛ dɛŋ. No hewɔ lɛ, beni Yesu ‘ŋɔ lɛ eha enyɛ’ lɛ amɛbatsɔ weku ekoŋŋ. Ŋwanejee ko bɛ he ákɛ miishɛɛ babaoo baye awerɛho ni yɔɔ okulafo lɛ tsui mli lɛ najiaŋ.

Ani otsui miishwe ni ená miishɛɛ ni tamɔ nakai—koni okɛ osuɔlɔ ko ni egbo lɛ asaa afee ekome ekoŋŋ? Ná nɔmimaa akɛ Nyɔŋmɔ nuɔ he nakai nɔŋŋ kɛha bo. Bɔ ni Yesu nu he eha nakai okulafo lɛ ni werɛ eho ehe lɛ jieɔ musuŋtsɔlɛ ni Nyɔŋmɔ diɛŋtsɛ yɔɔ lɛ kpo etsɔɔ, ejaakɛ Yesu kase e-Tsɛ lɛ yɛ gbɛ ni yeɔ emuu nɔ. (Yohane 14:9) Biblia lɛ tsɔɔ wɔ akɛ Nyɔŋmɔ miisumɔ ni ekɛ mɛi ni egboi ni yɔɔ ekaimɔ mli lɛ aba wala mli ekoŋŋ. (Hiob 14:14, 15) E-Wiemɔ ni ji Biblia lɛ haa wɔnáa hiɛnɔkamɔ ko ni nɔ bɛ, ni no ji gbɛkpamɔ akɛ wɔbaahi shi yɛ paradeiso mli yɛ shikpɔŋ lɛ nɔ, ni wɔbaana beni ateeɔ wɔsuɔlɔi ni egboi lɛ ashi lɛ. (Luka 23:43; Yohane 5:28, 29) Mɛni hewɔ okaseee mɔ ni nyɛɔ ekɛ mɔ Baa wala mli Ekoŋŋ lɛ he nii, kɛ bɔ ni ooofee oná hiɛnɔkamɔ akɛ abaatee osuɔlɔi ni egboi lɛ ashi kɛba wala mli lɛ hu he nii?

[Mfoniri ni yɔɔ baafa 23]

“Mɔ ni egbo lɛ te shi etá shi, ni ebɔi wiemɔ; ni eŋɔ lɛ eha enyɛ”