“Wolo Lɛ . . . Tsɔɔ Nii Taakɛ Yesu Tsɔɔ Nii Lɛ”

AMANIƐBƆI tsɔɔ akɛ Biblia kasemɔ wolo ni ji Mɛni Biblia lɛ Tsɔɔ Diɛŋtsɛ? lɛ ba yɛ ebe naa ni eeye eebua yɛ shiɛmɔ nitsumɔ lɛ mli. Biblia kaselɔ ko wie akɛ: “Egbeleɔ mɔ hiŋmɛiiaŋ ni elɛɔ tsui lɛ kɛ jwɛŋmɔ lɛ.” Kpokpaa wulu nɔkwɛlɔ ko bɔ amaniɛ akɛ: “Wolo lɛ gbalaa ojwɛŋmɔ ejaakɛ etsɔɔ nii taakɛ Yesu tsɔɔ nii lɛ. Ekɛ wiemɔi babaoo tsuuu nii, eyaa tɛ̃ɛ ni emli wiemɔi lɛ amli kã shi faŋŋ, shi kɛlɛ ehaa mɔ tsui nyɔɔ emli diɛŋtsɛ.” Susumɔ niiashikpamɔi ni nyiɛ sɛɛ nɛɛ ahe okwɛ.

Brazil Odasefoi lɛ kɛ Paulo kase Biblia lɛ beni eye aaafee afii 13 lɛ. Dɔlɛ sane ji akɛ, beni eye afii 16 lɛ eweku lɛ mli gbala. Bɔni afee ni Paulo anyɛ aye abua emami lɛ, ekɛ ehe yabɔ samba joo shwɛlɔi akuu ko he, shi etsɛɛɛ kɛkɛ ni ekɛ ehe yawo jeŋba shara mli ni ebɔi dãa numɔ shɛii. Shi jeŋbai gbohii nɛɛ fɛɛ asɛɛ lɛ, anɔkwalei komɛi yɛ etsui mli lolo. Ákɛ nɔkwɛmɔnɔ lɛ, beni eyɔse akɛ voodoo kɛ daimonioi yɛ tsakpãa lɛ, emli fu beni abi lɛ ni etswa lala yɛ he ko ni ashwɛɔ voodoo yɛ lɛ. Ebayɔse bɔ ni eshihilɛ efee shwɛm eha lɛ. Yɛ afi 2005 mli beni nyɛmi nuu fioo ko kɛ Biblia lɛ Tsɔɔ wolo lɛ tsɔɔ Paulo lɛ, enɛ tée emiishɛɛ shi amrɔ nɔŋŋ, ni ebɔi nikasemɔ ekoŋŋ. Etsɛɛɛ kwraa ni eshi joo shwɛlɔi akuu lɛ, ni amrɔ nɛɛ eyaa Kristofoi akpeei.

Zambia Goliath ni ji akrowa ko maŋtsɛ lɛ yɛ ŋamɛi enyɔ kɛ bii nyɔŋma, ni ekɛ eweku lɛ fɛɛ etee amɛhiɛ babaoo yɛ Biblia mli shishitoo mlai lɛ kɛ nitsumɔ mli. Beni Goliath bɔi Biblia lɛ Tsɔɔ wolo lɛ kanemɔ sɛɛ lɛ, etsɛɛɛ kwraa ni ebɔi tsakemɔi feemɔ. Yɛ January afi 2006 mli lɛ, ekɛ eweku lɛ bɔi Kristofoi akpeei yaa, ni yɛ February mli lɛ ekɛɛ eŋa ni ji enyɔ lɛ koni eshi, no sɛɛ lɛ ekɛ eŋa ni ekɛhi shi klɛŋklɛŋ lɛ gbãla lɛ yawo mla shishi. (Mateo 19:4-6; 1 Timoteo 3:2) Efɔ̃ɔ akrowa lɛ nɔ maŋtsɛ lɛ yeli yɛ March mli, kɛkɛ ni yɛ April mli lɛ, ekɛ eŋa Esther batsɔmɔ shiɛlɔi ni abaptisiko amɛ. Ekã shi faŋŋ akɛ, daimonioi lɛ náaa amɛyiŋ ni amɛkpɛ akɛ amɛbaasɔmɔ Yehowa lɛ he miishɛɛ, no lɛ hewɔ lɛ amɛbɔi Esther naa gbamɔ. Shi kɛlɛ, ete shi ewo amɛ, taakɛ atsɔɔ yɛ Yakobo 4:7 lɛ. Mɛni jɛ nɔ ni efee lɛ mli kɛba? Ekɛɛ akɛ: “Amrɔ nɛɛ mikɛ miwu fɛɛ eye wɔhe kɛjɛ daimonioi ahe.”