Ani Be ko Baashɛ ni Wɔshikpɔŋ lɛ Hiɛ Baakpata?

ANI osusu enɛ he pɛŋ, ‘Mɛni baaba wɔshikpɔŋ lɛ nɔ wɔsɛɛ?’ Yɛ bɔ ni mɛi babaoo naa akɛ aafite wɔshibɔlemɔ ŋulami fɛfɛo nɛɛ hewɔ lɛ, amɛsusuɔ akɛ ekolɛ wɔshikpɔŋ lɛ hiɛ baakpata.

Yɛ anɔkwale mli lɛ, ŋmɛnɛ lɛ aafite shikpɔŋ lɛ kɛtsɔ enɔ nibii kpakpai, tamɔ nu, kooi, kɛ kɔɔyɔŋ ni afiteɔ lɛ nɔ. Agbɛnɛ hu, adebɔɔ nibii ahe nilelɔi komɛi bɔɔ kɔkɔ akɛ, ekolɛ tɛ ko ni jɛ ŋwɛiniiaŋ, ŋulami ni efɛ, loo hulu lɛ mli hydrogen ni tãa lɛ baakpata shikpɔŋ lɛ kɛ wala nibii fɛɛ ni yɔɔ nɔ lɛ ahiɛ.

Adebɔɔ nibii ahe nilelɔi heɔ yeɔ akɛ, ekolɛ yɛ afii akpekpei to akpei komɛi asɛɛ lɛ, shikpɔŋ lɛ nyɛŋ afee he ni adesai baanyɛ ahi dɔŋŋ. Encyclopædia Britannica lɛ tsɔɔ enɛ mli akɛ “eji nɔ ko ni baafite kwraa, ni anyɛŋ asaa.”

Miishɛɛ sane ji akɛ, Biblia lɛ maa nɔ mi ehaa wɔ akɛ Yehowa Nyɔŋmɔ eŋmɛŋ gbɛ ni shikpɔŋ lɛ hiɛ akpata loo etsɔ he ko ni gbɔmɛi nyɛŋ nɔ ahi. Ákɛ Bɔlɔ lɛ, eyɛ ‘nyɛmɔ ni fa’ ni bɛ naagbee, ni no hewɔ lɛ ebaanyɛ ebaa jeŋ muu lɛ fɛɛ yi kɛya naanɔ. (Yesaia 40:26) No hewɔ lɛ, obaanyɛ oná hemɔkɛyeli yɛ wiemɔi nɛɛ amli akɛ: “[Nyɔŋmɔ,] oŋɔ shikpɔŋ lɛ oto eshishitoo nii lɛ anɔ, koni ekahoso gbi ko gbi ko.” “Hulu kɛ nyɔŋtsere, nyɛjiea eyi; nyɛ ŋulamii ní kpɛlɛɔ lɛ fiaa, nyɛjiea eyi! Nyɛ ŋwɛi amli ŋwɛi kɛ nui ni yɔɔ ŋwɛi yiteŋ lɛ, nyɛjiea eyi! . . . Ejaakɛ lɛ efã, ni abɔ amɛ. Eŋɔ amɛ emamɔ shi kɛmiiya naanɔ.”—Lala 104:5; 148:3-6.

Yiŋtoo Hewɔ ni Nyɔŋmɔ Bɔ Shikpɔŋ Lɛ

Ejeee Nyɔŋmɔ yiŋtoo akɛ afite shikpɔŋ lɛ ni awo nɔ muji tamɔ bɔ ni eyɔɔ amrɔ nɛɛ. Yɛ no najiaŋ lɛ, Nyɔŋmɔ bɔ klɛŋklɛŋ nuu kɛ yoo ni ji Adam kɛ Hawa, ni ekɛ amɛ wo abɔɔ fɛfɛo ko mli. Yɛ anɔkwale mli lɛ, amɛ-Paradeiso shĩa lɛ diɛŋtsɛ nyɛŋ aya nɔ ni emli afee fɛo. Nyɔŋmɔ kɛ nitsumɔ wo amɛdɛŋ ‘koni amɛhu mli ni amɛbu he.’ (1 Mose 2:8, 9, 15) Mɛɛ nitsumɔ ni yɔɔ miishɛɛ ni haa mɔ  tsui nyɔɔ emli po Nyɔŋmɔ kɛha wɔ klɛŋklɛŋ fɔlɔi ni no mli lɛ amɛye emuu lɛ nɛkɛ!

Shi yiŋtoo hewɔ ni Nyɔŋmɔ bɔ shikpɔŋ lɛ biɔ babaoo fe nakai shishijee abɔɔ lɛ he kɛkɛ ni aaabu. Nyɔŋmɔ miisumɔ ni aha shikpɔŋ lɛ fɛɛ atsɔ paradeiso. No hewɔ ni Nyɔŋmɔ kɛ famɔ nɛɛ ha Adam kɛ Hawa akɛ: “Nyɛfɔa ni nyɛyi afáa ni nyɛyia shikpɔŋ lɛ nɔ obɔ, ni nyɛnaanaa nɔ, ni nyɛyea ŋshɔŋloi kɛ ŋwɛi loofɔji kɛ kooloo fɛɛ kooloo ni tsiɔ ehe yɛ shikpɔŋ lɛ nɔ lɛ nɔ.”—1 Mose 1:28.

Dɔlɛ sane ji akɛ, ŋwɛibɔfo henɔwolɔ ko ni abale lɛ akɛ Satan lɛ te shi ewo Nyɔŋmɔ yiŋtoo lɛ. Ená shwelɛ ni mli wa akɛ Adam kɛ Hawa ajá lɛ. Satan kɛ amɛ wie kɛtsɔ onufu nɔ, ni eha amɛtse atua amɛshi Nyɔŋmɔ nɔyeli lɛ. (1 Mose 3:1-6; Kpojiemɔ 12:9) Kwɛ bɔ ni amɛhiɛ ni esɔɔɔ nii nɛɛ kɛ amɛ pɛ amɛhe ni amɛsusuɔ lɛ dɔ wɔ-Bɔlɔ lɛ ha! Shi nɔ kome ni amɛtuatsemɔ lɛ nyɛɛɛ atsake ji yiŋtoo hewɔ ni Yehowa Nyɔŋmɔ bɔ shikpɔŋ lɛ. Yehowa kɛɛ akɛ: “Miwiemɔi ni jɛɔ midaaŋ lɛ . . . ekuŋ esɛɛ kɛbaŋ miŋɔɔ efolo, shi moŋ eeefee nɔ ni sa mihiɛ lɛ, ni eeeha nɔ ni mitsu lɛ yɛ hewɔ lɛ aya nɔ!”—Yesaia 55:11.

Yiŋtoo kpakpa ko hewɔ Yehowa eŋmɛ Satan atuatsemɔ lɛ gbɛ ni etee nɔ kɛbashi wɔgbii nɛɛ amli lɛ. Adesai enyɛ eka amɛ diɛŋtsɛ amɛnɔyelii srɔtoi amɛkwɛ yɛ bei nɛɛ amli, ni nɔ ni ejɛ mli eba lɛ etsɔɔ akɛ he ni atsiɔ kɛjɛɔ Nyɔŋmɔ he, taakɛ Satan woɔ hewalɛ ni afee lɛ yeko omanye kwraa. *—Yeremia 10:23.

Yɛ naagbai ni ejɛ Satan atuatsemɔ lɛ mli kɛba lɛ fɛɛ sɛɛ lɛ, Nyɔŋmɔ ejɔɔ adesai komɛi ni ji jalɔi yɛ afii akpei abɔ ni eho lɛ amli. Agbɛnɛ hu, eha aŋmala nibii ni jɛɔ toiboo ni afeɔ ahaa Nyɔŋmɔ lɛ mli kɛbaa kɛ nibii ni jɛɔ enɔyeli lɛ ni akpoɔ lɛ mli kɛbaa lɛ ashwie shi yɛ Biblia lɛ mli aha wɔ, ni abaa yi. Kɛfata he lɛ, Yehowa efee naakpɛɛ nibii ni he baaba sɛɛnamɔ kɛha wɔ wɔsɛɛ. Ejɛ suɔmɔ mli eha adesai Yiwalaherelɔ, ni ji esuɔmɔ Bi Yesu Kristo ni etsu lɛ kɛba koni ebatsɔɔ wɔ gbɛ ni hi fe fɛɛ ni wɔɔtsɔ nɔ wɔhi shi, koni eŋɔ ewala hu eha yɛ wɔ hewɔ. (Yohane 3:16) Akɛni Yesu esaaa gbele hewɔ lɛ, Nyɔŋmɔ kɛ egbele lɛ tsu nii akɛ mla naa nɔdaamɔnɔ koni ekɛhe nɔ ni Adam kɛ Hawa laaje lɛ, ni no ji gbɛkpamɔ akɛ abaahi shi kɛya naanɔ yɛ shikpɔŋ lɛ nɔ paradeiso mli lɛ. * Enɛ hewɔ lɛ, Yehowa Nyɔŋmɔ eto ŋwɛi nɔyeli ko shishi koni eye adesai fɛɛ anɔ, ni ehala e-Bi Yesu Kristo ni atee lɛ shi lɛ koni efee nakai Maŋtsɛyeli lɛ nɔ Maŋtsɛ. Gbɛjianɔtoo ni nɔ bɛ nɛɛ baakwɛ koni yiŋtoo hewɔ ni Nyɔŋmɔ bɔ shikpɔŋ lɛ aba mli.—Mateo 6:9, 10.

No hewɔ lɛ, wɔbaanyɛ wɔná hekɛnɔfɔɔ kwraa yɛ shiwoi nɛɛ ni yɔɔ miishɛɛ ni aŋmala yɛ Biblia lɛ mli lɛ amli, nɔ ni kɛɔ akɛ: “Efɔŋfeelɔi lɛ, aaafolɔ amɛ ashwie; shi mɛi ni kwɛɔ Yehowa gbɛ lɛ, shikpɔŋ lɛ aaatsɔ̃ amɛnɔ̃. Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.” “Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee. Ni mɔ ni ta maŋtsɛsɛi lɛ nɔ lɛ kɛɛ: Naa, miifee nii fɛɛ ehee.”—Lala 37:9, 29; Kpojiemɔ 21:3-5.

Biblia lɛ Eteee Shi Ewooo Ehe

Shi mɛi komɛi baabi akɛ ‘Ani wɔbaanyɛ wɔkɛɛ akɛ ŋmalɛi ni atsɛ yisɛɛ kɛtsɔ hiɛ lɛ kɛ Biblia mli ŋmalɛi krokomɛi ni etamɔ nɔ ni amɛkɛɔ akɛ shikpɔŋ lɛ baaba naagbee lɛ kpãa gbee?’ Nyɛhaa wɔsusua nɔkwɛmɔnii komɛi ahe wɔkwɛa. Niiamlipɛimɔ ni tamɔ nɛkɛ ni wɔɔfee lɛ baaha wɔna akɛ Biblia lɛ eteee shi ewooo ehe.

 Dani adebɔɔ nibii ahe nilelɔi baayɔse akɛ be ko baashɛ ni bɔɔ nii fɛɛ ‘baafite’ lɛ, no mli lɛ Biblia mli lalatsɛ ko ejɛ jeeŋmɔ beebe eŋma akɛ: “[Nyɔŋmɔ,] oto shikpɔŋ lɛ shishi, ni ŋwɛi lɛ oniji anaa nitsumɔi ni. Amɛ lɛ amɛhiɛ baakpata, shi bo lɛ, oyɛ daa: ni amɛ fɛɛ tswɛm amɛbaasũ tamɔ atade; oootsake amɛ tamɔ mama, ni amɛaatsake. Shi bo lɛ, oyɛ bɔ ni oyɔɔ lɛ nɔŋŋ, ni ofii lɛ etãaa gbi ko gbi ko.”—Lala 102:26-28.

Wiemɔi ni lalatsɛ lɛ ŋma nɛɛ etsɔɔɔ akɛ eete shi eewo naanɔ yiŋtoo hewɔ ni Nyɔŋmɔ bɔ shikpɔŋ lɛ. Yɛ no najiaŋ lɛ, eetsɔɔ srɔtofeemɔ ni yɔɔ bɔ ni Nyɔŋmɔ hiɔ shi kɛyaa naanɔ kɛ bɔ ni nibii fɛɛ ni ebɔ lɛ hiɛ nyɛɔ ekpataa lɛ teŋ. Eji Nyɔŋmɔ ehiii shi kɛyaaa naanɔ kulɛ, jeŋ muu lɛ fɛɛ ní shibɔlemɔ ŋulamii ni haa wɔnáa la kɛ hewalɛ, ni ehaa shikpɔŋ lɛ hu hiɔ eŋɛlɛ nɔ lɛ baafite, ni yɛ naagbee lɛ amɛhiɛ baakpata kwraa. No hewɔ lɛ, kɛ́ ashi shikpɔŋ lɛ koni lɛ diɛŋtsɛ ekudɔ ehe lɛ, ‘ebaasũ’ loo ebaafite kɛya naanɔ.

Ŋmalɛi krokomɛi hu yɛ Biblia lɛ mli ni kɛ́ okane klɛŋklɛŋ kwraa lɛ, etamɔ nɔ ni amɛteɔ shi amɛwoɔ yiŋtoo hewɔ ni Nyɔŋmɔ bɔ shikpɔŋ lɛ. Ákɛ nɔkwɛmɔnɔ lɛ, Biblia lɛ wieɔ ŋwɛi kɛ shikpɔŋ lɛ he akɛ ‘ebaaho eya.’ (Kpojiemɔ 21:1) Yɛ anɔkwale mli lɛ, wiemɔi nɛɛ eteee shi ewooo Yesu shiwoo nɛɛ: “Ajɔɔ mɛi ni he jɔ lɛ; shi amɛaaye shikpɔŋ lɛ nɔ.” (Mateo 5:5) Belɛ, mɛni Biblia lɛ tsɔɔ mɔ, beni ewie akɛ ŋwɛi kɛ shikpɔŋ lɛ ‘baaho aya’ lɛ?

Bei pii lɛ, Biblia lɛ kɛ wiemɔ “shikpɔŋ” tsuɔ nii yɛ mfonirifeemɔ gbɛ nɔ kɛdamɔɔ shi ehaa adesai aweku lɛ. Ákɛ nɔkwɛmɔnɔ lɛ, susumɔ ŋmalɛ kuku ni nyiɛ sɛɛ nɛɛ he okwɛ: “Shikpɔŋ muu lɛ fɛɛ yɛ naabu kome, ni amɛwieɔ wiemɔ kome.” (1 Mose 11:1) Eyɛ faŋŋ akɛ, “shikpɔŋ” ni akɛtsu nii yɛ biɛ lɛ kɔɔ gbɔmɛi ni yɔɔ shikpɔŋ lɛ nɔ lɛ ahe. Nɔkwɛmɔnɔ kroko hu ji nɔ ni yɔɔ Lala 96:1 lɛ ni kɛɔ akɛ: “Shikpɔŋ lɛ fɛɛ, nyɛlaa nyɛhaa Yehowa!” Ekã shi faŋŋ akɛ, yɛ ŋmalɛ nɛɛ kɛ ekrokomɛi amli lɛ, akɛ wiemɔ “shikpɔŋ” lɛ tsu nii yɛ mfonirifeemɔŋ kɛkɔ gbɔmɛi ahe.—Lala 96:13.

Bei komɛi lɛ, Biblia lɛ kɛ shikpɔŋ lɛ nɔ nɔyelɔi lɛ toɔ ŋwɛi loo ŋwɛi bɔɔ nii lɛ ahe. Ákɛ nɔkwɛmɔnɔ lɛ, awie Babilonbii anɔyelɔi ni yitseiaŋ wala lɛ ahe akɛ amɛtamɔ ŋulamii ejaakɛ amɛwó amɛhe nɔ fe mɛi krokomɛi ni bɔle amɛ lɛ. (Yesaia 14:12-14) Taakɛ agba afɔ̃ shi lɛ, akpata mfonirifeemɔŋ Babilonbii ‘aŋwɛi’ lɛ, loo nɔyelɔi lɛ kɛ “shikpɔŋ” lɛ ni ji mɛi ni fĩɔ nakai nɔyeli lɛ sɛɛ lɛ hiɛ yɛ afi 539 D.Ŋ.B. (Yesaia 51:6) Enɛ ha Yudafoi ni etsake amɛtsuii lɛ nyɛ amɛku amɛsɛɛ kɛtee Yerusalem, he ni “ŋwɛi hee” ni ji nɔyeli gbɛjianɔtoo hee, ye “shikpɔŋ hee” ni ji adesai jalɔi anɔ yɛ lɛ.—Yesaia 65:17.

Ekã shi faŋŋ akɛ wiemɔi ni Biblia lɛ kɛtsu nii akɛ ŋwɛi kɛ shikpɔŋ ‘baaho aya’ lɛ kɔɔ ŋmɛnɛŋmɛnɛ beaŋ adesai anɔyelii ni ekpɔtɔ lɛ kɛ amɛsɛɛfilɔi ni ekwa Nyɔŋmɔ lɛ ahe. (2 Petro 3:7) Nifeemɔ nɛɛ baagbele gbɛ kɛha Nyɔŋmɔ ŋwɛi nɔyeli hee lɛ koni ejɔɔ adesai jalɔi aweku hee lɛ, ejaakɛ “yɛ [Nyɔŋmɔ] shiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.”—2 Petro 3:13.

No hewɔ lɛ, obaanyɛ oná hemɔkɛyeli yɛ Nyɔŋmɔ shiwoo akɛ wɔshikpɔŋ lɛ ni ji wɔshĩa lɛ baahi shi kɛya naanɔ lɛ mli. Kɛfata he lɛ, Biblia lɛ tsɔɔ nɔ ni esa akɛ ofee koni onyɛ oná nakai be ni yɔɔ miishɛɛ, ni ji be mli ni abaafee shikpɔŋ muu lɛ fɛɛ paradeiso lɛ mli gbɛfaŋnɔ. Yesu kɛɛ akɛ: “Shi enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.” (Yohane 17:3) Mɛni hewɔ okɛfeee oti ni ma ohiɛ akɛ obaapɛi nɔ ni Biblia lɛ tsɔɔ yɛ nɔ ni baaba shikpɔŋ lɛ kɛ adesai anɔ wɔsɛɛ lɛ he lɛ mli? Yehowa Odasefoi ni yɔɔ he ni oyɔɔ lɛ yɛ he miishɛɛ akɛ amɛaaye amɛbua bo yɛ enɛ feemɔ mli.

[Shishigbɛ niŋmai]

[Wiemɔ ni akɔ ni akɛmiitsu nii ni yɔɔ baafa 12]

Biblia lɛ woɔ shi akɛ wɔshikpɔŋ ni ji wɔshĩa lɛ baahi shi kɛya naanɔ

[Hei ni Mfonirii ni yɔɔ baafa 10 lɛ Jɛ]

Shikpɔŋ kokroo he mfoniri: NASA/The Visible Earth (http://visibleearth.nasa.gov/); snoo mli oshishibrishii: © Bryan and Cherry Alexander Photography