Bɔ ni Blema Maŋtsɛyeli ni Ji Lidia Saa Wɔhe Ŋmɛnɛ

EKOLƐ onuko blema maŋtsɛyeli ni ji Lidia lɛ he sane pɛŋ, ni no hewɔ lɛ ekolɛ onaa baakpɛ ohe akɛ ooole akɛ nɔ ko ni ayana yɛ jɛmɛ lɛ tsake bɔ ni je lɛ tsuɔ jarayeli nibii ahe nii ehaa lɛ kwraa. Ekolɛ mɛi ni kaneɔ Biblia lɛ hu anaa baakpɛ amɛhe akɛ amɛaale akɛ nɔ ko ni Lidiabii lɛ fee lɛ haa anuɔ Biblia mli gbalɛ ko ni shishinumɔ wa lɛ shishi. Mɛni ji nɔ ni Lidiabii lɛ yana? Dani wɔbaaha sanebimɔ nɛɛ hetoo lɛ, ebaahi jogbaŋŋ akɛ wɔɔkase shihilɛ ni tee nɔ yɛ maŋtsɛyeli ni etamɔ nɔ ni hiɛ ekpa enɔ kwraa nɛɛ mli kɛ be ni ekɛhi shi lɛ he nɔ ko.

 Maŋtsɛmɛi ni hi shi yɛ Lidia lɛ ye nɔ kɛjɛ amɛmaŋtiase ni ji Sarde, ni nakai beaŋ lɛ eyɔɔ Asia Bibioo lɛ anaigbɛ lɛ mli, shi amrɔ nɛɛ atsɛɔ jɛmɛ akɛ Turkey. Lidia naagbee maŋtsɛ Croesus bua jwetrii babaoo anaa eha ehe, shi aaafee afi 546 D.Ŋ.B. lɛ, Koresh Kpeteŋkpele ni jɛ Persia lɛ baŋɔ emaŋtsɛyeli lɛ—Koresh nɛɛ nɔŋŋ ji mɔ ni ye Babilon Maŋtsɛyeli lɛ nɔ kunim yɛ afii fioo komɛi asɛɛ lɛ.

Tsakemɔi heei ni Lidia jarayelɔi fee lɛ hewɔ lɛ, awieɔ amɛhe akɛ amɛfata mɛi klɛŋklɛŋ ni kɛ kapɛji ni ji shika ni akɛ dade fee bɔi nitsumɔ lɛ ahe. Akɛ shikatsuru kɛ jwiɛtɛi tsu nii be saŋŋ yɛ blema akɛ shika, shi akɛni shikatsuru kɛ gai ni akɛtsuɔ nii akɛ shika lɛ adaramɔ yeee egbɔ hewɔ lɛ, be fɛɛ be ni mɛi baaye jara lɛ, ebaabi ni amɛkɛ shika lɛ aŋmɛ ŋsɛnii amli amɛkwɛ dã. Ákɛ nɔkwɛmɔnɔ lɛ, yɛ Israel lɛ, Nyɔŋmɔ gbalɔ Yeremia hé shikpɔŋ ko ni eŋma akɛ: “Miŋmɛ shika ni naa shiɔ jwiɛtɛi shekeli nyɔŋma kɛ kpawo miha lɛ.”—Yeremia 32:9.

Mɛi ni hi shi yɛ Lidia yɛ Yeremia gbii lɛ amli lɛ na gbɛ ko ni yɔɔ mlɛo ni amɛbaatsɔ nɔ amɛkɛye jara—no ji kapɛji ni mli etsiii tsɔ ni maŋ lɛ kadimɔnɔ yɔɔ eko fɛɛ eko nɔ, ni tsɔɔ akɛ akpɛlɛ ekɛ nitsumɔ nɔ lɛ. Shikatsuru kɛ jwiɛtɛi ŋmiiŋmi ni akɛfutu ni atsɛɔ lɛ electrum ji nɔ ni akɛfee Lidia klɛŋklɛŋ kapɛji lɛ. Beni Croesus batsɔ maŋtsɛ lɛ, etsake shikai nɛɛ, ni ekɛ kapɛji ni akɛ jwiɛtɛi fee kɛ kapɛji ni akɛ shikatsuru fee ye najiaŋ. Lidiabii lɛ to gbɛjianɔ ko ni akɛ dade kapɛji srɔtoi enyɔ bɔi nitsumɔ, ni bɔ ni gbɛjianɔtoo nɛɛ yɔɔ ji akɛ, dade kapɛji ni baa shi lɛ ekomekomei 12 kɛ dade kaplɛ ni jara wa waa lɛ ekome yeɔ egbɔ. Shi naagba ba shika gbɛjianɔtoo nɛɛ kɛ nitsumɔ he ejaakɛ mɛi kɛ kantafiti kapɛji, ni ji shikatsuru ni akɛ dadei ni jara waaa efutu mli lɛ bɔi nitsumɔ. Ehe bahia ni jarayelɔi aná gbɛ ko ni yɔɔ mlɛo ni amɛbaatsɔ nɔ kɛna nɔ ni ji shikatsuru lɛ diɛŋtsɛ.

Lidiabii lɛ kpa shi amɛna akɛ tɛ diŋ ko ni yɔɔ maŋ lɛ mli ni atsɛɔ lɛ Lidia tɛ lɛ baanyɛ atsu amɛnaagba lɛ he nii. Kɛ́ akɛ dade kaplɛ ko shɔɔ tɛ ni yɔɔ trotro, kɛ ehiɛ ŋmlitsaŋmlitsa fioo lɛ nɔ lɛ, eshiɔ okadi ko yɛ shika lɛ nɔ. Kɛ́ akɛ nakai okadi lɛ su to okadii ni anaa yɛ dadei krokomɛi ni ale akɛ shikatsuru yɛ amɛmli lɛ ahe lɛ, ehaa anaa shikatsuru abɔ ni yɔɔ nakai dade kaplɛ lɛ mli. Nɛkɛ tɛ nɛɛ ni akpa shi ana, ni ji tɛ ni akɛkaa kaplɛ ko akwɛɔ akɛ eji shika kpakpa lɛ ji nɔ ni ha anyɛ akɛ he fɔ̃ dade kapɛji ni akɛtsuɔ nii lɛ anɔ. Mɛɛ gbɛ nɔ tɛi ni akɛkaa shika akwɛɔ lɛ he nii ni wɔɔle lɛ baanyɛ aye abua wɔ koni wɔnu Biblia lɛ shishi?

Biblia Mli Mfonirifeemɔŋ Tɛi ni Akɛkaa Nii Akwɛɔ

Be mli ni tɛ ni akɛkaa shikatsuru akwɛɔ lɛ batsɔ nɔ ko ni jarayelɔi kɛfɔɔ nitsumɔ lɛ, wiemɔ ni akɛtsuɔ nii kɛhaa “tɛ ni akɛkaa shikatsuru akwɛɔ” lɛ shishinumɔ batsɔ gbɛ nɔ ni atsɔɔ akaa nii akwɛɔ. Yɛ Hela, ni ji wiemɔ ni aŋma Biblia lɛ fã ko yɛ mli lɛ mli lɛ, akɛ wiemɔ nɛɛ nɔŋŋ damɔɔ shi kɛhaa piŋmɔ ni hii ni akɛ niseniianifeemɔ kaa amɛ akwɛɔ lɛ piŋɔ lɛ.

Akɛni gboklɛfoi anɔkwɛlɔi ji mɛi ni piŋɔ gboklɛfoi hewɔ lɛ, akɛ wiemɔ ni aná kɛjɛ “tɛ ni akɛkaa shikatsuru akwɛɔ” mli lɛ hu tsu nii kɛkɔ gboklɛfoi anɔkwɛlɔi ahe. No hewɔ lɛ, Biblia lɛ wieɔ Yesu abɛbua ni kɔɔ tsulɔ ko ni hiɛ esɔɔɔ nii lɛ he akɛ, aŋɔ lɛ aha “gboklɛfoi anɔkwɛlɔi lɛ,” loo yɛ Biblia shishitsɔɔmɔi komɛi amli lɛ, “mɛi ni piŋɔ mɛi lɛ.” (Mateo 18:34; American Standard Version, Darby, King James Version) The International Standard Bible Encyclopaedia lɛ wie ŋmalɛ nɛɛ he akɛ: “Ekolɛ abuɔ tsuŋwoo lɛ diɛŋtsɛ po akɛ eji ‘piŋmɔ’ (taakɛ ŋwanejee ko bɛ he akɛ eji lɛ), ni no hewɔ lɛ esa akɛ wɔnu wiemɔ ni ji ‘mɛi ni piŋɔ mɛi’ lɛ shishi akɛ etsɔɔ gboklɛfoi anɔkwɛlɔi.” Enɛ yeɔ ebuaa kɛgbalaa Biblia mli ŋmalɛ ko ni yɔɔ miishɛɛ lɛ mli.

Atsɔɔ Abɛbua ko Shishi

Mɛi ni jɛɔ anɔkwayeli mli amɛkaneɔ Biblia lɛ kɛ be saŋŋ esusu nɔ ni baaba Satan nɔ lɛ he.  Biblia lɛ kɛɔ akɛ: “Abonsam lɛ . . . aŋɔ lɛ awo la kɛ swɔɔ kpaakpo lɛ mli, he ni kooloo lɛ kɛ amale gbalɔ lɛ hu yɔɔ lɛ. Ni aaapiŋ amɛ nyɔɔŋ kɛ shwane kɛaatee naanɔi anaanɔ.” (Kpojiemɔ 20:10) Ekã shi faŋŋ akɛ, ákɛ Yehowa baapiŋ mɔ ko kɛya naanɔ lɛ teɔ shi ewoɔ Nyɔŋmɔ suɔmɔ kɛ ejalɛsaneyeli lɛ. (Yeremia 7:31) Kɛfata he lɛ, Biblia lɛ wieɔ naanɔ wala he akɛ eji nikeenii, jeee toigbalamɔ. (Romabii 6:23) Belɛ, eyɛ faŋŋ akɛ aŋma Kpojiemɔ 20:10 lɛ yɛ okadifeemɔ wiemɔ mli. Kooloo lɛ kɛ la kpaakpo lɛ ji mfonirifeemɔŋ nibii. (Kpojiemɔ 13:2; 20:14) Ani piŋmɔ lɛ hu ji mfonirifeemɔŋ nii? Mɛni baanyɛ afee wiemɔ nɛɛ shishinumɔ?

Taakɛ wɔna lɛ, aná Hela wiemɔ kɛha “piŋmɔ” lɛ kɛjɛ wiemɔ ni ji “tɛ ni akɛkaa shikatsuru akwɛɔ” lɛ mli, ni ebaanyɛ ekɔ piŋmɔ ni gboklɛfonyo ko piŋɔ lɛ he. No hewɔ lɛ, ekolɛ piŋmɔ ni abaapiŋ Satan kɛya naanɔ lɛ kɔɔ enaa ni abaatsĩ kɛya naanɔ yɛ gbele mli, oookɛɛ nɔ ni atsĩ enaa yɛ tsuŋwoohe ko ni enyɛŋ eje kpo dɔŋŋ lɛ he.

Tɛ ni Lidiabii lɛ kɛkaa shikatsuru amɛkwɛɔ lɛ yeɔ ebuaa wɔ ni wɔnuɔ nɔ kroko hu ni kɔɔ ‘piŋmɔ ni abaapiŋ’ Satan kɛya naanɔ ní kɛ Nyɔŋmɔ suɔmɔ lɛ kpãa gbee lɛ shishi. Yɛ wiemɔi komɛi amli lɛ, “tɛ ni akɛkaa shikatsuru akwɛɔ” lɛ ebatsɔ wiemɔ ni akɛfɔɔ nitsumɔ kɛhaa nɔ ko ni akɛkaa nibii akwɛɔ. Ákɛ nɔkwɛmɔnɔ lɛ, yɛ Blɔfo wiemɔ mli lɛ, “tɛ ni akɛkaa shikatsuru akwɛɔ” lɛ tsɔɔ “kaa loo gbɛ ni atsɔɔ nɔ akɛnaa nɔ̃ kpakpa ni nɔ ko ji loo bɔ ni nɔ ko ja jogbaŋŋ ha.” No hewɔ lɛ, “piŋmɔ” ni abaapiŋ Satan kɛya naanɔ lɛ tsɔɔ akɛ kojomɔ ni abaakojo lɛ lɛ baafee naanɔ tɛ ni akɛkaa nii akwɛɔ ni abaanyɛ akɛtsu nii kɛji aleenɔ ni mɔ ko tse atua eshi Yehowa yɛ wɔsɛɛ be mli lɛ. Be ko baŋ dɔŋŋ ni ebaabi ni akɛ be babaoo atsu nii kɛka mɔ ko ni teɔ shi ewoɔ Yehowa nɔyeli lɛ akwɛ ni akɛbu shitee-kɛwolɔ lɛ fɔ́.

Shishinumɔ ni aná yɛ nɔ hewɔ ni jarayelɔi ni yɔɔ he fɛɛ he lɛ kɛ tɛ ni Lidiabii lɛ kɛkaa shikatsuru amɛkwɛɔ lɛ bɔi nitsumɔ, kɛ shishinumɔ ni mfonirifeemɔŋ wiemɔi ni nakai nifeemɔ lɛ ha aná lɛ haa anaa nɔ ni baaba Satan nɔ. Ehiɛ ni abaakpata lɛ baafee kojomɔ ni akɛkaa nibii akwɛɔ ní haŋ Nyɔŋmɔ aŋmɛ atuatsemɔ gbɛ dɔŋŋ kɛmiiya naanɔ.—Romabii 8:20.

[Wiemɔ ni akɔ ni akɛmiitsu nii ni yɔɔ baafa 23]

Satan mfonirifeemɔŋ piŋmɔ lɛ tsɔɔ akɛ ekojomɔ lɛ baafee kojomɔ ni akɛkaa nibii akwɛɔ kɛmiiya naanɔ

[Shikpɔŋ he mfoniri ni yɔɔ baafa 21]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Ŋshɔ Diŋ

LIDIA

SARDE

Mediteranea Ŋshɔ

[Mfoniri ni yɔɔ baafa 21]

Blema Sarde Tsũkoi

[Mfoniri ni yɔɔ baafa 22]

Yɛ blema beaŋ lɛ, akɛ ŋsɛnii tsuɔ nii kɛsusuɔ shika

[He ni Sane lɛ Jɛ]

E. Strouhal/Werner Forman/Art Resource, NY

[Mfonirii ni yɔɔ baafa 22, 23]

Tɛ ni akɛkaa shikatsuru akwɛɔ lɛ etee nɔ ehi shi kɛbashi ŋmɛnɛŋmɛnɛ beaŋ

[He ni Sane lɛ Jɛ]

Dade kapɛji: Courtesy Classical Numismatic Group, Inc.; tɛ ni akɛkaa nibii akwɛɔ: Science Museum/Science & Society Picture Library

[He ni Mfoniri ni yɔɔ baafa 21 lɛ Jɛ]

Electrum dade kaplɛ: Courtesy Classical Numismatic Group, Inc.