Nɔ Ni Wɔkaseɔ Kɛjɛɔ Yesu Ŋɔɔ

Yɛ Nyɔŋmɔ Maŋtsɛyeli lɛ He

Mɛni ji Nyɔŋmɔ Maŋtsɛyeli lɛ?

Nyɔŋmɔ Maŋtsɛyeli lɛ ji nɔyeli ni baaye shikpɔŋ muu lɛ fɛɛ nɔ. Yesu wie akɛ: “No hewɔ lɛ nyɛsɔlea nɛkɛ: . . . Omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.”—Mateo 6:9, 10; Daniel 2:44.

Namɛi baafee Nyɔŋmɔ Maŋtsɛyeli lɛ nɔyelɔi?

Afɔ́ Yesu akɛ mɔ ni baafee Nyɔŋmɔ Maŋtsɛyeli lɛ Nɔyelɔ. Ŋwɛibɔfo ko kɛɛ Yesu nyɛ akɛ: “Nuŋtsɔ Nyɔŋmɔ aaaŋɔ etsɛ David maŋtsɛsɛi lɛ aha lɛ. Ni eeeye . . . maŋtsɛ.” (Luka 1:30-33) Kɛfata he lɛ, Yesu hala esɛɛnyiɛlɔi lɛ ekomɛi koni amɛfata ehe kɛye nɔ. Ekɛɛ ebɔfoi lɛ akɛ: “Nyɛji mɛi ni kɛ mi ehi shi yɛ mikaai lɛ amli; ni mi hu miito maŋtsɛyeli maha nyɛ taakɛ bɔ ni mitsɛ eto eha mi lɛ.” (Luka 22:28, 29; Daniel 7:27) Yesu sɛɛnyiɛlɔi lɛ ateŋ mɛi 144,000 baafata ehe kɛye nɔ.—Kpojiemɔ 5:9, 10; 14:1.

Nɛgbɛ Maŋtsɛyeli lɛ baahi?

Nyɔŋmɔ Maŋtsɛyeli lɛ baaye nɔ kɛjɛ ŋwɛi. Yesu kɛɛ esɛɛnyiɛlɔi lɛ akɛ: “Kɛji mitee ni miyasaa gbɛhe mito nyɛ [yɛ ŋwɛi] lɛ, mibaba ekoŋŋ ni mibabaŋɔ nyɛ kɛya he ni mi diɛŋtsɛ miyɔɔ lɛ, koni he ni miyɔɔ lɛ nyɛ hu nyɛhi jɛi. . . . Miiya tsɛ lɛ ŋɔɔ.”—Yohane 14:2, 3, 12; Daniel 7:13, 14.

Mɛni Nyɔŋmɔ Maŋtsɛyeli lɛ baafee yɛ efɔŋfeemɔ he?

Yesu baajie mɛi fɔji lɛ kɛjɛ shikpɔŋ lɛ nɔ. Yesu kɛɛ akɛ: “Shi beni gbɔmɔ bi lɛ [Yesu] aaaba yɛ enunyam lɛ mli, ni bɔfoi krɔŋkrɔŋi lɛ fɛɛ aaafata ehe lɛ, no mli lɛ eeeta enunyam sɛi lɛ nɔ; ni  aaabua jeŋmaji lɛ fɛɛ naa yɛ ehiɛ, ni eeegbala amɛmli . . . Ni mɛnɛɛmɛi [mɛi fɔji] lɛ, amɛaatee naanɔ hejaramɔ mli; shi jalɔi lɛ aaatee naanɔ wala mli.”—Mateo 25:31-34, 46.

Namɛi baahi shikpɔŋ lɛ nɔ akɛ Maŋtsɛyeli lɛ shishibii?

Yesu kɛɛ akɛ: “Ajɔɔ mɛi ni he jɔ lɛ; shi amɛaaye shikpɔŋ lɛ nɔ.” (Mateo 5:5; Lala 37:29; 72:8) Shikpɔŋ lɛ nɔ baayi obɔ kɛ gbɔmɛi ni amrɔ nɛɛ po lɛ, amɛmiikase akɛ amɛbaajie suɔmɔ kpo amɛtsɔɔ amɛhe. Yesu kɛɛ esɛɛnyiɛlɔi lɛ akɛ: “Kitã hee miŋɔhaa nyɛ, akɛ nyɛsumɔ nyɛhe; taakɛ bɔ ni misumɔ nyɛ lɛ, nakai nyɛ hu nyɛsumɔa nyɛhe. Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”—Yohane 13:34, 35.

Mɛni Nyɔŋmɔ Maŋtsɛyeli lɛ baafee eha adesai ni yɔɔ shikpɔŋ lɛ nɔ lɛ?

Yesu baatsá adesai ahelai fɛɛ eha amɛ. Beni Yesu yɔɔ shikpɔŋ lɛ nɔ lɛ, ejaje “Nyɔŋmɔ maŋtsɛyeli lɛ he sane etsɔɔ” asafoku lɛ, “ni etsá mɛi ni tsámɔ ehia amɛ lɛ.” (Luka 9:11) Beni bɔfo Yohane na Yesu ni atee lɛ shi lɛ yɛ ninaa mli lɛ, ekɛɛ akɛ: “Mina ŋwɛi hee kɛ shikpɔŋ hee . . . Minu gbee kpeteŋkpele ko jɛ maŋtsɛsɛi lɛ mli kɛɛ: Naa, Nyɔŋmɔ buu lɛ yɛ gbɔmɛi ateŋ . . . Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ.”—Kpojiemɔ 21:1-4.

Nyɔŋmɔ Maŋtsɛyeli lɛ baaku sɛɛ ekɛ Paradeiso aba shikpɔŋ lɛ nɔ ekoŋŋ. Efɔŋfeelɔ ko ni asɛŋ ekɛ Yesu fɛɛ lɛ kɛɛ akɛ: “Nuŋtsɔ, kaimɔ mi, beni oooba yɛ omaŋtsɛyeli lɛ mli lɛ!” Ni Yesu kɛɛ lɛ akɛ: “Lɛɛlɛŋ, miikɛɛo akɛ: Ŋmɛnɛ okɛ mi aaahi Paradeiso!”—Luka 23:42, 43; Yesaia 11:4-9.

Kɛ́ ootao enɛ he saji babaoo lɛ, kwɛmɔ Mɛni Biblia lɛ Tsɔɔ Diɛŋtsɛ? * wolo lɛ yitso 8 lɛ mli

[Shishigbɛ niŋmaa]