Tsɔɔmɔ Obii Lɛ Anii

Eesumɔ akɛ Eye Ebua

ANI ole mɔ ko ni he miiye waa?— Ani oná kulɛ obaanyɛ ofee nɔ ko kɛye obua lɛ?— Ni kɛ́ mɔ nɛɛ jɛ maŋ kroko nɔ loo esoro jamɔ mli ni eyɔɔ hu? Ani obaaya nɔ oye obua lɛ ni ená hewalɛ?— Gbekɛ yoo fioo ko ni hi Israel shikpɔŋ lɛ nɔ aaafee afii 3,000 ni eho nɛ lɛ fee nakai. Ha wɔsusu nɔ ni ba yɛ nakai beaŋ lɛ he wɔkwɛ.

Nakai beaŋ lɛ, blema Israel ni ji he ni gbekɛ yoo fioo lɛ jɛ lɛ kɛ maŋ ni bɛŋkɛ ni ji Siria lɛ fɔɔ nɔmɔ. (1 Maŋtsɛmɛi 22:1) Gbi ko lɛ, Siriabii lɛ ba Israel ni amɛbaŋɔ gbekɛ yoo fioo lɛ nom. Amɛ kɛ lɛ tee Siria, ni beni eyɔɔ jɛmɛ lɛ esɔmɔ Naeman ni ji Siria tatsɛnukpa lɛ ŋa lɛ. No mli lɛ, Naeman miiye hela gbonyo ko ni atsɛɔ lɛ kpiti, ni hela nɛɛ nyɛɔ ehaa mɔ hewolo nɔ fiteɔ.

Gbekɛ yoo lɛ kɛɛ Naeman ŋa lɛ akɛ abaanyɛ atsá ewu lɛ hela lɛ aha lɛ. Ekɛɛ lɛ akɛ: ‘Eji Naeman yɛ Samaria kulɛ, Yehowa gbalɔ Elisha baanyɛ atsá ekpiti lɛ eha lɛ.’ Ojogbaŋŋ, bɔ ni tsulɔ yoo lɛ wie Elisha he lɛ ha Naeman he ye akɛ ekolɛ gbalɔ lɛ baanyɛ atsá ehela lɛ lɛɛlɛŋ. No hewɔ lɛ, yɛ Siria maŋtsɛ Ben-Hadad gbɛŋmɛɛ naa lɛ, Naeman kɛ etsuji lɛ ateŋ mɛi komɛi fã gbɛ kakadaŋŋ ni feɔ kilomitai 150 kɛtee koni amɛyatao Elisha.

Klɛŋklɛŋ lɛ, amɛtee Israel maŋtsɛ Yehoram ŋɔɔ. Ni amɛkɛ wolo ni jɛ Maŋtsɛ Ben-Hadad ŋɔɔ ni miibi ni aye abua Naeman lɛ tsɔɔ lɛ. Shi Yehoram bɛ hemɔkɛyeli yɛ Yehowa loo gbalɔ Elisha mli. Yehoram susu akɛ Ben-Hadad miitao ekɛ lɛ awu ta. Beni Elisha nu enɛ lɛ, ekɛɛ Maŋtsɛ Yehoram akɛ: “Ha ní eba miŋɔɔ kɛkɛ.” Elisha miitao eha ana akɛ Nyɔŋmɔ yɛ hewalɛ ni ekɛaatsá Naeman hela gbonyo lɛ.—2 Maŋtsɛmɛi 5:1-8.

Beni Naeman yashɛ Elisha shĩa lɛ kɛ ekpɔŋɔi kɛ eta shwiilii lɛ, Elisha tsu tsulɔ ko ni eyakɛɛ lɛ akɛ: ‘Yaa ni oyaju ohe shii kpawo yɛ Yordan mli, ni ohewolo aaahi!’ Enɛ ha Naeman mli fu. Eekpa gbɛ akɛ Elisha baaje kpo kɛba ni ekɛ enine ahuu ekpiti lɛ nɔ ni etsá lɛ. Yɛ no najiaŋ lɛ, tsulɔ nɛɛ pɛ kɛkɛ ena! No hewɔ lɛ, Naeman kɛ mlila ku esɛɛ akɛ eeya shĩa.—2 Maŋtsɛmɛi 5:9-12.

 Eji Naeman tsuji lɛ ateŋ mɔ kome ji bo kulɛ, mɛni obaafee?— Ojogbaŋŋ, tsuji lɛ bi lɛ akɛ: ‘Eji nɔ ko ni feemɔ wa Elisha kɛɛ ofee kulɛ, aso ofeŋ? No hewɔ lɛ, mɛni hewɔ ofeee nii ní yɔɔ mlɛo nɛɛ—yaa ju ohe kɛkɛ ni ohe atse?’ Naeman bo amɛ toi. Kɛkɛ ni “[e]kpeleke shi, ni ekɛ ehe yatsɔ Yordan mli shii kpawo . . . ni ehewolo hi ekoŋŋ tamɔ gbekɛ fioo hewolo.”

Naeman ku esɛɛ eba Elisha ŋɔɔ ni ebakɛɛ lɛ akɛ: “Naa, kpaako dani miná mile akɛ Nyɔŋmɔ ko Nyɔŋmɔ ko bɛ shikpɔŋ nɛɛ nɔ fɛɛ, akɛ ja Israel kɛkɛ.” Ewo Elisha shi akɛ “eshaŋ shaa afɔle loo afɔle kroko ehaŋ nyɔŋmɔ ko nyɔŋmɔ ko dɔŋŋ, akɛ ja Yehowa kɛkɛ!”—2 Maŋtsɛmɛi 5:13-17.

Ani obaasumɔ ni oye obua mɔ ko ni ekase Yehowa kɛ nɔ ni ebaanyɛ efee lɛ he nii taakɛ gbekɛ yoo fioo lɛ fee lɛ?— Beni Yesu yɔɔ shikpɔŋ lɛ nɔ lɛ, kpitiyelɔ ko hé enɔ eye ni ekɛɛ akɛ: ‘Kɛji oosumɔ ni oye obua mi lɛ, no lɛ obaanyɛ oye obua mi.’ Ani ole hetoo ni Yesu ha lɛ?— “Miisumɔ.” Yesu tsá lɛ, taakɛ bɔ pɛ ni Yehowa tsá Naeman lɛ.—Mateo 8:2, 3.

Ani ole jeŋ hee ni Yehowa baafee ni gbɔmɛi fɛɛ baaná gbɔmɔtsoŋ hewalɛ ní amɛbaanyɛ amɛhi shi kɛya naanɔ yɛ mli lɛ he nɔ ko?— (2 Petro 3:13; Kpojiemɔ 21:3, 4) No lɛ ŋwanejee ko bɛ he akɛ obaasumɔ ni ogba mɛi krokomɛi nibii ni yɔɔ mishɛɛ nɛɛ!

Sanebimɔi:

○ Mɛɛ gbɛ nɔ gbekɛ yoo fioo ni Naeman hii lɛ ŋɔ lɛ nom lɛ ye ebua Naeman?

○ Mɛni hewɔ shishijee lɛ Naeman sumɔɔɔ akɛ eboɔ Elisha toi lɛ, shi mɛni ha etsake ejwɛŋmɔ?

○ Kɛ́ oosumɔ akɛ okase nakai gbekɛ yoo fioo lɛ, mɛni esa akɛ ofee?

○ Mɛni Yesu sumɔ akɛ efee, ni mɛni hewɔ shihilɛ yɛ Nyɔŋmɔ jeŋ hee lɛ mli lɛ baafee nɔ ni yɔɔ miishɛɛ waa lɛ?