Ani Tɔmɔ Yɛ He Ákɛ Akɛ Nyɔŋmɔ Gbɛi Lɛ Aaatsu Nii?

YƐ Hebri Ŋmalɛi ni bei pii lɛ afɔɔ lɛ tsɛmɔ akɛ “Kpaŋmɔ Momo” lɛ mli lɛ, Nyɔŋmɔ gbɛi lɛ ni akɛ Hebri niŋmaa okadii ni ji יהוה ŋma (ni akaneɔ kɛjɛɔ ninejurɔgbɛ kɛyaa abɛkugbɛ) lɛ je kpo shii 7,000 sɔŋŋ yɛ mli. No tsɔɔ akɛ, akɛ Hebri niŋmai okadii ejwɛ ni ji Yohdh, He, Waw, kɛ He lɛ damɔɔ shi ahaa Nyɔŋmɔ gbɛi lɛ, ni afɔɔ enɛ shishitsɔɔmɔ akɛ YHWH.

Afii babaoo ni eho nɛ lɛ, Yudafoi lɛ ná hemɔkɛyeli gbonyo akɛ, eji tɔmɔ ákɛ akɛ Nyɔŋmɔ gbɛi lɛ aaatsu nii. Enɛ hewɔ lɛ, amɛkpa egbɛi lɛ tsɛmɔ, ni amɛkɛ sablãi krokomɛi ye egbɛi lɛ najiaŋ yɛ amɛwoji amli. Shi kɛlɛ, Biblia shishitsɔɔlɔi babaoo etsɔɔ Nyɔŋmɔ gbɛi lɛ shishi akɛ, “Yahweh,” loo “Yehowa.” Bibliai ni tsɔɔ Nyɔŋmɔ gbɛi lɛ shishi yɛ nɛkɛ gbɛ nɔ lɛ ateŋ ekome ji Jerusalem Bible ni Katolikbii fee lɛ. Biblia shishitsɔɔmɔ nɛɛ tsɔɔ akɛ, beni Mose bi Nyɔŋmɔ akɛ, mɛni ekɛɛ Israelbii kɛji amɛbi lɛ mɔ ni tsu lɛ amɛŋɔɔ lɛ, Nyɔŋmɔ ha lɛ hetoo akɛ: “Kɛɛmɔ Israelbii lɛ akɛ: ‘Yahweh, nyɛtsɛmɛi a-Nyɔŋmɔ lɛ, ni ji Abraham Nyɔŋmɔ, Isak Nyɔŋmɔ, kɛ Yakob Nyɔŋmɔ lɛ tsu mi nyɛŋɔɔ.’ Enɛ ji migbɛi kɛyaa naanɔ; ni enɛ ji gbɛi ni mɛi aaatsɛ kɛkai mi yɛ yinɔi fɛɛ ni baaba lɛ amli.”—2 Mose 3:15.

Beni Yesu sɔleɔ lɛ, ewie bɔ ni ekɛ Nyɔŋmɔ gbɛi lɛ tsuɔ nii lɛ he akɛ: “Mijie ogbɛi lɛ kpo mitsɔɔ amɛ, ni masaa majie lɛ kpo matsɔɔ.” Ni Yesu kɛɛ yɛ sɔlemɔ ni afɔɔ lɛ tsɛmɔ akɛ Wɔ-Tsɛ ni Yɔɔ Ŋwɛi sɔlemɔ lɛ mli akɛ: “Wɔtsɛ ni yɔɔ ŋwɛi, ogbɛi lɛ he atse.”—Yohane 17:26; Mateo 6:9.

Belɛ, nɔ ni Paapa Benedict XVI wie yɛ Nyɔŋmɔ gbɛi lɛ kɛ nitsumɔ he yɛ ewolo ko ni eŋma nyɛsɛɛ nɛɛ, ni ji Jesus of Nazareth lɛ mli lɛ haa mɔ naa kpɛɔ ehe. Ekɛɛ akɛ: “Israelbii lɛ . . . asane ja jogbaŋŋ akɛ amɛkpa gbɛi ni Nyɔŋmɔ kɛtsɛɔ lɛ diɛŋtsɛ ehe ni akɛ niŋmaa okadii ni ji YHWH ŋmaa lɛ tsɛmɔ, koni amɛkagbe gbɛi lɛ he guɔ ni ebatsɔ tamɔ wɔŋjalɔi lɛ anyɔŋmɔi lɛ agbɛi. Yɛ nakai gbɛ nɔ nɔŋŋ lɛ, eji tɔmɔ akɛ Biblia shishitsɔɔmɔi srɔtoi ni atsɔɔ shishi nyɛsɛɛ nɛɛ kɛ Nyɔŋmɔ gbɛi lɛ—ni Israelbii lɛ bu lɛ akɛ eji gbɛi krɛdɛɛ ko ni esaaa akɛ atsɛɔ lɛ—tsu nii, oookɛɛ nɔ ni gbɛi nɛɛ ji blema gbɛi ko kɛkɛ.”

Te osusuɔ tɛŋŋ? Ani eja loo ejaaa ákɛ akɛ Nyɔŋmɔ gbɛi lɛ aaatsu nii? Kɛji Yehowa diɛŋtsɛ kɛɛ akɛ: “Enɛ ji migbɛi kɛyaa naanɔ; ni enɛ ji gbɛi ni mɛi aaatsɛ kɛkai mi yɛ yinɔi fɛɛ ni baaba lɛ amli” lɛ, ani mɔ ko yɛ hegbɛ akɛ eeete ewo shi nɔ ni Nyɔŋmɔ kɛɛ lɛ?

[Mfoniri ni yɔɔ baafa 30]

Yesu kɛ Nyɔŋmɔ gbɛi lɛ tsu nii yɛ esɔlemɔi amli