Mɛni Hewɔ Esa akɛ Ohiɛ Asɔ Nii?

“Naanyo Raquel,

Miida bo shi waa yɛ hewalɛ ni owoɔ mi daa lɛ hewɔ. Eyɛ mli akɛ ekolɛ oleee moŋ, shi bɔ ni oyɔɔ lɛ woɔ mi hewalɛ, ni mlihilɛ mli ni ojɛɔ okɛ mi wieɔ lɛ yeɔ ebuaa mi babaoo.”—Jennifer.

ANI mɔ ko efee nɔ ko kɛda bo shi pɛŋ beni okpaaa gbɛ? Kɛ́ nakai ni lɛ, ŋwanejee ko bɛ he akɛ nifeemɔ nɛɛ ha oná miishɛɛ pam. Eji anɔkwale akɛ, wɔsumɔɔ ni mɛi abu wɔ ni amɛhiɛ asɔ wɔ.—Mateo 25:19-23.

Kɛ́ wɔdaa mɛi ashi lɛ ehaa wekukpãa ni kã wɔkɛ amɛ teŋ lɛ mli waa. Kɛfata he lɛ, kɛ́ wɔhiɛ sɔɔ nii lɛ, no tsɔɔ akɛ wɔmiinyiɛ Yesu Kristo ní hiɛ kpaaa mɛi krokomɛi anitsumɔi kpakpai anɔ lɛ nanemaahei lɛ asɛɛ.—Marko 14:3-9; Luka 21:1-4.

Dɔlɛ sane ji akɛ, kɛ́ aawie hiɛsɔɔ ni ajieɔ lɛ kpo, kɛ́ eji yɛ wiemɔ mli loo kɛtsɔ woloŋmaa nɔ lɛ he lɛ, amrɔ nɛɛ mɛi babaoo ebɔɔɔ enɛ he mɔdɛŋ. Biblia lɛ bɔ kɔkɔ akɛ yɛ “naagbee gbii lɛ anɔ” lɛ, mɛi baatsɔmɔ “trumui.” (2 Timoteo 3:1, 2) Kɛ́ wɔkwɛɛɛ wɔhe nɔ jogbaŋŋ lɛ, bɔ ni ŋmɛnɛ lɛ, mɛi babaoo ejieee hiɛsɔɔ kpo lɛ baanyɛ aná wɔnɔ hewalɛ gbonyo koni wɔkajie hiɛsɔɔ ni ekolɛ wɔnuɔ he lɛ kpo.

Mɛɛ gbɛ̀i kpakpai fɔlɔ baanyɛ atsɔ nɔ kɛtsɔɔ amɛbii bɔ ni ajieɔ hiɛsɔɔ kpo? Namɛi esa akɛ wɔda amɛ shi? Ni mɛni hewɔ esa akɛ wɔhiɛ asɔ nii kɛ́ mɛi ni ebɔle wɔ lɛ ji trumui po lɛ?

Yɛ Weku Kɔkrɔɔ lɛ Mli

Fɔlɔi gboɔ deŋme kɛkwɛɔ amɛbii. Shi bei komɛi lɛ, ekolɛ fɔlɔi baanu he akɛ amɛbii lɛ ahiɛ esɔɔɔ mɔdɛŋ ni amɛbɔɔ lɛ. Mɛni amɛbaanyɛ amɛfee kɛtsake shihilɛ nɛɛ? Nibii etɛ ni nyiɛ sɛɛ nɛɛ ahe miihia.

(1) Nɔkwɛmɔnɔ. Nɔkwɛmɔnɔ kpakpa feemɔ ji gbɛ̀i kpakpai ni atsɔɔ nɔ atsɔseɔ gbekɛbii lɛ ateŋ ekome. Beni Biblia lɛ wieɔ nyɛ ko ni tsuɔ nii dɛŋdɛŋ ni hi shi yɛ blema Israel lɛ he lɛ, ekɛɛ akɛ: “Ebii lɛ teɔ shi, ni amɛjɔɔ lɛ.” Namɔ ŋɔɔ gbekɛbii nɛɛ kase bɔ ni ajieɔ hiɛsɔɔ kpo lɛ yɛ? Ŋmalɛ nɛɛ fã ni tsa nɔ lɛ haa wɔnaa hetoo lɛ. Ekɛɔ akɛ: “Ewu lɛ hu kafoɔ lɛ.” (Abɛi 31:28) Kɛ́ fɔlɔi jieɔ hiɛsɔɔ kpo amɛtsɔɔ amɛhe amɛhe lɛ, ehaa amɛbii lɛ naa akɛ, kɛ́ ajie hiɛsɔɔ kpo lɛ, ehaa mɔ ni ajieɔ hiɛsɔɔ kpo atsɔɔ lɛ lɛ náa miishɛɛ, ehaa wekukpãa kpakpa hiɔ weku lɛ mlibii lɛ ateŋ, ni no tsɔɔ akɛ mɔ ni jieɔ hiɛsɔɔ kpo lɛ baa ejeŋ jogbaŋŋ.

Tsɛ ko ni atsɛɔ lɛ Stephen lɛ kɛɛ akɛ, “Mibɔɔ mɔdɛŋ akɛ mafee nɔkwɛmɔnɔ maha mibii lɛ kɛtsɔ shi ni midaa miŋa kɛji ehoo niyenii lɛ nɔ.” Mɛni ejɛ enɛ mli kɛba? Stephen kɛshi sɛɛ akɛ, “Mibiyei enyɔ lɛ eyɔse enɛ, ni enɛ eye ebua amɛ ni amɛna akɛ esa akɛ amɛjie hiɛsɔɔ kpo.” Kɛji obote gbalashihilɛ mli lɛ, ani odaa ohefatalɔ lɛ shi daa yɛ shĩa nifeemɔi ni efɔɔ feemɔ lɛ ahe? Kɛji obii lɛ fee nibii ni akpaa gbɛ akɛ amɛfee po lɛ, ani odaa amɛ shi?

(2) Tsɔsemɔ. Abaanyɛ akɛ hiɛsɔɔ kpo ni ajieɔ lɛ ato fɔfɔi he. Taakɛ ehe baahia ni akwɛ fɔfɔii anɔ jogbaŋŋ dani amɛbaafee frɔ̃frɔ̃ lɛ,  nakai nɔŋŋ ehe baahia ni atsɔse gbekɛbii jogbaŋŋ dani amɛhiɛ baasɔ nii. Te fɔlɔi aaafee tɛŋŋ amɛye amɛbua amɛbii lɛ ni amɛhiɛ asɔ nii loo amɛjie hiɛsɔɔ kpo lɛ? Nilelɔ Maŋtsɛ Salomo wie nɔ kome ni baanyɛ aha amɛfee nakai lɛ he beni eŋma akɛ: “Jalɔ tsui jwɛŋɔ hetoohamɔ he.”—Abɛi 15:28.

Fɔlɔi, ani nyɛbaanyɛ nyɛtsɔse nyɛbii lɛ koni kɛ́ mɔ ko ke amɛnii lɛ, amɛjwɛŋ mɔdɛŋ ni mɔ lɛ ebɔ kɛ ejurɔ ni mɔ lɛ efee lɛ nɔ? Sanenɔjwɛŋmɔ ni tamɔ nɛkɛ lɛ baaha amɛhiɛ asɔ nii waa, taakɛ sũ kpakpa haa fɔfɔi feɔ frɔ̃frɔ̃ lɛ. Maria ni etsɔse bii etɛ lɛ kɛɛ akɛ: “Ebaabi ni ohé be ni okɛ obii lɛ ata shi ni ogbala mli otsɔɔ amɛ koni amɛna nɔ ni etsɔɔ kɛ́ mɔ ko ke amɛ nii—akɛ mɔ lɛ susu amɛhe pɔtɛɛ, ni eetao ni amɛna akɛ esumɔɔ amɛsane naakpa. Shi misusuɔ akɛ sɛɛnamɔ yɛ enɛ feemɔ he.” Jeee akɛ sanegbaa ni tamɔ nɛkɛ lɛ baaye abua gbekɛbii lɛ ni amɛle nɔ ni esa akɛ amɛkɛɛ kɛjie hiɛsɔɔ kpo kɛkɛ, shi moŋ ebaaye ebua amɛ hu ni amɛna nɔ hewɔ ni esa akɛ amɛkɛɛ nakai.

Fɔlɔi ni le nii lɛ yeɔ buaa amɛbii lɛ ni amɛkana susumɔ akɛ nibii kpakpai fɛɛ ni akeɔ amɛ lɛ ji nibii ni esa akɛ mɛi afee aha amɛ. * Kɔkɔbɔɔ ni kɔɔ bɔ ni esa ákɛ akɛ tsuji aye aha lɛ he ni yɔɔ Abɛi 29:21 lɛ kɔɔ bii hu ahe nakai nɔŋŋ, akɛ: “Kɛ́ mɔ ko hiɛ etsulɔ fɔfɔɔle kɛjɛ egbekɛbiiashi lɛ, kɛ́ fee sɛɛ lɛ ebuuu nɔ̃ [loo efeɔ trumu].”

Te aaafee tɛŋŋ aye abua gbekɛbii ni darako ni amɛjie hiɛsɔɔ kpo? Nyɛ ko ni yɔɔ bii etɛ ni atsɛɔ lɛ Linda lɛ kɛɛ akɛ: “Kɛ́ mikɛ miwu ŋma wolo ko ni wɔkɛyaada mɔ ko shi lɛ, wɔwoɔ wɔbii lɛ hewalɛ ni amɛtɛŋ mfoniri ko ni wɔkɛfata he loo amɛŋmala amɛgbɛi yɛ wolo ni wɔŋma lɛ nɔ.” Lɛɛlɛŋ, ekolɛ mfoniri ni amɛbaatɛŋ lɛ kɛ amɛgbɛi ni amɛbaaŋmala lɛ efeŋ fɛo moŋ, shi nakai feemɔ baaná amɛnɔ hewalɛ kpakpa koni amɛle bɔ ni ajieɔ hiɛsɔɔ kpo amɛwala beaŋ fɛɛ.

(3) Nyɛkafɔ̃a. Akɛ ŋkomeŋfa su fɔ wɔ fɛɛ, ni enɛ baanyɛ aha wɔkajie hiɛsɔɔ kpo. (1 Mose 8:21; Mateo 15:19) Kɛlɛ, Biblia lɛ woɔ Nyɔŋmɔ tsuji hewalɛ akɛ: ‘Nyɛtsɔmɔa mɛi heei yɛ nyɛjwɛŋmɔ mumɔ lɛ mli, ni nyɛwo gbɔmɔ hee ni abɔ yɛ Nyɔŋmɔ subaŋ nɔ lɛ.’—Efesobii 4:23, 24.

Shi fɔlɔi ni yɔɔ niiashikpamɔ lɛ le akɛ, ewaaa akɛ aaakɛɛ akɛ abaaye abua gbekɛbii ni ‘amɛwo gbɔmɔ hee lɛ’ fe efeemɔ diɛŋtsɛ. Stephen ni awie ehe kɛtsɔ hiɛ lɛ kɛɛ akɛ, “Wɔnáaa lɛ mlɛo akɛ wɔɔtsɔɔ wɔbii lɛ ni amɛda mɛi ashi ni ehe ehiaa ni wɔkai amɛ dã.” Shi Stephen kɛ eŋa anijiaŋ ejeee wui. Stephen kɛshi sɛɛ akɛ, “Akɛni wɔfɔ̃ɔɔ wɔbiyei lɛ kaimɔ hewɔ lɛ, amɛkɔ nɔ ni wɔtaoɔ wɔtsɔɔ amɛ lɛ sɛɛ. Amrɔ nɛɛ wɔnyaa bɔ ni amɛjieɔ hiɛsɔɔ kpo amɛtsɔɔ mɛi lɛ he waa diɛŋtsɛ.”

Ni Nanemɛi kɛ Akutsoŋbii Hu?

Bei komɛi lɛ, eyɛ mli akɛ wɔhiɛ esɔ nɔ ni afee aha wɔ lɛ moŋ, shi wɔhiɛ kpaa nɔ akɛ wɔɔda shi. Ani ehe miihia diɛŋtsɛ akɛ wɔhiɛ asɔ nɔ ko ni mɔ ko efee eha wɔ lɛ ni agbɛnɛ hu wɔda mɔ lɛ shi? Bɔni afee ni wɔha sanebimɔ nɛɛ hetoo lɛ, ha wɔsusu sane ko ni ba ni kɔɔ Yesu kɛ kpitiyelɔi komɛi ahe lɛ he wɔkwɛ.

Be ko beni Yesu nyiɛ gbɛ kɛmiiya Yerusalem lɛ, ekɛ hii kpitiyelɔi nyɔŋma kpe. Biblia lɛ bɔ amaniɛ akɛ: “Amɛwó amɛgbee amɛkɛɛ: Nuŋtsɔ Yesu, naa wɔ mɔbɔ! Ni beni ena amɛ lɛ, ekɛɛ amɛ akɛ: Nyɛyaa nyɛkɛ nyɛhe ayatsɔa osɔfoi lɛ. Ni eba mli akɛ, beni amɛyaa lɛ, amɛhe tã. Shi amɛteŋ mɔ kome lɛ, beni ena akɛ atsa lɛ lɛ, eku esɛɛ kɛba, ni ekɛ gbee walɛ bawo Nyɔŋmɔ hiɛ nyam. Ni ekɛ ehiɛ babu shi yɛ enajiashi, ni eda lɛ shi. Shi mɔnɛ lɛ Samarianyo ni.”—Luka 17:11-16.

Ani Yesu ku ehiɛ eshwie hiɛsɔɔ ni mɛi krokomɛi lɛ ejieee lɛ kpo lɛ nɔ? Amaniɛbɔɔ lɛ tsa nɔ akɛ: “Ni Yesu here nɔ akɛ: Ani jeee mɛi nyɔŋma he tã lɛ? Shi mɛi nɛɛhu lɛ, nɛɛgbɛ amɛyɔɔ? Aso anaaa amɛteŋ mɔ ko ni kuɔ esɛɛ ekɛ anunyam bahaa Nyɔnmɔ, akɛ ja maŋsɛɛnyo nɛɛ?”—Luka 17:17, 18.

 Kpitiyelɔi nɛɛhu krokomɛi lɛ jeee efɔŋfeelɔi. Mra mli lɛ, amɛjie hemɔkɛyeli kpo yɛ Yesu mli ni amɛjɛ amɛsuɔmɔ mli amɛbo famɔi ni ekɛha amɛ ni biɔ ni amɛfã gbɛ kɛya Yerusalem ni amɛkɛ amɛhe ayatsɔɔ osɔfoi lɛ toi. Ni kɛlɛ, eyɛ mli akɛ amɛhiɛ sɔ ejurɔ ni Yesu fee amɛ lɛ moŋ, shi amɛyadaaa lɛ shi. Edɔ Kristo akɛ amɛbadaaa lɛ shi. Ni wɔ hu? Kɛ́ mɔ ko kɛ wɔ ye jogbaŋŋ lɛ, ani wɔhe feɔ oya kɛdaa mɔ lɛ shi, ni kɛ́ ebaahi lɛ, ani wɔŋmaa wolo loo wɔfeɔ nɔ kroko kɛjieɔ hiɛsɔɔ kpo?

Biblia lɛ kɛɔ akɛ suɔmɔ “efeee nii ni esaaa, epeleee lɛ diɛŋtsɛ enɔ̃.” (1 Korintobii 13:5) No hewɔ lɛ, kɛ́ mɔ ko jɛ etsuiŋ ejie hiɛsɔɔ kpo lɛ, jeee akɛ no tsɔɔ akɛ ebaa ejeŋ jogbaŋŋ kɛkɛ, shi etsɔɔ hu akɛ eyɛ suɔmɔ. Taakɛ wɔkaseɔ yɛ sane ni kɔɔ kpitiyelɔi lɛ ahe lɛ mli lɛ, esa akɛ mɛi ni miitao amɛsa Kristo hiɛ lɛ ajie suɔmɔ ni tamɔ nɛkɛ kpo amɛtsɔɔ mɛi fɛɛ ni amɛhiɛ asɔ amɛ, ekɔɔɔ he eko maŋ nɔ ni amɛjɛ, amɛhewolonɔ su, loo jamɔ mli ni amɛyɔɔ.

Bi ohe akɛ, ‘Mɛɛ be nɛ ni mida mikutsoŋnyo, minaanyo nitsulɔ, miskulnyo, helatsamɔhe nitsulɔ ko, shwapo nɔkwɛlɔ ko, loo mɔ kroko ni ye ebua mi lɛ shi?’ Mɛni hewɔ okɔɔɔ gbi kome loo gbii enyɔ ni okadi shii abɔ ni okɛ onaabu daa mɛi ashi yɛ mli loo otsɔɔ gbɛ̀i krokomɛi ni hi anɔ ojieɔ hiɛsɔɔ kpo otsɔɔ mɛi? Enɛ baanyɛ aye abua bo koni ona hei ni esa akɛ ofee tsakemɔi yɛ bɔ ni ojieɔ hiɛsɔɔ kpo ohaa lɛ mli.

Ekã shi faŋŋ akɛ, mɔ ni sa wɔshidaa fe fɛɛ ji Yehowa Nyɔŋmɔ. Lɛ ji “duromɔ nii kpakpai fɛɛ kɛ nikeenii ni hi kɛwula shi fɛɛ lɛ” a-Halɔ. (Yakobo 1:17) Mɛɛ be nɛ ni ojɛ otsuiŋ fɛɛ oda Nyɔŋmɔ shi yɛ nibii pɔtɛɛ ni efeɔ ehaa bo lɛ hewɔ?—1 Tesalonikabii 5:17, 18.

Mɛni Hewɔ Esa akɛ Oda Shi Eyɛ Mli akɛ Mɛi Efeee Nakai?

Ekolɛ mɛi edaŋ wɔ shi kɛ́ wɔfee nɔ ko wɔha amɛ. Belɛ, mɛni hewɔ esa akɛ wɔda shi kɛji mɛi efeee nakai lɛ? Ha wɔsusu yiŋtoo kome hewɔ ni esa akɛ wɔda shi lɛ he wɔkwɛ.

Kɛ́ wɔfee mɛi ni ejieee hiɛsɔɔ kpo lɛ ejurɔ lɛ, no tsɔɔ akɛ wɔmiikase wɔ-Bɔlɔ ni ji Yehowa Nyɔŋmɔ ni mli hi lɛ. Anɔkwale ni eji akɛ mɛi babaoo hiɛ esɔɔɔ suɔmɔ ni Yehowa jieɔ lɛ kpo etsɔɔ amɛ lɛ haaa ekpa ejurɔ ni efeɔ amɛ lɛ. (Romabii 5:8; 1 Yohane 4:9, 10) Ehaa “ehulu teɔ shi yɛ mɛi fɔji kɛ mɛi kpakpai anɔ, ni ehaa nugbɔ nɛɔ yɛ jalɔi kɛ mɛi ni bɛ jalɛ lɛ anɔ.” Eyɛ mli akɛ wɔyɛ jeŋ ni mɛi babaoo feɔ trumu yɛ mli moŋ, shi kɛ́ wɔbɔ mɔdɛŋ wɔjie hiɛsɔɔ kpo lɛ, no baaha wɔtsɔmɔ ‘wɔ-Tsɛ ni yɔɔ ŋwɛi lɛ bii.’—Mateo 5:45.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 15]

Kɔ gbi kome loo gbii enyɔ ni okadi shii abɔ ni okɛ onaabu daa mɛi ashi yɛ mli

[Mfoniri ni yɔɔ baafa 15]

Feemɔ bɔ ni ajieɔ hiɛsɔɔ kpo he nɔkwɛmɔnɔ otsɔɔ obii

[Mfoniri ni yɔɔ baafa 15]

Obaanyɛ otsɔse obii ni darako lɛ po ni amɛjie hiɛsɔɔ kpo