Ani Ole Oŋwɛi Tsɛ Lɛ?

TE OLE otsɛ oha tɛŋŋ? Ekolɛ sanebimɔ nɛɛ baaha ohiɛ afee bo yaa kɛ́ oji mɔ ko ni da yɛ weku ni ajieɔ suɔmɔ kpo yɛ mli lɛ mli lɛ. Ekolɛ obaajie naa akɛ, ‘Aa, mile lɛ jogbaŋŋ!’ Hɛɛ, mɛi pii le nibii ni amɛtsɛmɛi sumɔɔ kɛ nibii ni amɛsumɔɔɔ, bɔ ni amɛfeɔ amɛnii amɛhaa yɛ shihilɛi komɛi amli, kɛ bɔ ni amɛkwɛɔ amɛwekui lɛ amɛhaa.

Fɛɛ sɛɛ lɛ, ekolɛ bei komɛi lɛ otsɛ jieɔ sui komɛi ni okpaaa gbɛ akpo, ni enɛ haa ohiɛ feɔ bo yaa. Ákɛ nɔkwɛmɔnɔ lɛ, ekolɛ binuu ko le etsɛ akɛ mɔ ko ni yɔɔ diŋŋ ni mli jɔ—kɛyashi sane ko ni biɔ ni atsu he nii amrɔ nɔŋŋ ba. Trukaa lɛ, ebale etsɛ akɛ mɔ ko ni etswa efai shi akɛ ekɛ shiŋŋfeemɔ baabu eweku lɛ he.

Te ole wɔ-Bɔlɔ lɛ hu oha tɛŋŋ? Awie ehe akɛ: “Emli nɔŋŋ wɔhiɛ kamɔ ni wɔtsiɔ wɔhe ni wɔyɔɔ yɛ.” (Bɔfoi lɛ Asaji 17:28) Nyɔŋmɔ ji mɔ ni ha wɔ wala; no hewɔ lɛ, wɔbaanyɛ wɔkɛɛ akɛ, lɛ ji mɛi fɛɛ ni yɔɔ wala mli lɛ a-Tsɛ. (Yesaia 64:7) Ekolɛ nakai ji bɔ ni onuɔ he yɛ Nyɔŋmɔ he, eja gbɛ ni ehi hu akɛ onuɔ he nakai. Shi nibii babaoo yɛ ni wɔbaanyɛ wɔkase ní wɔle yɛ ehe—koni wɔná he sɛɛ, ni wɔná miishɛɛ.

Bɔ ni ole otsɛ oha lɛ ji nɔ ni baatsɔɔ bɔ ni okɛ lɛ baaye aha kɛ bulɛ ni obaajie lɛ kpo otsɔɔ lɛ. Nakai nɔŋŋ hu babaoo ni oleɔ Nyɔŋmɔ lɛ, babaoo ni okɛ lɛ teŋ wekukpãa lɛ mli baawa waa. Kɛ́ okaseɔ Nyɔŋmɔ he nii babaoo ni ofeɔ esuɔmɔnaa nii lɛ, Nyɔŋmɔ baanyɛ aye abua bo kɛkpee shihilɛ mli naagbai anaa.

Mɛɛ mɔ nɛkɛ Nyɔŋmɔ ji? Te esa akɛ esui lɛ asa ohe yɛ bɔ ni okɛ lɛ yeɔ haa lɛ mli eha tɛŋŋ? Ani kɛ́ obale Nyɔŋmɔ lɛ, no kɛ sɔ̃i komɛi bafɔ̃ɔ onɔ? Obaaná sanebimɔi nɛɛ ahetoo yɛ sane ni nyiɛ sɛɛ lɛ mli.

[Wiemɔ ni akɔ ni akɛmiitsu nii ni yɔɔ baafa 3]

Bɔ ni ole mɔ ko oha lɛ náa bɔ ni okɛ lɛ yeɔ haa lɛ nɔ hewalɛ