Amaniɛbɔɔ ni Jɛ Nicaragua

“Kɛji Oshɛ Coco Faa lɛ Naa lɛ, Tsɔ Ninejurɔgbɛ”

“LƆLE ni akɛfãa gbɛ yɛ gbɛjegbɛi ni nɔ yɔɔ dokoidokoi anɔ, kɛ tsɔne ni akɛjieɔ lɔle ni eka ŋmɔtɔ mli ahe baahia bo, ni agbɛnɛ ebaabi ni okɛ mu babaoo awo galɔn srɔtoi amli ofata nɔ ni yɔɔ lɔle lɛ mli lɛ he. Ná ole akɛ, obaayatsɔ ŋmɔtɔ ni baanyɛ asu lɔle lɛ tai lɛ mli. Kɛji oshɛ Coco Faa lɛ naa lɛ, tsɔ ninejurɔgbɛ.”

Eji anɔkwale akɛ, wiemɔi nɛɛ ni naanyo maŋsɛɛ sanekpakpa shiɛlɔ ko kɛ mi wie lɛ ha mishe gbeyei. Fɛɛ sɛɛ lɛ, gbi ko Jufɔ leebi lɛ, mije gbɛ ni mifã kɛtee Kristofoi akpee ko ni afee yɛ Wamblán ni ji maŋ bibioo ko ni yɔɔ Nicaragua kooyigbɛ lɛ shishi.

Mije migbɛfãa lɛ shishi maŋkɛ hima, ni mikɛ milɔle ni egbɔ shi eyɔɔ hewalɛ lɛ tsɔ gbɛjegbɛ ko ni nɔ yɔɔ trotro ni ji Pan-American Highway lɛ nɔ kɛtee. Beni mishɛ Jinotega lɛ, mitsɔ gbɛjegbɛ ko ni awoko nɔ kootaa ni jɛi niiaŋ bii lɛ tsɛɔ lɛ feo loo taŋtaŋ lɛ nɔ. Dani mashi maŋ nɛɛ mli lɛ, mina shwapoi enyɔ komɛi, awo ekome gbɛi akɛ Nyɔŋmɔ Naakpɛɛ Nifeemɔ kɛ ekroko lɛ akɛ, Gbohiiashitee Lɛ.

Gbɛjegbɛ lɛ yɛ lɔgɔligi, ni eyeɔ gɔŋ kɛ jɔɔ. Mikudɔ lɔle lɛ blɛoo kɛtsɔ bui kɛ jɔɔi amli. Gbɛjegbɛ lɛ kɛ mi yatsɔ kpaakpo kakadaŋŋ ko ni yɔɔ jɔɔ ko ni kã gɔŋ ko ni atatu ehà nɔ lɛ shishi lɛ mli lɛ he. Mina tsei ni fɔfɔii ni atsɛɔ amɛ orchids kɛ jwɛi bibiibibii ni atsɛɔ amɛ Spanish moss ewula amɛ yɛ afua lɛ mli.

Beni mishɛ gbɛ lɛ he ko ni edɔ kɔŋtɔ waa lɛ, shwɛ sharao ni mikɛ bɔs ko ni nyiɛ gbɛ lɛ teŋ kɛmiiba lɛ akpe hiɛ-kɛ-hiɛ. Bɔs lɛ sɛɛ miije lasu kpɔŋŋ, ni etai lɛ loɔ tɛi eshɛrɛɔ eshwieɔ beni ehoɔ lɛ. Yɛ Nicaragua maŋ lɛ mli lɛ, obaana ni aŋma tsɔne kudɔlɔi ni kudɔɔ tsɔne basabasa lɛ asabalai yɛ amɛtsɔji lɛ ashwishwɛi lɛ ahiɛ faŋŋ, ni sabalai nɛɛ ekomɛi ji: Kunimyelɔ, Nyɔŋmɔŋkrakro, Jeŋ, loo Gbɔbilɔ.

Beni shɛɔ shwane fintiŋŋ lɛ, no mli lɛ mishɛ Pantasma Ŋa lɛ nɔ. Miyatsɔ tso tsu ko ni ma shikpɔŋ ko ni abɛɛ nɔ lɛ he kɛho yɛ ŋa nɛɛ nɔ. Nɔ ni mina lɛ tamɔ wolo momo ko mli mfoniri: Nuu onukpa ko ta maŋoo nɔ, gbee ko ewɔ yɛ tso ko shishi, kɛ tsinai enyɔ ni akɛ tso ewo amɛkuɛ ni afi amɛ akpɛtɛ shwiili ko ni akɛ tsei efee etai lɛ he. Yɛ maŋ bibioo ko mli lɛ, mina gbekɛbii pii ni miije kpo kɛmiijɛ skul ko mli. Amɛyi gbɛjegbɛ lɛ nɔ obɔ kɛ amɛtadei bluu tuŋŋ, tamɔ ŋshɔkei ni kuɔ shwieɔ ŋshɔ naa.

Beni mibɛŋkɛɔ Wiwilí lɛ, mina Coco Faa lɛ klɛŋklɛŋ kwraa, ni no mli lɛ hulu lɛ miitso waa. Faa wulu nɛɛ ji nɔ titri ni onaa kɛ́ oshɛ maŋ nɛɛ mli lɛ, ni enui lɛ hoɔ kɛyaa jɔɔŋ gbɛ. Beni mikai gbɛtsɔɔmɔ ni akɛha mi lɛ, mitsɔ ninejurɔgbɛ kɛyatsɔ gbɛjegbɛ ni nɔ yɔɔ gbeyei ni ejɛkɛmɔ ji shitoi 23 lɛ nɔ kɛtee Wamblán.

Milɔle lɛ tsɔ fai aaafee kpaanyɔ loo nɛɛhu mli ni egbɛɔ emli nui lɛ eshwãa beni mikudɔɔ tsɔne lɛ kɛtsɔɔ gbɛjegbɛ dokoidokoi ni nɔ ewo muji lɛ nɔ lɛ. Beni mibɔ mɔdɛŋ akɛ makudɔ tsɔne lɛ koni ekatsɔ  bui ni yɔɔ ŋmɔtɔ ni egbi lɛ mli lɛ, eha miwo mulu fioo ko tamɔ lasuogbele. Hɛɛ, “Miye mulu lɛ,” taakɛ jɛi niiaŋ bii lɛ baakɛɛ lɛ. Yɛ naagbee lɛ, miyashɛ gbɛ lɛ naagbee ni mina Wamblán, ni ji he ni miyaa lɛ yɛ hɔɔŋ ni mli ti mli yɛ jɔɔ ni mli eyi kɛ tsei lɛ mli.

Enɔ jetsɛremɔ beni atswa leebi 4:30 lɛ, etamɔ nɔ ni mɔ fɛɛ mɔ ete shi. Wuɔi lɛ agbɛɛmɔ ni naa baaa shi lɛ ha mihiɛ tsɛ̃ oya ni mite shi miyanyiɛ gbɛjegbɛ lɛ he. Niyenii ko ni akɛ abele mamu loo ashikishaŋ feɔ ni atsɛɔ lɛ tortilla ni aaashã yɛ tɛ flɔnɔɔi amli lɛ ŋma eyi gɔŋ lɛ he kɔɔyɔi lɛ amli obɔ.

Nitɛŋlɔ ko ni yɔɔ jɛi lɛ etɛŋ paradeiso shihilɛi fɛfɛji srɔtoi yɛ gbɛjegbɛ lɛ abɛku kɛ ninejurɔ fɛɛ. Obaana okadii ni akɛmiitswa cola dãa lɛ henɔi srɔtoi lɛ he adafi yɛ pulperías loo shwapoi ni yɔɔ gbɛjegbɛ lɛ koŋgbɛ lɛ ahe. Adafitswaa woji krokomɛi ni akɛkpɛtɛ gbogboi ahe lɛ hu haa mɛi kaiɔ shi ni nɔyelii etɛ ni ye maŋ lɛ nɔ nyɛsɛɛ nɛɛ nɔŋŋ lɛ wowoo lɛ. Akɛ ziŋele emamɔ niiasɛɛyaahei kɛmamɔ kɔnkret nɔ.

Mikɛ Nicaraguabii aŋamɔ ni ji Adiós lɛ ŋa mɛi. Amɛŋmɔɔ ni amɛkɛ mi gbaa sane kɛ miishɛɛ. Wɔwoɔ wɔgbee nɔ akɛni okpɔŋɔi kɛ tejiokpɔŋɔi ni hoɔ kɛyaa kɛbaa lɛ anaji ashi gbɛɛmɔi lɛ anaa wa hewɔ lɛ.

Beni shɛɔ Sohaa gbɛkɛ lɛ, no mli lɛ wekui srɔtoi lɛ ebashɛ shi kɛha gbii enyɔ kpee lɛ. Amɛteŋ mɛi komɛi tswa nantu kɛba, mɛi komɛi tara okpɔŋɔi anɔ kɛba, ni mɛi komɛi hu tara tsɔji amli kɛba. Gbekɛbii hii kɛ yei komɛi wo rɔba tokotai kɛtswa nantu ŋmɛlɛtswai ekpa kɛba. Amɛteŋ mɛi komɛi fo faai yɛ hei ni afũ okplɛmii ni kɛ́ anaa amɛnɔ lɛ amɛbaafɛlɛ lɛ, ni amɛkɛ ekãa tsɔmɔ faai ni shitii yɔɔ amɛmli nɛɛ amli. Mɛi ni jɛ shɔŋŋshɔŋŋ lɛ kɛ niyenii fioo pɛ ba—omɔ ni akɛ kpolotoo fɔ hoo. Mɛni hewɔ amɛ fɛɛ amɛba?

Amɛba koni amɛbawo hemɔkɛyeli ni amɛyɔɔ akɛ wɔsɛɛ kpakpa ko baaba lɛ mli hewalɛ. Amɛba koni agbala Biblia lɛ mli atsɔɔ amɛ. Amɛba koni amɛbajá Nyɔŋmɔ.

Hɔɔ shɛ. Toibolɔi ni fa fe 300 tara tso sɛii kɛ rɔba sɛii anɔ yɛ agba ko ni akɛ ziŋele ehà nɔ lɛ shishi. Yeifɔyei ha amɛbii aniyenii. Kpolotoi miibo kɔ̃ɔkɔ̃ɔ, ni wuɔi hu miibolɔ yɛ kooloi alɛɛhe ni bɛŋkɛ jɛmɛ lɛ.

Jeŋ dɔ waa, ni etsɛɛɛ ni eha wɔhe bɔi wɔ hiamɔ. Kɛlɛ, toibolɔi lɛ tee nɔ amɛbo ŋaawoo kɛ gbɛtsɔɔmɔ ni akɛha amɛ lɛ toi jogbaŋŋ. Kɛ́ wielɔ lɛ miikane Biblia ŋmalɛ ko lɛ, amɛkwɛɔ amɛnɔ lɛ mli kɛnyiɛɔ esɛɛ, amɛlá lalai ni damɔ Biblia mli saneyitsei anɔ, ni amɛjɛ bulɛ mli amɛbo sɔlemɔi ni adamɔ amɛnajiaŋ asɔle lɛ atoi.

Kɛ́ agbe kpee lɛ fã ko naa lɛ, mɛi komɛi fataa mihe ni wɔkɛ gbekɛbii lɛ shwɛɔ. No sɛɛ lɛ, wɔkɛ gbekɛbii lɛ susuɔ otii ni amɛŋmala amɛshwie shi lɛ ahe. Mikɛ ŋulamii kɛ ŋulami kushai ahe mfonirii ni yɔɔ mikɔmpiuta lɛ nɔ lɛ tsɔɔ amɛ. Gbekɛbii lɛ ŋmɔɔ, ni amɛfɔlɔi hu náa miishɛɛ.

Oona kɛ onaaa lɛ, kpee lɛ ba naagbee, ni ebabi ni mɔ fɛɛ mɔ aya shĩa. Mishi enɔ jetsɛremɔ ní mijwɛŋmɔŋ eyi tɔ kɛ niiashikpamɔi ni yɔɔ miishɛɛ pam, ni mitsui hu yi obɔ kɛ nanemɛi heei ni miná lɛ ahe suɔmɔ. Mitswa mifai shi akɛ makase amɛ ni maha mimii ashɛ minii ahe, ni agbɛnɛ hu mamɛ Nyɔŋmɔ.

[Mfonirii ni yɔɔ baafa 17]

Wekui fã gbɛ shitoi abɔ kɛtee kpee ni afee yɛ Wamblán lɛ