Mina Bɔ ni Wala He Hiaa

MINÁ NIIASHIKPAMƆ NƐƐ YƐ APRIL 16, 2007 LEEBI MLI. Beni mikoto shi yɛ Norris Hall lɛ ŋwɛitsu ŋsɔɔdo ni ji etɛ lɛ ɔfis lɛ koŋgbɛ yɛ Virginia Polytechnic Institute and State University, loo Virginia Tech skul lɛ mli lɛ, nɔ ni tee nɔ lɛ ha mikai bɔ ni ehe hiaa ni wɔda Nyɔŋmɔ shi gbi fɛɛ gbi ni je baatsɛre wɔ yɛ shihilɛ mli lɛ.

No mli lɛ, miyɛ ɔfis ni mitsuɔ nii yɛ jɛmɛ lɛ, ni miisaa mihe koni mayaloo woji ni aŋmala mi lɛ yɛ ŋsɔɔdo ni ji enyɔ lɛ nɔ. Nilelɔ kpanaa ko bakɛɛ mi akɛ mikɛ lɛ aya koni miyaye mibua lɛ kɛtsu ekɔmpiuta lɛ he naagba ko he nii yɛ ɔfis ni etsuɔ nii yɛ mli lɛ. Beni wɔbote ɔfis ni etsuɔ nii yɛ mli lɛ mli lɛ, wɔnu tui agbɛɛmɔ babaoo he yɛ ŋsɔɔdo ni ji enyɔ lɛ nɔ. Akɛni wɔleee nɔ ni yaa nɔ lɛ hewɔ lɛ, wɔkɛ oyaiyeli jo foi kɛtee ɔfis ni etsuɔ nii yɛ mli lɛ mli, wɔŋa shinaa lɛ, ni wɔkɛ yeyeeyefeemɔ mɛ nɔ ni baanyɛ aba wɔwala nɔ yɛ minitii fioo ni kã wɔhiɛ lɛ amli. Miyatee mihe yɛ ɔfis lɛ mli koŋgbɛ ni mifɔse mitsuiŋ mishwie Yehowa Nyɔŋmɔ hiɛ yɛ sɔlemɔ mli, ni mibi lɛ ni etsɔɔ mi gbɛ koni manyɛ madamɔ nɔ fɛɛ nɔ ni baaba yɛ enɛ sɛɛ lɛ naa.

Beni wɔmɛɔ yɛ jɛmɛ lɛ, mikai sane ko ni ba afii 15 nɛ lɛ. No mli lɛ, miisaa tsɔne ko yɛ tsɔnesaamɔhe ko. Tsɛŋsi bibioo ko ni pɛtrol yɔɔ mli ni minanemɛi nitsulɔi lɛ ateŋ mɔ kome hiɛ lɛ here. Tsuifãa sɔŋŋ ha etsi tsɛŋsi kɛ pɛtrol lɛ eshwie mihiɛ trukaa! Mimu la ni tsoɔ grigri lɛ lasu lɛ miwo mimli, ni migbɔmɔtso lɛ ŋwɛigbɛ shã waa. Akɛ kɔɔyɔŋ lɛlɛ wo mi kɛtee helatsamɔhe ko ni akwɛɔ mɛi ni eshã yɛ, ni ahe mi afɔ̃ jɛmɛ nyɔji etɛ kɛ fã sɔŋŋ ni aakwɛ mi jogbaŋŋ akɛ manyɛ mahi wala mli lo. Beni akɛ nyɔji enumɔ ekwɛ mi ni miná hewalɛ sɛɛ lɛ, ajie mi kɛtee shĩa, ni eŋɔɔ minaa akɛ miyɛ wala mli lolo. Nakai niiashikpamɔ lɛ ha mina bɔ ni wala he hiaa waa gbi fɛɛ gbi ni je baatsɛre mi lɛ. Agbɛnɛ hu, ewaje mifai shi ni mitswa akɛ mikɛ miwala baasɔmɔ Yehowa Nyɔŋmɔ, ni ji mɔ ni ha mi nakai wala lɛ akɛ e-Dasefoi lɛ ateŋ mɔ kome.—Lala 90:12; Yesaia 43:10.

Akɛni pilamɔi ni mipila lɛ haaa manyɛ matsu nii akɛ tsɔnesaalɔ dɔŋŋ hewɔ lɛ, mikase kɔmpiutai kɛ nitsumɔ, ni Virginia Tech skul lɛ he mi koni matsu nii yɛ jɛmɛ. Enɛ hewɔ jɛ ni miyɔɔ Norris Hall nakai leebi lɛ.

Beni tui lɛ agbɛɛmɔ yaa nɔ lɛ, no mli lɛ wɔleee kwraa akɛ mɔ aŋkro ko tu tswaa ni gbe mɛi fe fɛɛ yɛ U.S. yinɔsane mli lɛ miiya nɔ yɛ ŋsɔɔdo ni yɔɔ wɔshishi tuuntu lɛ nɔ. Gbɔmɛi agbee nɛɛ ba naagbee beni tu tswalɔ lɛ ekpata mɛi 32 ni efeko nɔ ko lɛ awala hiɛ, ni no sɛɛ lɛ, lɛ diɛŋtsɛ hu egbe ehe lɛ. Aaafee minitii 20 sɛɛ beni enɛ je shishi lɛ, wɔnu polisifoi ahe yɛ ablanaa lɛ nɔ. Wɔbo wɔtsɛ amɛ, ni amɛkɛ wɔ tee he ko ni yɔɔ shweshweeshwe.

Niiashikpamɔ ni yɔɔ gbeyei nɛɛ eha mina bɔ ni wala sɛɛ baanyɛ afo yɛ be kukuoo mli. (Yakobo 4:14) Kwɛ bɔ ni ehe hiaa akɛ wɔkɛ wɔhiɛ aaafɔ̃ Yehowa Nyɔŋmɔ ni ji wala Halɔ lɛ nɔ, ni wɔbu gbi fɛɛ gbi ni je baatsɛre wɔ lɛ akɛ eji nikeenii ni jara wa ni jɛ eŋɔɔ!—Lala 23:4; 91:2.

[He ni Mfoniri ni yɔɔ baafa 30 lɛ Jɛ]

AP Photo/The Roanoke Times, Alan Kim