Saji ni Mɛi ni Kaneɔ lɛ Biɔ

Ani Yehowa Odasefoi Heɔ Yeɔ Akɛ Amɛ Pɛ Ji Mɛi Ni Abaahere Amɛyiwala?

Yehowa Odasefoi susuɔ akɛ amɛna anɔkwa jamɔ lɛ. Kɛ́ jeee nakai kulɛ, amɛbaatsake amɛhemɔkɛyelii lɛ. Taakɛ eji yɛ jamɔi babaoo amlibii agbɛfaŋ lɛ, Yehowa Odasefoi yɛ hiɛnɔkamɔ akɛ abaahere amɛyiwala. Shi kɛlɛ, amɛheɔ amɛyeɔ hu akɛ, jeee amɛnitsumɔ ji akɛ amɛkojo mɛi, ni amɛtsɔɔ mɛi ni abaahere amɛyiwala. Naagbee kwraa lɛ, Nyɔŋmɔ ji Kojolɔ ni baakojo mɛi. Lɛ ebaatsɔɔ mɔ ni sa yiwalaheremɔ.—Yesaia 33:22.

Nyɔŋmɔ Wiemɔ lɛ tsɔɔ akɛ esaaa akɛ mɛi ni abaahere amɛyiwala lɛ taoɔ yiwalaheremɔ kɛkɛ, shi moŋ esa akɛ amɛkɛ Yiwalaherelɔ lɛ afee ekome. Ákɛ nɔkwɛmɔnɔ lɛ: Ŋɔɔ lɛ akɛ shisharalɔ ko edu gbɛ yɛ ŋã kpataa ko nɔ. Ekɛ hehiamɔ miitao gbɛ. Ani ehiɛ baakpata, loo ebaana gbɛ koni eyi aná wala? Bɔ ni nibii anaa baayakpa kɛha lɛ lɛ baadamɔ bɔ ni eeefee enii yɛ yelikɛbuamɔ ni akɛaaha lɛ lɛ he lɛ nɔ. Ekolɛ ekɛ ŋtɛŋfeemɔ aaakpoo yelikɛbuamɔ ni jielɔ loo yibaalɔ ko kɛaaha lɛ lɛ. Aloo ekɛ heshibaa aaakpɛlɛ yelikɛbuamɔ nɔ koni eyashɛ shweshweeshwe.

Yɛ nakai gbɛ nɔ nɔŋŋ lɛ, mɛi ni kɛ adesai a-Yibaalɔ ni ji Yehowa Nyɔŋmɔ feɔ ekome lɛ ji mɛi ni abaahere amɛyiwala. Eyɛ mli akɛ yiwalaheremɔ ji nikeenii ni jɛ Nyɔŋmɔ ŋɔɔ moŋ, shi jeee mɔ fɛɛ mɔ nine baashɛ nɔ. Yesu ni ji Nyɔŋmɔ Bi lɛ kɛɛ akɛ: “Jeee mɔ fɛɛ mɔ ni kɛɔ mi akɛ: Nuŋtsɔ, Nuŋtsɔ! lɛ, aaabote ŋwɛi maŋtsɛyeli lɛ mli; shi moŋ mɔ ni feɔ mitsɛ ni yɔɔ ŋwɛi lɛ suɔmɔnaa nii lɛ.”—Mateo 7:21.

Yehowa Odasefoi heɔ yeɔ akɛ mɛi ni náa hemɔkɛyeli yɛ Yesu kpɔmɔ afɔleshãa lɛ mli, ni amɛkɛ etsɔɔmɔi lɛ tsuɔ nii jogbaŋŋ lɛ pɛ ji mɛi ni Nyɔŋmɔ baahere amɛyiwala. (Bɔfoi lɛ Asaji 4:10-12) Susumɔ taomɔ nii etɛ ni he hiaa kɛha yiwalaheremɔ ni ajie lɛ kpo yɛ Nyɔŋmɔ Wiemɔ lɛ mli lɛ he okwɛ.

(1) Yesu kɛɛ esɛɛnyiɛlɔi lɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yohane 13:35) Nɔkwɛmɔnɔ ni Yesu diɛŋtsɛ fee kɛtsɔ ewala ni ekɛfɔ̃ shi eha mɛi krokomɛi lɛ nɔ lɛ maa bɔ ni suɔmɔ he hiaa ha lɛ nɔ mi. Mɛi ni sumɔɔ mɛi krokomɛi lɛ miijie su ko ni he hiaa kɛha yiwalaheremɔ kpo.

(2) Beni Yesu sɔleɔ kɛhaa e-Tsɛ be ko lɛ, ekɛɛ akɛ: “Mijie ogbɛi lɛ kpo mitsɔɔ amɛ.” (Yohane 17:26) Yesu le bɔ ni Nyɔŋmɔ gbɛi ni ji Yehowa lɛ he hiaa e-Tsɛ lɛ waa ha. Yesu sɔle koni “atse” e-Tsɛ gbɛi lɛ he. (Mateo 6:9) Nyɔŋmɔ gbɛi lɛ hetsemɔ biɔ ni ale gbɛi lɛ ni abu enɛ akɛ ehe hiaa ni eyɛ krɔŋkrɔŋ. Esa akɛ mɛi ni miitao ni ahere amɛyiwala lɛ kɛ Nyɔŋmɔ gbɛi lɛ atsu nii taakɛ Yesu fee lɛ. Agbɛnɛ hu, esa akɛ amɛtsɔɔ mɛi krokomɛi Nyɔŋmɔ gbɛi kɛ esui lɛ. (Mateo 28:19, 20) Yɛ anɔkwale mli lɛ, abaahere mɛi ni boɔ tsɛɔ Nyɔŋmɔ gbɛi lɛ pɛ ayiwala.—Romabii 10:13.

(3) Yesu kɛɛ Pontio Pilato akɛ: “Mimaŋtsɛyeli lɛ jɛɛɛ je nɛŋ.” (Yohane 18:36) Mɛi fioo pɛ ji mɛi ni kɛ amɛnifeemɔ tsɔɔ akɛ amɛyɛ hemɔkɛyeli yɛ Nyɔŋmɔ Maŋtsɛyeli lɛ loo enɔyeli ni Yesu ji enɔ Maŋtsɛ lɛ mli. Yɛ no najiaŋ lɛ, mɛi babaoo kɛ amɛhiɛ fɔɔ adesai agbɛjianɔtoi anɔ. Nɔ ni tamɔɔɔ enɛ lɛ, mɛi ni abaahere amɛyiwala lɛ kɛ anɔkwayeli fiɔ Nyɔŋmɔ Maŋtsɛyeli lɛ sɛɛ ni amɛtsɔɔ mɛi krokomɛi gbɛ ni Maŋtsɛyeli nɛɛ baatsɔ nɔ akpɔ̃ adesai anɔkwafoi fɛɛ.—Mateo 4:17.

Beni Yesu kaselɔi lɛ ná le taomɔ nii kɛha yiwalaheremɔ lɛ ateŋ ekomɛi lɛ, amɛkɛɛ akɛ: “Belɛ namɔ yiwala aaanyɛ ahere mɔ?” Yesu ha amɛ hetoo akɛ: “Nibii ni gbɔmɛi nyɛɛɛ afee lɛ, Nyɔŋmɔ lɛ enyɛɔ efeɔ.” (Luka 18:18-30) Yehowa Odasefoi lɛ bɔɔ mɔdɛŋ waa koni amɛshɛ taomɔ nii kɛha yiwalaheremɔ nɛɛ ahe. Agbɛnɛ hu, amɛgboɔ deŋme kɛyeɔ buaa mɛi krokomɛi koni ahere mɛi nɛɛ ayiwala.—w08 11/01-E.