Tsi Obɛŋkɛ Nyɔŋmɔ

Esumɔɔ Jalɛsaneyeli

Hebribii 10:26-31

ANI mɔ ko kɛ bo eye yɛ gbɛ ni ejaaa nɔ loo ewa bo yi pɛŋ, ni etamɔ nɔ ni agbalaaa etoi yɛ nɔ ni efee lɛ he, ni eshwaaa ehe? Kɛ́ mɔ ko ye bo sane ni ejaaa tamɔ nɛkɛ lɛ, ebaadɔ bo waa, titri lɛ kɛ́ mɔ ni fee nakai lɛ ji mɔ ko ni okpaa gbɛ akɛ ebaajie suɔmɔ kpo etsɔɔ bo ni ebu ohe. Ekolɛ obaabi akɛ, ‘Mɛni hewɔ Nyɔŋmɔ ŋmɛɔ nibii ni tamɔ nɛkɛ gbɛ?’ * Eji anɔkwale akɛ, Yehowa Nyɔŋmɔ nyɛ̃ɔ jalɛsane ni ayeee srɔtoi fɛɛ. Ewiemɔ ni ji Biblia lɛ haa wɔnaa nɔmimaa akɛ, Nyɔŋmɔ haŋ mɛi ni yaa nɔ amɛkɛ tsuiwalɛ feɔ esha lɛ aye amɛhe kɔkɔɔkɔ. Nyɛhaa wɔsusua bɔfo Paulo wiemɔi ni yɔɔ Hebribii 10:26-31 lɛ he wɔkwɛa.

Paulo ŋma akɛ: “Kɛ́ kwa wɔkwaa wɔfeɔ esha, beni wɔná anɔkwale he nilee lɛ sɛɛ lɛ, belɛ eshai ahe afɔle ko bɛ dɔŋŋ.” (Kuku 26) Mɛi ni kwaa amɛfeɔ esha lɛ sa toigbalamɔ waa. Mɛni hewɔ? Klɛŋklɛŋ lɛ, jeee emuu ni amɛyeee lɛ hewɔ amɛfeɔ esha bei komɛi lɛ—taakɛ wɔ fɛɛ wɔtɔ̃ɔ bei komɛi akɛni wɔyeee emuu hewɔ lɛ. Amɛyaa nɔ amɛfeɔ esha oookɛɛ eji amɛsu. Nɔ ni ji enyɔ lɛ, kwa amɛkwaa amɛfeɔ esha. The Bible in Basic English lɛ tsɔɔ wiemɔ nɛɛ shishi akɛ, “[amɛ]jeɔ gbɛ amɛfeɔ efɔŋ.” Amɛfee efɔŋ aahu akɛ, ebatsɔ amɛsu. Nɔ ni ji etɛ lɛ, jeee le ni amɛleee hewɔ amɛfeɔ esha. Amɛle Nyɔŋmɔ suɔmɔnaa nii kɛ egbɛ̀i lɛ, ni tsɔɔ akɛ amɛná ‘anɔkwale lɛ he nilee ni ja.’

Te Nyɔŋmɔ buɔ eshafeelɔi yitsoŋwalɔi ni tsakeee amɛtsui lɛ ehaa tɛŋŋ? Paulo kɛɛ akɛ, “Eshai ahe afɔle ko bɛ dɔŋŋ” kɛha amɛ. Kristo afɔleshãa—nikeenii ni Nyɔŋmɔ kɛha adesai lɛ—tsimɔɔ eshai ni wɔfeɔ akɛni wɔyeee emuu hewɔ lɛ anɔ. (1 Yohane 2:1, 2) Shi mɛi ni yaa nɔ amɛfeɔ esha ni amɛtsakeee amɛtsui lɛ miitsɔɔ akɛ amɛhiɛ esɔɔɔ nikeenii ni jara wa nɛɛ. Yɛ Nyɔŋmɔ hiɛ lɛ, ‘amɛnaanaa Nyɔŋmɔ bi lɛ nɔ, ni amɛbu kpaŋmɔ lá ni akɛtsuu amɛhe lɛ akɛ yaka nɔ ko.’ (Kuku 29) Gbɛ ni amɛkɔ lɛ tsɔɔ akɛ amɛbɛ bulɛ kɛha Yesu, ni amɛbuɔ elá lɛ akɛ “yaka nɔ ko,” ni tsɔɔ akɛ amɛbuɔ elá lɛ akɛ ejara tamɔ adesa ni yeee emuu nɔ̃. Trumui ni tamɔ nɛkɛ lɛ naŋ Kristo afɔleshãa lɛ he sɛɛ.

Mɛni efɔŋfeelɔi lɛ baanyɛ akpa gbɛ? Nyɔŋmɔ ni yeɔ jalɛsane lɛ ewo shi akɛ: “Minɔ̃ ji oweletɔɔ, mi mawo he nyɔmɔ.” (Kuku 30) Esa akɛ mɛi fɛɛ ni efee amɛjwɛŋmɔ akɛ amɛaaya nɔ amɛfee esha kɛye mɛi krokomɛi awui lɛ akwɛ ni ahi. Mɔ ko nyɛŋ eje gbɛ eku Nyɔŋmɔ jalɛ shishitoo mlai lɛ amli ni eye ehe yakatswaa. Bei pii lɛ, efɔŋfeelɔi agbɛ̀i gbohii lɛ nyiɛɔ amɛsɛɛ. (Galatabii 6:7) Bɔ fɛɛ bɔ ni fee lɛ, etsɛŋ amɛbaadamɔ Nyɔŋmɔ hiɛ be mli ni ejieɔ jalɛsane ni ayeee srɔtoi fɛɛ kɛjɛɔ shikpɔŋ nɛɛ nɔ lɛ. (Abɛi 2:21, 22) Paulo bɔ kɔkɔ akɛ: “Nyɔŋmɔ hiɛkalɔ lɛ dɛŋ gbeemɔ yɛ gbeyei pam.”—Kuku 31.

Le ni wɔle akɛ Yehowa Nyɔŋmɔ ekuuu ehiɛ eshwieee esha ni akwaa afeɔ nɔ lɛ shɛjeɔ wɔmii ni ehaa wɔtsɛɔ wɔtsuii wɔŋmɛɔ wɔmli, titri lɛ kɛha mɛi ni efɔŋfeelɔ kpanaku ko efee amɛ nɔ ko ni edɔ amɛ waa lɛ. Wɔbaanyɛ wɔkɛ hekɛnɔfɔɔ ashi esha he oweletɔɔ wɔha Nyɔŋmɔ kwraa, ejaakɛ enyɛ̃ɔ jalɛsane ni ayeee srɔtoi fɛɛ.—w08 11/01-E.

[Shishigbɛ niŋmaa]