“Mɛni Afeɔ yɛ Jɛmɛ?”

MƐI babaoo ni taa tsɔji amli kɛtsɔɔ Yehowa Odasefoi atsũi ni yɔɔ Mogale City (Krugersdorp) ni bɛŋkɛ Johannesburg yɛ South Africa lɛ he kɛhoɔ lɛ biɔ sane nɛɛ. No hewɔ lɛ, Odasefoi lɛ to gbɛjianɔ krɛdɛɛ ko yɛ October 12 kɛ 13, 2007 mli koni maŋbii abakwɛ nɔ ni afeɔ yɛ tsũi nɛɛ ni ji amɛnitsumɔhe nine lɛ amli. Yiŋtoi enyɔ ahewɔ amɛto gbɛjianɔ nɛɛ—koni amɛkɛjaje susumɔi ni ejaaa ni mɛi hiɛ yɛ Odasefoi ahe, agbɛnɛ hu koni amɛkɛha maŋbii lɛ ale nɔ ni nitsumɔhe nine nɛɛ feɔ koni ekɛye ebua ni atsu nitsumɔ ni Yesu Kristo fã akɛ atsu lɛ.—Mateo 28:19, 20.

Mɛi ni tsuɔ nii yɛ nitsumɔhe nine lɛ kɛ okadii wuji mamɔ agbo lɛ naa koni amɛkɛhere maŋbii lɛ atuu, ni amɛkɛ ninefɔ̃ɔ woji krɛdɛɛ hu ha akutsoŋbii lɛ kɛfɔ̃ amɛ nine. Afɔ̃ nitsumɔtsɛmɛi kɛ amɛwekui hu anine. Te mɛi here ninefɔ̃ɔ nɛɛ nɔ amɛha tɛŋŋ? Mɛi ni fa fe 500 ni jeee Odasefoi lɛ bakwɛ nɔ ni yaa nɔ yɛ tsũi nɛɛ amli.

Nɔ ni mɛi ná he miishɛɛ waa lɛ ateŋ ekome ji web-offset woji akalamɔ tsɔne ko ni atsɛɔ lɛ MAN Roland Lithoman ni nyɛɔ ekalaa woji tɛtrɛbii aaashɛ 90,000 yɛ ŋmɛlɛtswaa kome mli lɛ. Agbɛnɛ hu, mɛi ná he ni abuaa woji ni tsii fe tɔn 14 anaa yɛ ni akɛmajeɔ daa gbi, kɛ he ni atsaraa woji ni awoɔ amɛsɛɛ yɛ lɛ he miishɛɛ. Odasefoi ni tsuɔ nii yɛ hei srɔtoi yɛ nitsumɔhe nine lɛ mli lɛ fee nibii fɛfɛji ni gbalaa nitsumɔi ni amɛtsuɔ lɛ amli, ni nɔ ni fata enɛɛmɛi ahe ji woji akalamɔ he yinɔsane ni afo lɛ kuku ni wieɔ kɛjɛ beni akɛ Gutenberg woji akalamɔ gbɛ lɛ bɔi nitsumɔ kɛyashi beni akɛ ŋmɛnɛŋmɛnɛ beaŋ woji akalamɔ gbɛ ni ji litho-offset lɛ bɔi nitsumɔ lɛ he lɛ. Agbɛnɛ hu, amɛfee nɔ ko ni ha mɛi na bɔ ni nitsumɔhe nine lɛ kwɛɔ jogbaŋŋ koni ekafite nibii ni ebɔle nitsumɔhe nine lɛ he ni baa wala yi lɛ. Ákɛ nɔkwɛmɔnɔ lɛ, nitsumɔhe nine lɛ eto tsɔne krɛdɛɛ ko ni jieɔ kɔɔyɔŋ nibii kɛ fujee nibii ni ebɔɔ yɔɔ mli kɛjɛɔ nikalamɔ tsɔji lɛ amli kɛ niianɔsɔɔmɔ tsɔji ni buaa woji amulu anaa ni atsiɔ ashwieɔ lɛ ahe gbɛjianɔ.

Aŋma yɛ jɛi niiaŋ adafitswaa wolo ko mli akɛ, nitsulɔi 700 ni kɛ amɛhe eha ni yɔɔ nitsumɔhe nine lɛ “ji sɔɔlɔi ni ejɔɔ amɛhe nɔ amɛha Yehowa.” Agbɛnɛ hu, ewie bɔ ni woji akalamɔhe lɛ “yɔɔ falefale waa kɛ bɔ ni nɔ fɛɛ nɔ yaa nɔ pɛpɛɛpɛ yɛ jɛmɛ yɛ be naa” lɛ hu he. Nuu ko ni teɔ shi woɔ Yehowa Odasefoi lɛ hu tee eyakwɛ nɔ ni atsuɔ yɛ nitsumɔhe nine lɛ. No sɛɛ lɛ eŋma nitsumɔhe nine lɛ wolo akɛ: “Miiha nyɛ ayekoo. Efɔɔɔ kaa akɛ mɔ aaana nitsumɔhe ko ni nɔ fɛɛ nɔ miiya nɔ jogbaŋŋ kɛmɔ shi tamɔ nɛkɛ.”

Mɛi ni tee jɛmɛ lɛ ateŋ mɛi babaoo da shi akɛ aŋmɛ amɛ gbɛ koni amɛbakwɛ nɔ ni atsuɔ yɛ nitsumɔhe nine lɛ, ni amɛnaa kpɛ amɛhe akɛ amɛna akɛ abua Biblia kasemɔ woji ni atsɔɔ shishi kɛtee wiemɔi 151 amli anaa yɛ nitsumɔhe nine lɛ, ni akalaa woji yɛ jɛmɛ kɛhaa Afrika wuoyigbɛ kɛ teŋgbɛ maji 18. Aŋmɛɔ gbɛ koni mɛi ayakwɛ nɔ ni atsuɔ yɛ Yehowa Odasefoi anitsumɔhe niji ni yɔɔ je lɛŋ fɛɛ lɛ amli yɛ gbii ni amɛkɛtsuɔ nii lɛ amli. Mɛni hewɔ obiii be ni nitsumɔhe nine ni yɔɔ omaŋ lɛ mli lɛ ŋmɛɔ gbɛ koni mɛi abasara jɛmɛ lɛ ni oyasara jɛmɛ?—w08 11/01-E.

[Mfoniri ni yɔɔ baafa 16]

Ninefɔ̃ɔ wolo

[Mfoniri ni yɔɔ baafa 16]

Mɛi ni ebashɛ shi kɛha nitsumɔhe nine lɛ saramɔ

 [Mfonirii ni yɔɔ baafa 17]

Nitsumɔhe nine ni yɔɔ Mogale City, yɛ South Africa

[Mfoniri ni yɔɔ baafa 17]

MAN Roland Lithoman web-offset woji akalamɔ tsɔne

[Mfoniri ni yɔɔ baafa 17]

He ni atsaraa woji ni awoɔ amɛsɛɛ yɛ

[Mfoniri ni yɔɔ baafa 17]

He ni atoɔ woji ni akɛmajeɔ yɛ