Namɔ Baanyɛ Ale Wɔsɛɛ Sane?

“Mi nɔŋŋ miji Mawu, . . . mi ní mijɛɔ shishijee lɛ mijajeɔ naagbee nii lɛ, ni mijɛɔ blema beebe mijajeɔ nii ní anáko afee lɛ.”—Yesaia 46:9, 10.

YƐ WƆBEI nɛɛ ni nibii nyɛɔ etsakeɔ trukaa yɛ mli nɛɛ amli lɛ, maŋkwramɔŋ, shika he saji, kɛ shihilɛ mli saji ahe nilelɔi bɔɔ mɔdɛŋ amɛkaseɔ yinɔsaji kɛ bɔ ni nibii yaa nɔ ŋmɛnɛ lɛ ahe saji koni amɛdamɔ nomɛi anɔ kɛtsɔɔ nɔ ni baaba wɔsɛɛ. Mɛi krokomɛi hu kɛ ahuntoo taoɔ nɔ ni baaba amɛnɔ wɔsɛɛ kɛtsɔ ŋulamiiaŋkwɛlɔi loo mumɔi atsɛlɔi aŋɔɔ ni amɛyaa amɛyataoɔ amɛsaji anaa lɛ nɔ. Bei pii lɛ, hetoi ni akɛhaa mɛi nɛɛ lɛ haa amɛnine nyɛɔ shi. Ani anyɛŋ ale nɔ ni baaba je lɛ, wɔwekui, kɛ wɔ diɛŋtsɛ wɔnɔ wɔsɛɛ kwraa? Belɛ, ani mɔ ko baanyɛ ale wɔsɛɛ sane lɛɛlɛŋ?

Yehowa Nyɔŋmɔ Ofe lɛ wie lɛ diɛŋtsɛ ehe akɛ, eyɛ nyɛmɔ ni ekɛaatsɔɔ nɔ ni baaba wɔsɛɛ yɛ wiemɔi ni ekɛha gbalɔ Yesaia ni atsi tã kɛtsɔ hiɛ lɛ mli. Nyɔŋmɔ tsɔ Yesaia nɔ egba akɛ abaajie blema Israelbii lɛ kɛjɛ nom ni Babilonbii lɛ ŋɔ amɛ lɛ mli, ni amɛbaaku amɛsɛɛ amɛyatswa Yerusalem kɛ sɔlemɔtsu lɛ ekoŋŋ. Te gbalɛ nɛɛ ba mli eha tɛŋŋ? Yesaia tsɔ hiɛ etsɔɔ yɛ anɔkwale mli akɛ, Koresh ji mɔ ni baaye Babilon nɔ kunim aaafee afii 200 dani enɛ ba mli. Kɛfata he lɛ, Yesaia tsɔɔ gbɛ nɔ ni Koresh baatsɔ etsu enɛ he nii lɛ yɛ gbɛ ni ja nɔ—no ji akɛ ebaagba gbɛ kroko eha Eufrate Faa ni buɔ maŋtiase lɛ he lɛ koni eho kɛtsɔ nɔ. Yesaia gba hu po akɛ, Koresh baayanina ni agbele maŋtiase lɛ agboi wuji enyɔ lɛ anaa afɔ̃ shi yɛ anyagbafeemɔ hewɔ, ni enɛ baaha efee mlɛo kɛha Koresh akɛ eeeye kunim.—Yesaia 44:24–45:7.

Kɛ́ akɛ adesai to Nyɔŋmɔ he lɛ, adesai bɛ hewalɛ ni amɛkɛaale nɔ ni baaba wɔsɛɛ. Nilelɔ Maŋtsɛ Salomo ŋma akɛ: “Kaashwã ofɔ wɔ́ nɔ; ejaakɛ oleee nɔ ni gbi lɛ aaafɔ́.” (Abɛi 27:1) Nakai wiemɔ lɛ ji anɔkwale lolo. Adesa ko nyɛŋ ale lɛ diɛŋtsɛ ewɔsɛɛ po. Mɛni haa esoroɔ Nyɔŋmɔ yɛ enɛ gbɛfaŋ? Ele enii ni ebɔ lɛ fɛɛ, ni adesai asui kɛ amɛnifeemɔi fata he lɛ ahe nii fitsofitso. Kɛ́ Nyɔŋmɔ hala akɛ ebaafee nakai lɛ, ebaanyɛ ele bɔ ni aŋkroaŋkroi kɛ maŋ muu fɛɛ baaba amɛjeŋ amɛha wɔsɛɛ fitsofitso. Kɛfata he lɛ, eyɛ hewalɛ ni etãaa ni ebaanyɛ ekɛkudɔ bɔ ni shihilɛi anaa baayakpa amɛha. Kɛ́ Nyɔŋmɔ tsɔ egbalɔi lɛ anɔ egba akɛ nɔ ko baaba lɛ, etsɔɔ ehe “mɔ ni maa etsulɔ wiemɔ nɔ mi, ní ehaa ebɔfoi agbalɛ baa mli.” (Yesaia 44:26) Yehowa Nyɔŋmɔ pɛ baanyɛ awie wiemɔi nɛɛ yɛ anɔkwale mli.

Yesaia hi shi nɔ ni fa fe afii 700 dani Yesu ni ji Mesia lɛ ba. Kɛlɛ, Yesaia gba akɛ Mesia lɛ baaba. Shi mɛi ni wieɔ shiɔ Biblia lɛ ewie amɛshi Yesaia wolo lɛ akɛ ejaaa, titri lɛ kɛjɛ afi 1700 afii lɛ amli kɛbaa lɛ. Amɛkɛɔ akɛ Yesaia gbalɛi lɛ jeee gbalɛi diɛŋtsɛ, shi amɛji saji ni aŋmala beni nibii lɛ eba momo, ni tsɔɔ akɛ mɔ ko ni hi shi yɛ Yesaia beaŋ sɛɛ ji mɔ ni ŋmala saji ni eba momo lɛ eshwie shi. Ani susumɔ nɛɛ ja? Yɛ afi 1947 mli lɛ, ana Yesaia wolo lɛ eko kɛ blema wolokpoi krokomɛi yɛ tɛkplo ko ni bɛŋkɛ Ŋshɔ ni Egbo lɛ mli. Blema nibii ahe nilelɔi ekpa shi amɛna akɛ, afee Yesaia wolo nɛɛ ni ana lɛ nɔ ni fa fe afii 100 dani afɔ Mesia loo Kristo ni agba  ehe sane afɔ shi lɛ. Hɛɛ, Biblia lɛ haa aleɔ wɔsɛɛ sane!

Yesaia kɛ Biblia ŋmalɔi krokomɛi lɛ nyɛŋ agba nɔ ni baaba wɔsɛɛ yɛ amɛ diɛŋtsɛ amɛnilee pɛ naa. Yɛ no najiaŋ lɛ, “Mumɔ krɔŋkrɔŋ lɛ tsirɛ [amɛ] ni amɛwie wiemɔi ni Nyɔŋmɔ kɛha amɛ lɛ.” (2 Petro 1:21, Ga Biblia Hee) Wɔbaasusu Yesu shihilɛ he saji ni agba kɛtsɔ Yesaia nɔ lɛ ekomɛi ahe fitsofitso yɛ saji ni nyiɛ sɛɛ lɛ amli. No sɛɛ lɛ, wɔbaasusu nibii ni Yesu kɛ ekaselɔi lɛ gba akɛ ebaaba yɛ wɔbei nɛɛ amli kɛ wɔsɛɛ lɛ ahe.—w08 10/01-E.