“Nyɛfea Nyɔŋmɔ Kaselɔi”
Tsi Obɛŋkɛ Nyɔŋmɔ
“Nyɛfea Nyɔŋmɔ Kaselɔi”
MLIHILƐ. Musuŋtsɔlɛ. Eshaifaa. Suɔmɔ. Dɔlɛ sane ji akɛ, efɔɔɔ kaa akɛ aaana mɛi ni miijie sui kpakpai ni tamɔ enɛɛmɛi akpo ŋmɛnɛ. Ni bo hu? Ani osusuɔ akɛ onyɛŋ oye omanye kɔkɔɔkɔ, ekɔɔɔ he eko mɔdɛŋ fɛɛ ni ooobɔ akɛ oooná sui kpakpai ni tamɔ nɛkɛ? Ekolɛ otsui ni buɔ ehe fɔ lɛ baama nɔ mi doo eha bo akɛ, yɛ naatsii nii komɛi tamɔ sui gbohii ni eka ohe loo niiashikpamɔ gbonyo ko ni oná be ko ni eho lɛ hewɔ lɛ, onyɛŋ oná sui kpakpai. Kɛlɛ, Biblia lɛ maa anɔkwa sane ko ni baanyɛ aha wɔtsɛ wɔtsuii wɔŋmɛ wɔmli lɛ nɔ mi ehaa wɔ—no ji akɛ wɔ-Bɔlɔ lɛ le akɛ wɔyɛ nyɛmɔ ni baanyɛ aha wɔná sui kpakpai.
Nyɔŋmɔ Wiemɔ lɛ woɔ anɔkwa Kristofoi ahewalɛ akɛ: “No hewɔ lɛ nyɛfea Nyɔŋmɔ kaselɔi, tamɔ bii ni asumɔɔ.” (Efesobii 5:1) Wiemɔi nɛɛ tsɔɔ akɛ Nyɔŋmɔ yɛ hekɛnɔfɔɔ babaoo yɛ ejálɔi lɛ amli. Yɛ mɛɛ gbɛ nɔ? Yehowa Nyɔŋmɔ bɔ gbɔmɔ yɛ Lɛ diɛŋtsɛ esubaŋ nɔ, tamɔ E-henɔ. (1 Mose 1:26, 27) No tsɔɔ akɛ, Nyɔŋmɔ kɛ sui ni tamɔ enɔ̃ lɛ bɔ adesai. * No hewɔ lɛ, beni Biblia lɛ woɔ Kristofoi ahewalɛ ni ‘amɛfee Nyɔŋmɔ kaselɔi’ lɛ, etamɔ nɔ ni Yehowa diɛŋtsɛ miikɛɛ amɛ akɛ: ‘Miyɛ hekɛnɔfɔɔ yɛ nyɛmli. Mile akɛ nyɛyeee emuu moŋ, shi nyɛyɛ nyɛmɔ ni nyɛkɛaafee nyɛnii tamɔ mi kɛyashi he ko.’
Mɛni ji Nyɔŋmɔ sui ni wɔbaanyɛ wɔkase lɛ ekomɛi? Kukuji krokomɛi ni bɔle Efesobii 5:1 lɛ he lɛ haa wɔ hetoo. Kadimɔ akɛ, Paulo kɛ wiemɔi ni ji “no hewɔ lɛ” je hewalɛwoo ni ekɛha akɛ wɔkase Nyɔŋmɔ lɛ shishi. Wiemɔi nɛɛ kɛ kuku ni tsɔ Efesobii 5:1 lɛ hiɛ lɛ yɛ tsakpãa, ejaakɛ atsi mlihilɛ, musuŋtsɔlɛ, kɛ eshaifaa atã yɛ nakai kuku lɛ mli. (Efesobii 4:32; 5:1) Beni Paulo wo Kristofoi aŋaa akɛ amɛkase Nyɔŋmɔ lɛ sɛɛ lɛ, ewo amɛ hewalɛ hu koni amɛtiu shihilɛ gbɛ ni baatsɔɔ akɛ amɛyɛ suɔmɔ ni ŋkomeŋfa su bɛ mli lɛ sɛɛ. (Efesobii 5:2) Eji anɔkwale akɛ, Yehowa Nyɔŋmɔ ji mɔ ni feɔ nɔkwɛmɔnɔ ni fe fɛɛ yɛ sui tamɔ mlihilɛ, musuŋtsɔlɛ, mɛi ahe eshai ni akɛfaa amɛ kwraa, kɛ suɔmɔ kpojiemɔ mli, ni esa akɛ wɔ fɛɛ wɔkase lɛ.
Mɛni hewɔ esa akɛ wɔkase Nyɔŋmɔ? Kadimɔ akɛ Paulo wiemɔi ni ekɛtsu nii lɛ haa wɔnaa yiŋtoo ni nɔ bɛ hewɔ ni esa akɛ wɔfee nakai, ekɛɛ akɛ: ‘Nyɛfea Nyɔŋmɔ kaselɔi, tamɔ bii ni asumɔɔ.’ Susumɔ nɛɛ taa wɔtsuiiaŋ waa, aloo jeee nakai? Yehowa buɔ ejálɔi lɛ akɛ amɛji ebii ni esumɔɔ amɛ waa diɛŋtsɛ. Taakɛ gbekɛ ko bɔɔ mɔdɛŋ ni efee enii tamɔ etsɛ lɛ, nakai nɔŋŋ anɔkwa Kristofoi bɔɔ mɔdɛŋ fɛɛ ni amɛaanyɛ koni amɛfee amɛnii tamɔ amɛ-Tsɛ ni yɔɔ ŋwɛi lɛ.
Yehowa enyɛɛɛ adesai anɔ koni amɛkase lɛ. Nɔ ni tamɔɔɔ nakai lɛ, ewo wɔhiɛ nyam kɛtsɔ nyɛmɔ ni eha wɔ koni wɔkɛhala nɔ ni wɔsumɔɔ lɛ nɔ. No hewɔ lɛ, kɛ́ obaafee mɔ ni kaseɔ Nyɔŋmɔ loo ofeŋ nakai lɛ, bo diɛŋtsɛ obaakpɛ yiŋ oha ohe. (5 Mose 30:19, 20) Shi kaaha ohiɛ miikpa nɔ kɔkɔɔkɔ akɛ oyɛ nyɛmɔ ni baanyɛ aha ojie sui ni tamɔ Nyɔŋmɔ nɔ̃ lɛ akpo. Yɛ anɔkwale mli lɛ, klɛŋklɛŋ lɛ esa akɛ ole Nyɔŋmɔ sui kɛ egbɛ̀i dani obaanyɛ okase lɛ. Biblia lɛ baanyɛ aye abua bo ni okase Nyɔŋmɔ sui kɛ egbɛ̀i ni nɔ bɛ ni eha mɛi akpekpei abɔ ebatsɔmɔ ekaselɔi lɛ ahe nii.—w08 10/01-E.
[Shishigbɛ niŋmaa]
^ kk. 5 Kolosebii 3:9, 10 lɛ haa wɔnaa akɛ, Nyɔŋmɔ subaŋ nɔ ni abɔ wɔ yɛ lɛ kɔɔ bɔ ni wɔbaa wɔjeŋ wɔhaa lɛ he. Awoɔ mɛi ni sumɔɔ akɛ amɛsa Nyɔŋmɔ hiɛ lɛ ahewalɛ akɛ amɛwo “gbɔmɔ hee ní tsɔɔ ehee ekoŋŋ . . . yɛ mɔ ni bɔ lɛ [ni ji Nyɔŋmɔ] lɛ subaŋ lɛ naa.”