Wɔwɔsɛɛ ni Ebɛŋkɛ Kpaakpa lɛ he Gbalɛi

BENI bɔfo Petro wieɔ adesai kɛ shikpɔŋ lɛ wɔsɛɛ ahe lɛ, eŋma akɛ: “Yɛ [Nyɔŋmɔ shiwoo] lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13) Gbalɔ Yesaia ji mɔ klɛŋklɛŋ ni atsɔ enɔ akɛ “ŋwɛi hee kɛ shikpɔŋ hee” lɛ he shiwoo lɛ ha. (Yesaia 65:17; 66:22) Gbalɛ nɛɛ ni Petro tsɛ yisɛɛ lɛ  tsɔɔ akɛ, yɛ ebeaŋ lɛ, gbalɛ nɛɛ bako mli kɛmɔko shi.

No sɛɛ lɛ, yɛ aaafee afi 96 Ŋ.B. lɛ, yɛ ninaai ni ajie kpo atsɔɔ bɔfo Yohane lɛ amli lɛ, atsɔɔ akɛ nakai “shikpɔŋ hee” lɛ kɛ jɔɔmɔi ni Nyɔŋmɔ Maŋtsɛyeli lɛ kɛaaba lɛ yɛ tsakpãa. (Kpojiemɔ 21:1-4) Wiemɔi ni Yesu kɛ bɔfo Paulo wie yɛ bɔ ni je lɛ shihilɛ baaji eha dani Nyɔŋmɔ Maŋtsɛyeli lɛ kɛ jɔɔmɔi nɛɛ aaaba lɛ miiná amɛmlibaa amrɔ nɛɛ. No hewɔ lɛ, wɔbaanyɛ wɔkpa gbɛ akɛ etsɛŋ ni Maŋtsɛyeli nɛɛ kɛ jeŋ hee lɛ baaba. Te jeŋ hee lɛ baaji eha tɛŋŋ? Biblia mli wolo ni ji Yesaia wolo lɛ gbaa wɔ enɛ he sane.

Jɔɔmɔi ni Jeŋ Hee lɛ Kɛaaba

Jeŋ Fɛɛ Toiŋjɔlɛ kɛ Jamɔŋ Ekomefeemɔ. “Amɛkɛ amɛklantei aaasɔ̃ kɔii ni amɛkɛ amɛkpɔlɔi hu aaasɔ̃ adedai. Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!”—Yesaia 2:2-4.

Toiŋjɔlɛ Baahi Adesai kɛ Kooloi Ateŋ. “Klaŋ kɛ gwantɛŋ bi aaahi shi, ni kootsɛ kɛ abotia bi aaabu shi; ni tsina bi kɛ jata bi kɛ kooloo ní ewo fɔ fɛɛ aaahi he kome, ni gbekɛ bibioo aaakpala amɛ. Tsina yoo hu kɛ oshishibrishi aaaye nii, ni amɛbii aaabumɔ shi yɛ he kome, ni jata aaaye jwɛi tamɔ tsina. . . . Amɛfeŋ efɔŋ ni amɛfiteŋ nii yɛ migɔŋ krɔŋkrɔŋ lɛ nɔ fɛɛ; ejaakɛ shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu ha ŋshɔ shishi lɛ.”—Yesaia 11:6-9.

Niyenii Babaoo Baaba Kɛha Mɛi Fɛɛ. “Yehowa Zebaot aaaŋmɛ okpɔlɔ yɛ gɔŋ nɛɛ nɔ aha majimaji fɛɛ: fɔ nii kɛ wein kpakpa, fɔ nii kɛ wuiaŋ fɔ, wein kpakpa ní atsere nɔ.”—Yesaia 25:6.

Gbele Ehiŋ Shi Dɔŋŋ. “[Nyɔŋmɔ baami] gbele kɛaatee naanɔ; ni Nuŋtsɔ Yehowa aaatsumɔ hiɛaŋ fɛɛ yaafonui, ni eeejie emaŋ lɛ hiɛgbele lɛ yɛ shikpɔŋ muu lɛ fɛɛ nɔ; ejaakɛ Yehowa ekɛɛ.”—Yesaia 25:8.

Abaatee Gbohii Ashi. “Omɛi ní egboi lɛ ahiɛ aaatsɛ̃, ni amɛgbɔmɔtsei aaate shi. Ao nyɛ su mli bii, nyɛhiɛ atsɛ̃a, ni nyɛláa kɛ miishɛɛ! . . . Oooha gbohii lɛ ate shi.”—Yesaia 26:19, Ga Biblia Hee.

Mesia lɛ Baafee Jalɛ Kojolɔ. “Bɔ ni etoii nuɔ lɛ, jeee nakai ebaabu atɛŋ; shi eeekojo ohiafoi yɛ jalɛ naa, ni jajemɔ hu ekɛaakã mɛi lɛ, ni eeebu mɛi ní nii yɔɔ mɔbɔ yɛ shikpɔŋ lɛ nɔ lɛ atɛŋ bɔ ni ja.”—Yesaia 11:3, 4.

 Abaatsa Shwilafoi kɛ Toimulɔi. “Aaagbele shwilafoi ahiŋmɛii, ni aaagbele toimulɔi atoii.”—Yesaia 35:5.

Ŋã Kpataa Baatsɔ Shikpɔŋ ni Baa Nii. “Ŋã kpataa kɛ shikpɔŋ gbiŋ lɛ aaanyá, ŋã kplanaa lɛ hu mli aaafili lɛ, ni eeegba afofro tamɔ fɔfɔi! Eeegba afofro babaoo ni emli aaafili lɛ, ni emli aaafili lɛ kɛ miishɛɛ kɛ nyamɔ sɔŋŋ.”—Yesaia 35:1, 2.

Shikpɔŋ Hee. “Miibɔ ŋwɛi hee [ŋwɛi nɔyeli hee] kɛ shikpɔŋ hee [adesai jalɔi aweku hee], ni akaiŋ tsutsu nii lɛ dɔŋŋ, ni asaŋ ebaŋ jwɛŋmɔ mli dɔŋŋ; shi moŋ, nyɛnyaa ní nyɛmli afilia nyɛ kɛyaa naanɔ yɛ nii ní mibɔɔ lɛ ahewɔ; . . . Shi [mɛi ni baahi shi yɛ jeŋ hee ni Nyɔŋmɔ ewo shi yɛ he lɛ mli lɛ aaamamɔ] tsũi, ni amɛaahi mli, ni amɛaafee weintromi, ni amɛaaye mli yibii! Amɛmamɔŋ tsũi, ní mɔ kroko ahi mli, ni amɛhuŋ hu, ní mɔ kroko aye; ejaakɛ mimaŋ lɛ gbii aaatamɔ tsei agbii, ni mɛi ni mihala lɛ aaaye amɛnine naa nitsumɔ lɛ mli nii aahu po. Amɛgboŋ deŋme yakatswaa, ni amɛfɔŋ amɛhaŋ oshara; ejaakɛ mɛi ní Yehowa ejɔɔ amɛ lɛ aseshibii ji amɛ, ni amɛshwiei kɛ amɛ aaahi shi. Ni aaaba mli akɛ, dani amɛaatsɛ́ mi lɛ, mahere nɔ; ni beni amɛwieɔ lolo lɛ, mabo toi!” “‘Shi tamɔ bɔ ni ŋwɛi hee kɛ shikpɔŋ hee ní mibafee lɛ aaadamɔ shi yɛ mihiɛ lɛ,’ Yehowa kɛɛ, ‘nakai nyɛseshi kɛ nyɛgbɛi lɛ aaadamɔ shi.’”—Yesaia 65:17-25; 66:22.

Wɔsɛɛ ni Yɔɔ Nyam He Gbalɛ

Jeee Yesaia wolo lɛ pɛ ji Biblia mli wolo ni gba akɛ nine aaashɛ jɔɔmɔi anɔ wɔsɛɛ. Gbalɛi ni kɔɔ nibii kpakpai ni Nyɔŋmɔ baatsɔ e-Maŋtsɛyeli ni Kristo baaye nɔ lɛ nɔ etsu lɛ ahe lɛ eyi Biblia lɛ mli obɔ. * Ani obaasumɔ ni ohi shi yɛ paradeiso shihilɛ ni tamɔ nɛkɛ mli? Obaanyɛ! Bo diɛŋtsɛ taomɔ nɔ ni Biblia lɛ tsɔɔ diɛŋtsɛ yɛ yiŋtoi kpakpai ni Nyɔŋmɔ yɔɔ kɛha wɔsɛɛ lɛ he, ni okase bɔ ni ooofee oná mli gbɛfaŋnɔ. Yehowa Odasefoi yɛ he miishɛɛ akɛ amɛaaye amɛbua bo.—w08 10/01-E.

[Shishigbɛ niŋmaa]

[Mfoniri ni yɔɔ baafa 8]

Adesai kɛ amɛhe baahi shi yɛ toiŋjɔlɛ mli, ni toiŋjɔlɛ baahi amɛ kɛ kooloi ateŋ

[Mfoniri ni yɔɔ baafa 9]

Gbohii baaba wala mli ekoŋŋ

[Mfoniri ni yɔɔ baafa 10]

Shikpɔŋ muu lɛ fɛɛ baatsɔ paradeiso