Nɔ Ni Wɔkaseɔ Kɛjɛɔ Yesu Ŋɔɔ

Yɛ Hiɛnɔkamɔ ni yɔɔ Kɛha Gbohii lɛ He

Kɛ́ hooo lɛ, Yesu tee mɛi etɛ ashi, ni ekɛtsɔɔ akɛ hiɛnɔkamɔ yɛ kɛha gbohii. (Luka 7:11-17; 8:49-56; Yohane 11:1-45) Bɔni afee ni wɔnu hiɛnɔkamɔ ni yɔɔ kɛha gbohii lɛ shishi lɛ, esa akɛ wɔle nɔ ni haa wɔgboiɔ kɛ bɔ ni fee ni gbele ba.

Mɛni Hewɔ Hela Mɔɔ Wɔ ni Wɔgboiɔ?

Kɛ́ Yesu kɛ mɛi ahe eshai fa amɛ lɛ, amɛhe waa amɛ. Ákɛ nɔkwɛmɔnɔ lɛ, beni akɛ nuu ko ni miiye kuumɔ hela tee Yesu ŋɔɔ lɛ, Yesu kɛɛ akɛ: “Nɔ ni aaakɛɛ akɛ: Aŋɔ ohe eshai lɛ afao lɛ, aloo nɔ ni aaakɛɛ akɛ: Tee shi ni onyiɛ lɛ, té emli nɔ ni kɛɛmɔ jaraaŋ? Shi beni afee ni nyɛná nyɛle akɛ gbɔmɔ bi lɛ yɛ hegbɛ yɛ shikpɔŋ lɛ nɔ akɛ eŋɔɔ eshai efaa lɛ, kɛkɛ lɛ ekɛɛ helatsɛ lɛ akɛ: Tee shi, wó osaa lɛ, ni oya owe!” (Mateo 9:2-6) No hewɔ lɛ, esha ji nɔ ni kɛ hela kɛ gbele baa. Klɛŋklɛŋ nuu ni ji Adam lɛ ji mɔ ni ha afɔɔ adesai akɛ eshafeelɔi.—Luka 3:38; Romabii 5:12.

Mɛni Hewɔ Yesu Gbo?

Yesu efeee esha. No hewɔ lɛ, kulɛ esaaa mɔ ni gboɔ. Yesu tsɔ gbo ni egbo yɛ wɔnajiaŋ lɛ nɔ ekɛwo wɔhe eshai lɛ ahe nyɔmɔ. Ekɛɛ akɛ, abaafɔse elá lɛ “ashwie shi yɛ mɛi pii ahewɔ ha eshaifaa.”—Mateo 26:28.

Yesu kɛɛ hu akɛ: “Gbɔmɔ bi lɛ baaa ni asɔmɔ lɛ, shi eba sɔɔmɔ moŋ, ni eŋɔ esusuma lɛ eha yɛ mɛi pii akpɔmɔ hewɔ.” (Mateo 20:28) Yesu tsɛ wɔhe eshai lɛ ahe nyɔmɔ ni ewo lɛ akɛ ‘kpɔmɔnɔ’ ejaakɛ ekpɔ̃ mɛi kɛjɛ gbele mli. Agbɛnɛ hu Yesu kɛɛ akɛ: “Mi lɛ miba beni afee ni amɛná wala ni amɛná ni ateke nɔ.” (Yohane 10:10) Bɔni afee ni wɔnu hiɛnɔkamɔ ni yɔɔ kɛha gbohii lɛ shishi jogbaŋŋ lɛ, esa akɛ wɔle shihilɛ mli hu ni gbohii lɛ yɔɔ.

 Mɛni Baa Mɔ nɔ Kɛji Egbo?

Beni Yesu naanyo Lazaro gbo lɛ, Yesu ha ale shihilɛ mli ni gbohii yɔɔ. Ekɛɛ ekaselɔi lɛ akɛ: “Wɔshieŋtsɛ Lazaro ewɔ; shi miiya [Betania] ni mayatsĩɛ lɛ yɛ wɔ lɛ mli. . . . Amɛ lɛ amɛsusu akɛ wɔ kpakpa hewɔ ewie. Agbɛnɛ Yesu kɛɛ amɛ faŋŋ akɛ: Lazaro égbo.” No hewɔ lɛ, Yesu ha efee faŋŋ akɛ gbohii lɛ ewɔ, ni tsɔɔ akɛ amɛleee nɔ ko nɔ ko.—Yohane 11:1-14.

Beni Yesu tee Lazaro shi lɛ, no mli lɛ enaanyo nɛɛ egbo gbii ejwɛ. Kɛlɛ, amaniɛbɔɔ ko bɛ Biblia lɛ mli ni tsɔɔ akɛ Lazaro wie akɛ eyaje shihilɛ ko mli be ni egbo lɛ. Dani aaatee Lazaro shi lɛ, no mli lɛ ehiɛ kãaa ni eleee nɔ ko nɔ ko.—Jajelɔ 9:5, 10; Yohane 11:17-44.

Mɛɛ Hiɛnɔkamɔ Yɔɔ Kɛha Gbohii?

Abaatee gbohii ashi kɛba wala mli ekoŋŋ, ni amɛbaaná hegbɛ akɛ amɛaahi shi kɛya naanɔ. Yesu kɛɛ akɛ: “Ŋmɛlɛtswaa lɛ miiba, nɔ̃ mli ni mɛi fɛɛ ni yɔɔ [kaimɔ] gbohiiabui lɛ amli lɛ aaanu [Yesu gbee], ni amɛaaje kpo.”—Yohane 5:28, 29.

Hiɛnɔkamɔ nɛɛ ji Nyɔŋmɔ suɔmɔ kpojiemɔ. Yesu kɛɛ akɛ: “Nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.”—Yohane 3:16; Kpojiemɔ 21:4, 5.—w08 11/01-E.

Kɛ́ ootao ole enɛ he saji babaoo lɛ, kwɛmɔ Mɛni Biblia lɛ Tsɔɔ Diɛŋtsɛ? * wolo lɛ yitso 6 lɛ mli

[Shishigbɛ niŋmaa]