Tsɔɔmɔ Obii lɛ Anii

Ani Oyeɔ Awuŋa? Yosef Nyɛmimɛi Hii lɛ Ye Ehe Awuŋa

HA WƆSUSU nɔ ni atsɔɔ kɛ́ akɛɛ mɔ ko ji awuŋayelɔ lɛ he wɔkwɛ. Ani onu he be ko pɛŋ akɛ ewa kɛha bo akɛ ooosumɔ mɔ ko sane akɛni mɛi kɛɔ akɛ eji gbɔmɔ kpakpa, ehe yɛ fɛo, loo ele nii waa lɛ hewɔ? *— Ojogbaŋŋ, nakai ji bɔ ni mɔ ni yeɔ mɔ ko he awuŋa lɛ feɔ yɛ mɔ lɛ he.

Kɛ́ fɔlɔi sumɔɔ amɛbii lɛ ateŋ mɔ kome sane fe amɛbii krokomɛi lɛ, ebaanyɛ etee awuŋayeli shi yɛ weku lɛ mli. Biblia lɛ gbaa wɔ weku ko ni awuŋayeli ha naagba wulu ko ba mli lɛ he sane. Ha wɔsusu naagba ni enɛ kɛba lɛ he wɔkwɛ, kɛ nɔ ni wɔbaanyɛ wɔkase kɛjɛ nɔ ni ba lɛ mli.

Yosef ji Yakob bihii lɛ ateŋ mɔ ni ji 11 nɔ, ni Yosef tsɛbii lɛ bɛ̀ lɛ amɛwo amɛmli loo amɛye ehe awuŋa. Ani ole nɔ hewɔ?— Nɔ hewɔ ji akɛ, amɛtsɛ Yakob sumɔɔ Yosef sane waa. Ákɛ nɔkwɛmɔnɔ lɛ, Yakob kpɛ atade wuyaa fɛfɛo ko eha Yosef. Yakob sumɔ Yosef sane waa “ejaakɛ lɛ ji egbɔlɛ mli bi” kɛ eŋa ni esumɔɔ lɛ waa ni ji Rahel lɛ kromɔbi.

Biblia lɛ kɛɔ akɛ, ‘beni Yosef nyɛmimɛi lɛ na akɛ amɛtsɛ sumɔɔ lɛ fe enyɛmimɛi lɛ fɛɛ lɛ, amɛnyɛ Yosef.’ Kɛkɛ ni gbi ko lɛ, Yosef kɛɛ eweku lɛ akɛ, ela lamɔ ko, ni yɛ lamɔ lɛ mli lɛ, eweku lɛ mlibii fɛɛ ni etsɛ tete fata he lɛ koto lɛ. Biblia lɛ kɛɔ akɛ, “enyɛmimɛi lɛ bɛ̀ lɛ wo amɛmli” loo amɛye ehe awuŋa, ni Yosef tsɛ po kã ehiɛ akɛ egba lamɔ ni tamɔ nɛkɛ.—1 Mose 37:1-11.

Sɛɛ mli beni Yosef eye afii 17 lɛ, enyɛmimɛi lɛ fã gbɛ kilomitai abɔ kɛtee he ko shɔŋŋ koni amɛyalɛ̀ amɛweku lɛ gwaŋtɛŋi kɛ abotiai lɛ. No hewɔ lɛ, Yakob tsu  Yosef koni eyakwɛ akɛ enyɛmimɛi lɛ yɛ jogbaŋŋ lo. Ani ole nɔ ni enyɛmimɛi lɛ ateŋ mɛi babaoo tao akɛ amɛfee beni amɛna lɛ akɛ eeba amɛŋɔɔ lɛ?— Amɛmiitao ni amɛgbe lɛ! Shi amɛteŋ mɛi enyɔ, ni ji Ruben kɛ Yuda sumɔɔɔ akɛ amɛfee nakai.

Beni guɔyelɔi komɛi ni miiho kɛmiiya Mizraim lɛ shɛ jɛmɛ lɛ, Yuda kɛɛ akɛ: “Nyɛhaa wɔhɔ̃a lɛ.” Ni amɛhɔ̃ɔ lɛ lɛɛlɛŋ. No sɛɛ lɛ, amɛgbe too kpakpo ko, ni amɛŋɔ Yosef atade lɛ amɛtsɔ elá lɛ mli. Sɛɛ mli beni amɛkɛ atade lɛ yatsɔɔ amɛtsɛ lɛ, ekɛ yaafo wie akɛ: ‘Kooloo fɔŋ ko eye Yosef!’—1 Mose 37:12-36.

Sɛɛ mli kwraa lɛ, Farao ni ji Mizraim nɔyelɔ lɛ basumɔ Yosef sane naakpa. Nɔ hewɔ ni ebalɛ nakai ji akɛ, Nyɔŋmɔ ye ebua Yosef ni enyɛ etsɔɔ lamɔi enyɔ komɛi ni Farao la lɛ ashishi. Klɛŋklɛŋ lamɔ lɛ ji akɛ, ena tsinai kpawo ni yɔɔ hewalɛ, ni tsinai kpawo ni hela emɔmɔ amɛ nyiɛ amɛsɛɛ kɛba. Lamɔ ni ji enyɔ lɛ kɔɔ abele tsei kpawo ni eba babaoo kɛ abele tsei kpawo ni nɔ ko bɛ he lɛ ahe. Yosef kɛɛ akɛ, lamɔi enyɔ lɛ fɛɛ shishi tsɔɔ akɛ, abaaná niyenii babaoo afii kpawo, ni no sɛɛ lɛ hɔmɔ baaba afii kpawo. Farao fã ni awo Yosef nɔkwɛlɔ koni ekwɛ ni abua niyenii naa ato yɛ afii ni niyenii baabu lɛ amli, ni akɛsaa he ato hɔmɔ afii lɛ.

Beni hɔmɔ lɛ ba lɛ, niyenii he bahia Yosef weku ni yɔɔ maŋsɛɛ shɔŋŋ lɛ. Yakob tsu Yosef nyɛmimɛi hii nukpai nyɔŋma lɛ koni amɛya Mizraim ni amɛyatao niyenii kɛba. Amɛtee amɛyadamɔ Yosef hiɛ, shi amɛyooo lɛ. Yosef ejieee ehe shi etsɔɔɔ enyɛmimɛi lɛ, ni eka amɛ ekwɛ, ni ena bɔ ni amɛshwa amɛhe yɛ efɔŋ ni amɛfee lɛ lɛ mli. No sɛɛ lɛ, Yosef tsɔɔ amɛ mɔ ni eji. Kwɛ bɔ ni amɛná miishɛɛ akɛ amɛkɛ amɛhe ekpe ekoŋŋ, ni amɛfua amɛhe!—Mose Klɛŋklɛŋ Wolo, yitso 40 kɛyashi yitso 45.

Mɛni obaanyɛ okase yɛ awuŋayeli he yɛ Biblia mli amaniɛbɔɔ nɛɛ mli?— Awuŋayeli baanyɛ ekɛ naagbai wuji aba, ni ebaanyɛ eha mɔ ko asumɔ po akɛ eye lɛ diɛŋtsɛ enyɛmi awui! Nyɛhaa wɔkanea Bɔfoi lɛ Asaji 5:17, 18 kɛ 7:54-59 lɛ ni wɔkwɛ nɔ ni awuŋayeli ha mɛi fee Yesu kaselɔi lɛ.— Beni okane enɛ sɛɛ lɛ, ani obaanyɛ ona nɔ hewɔ ni esa akɛ wɔkwɛ jogbaŋŋ ni wɔkaye awuŋa lɛ?—

Yosef ye afii 110 ni egbo. Efɔ bii, ni ená nabii kɛ nanakaŋsowai. Wɔbaanyɛ wɔná nɔmimaa akɛ, Yosef tsɔse amɛ koni amɛsumɔsumɔɔ amɛhe ni amɛkaye awuŋa.—1 Mose 50:22, 23, 26.—w08 10/1-E.

[Shishigbɛ niŋmaa]

Sanebimɔi:

○ Kɛ́ akɛɛ mɔ ko ji awuŋayelɔ lɛ, te atsɔɔ tɛŋŋ?

○ Mɛni awuŋayeli ha Yosef nyɛmimɛi lɛ fee?

○ Mɛni hewɔ Yosef kɛ enyɛmimɛi lɛ ahe eshai lɛ ke amɛ lɛ?

○ Mɛni wɔbaanyɛ wɔkase kɛjɛ amaniɛbɔɔ nɛɛ mli?