Bɔlɔ ni Sa Wɔyijiemɔ
Tsi Obɛŋkɛ Nyɔŋmɔ
Bɔlɔ ni Sa Wɔyijiemɔ
ANI obi ohe pɛŋ akɛ, ‘Mɛni ji yiŋtoo ni yɔɔ shihilɛ sɛɛ?’ Mɛi ni susuɔ akɛ wala tsɔ sutsakemɔ ni jeee mɔ ko kudɔ nɔ kɛba lɛ taoɔ sanebimɔ nɛɛ hetoo, shi amɛnaŋ. Shi ebɛ lɛ nakai yɛ mɛi ni kpɛlɛɔ anɔkwa sane ni ma shi shiŋŋ akɛ, Yehowa Nyɔŋmɔ ji wala Halɔ lɛ nɔ lɛ agbɛfaŋ. (Lala 36:10) Amɛle akɛ yiŋtoo ko hewɔ ebɔ wɔ. Aŋma yiŋtoo nɛɛ yɛ Kpojiemɔ 4:11 lɛ. Nyɛhaa wɔpɛia bɔ ni nakai wiemɔi ni bɔfo Yohane ŋma lɛ gbálaa nɔ hewɔ ni wɔyɔɔ wala mli lɛ ehaa lɛ mli wɔkwɛa.
Yohane ŋma akɛ, mumɔŋ bɔɔ nii akuu ko jie Nyɔŋmɔ yi akɛ: “Nuŋtsɔ [Yehowa], bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔ naa amɛyɔɔ ni abɔ amɛ.” Yehowa pɛ ji mɔ ni sa yijiemɔ ni tamɔ nɛkɛ. Mɛni hewɔ? Ejaakɛ lɛ ‘ebɔ nii fɛɛ.’ Belɛ, mɛni esa akɛ enɛ atsirɛ ebɔɔ nii ni ji adesai kɛ ŋwɛibɔfoi lɛ ni amɛfee?
Awie Yehowa he akɛ, lɛ ji mɔ ni sa akɛ ‘eŋɔ’ anunyam, agbojee, kɛ hewalɛ. Ŋwanejee ko bɛ he akɛ, lɛ ji Mɔ ni yɔɔ anunyam, agbojee, kɛ hewalɛ fe fɛɛ yɛ jeŋ muu lɛ fɛɛ mli. Shi adesai ateŋ mɛi babaoo ekpɛlɛɛɛ nɔ akɛ lɛ ji nibii fɛɛ a-Bɔlɔ. Fɛɛ sɛɛ lɛ, ayɛ mɛi ni naa Nyɔŋmɔ ‘he nii ni anaaa’ lɛ faŋŋ kɛtsɔ nibii ni efee lɛ anɔ. (Romabii 1:20) Enɛ tsirɛɔ amɛ ni amɛjɛɔ tsuii ni eyimɔ obɔbɔ kɛ hiɛsɔɔ amli amɛkɛ anunyam kɛ agbojee haa Yehowa. Amɛjajeɔ odaseyeli ni ma shi shiŋŋ, ni ji akɛ Yehowa ji mɔ ni fee nibii fɛɛ yɛ naakpɛɛ gbɛ nɔ, ni no hewɔ lɛ esa akɛ wɔjie bulɛ babaoo kpo wɔtsɔɔ lɛ lɛ amɛtsɔɔ mɛi fɛɛ ni feɔ toi kɛhaa amɛ lɛ.—Lala 19:2, 3; 139:14.
Shi mɛɛ gbɛ nɔ Yehowa nine shɛɔ hewalɛ nɔ kɛjɛɔ ejálɔi lɛ aŋɔɔ? Yɛ anɔkwale mli lɛ, bɔɔ nɔ̃ ko bɔɔ nɔ̃ ko bɛ ni baanyɛ aha Bɔlɔ ofe lɛ hewalɛ. (Yesaia 40:25, 26) Shi akɛni abɔ wɔ yɛ Nyɔŋmɔ subaŋ nɔ hewɔ lɛ, wɔyɛ Nyɔŋmɔ sui lɛ eko yɛ gbɛ ko nɔ, ni hewalɛ ji sui nɛɛ ateŋ ekome. (1 Mose 1:27) Kɛ́ wɔhiɛ sɔɔ nɔ ni wɔ-Bɔlɔ lɛ efee eha wɔ lɛ lɛɛlɛŋ lɛ, no baatsirɛ wɔ koni wɔkɛ wɔhewalɛ kɛ wɔnyɛmɔ atsu nii kɛjie eyi ni wɔwo ehiɛ nyam. Yɛ nɔ najiaŋ ni wɔkɛ wɔnyɛmɔ aaatsu nii kɛdi nibii ni wɔnyaa he lɛ asɛɛ pɛ lɛ, wɔnuɔ he akɛ Yehowa Nyɔŋmɔ ji mɔ ni esa akɛ wɔŋɔ wɔhewalɛ fɛɛ wɔha beni wɔsɔmɔɔ lɛ lɛ.—Marko 12:30.
Belɛ, mɛni hewɔ wɔyɔɔ wala mli? Kpojiemɔ 4:11 lɛ naagbee fã lɛ haa sanebimɔ nɛɛ hetoo akɛ: “Osuɔmɔ naa [bɔɔ nii fɛɛ yɔɔ] ni abɔ amɛ.” Jeee wɔ diɛŋtsɛ wɔbɔ wɔhe. Nyɔŋmɔ suɔmɔ naa hewɔ wɔyɔɔ wala mli. Yɛ enɛ hewɔ lɛ, mɔ ni hiɔ shi kɛhaa lɛ diɛŋtsɛ ehe lɛ tsui enyɔŋ emli kɔkɔɔkɔ. Esa akɛ wɔkase Nyɔŋmɔ suɔmɔnaa nii, ni no sɛɛ lɛ wɔha wɔshihilɛ kɛ no akpã gbee dani wɔbaaná mligbɛ toiŋjɔlɛ, miishɛɛ, wɔtsuii baanyɔ wɔmli, ni wɔnu he akɛ sɛɛnamɔ yɛ wɔshihilɛ he. Ja wɔfee enɛ pɛ dani wɔbaanyɛ wɔkɛɛ akɛ wɔna yiŋtoo hewɔ ni abɔ wɔ kɛ nɔ hewɔ ni wɔyɔɔ wala mli lɛ.—Lala 40:9.—w08 12/1-E.
[He ni Mfoniri ni yɔɔ baafa 27 lɛ Jɛ]
NASA, ESA, kɛ A. Nota (STScI)