Ani Nyɔŋmɔ Susuɔ Mihe?

Hetoi ni mɛi fɔɔ hamɔ:

▪ “Nyɔŋmɔ nɔ kwɔ kwraa fe bɔ ni eeená dekã kɛsusu minaagbai lɛ ahe.”

▪ “Mikpaaa shi akɛ esusuɔ mihe.”

Mɛni Yesu wie?

▪ “Ani jeee kpãi enyɔ ahɔɔ aflimatai enumɔ aheɔ? shi Nyɔŋmɔ hiɛ kpaaa amɛteŋ ekome folo nɔ. Shi nyɛyiteŋ tsɔi tete akane fɛɛ. No hewɔ lɛ nyɛkashea gbeyei; nyɛjara wa fe aflimatai babaoo.” (Luka 12:6, 7) Ŋwanejee ko bɛ he akɛ, Yesu tsɔɔ akɛ Nyɔŋmɔ susuɔ wɔhe.

▪ “Nyɛkahaoa nyɛhe nyɛkɛɛa akɛ: Mɛni wɔɔye, aloo mɛni wɔɔnu, mɛni hu wɔɔŋɔha wɔhe? Ejaakɛ nii nɛɛ fɛɛ sɛɛ jeŋmajiaŋbii lɛ diɔ. Shi nyɛtsɛ lɛ ni yɔɔ ŋwɛi lɛ le akɛ nii nɛɛ fɛɛ he miihia nyɛ.” (Mateo 6:31, 32) Yesu yɛ nɔmimaa akɛ Nyɔŋmɔ le wɔteaŋ mɔ fɛɛ mɔ hiamɔ nii.

BIBLIA lɛ feɔ lɛ faŋŋ akɛ Nyɔŋmɔ susuɔ wɔhe. (Lala 55:23; 1 Petro 5:7) Kɛ́ nakai ni lɛ, belɛ mɛni hewɔ wɔnaa nɔ̃ babaoo ŋmɛnɛ lɛ? Kɛ́ Nyɔŋmɔ yɛ suɔmɔ ni eji hewalɔ ofe lɛ, mɛni hewɔ efeee nɔ ko kɛfooo nɔnaa sɛɛ?

Hetoo lɛ kɔɔ anɔkwa sane ko ni mɛi fioo ko pɛ ni le lɛ he—Satan Abonsam ji jeŋ fɔŋ nɛɛ nɔyelɔ. Beni Satan kaa Yesu lɛ, Satan kɛ je lɛŋ maŋtsɛyelii lɛ fɛɛ tsɔɔ Yesu ni ekɛɛ akɛ: “Bo maŋɔ nɛkɛ hegbɛ nɛɛ fɛɛ kɛ amɛnunyam lɛ mahã; ejaakɛ mi aŋɔhã, ni mɔ fɛɛ mɔ ni misumɔɔ lɛ, lɛ miŋɔhãa.”—Luka 4:5-7.

Namɔ wo Satan je lɛ nɔyelɔ? Beni wɔ klɛŋklɛŋ fɔlɔi, Adam kɛ Hawa bo Satan toi ni amɛkpa yɛ Nyɔŋmɔ sɛɛ lɛ, amɛkɛ amɛnifeemɔ lɛ tsɔɔ akɛ, amɛhala Satan akɛ amɛnɔyelɔ. Kɛjɛ beni amɛtse nakai atua lɛ, Yehowa Nyɔŋmɔ kɛ tsuishiŋmɛɛ eŋmɛ gbɛ koni be ko aho ni akɛna akɛ Satan nɔyeli lɛ ehiii kwraa. Yehowa enyɛɛɛ gbɔmɛi anɔ ni amɛjá lɛ, shi egbele gbɛ eha wɔ koni wɔku wɔsɛɛ kɛba eŋɔɔ.—Romabii 5:10.

Akɛni Nyɔŋmɔ susuɔ wɔhe hewɔ lɛ, eto gbɛjianɔ koni Yesu akpɔ̃ wɔ kɛjɛ Satan nɔyeli shishi. Etsɛŋ Yesu ‘baakpata mɔ ni yɔɔ gbele nɔ hewalɛ ni ji abonsam lɛ hiɛ.’ (Hebribii 2:14) Ekɛ nakai feemɔ ‘baafite abonsam nitsumɔi lɛ.’—1 Yohane 3:8.

Shikpɔŋ lɛ baafee Paradeiso ekoŋŋ. Yɛ nakai beaŋ lɛ, Nyɔŋmɔ “aaatsumɔ [gbɔmɛi ahiɛaŋ] yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:4, 5. *—w09 02/01-E.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 8]

Shikpɔŋ lɛ baafee Paradeiso ekoŋŋ