Saji Ni Mɛi Ni Kaneɔ Lɛ Biɔ

Ani Yesu Ji Bɔfonukpa Mikael Lɛ?

▪ Yɛ kukufoo mli lɛ, hɛɛ. Yɛ hei pii lɛ, anyɛɔ akɛ gbɛ́i fe ekome tsɛɔ mɔ ko. Nakai nɔŋŋ mɛi hiɛ gbɛ́i fe ekome yɛ Biblia beaŋ. Ákɛ nɔkwɛmɔnɔ lɛ, atsɛɔ blematsɛ Yakob akɛ Israel. (1 Mose 35:10) Akɛ gbɛ́i srɔtoi enumɔ tsɛ bɔfo Petro, nomɛi ji: Simeon, Simon, Petro, Kefa, kɛ Simon Petro. (Mateo 10:2; 16:16; Yohane 1:42; Bɔfoi lɛ Asaji 15:7, 14) Te wɔɔfee tɛŋŋ wɔná nɔmimaa akɛ Mikael ji gbɛ́i kroko ni akɛtsɛɔ Yesu lɛ? Susumɔ Ŋmalɛ mli odaseyelii ni nyiɛ sɛɛ nɛɛ ahe.

Biblia lɛ tsi Mikael ni ji mumɔŋ bɔɔ nɔ ni yɔɔ hewalɛ waa lɛ tã shii enumɔ sɔŋŋ. Ejeɔ kpo shii etɛ yɛ Daniel wolo lɛ mli. Yɛ Daniel 10:13, 21 lɛ wɔkaneɔ akɛ, Mikael ni ji “lumɛi onukpai lɛ ateŋ mɔ kome lɛ” ni atsɛɔ lɛ hu akɛ “nyɛlumɔ” lɛ ye ebua ŋwɛibɔfo ko ni atsu lɛ. Agbɛnɛ hu, yɛ Daniel 12:1 lɛ, ahaa wɔleɔ akɛ yɛ naagbee gbii lɛ amli lɛ, “Mikael ni ji lumɔ kpeteŋkpele ní damɔ shi ha omaŋbii lɛ aaate shi adamɔ shi.”

Kɛfata he lɛ, atsi Mikael tã yɛ Kpojiemɔ 12:7 lɛ akɛ “Mikael kɛ ebɔfoi” lɛ wu ta ko ni he hiaa waa, ni nɔ ni jɛ mli kɛba ji akɛ, ashɛrɛ Satan Abonsam kɛ ebɔfoi fɔji lɛ ashwie kɛjɛ ŋwɛi.

Kadimɔ akɛ yɛ ŋmalɛi ni atsi tã kɛtsɔ hiɛ lɛ ateŋ eko fɛɛ eko mli lɛ, awie Mikael lɛ he akɛ ŋwɛibɔfo tabilɔ ni miiwu eeha Nyɔŋmɔ webii lɛ ni eefã amɛhe, ni ekɛ Satan ni ji Yehowa henyɛlɔ fe fɛɛ lɛ taa naa po.

Yuda kuku 9 lɛ tsɛ Mikael akɛ “bɔfonukpa.” Akɛ wiemɔ “bɔfonukpa” lɛ tsu nii ha mɔ kome pɛ yɛ Biblia lɛ mli. Ŋmalɛ kroko pɛ ni akɛ wiemɔ bɔfonukpa lɛ tsu nii yɛ mli ji 1 Tesalonikabii 4:16 lɛ, jɛmɛ Paulo wie Yesu ni atee lɛ shi lɛ he akɛ: “Nuŋtsɔ [Yesu] diɛŋtsɛ kɛ oshebɔɔ kɛ ŋwɛi bɔfonukpa gbee kɛ Nyɔŋmɔ tɛtɛrɛmantɛrɛ aaajɛ ŋwɛi akpeleke shi.” No hewɔ lɛ, awie Yesu Kristo diɛŋtsɛ he yɛ biɛ akɛ bɔfonukpa.

Yɛ nibii ni wɔsusu he kɛtsɔ hiɛ lɛ anaa lɛ, te wɔbaamu sane naa wɔha tɛŋŋ? Yesu Kristo ji bɔfonukpa Mikael lɛ. Gbɛ́i enyɔ lɛ fɛɛ—Mikael (eshishi ji “Namɔ Tamɔ Nyɔŋmɔ?”) kɛ Yesu (eshishi ji “Yehowa Ji Yiwalaherelɔ”) lɛ gbalaa jwɛŋmɔ kɛyaa gbɛfaŋnɔ titri ni Yesu tsuɔ yɛ Nyɔŋmɔ nɔyeli lɛ mli lɛ nɔ. Filipibii 2:9 lɛ kɛɔ akɛ: “Enɛ hewɔ hu ni Nyɔŋmɔ wó [Yesu ni awo ehiɛ nyam lɛ nɔ] gojoo, ni eduro lɛ gbɛ́i ní tá gbɛ́i fɛɛ gbɛ́i nɔ.”

Ehe miihia ni wɔkadi akɛ jeee beni afɔ Yesu akɛ adesa lɛ ji be ni ewala je shishi. Dani Maria baafɔ Yesu lɛ, ŋwɛibɔfo ko basara lɛ, ni ekɛɛ lɛ akɛ mumɔ krɔŋkrɔŋ lɛ baaha ená musu, ni kɛ́ efɔ lɛ, esa akɛ ewo gbekɛ lɛ gbɛ́i akɛ Yesu. (Luka 1:31) Beni Yesu tsuɔ esɔɔmɔ nitsumɔ lɛ, efɔɔ shihilɛ mli ni eyɔɔ dani eba shikpɔŋ lɛ nɔ lɛ he wiemɔ.—Yohane 3:13; 8:23, 58.

No hewɔ lɛ, bɔfonukpa Mikael lɛ ji gbɛ́i ni akɛtsɛɔ Yesu dani eba shikpɔŋ lɛ nɔ akɛ adesa. Beni atee Yesu shi ni eku esɛɛ kɛtee ŋwɛi lɛ, ebɔi nitsumɔ ekoŋŋ akɛ bɔfonukpa Mikael “kɛwo tsɛ Nyɔŋmɔ lɛ hiɛ nyam.”—Filipibii 2:11.