Tsi Obɛŋkɛ Nyɔŋmɔ

“Omaŋtsɛyeli lɛ Aaadamɔ Shi Shiŋŋ”

2 Samuel 7:1-16

YƐ ADESAI ayinɔsane mli fɛɛ lɛ, akpa nɔyelɔi babaoo nɔyeli. Afɔ̃ oshiki kɛkpa amɛteŋ mɛi komɛi, ni atsɔ patapaafeemɔ nɔ hu akpa mɛi krokomɛi. Ni Yesu Kristo ni ji Nyɔŋmɔ ŋwɛi Maŋtsɛyeli lɛ nɔ Maŋtsɛ lɛ hu? Ani nɔ ko baanyɛ atsi enaa koni ekaye nɔ akɛ Maŋtsɛ ni Nyɔŋmɔ ehala? Wɔbaana hetoo lɛ yɛ wiemɔi ni Yehowa kɛ Maŋtsɛ David ni hi shi yɛ blema Israel lɛ wie, taakɛ aŋma yɛ 2 Samuel yitso 7 lɛ mli.

Wɔnaa yɛ yitso 7 lɛ shishijee mli akɛ, David ehao, ejaakɛ lɛ maŋtsɛ ni ji adesa po lɛ yɛ maŋtsɛwe fɛfɛo mli, yɛ be mli ni Nyɔŋmɔ adeka lɛ yɛ buu ko kɛkɛ mli. * David ha ale akɛ eesumɔ ni ema shĩa ni sa jogbaŋŋ loo sɔlemɔwe eha Yehowa. (Kuku 2) Shi jeee David ji mɔ ni baama shĩa lɛ. Yehowa tsɔ gbalɔ Natan nɔ ekɛɛ David akɛ ebinuu ko ji mɔ ni baama sɔlemɔwe lɛ.—Kukuji 4, 5, 12, 13.

Yehowa ná shwelɛ ni David ná yɛ etsui mli lɛ he miishɛɛ waa. Yɛ suɔmɔ ni David yɔɔ kɛha Nyɔŋmɔ kɛ agbɛnɛ, yɛ gbalɛ kɛ gbeekpamɔ naa lɛ, Nyɔŋmɔ kɛ David fee kpaŋmɔ akɛ ebaatee mɔ ko shi kɛjɛ David odehei awekutɔkpãa lɛ mli, ni mɔ lɛ baaye nɔ kɛya naanɔ. Nyɔŋmɔ tsɔ Natan nɔ ekɛ shiwoo ni kã etsui nɔ lɛ ha David akɛ: “Owe kɛ omaŋtsɛyeli lɛ aaadamɔ shi shiŋŋ yɛ ohiɛ kɛaatee naanɔ: omaŋtsɛsɛi lɛ aaama shi shiŋŋ kɛaatee naanɔ!” (Kuku 16) Namɔ ji kpaŋmɔ nɛɛ Niyelɔ diɛŋtsɛ—Mɔ ni baaye nɔ kɛya naanɔ lɛ?—Lala 89:21, 30, 35-37.

Yesu ni jɛ Nazaret lɛ jɛ David wekutɔkpãa lɛ mli. Beni ŋwɛibɔfo ko tswaa Yesu fɔmɔ lɛ he adafi lɛ, ekɛɛ akɛ: “Nuŋtsɔ Nyɔŋmɔ aaaŋɔ etsɛ David maŋtsɛsɛi lɛ aha lɛ. Ni eeeye Yakob we lɛ nɔ maŋtsɛ kɛaatee naanɔ, ni emaŋtsɛyeli lɛ sɛɛ efoŋ.” (Luka 1:32, 33) No hewɔ lɛ, kpaŋmɔ ni akɛ David fee lɛ ná emlibaa yɛ Yesu Kristo mli. No hewɔ lɛ, jeee gbɔmɔ ko ni hala lɛ akɛ eye nɔ, shi Nyɔŋmɔ ni hala lɛ kɛtsɔ shi ni ewo akɛ ebaaha eye nɔ kɛya naanɔ lɛ nɔ. Nyɛhaa wɔkaia akɛ, Nyɔŋmɔ shiwoi baa mli be fɛɛ be.—Yesaia 55:10, 11.

Wɔbaanyɛ wɔkase nibii enyɔ ni he hiaa yɛ 2 Samuel yitso 7 lɛ mli. Klɛŋklɛŋ lɛ, wɔbaanyɛ wɔná nɔmimaa akɛ nɔ ko nɔ ko nyɛŋ atsi Yesu Kristo naa koni ekaye nɔ, ni asaŋ mɔ ko mɔ ko hu nyɛŋ afee nakai. No hewɔ lɛ, wɔbaanyɛ wɔná nɔmimaa akɛ ebaatsu yiŋtoo hewɔ ni ato enɔyeli lɛ ama shi lɛ he nii, no ji akɛ, afee Nyɔŋmɔ suɔmɔnaa nii yɛ shikpɔŋ lɛ nɔ fɛɛ, taakɛ afeɔ yɛ ŋwɛi lɛ.—Mateo 6:9, 10.

Nɔ ni ji enyɔ lɛ, amaniɛbɔɔ nɛɛ tsɔɔ wɔ nɔ ko ni taa mɔ tsuiŋ yɛ Yehowa he. Kaimɔ akɛ Yehowa na David tsuiiaŋ susumɔi nɛɛ ni ená he miishɛɛ. Kɛ́ wɔná wɔle akɛ Yehowa naa jamɔ krɔŋŋ ni wɔkɛhaa lɛ lɛ, ni enáa he miishɛɛ lɛ, ehaa wɔtsui nyɔɔ wɔmli waa. Bei komɛi lɛ, shihilɛi komɛi ni wɔnyɛŋ he nɔ ko wɔfee, tamɔ hela loo gbɔlɛ, haŋ wɔnyɛ wɔfee nibii fɛɛ ni wɔshweɔ ni wɔfee yɛ Nyɔŋmɔ sɔɔmɔ mli lɛ. Kɛ́ eba lɛ nakai lɛ, esa akɛ wɔha anɔkwale ni eji akɛ Yehowa naa wɔtsuiŋ susumɔi ni haa wɔkɛ jamɔ krɔŋŋ haa lɛ lɛ ashɛje wɔmii.

[Shishigbɛ niŋmaa]