Kasemɔ Nii Kɛjɛ Nyɔŋmɔ Wiemɔ Lɛŋ

Mɛni Hewɔ?

Sane nɛɛ teɔ sanebimɔi komɛi ni ekolɛ osusu he pɛŋ lɛ ashi, ni etsɔɔ he ni obaanyɛ ona hetoi lɛ yɛ, yɛ o-Biblia lɛ mli. Yehowa Odasefoi baaná he miishɛɛ akɛ amɛ kɛ bo aaasusu hetoi nɛɛ ahe.

1. Mɛni hewɔ esa akɛ okase nii kɛjɛ Nyɔŋmɔ ŋɔɔ?

Nyɔŋmɔ yɛ nɔkpakpa ko he sanekpakpa kɛha adesai. Ehaa wɔleɔ enɛ kɛtsɔ Biblia lɛ nɔ. Biblia lɛ tamɔ wolo ko ni jɛ wɔŋwɛi Tsɛ ni yɔɔ suɔmɔ lɛ ŋɔɔ.—Kanemɔ Yeremia 29:11.

2. Mɛni ji sanekpakpa lɛ?

Nɔyeli kpakpa he miihia adesai. Nɔyelɔ ni ji adesa ko nyɛko ajie awuiyeli, jalɛsane ni ayeee, hela, loo gbele kɛjɛ adesai ateŋ. Shi sanekpakpa ko yɛ. Nyɔŋmɔ baato nɔyeli kpakpa ko eha adesai, ni no baajie nɔ fɛɛ nɔ ni kɛ piŋmɔ baa lɛ kɛya.—Kanemɔ Daniel 2:44.

3. Mɛni hewɔ ehe hiaa ni okase nii kɛjɛ Nyɔŋmɔ ŋɔɔ?

Etsɛŋ Nyɔŋmɔ baajie mɛi fɛɛ ni haa adesai piŋɔ lɛ kɛjɛ shikpɔŋ lɛ nɔ. Shi dani nakai be lɛ aaaba lɛ, eetsɔɔ mɛi akpekpei abɔ ni he jɔ anii koni amɛsumɔ amɛhe ni amɛshihilɛ ahi. Nyɔŋmɔ Wiemɔ lɛ miitsɔɔ mɛi bɔ ni amɛaafee amɛdamɔ shihilɛ mli naagbai anaa, bɔ ni amɛaafee amɛná anɔkwa miishɛɛ, kɛ bɔ ni amɛaafee amɛsa Nyɔŋmɔ hiɛ.—Kanemɔ Zefania 2:3.

  4. Namɔ ji Biblia lɛ Ŋmalɔ?

Woji bibii 66 feɔ Biblia lɛ. Hii aaafee 40 ji mɛi ni ŋma. Mose ji mɔ ni ŋmala emli klɛŋklɛŋ woji enumɔ lɛ aaafee afii 3,500 ni eho nɛ lɛ. Bɔfo Yohane ji mɔ ji ŋma naagbee nɔ̃ lɛ aaafee afii 1,900 ni eho nɛ lɛ. Shi mɛi ni ŋmala Biblia lɛ ŋmala Nyɔŋmɔ susumɔi, jeee amɛ diɛŋtsɛ amɛsusumɔi. No hewɔ lɛ, Nyɔŋmɔ ji Biblia lɛ ŋmalɔ.—Kanemɔ 2 Timoteo 3:16; 2 Petro 1:21.

Wɔle akɛ Biblia lɛ jɛ Nyɔŋmɔ ŋɔɔ ejaakɛ egbaa nibii ni baaba wɔsɛɛ lɛ fitsofitso, ni ebaa mli nakai pɛpɛɛpɛ. Adesa ko nyɛŋ nakai afee. (Yesaia 46:9, 10) Agbɛnɛ hu, Biblia lɛ haa wɔleɔ Nyɔŋmɔ sui ni nɔ bɛ lɛ. Ebaanyɛ etsake mɛi koni amɛshihilɛ ahi jogbaŋŋ. Anɔkwa saji nɛɛ haa mɛi akpekpei abɔ ayiŋ tsɔɔ akɛ Biblia lɛ ji Nyɔŋmɔ Wiemɔ.—Kanemɔ Yoshua 23:14; 1 Tesalonikabii 2:13.

5. Te ooofee tɛŋŋ onu Biblia lɛ shishi?

Abale Yesu jogbaŋŋ akɛ mɔ ni tsɔɔ Nyɔŋmɔ Wiemɔ lɛ. Eyɛ mli akɛ mɛi ni ekɛwie lɛ ateŋ mɛi babaoo le Biblia lɛ he nɔ ko moŋ, shi ehe bahia ni aye abua amɛ ni amɛnu shishi. Yesu tsɛ Biblia mli ŋmalɛi srɔtoi ayisɛɛ ni etsɔɔ mli koni ekɛye ebua amɛ ni “amɛna Ŋmalɛi lɛ anaa.” Sane nɛɛ, ni ji “Kasemɔ Nii Kɛjɛ Nyɔŋmɔ Wiemɔ Lɛŋ” lɛ baatsɔ nakai gbɛ nɔŋŋ nɔ eye ebua bo.—Kanemɔ Luka 24:27, 45.

Nɔ ni Nyɔŋmɔ tsɔɔ wɔ yɛ nɔ hewɔ ni wɔyɔɔ shihilɛ mli lɛ he lɛ haa wɔmii shɛɔ wɔhe waa. Shi ekolɛ mɛi komɛi naŋ he miishɛɛ akɛ amɛbaana ni ookane Biblia lɛ. Kaaha enɛ miije onijiaŋ wui. Kɛ́ obaaná naanɔ wala wɔsɛɛ lɛ, edamɔ le ni ooole Nyɔŋmɔ lɛ nɔ.—Kanemɔ Mateo 5:10-12; Yohane 17:3.—w11-E 01/1.

Kɛ́ ootao ole enɛ he sane babaoo lɛ, kwɛmɔ wolo nɛɛ ni Yehowa Odasefoi fee lɛ, Mɛni Biblia Lɛ Tsɔɔ Diɛŋtsɛ? yitso 2 lɛ mli.