Ani Biblia Lɛ Guɔ Asɔshwɛmɔ?

BEI pii lɛ, sinii kɛ tɛlivishiŋ nɔ nifeemɔi ni ale waa lɛ haa mɛi naa asɔshwɛmɔ—titri lɛ nɔ ni ashwɛɔ yɛ asɔshwɛmɔtsũi amli lɛ—akɛ eji shwɛmɔ ni mɛi ni he yɔɔ fɛo, niiatsɛmɛi, kɛ mɛi ni abuɔ amɛ akɛ amɛji gbɔmɛi wuji lɛ shwɛɔ. Yɛ anɔkwale mli lɛ, bei pii lɛ mɛi ni kwɛɔ sinii nɛɛ naa akɛ nifeemɔi nɛɛ ji sini mli nɔ ko kɛkɛ, shi jeee nɔ ni yɔɔ diɛŋtsɛ.

Shi jeee asɔshwɛmɔtsũi amli pɛ ashwɛɔ asɔ yɛ—lototsemɔ, abasa ni ataa yɛ kpɔiaŋgbɔlemɔ akaŋshii ahe, kɛ Intanɛt nɔ asɔshwɛmɔ ehe shi waa yɛ je lɛŋ ŋmɛnɛ. Wolo ni ji Internet Gambling lɛ kɛɛ akɛ, asɔshwɛmɔ ji “nifeemɔ gbonyo ko ni gbɛɔ eshwãa oyayaayai ni miihe akpele jeŋ fɛɛ.” Akɛ nɔkwɛmɔnɔ lɛ, amrɔ nɛɛ spaatswaa henɔ ko ni atsɛɔ lɛ poker lɛ ebaafee shwɛmɔ akaŋshii ko ni ehe shi yɛ tɛlivishiŋ kɛ Intanɛt lɛ nɔ. Adafitswaa wolo ko tsɔɔ akɛ, niiamlitaomɔ ko ni afee nyɛsɛɛ nɛɛ yɛ United States lɛ tsɔɔ akɛ, yɛ nyɔji 18 pɛ mli lɛ, mɛi ni tswaa poker lɛ ayifalɛ lɛ ku ebɔ he enyɔ yɛ jɛmɛ.

Asɔshwɛmɔ ji shika ni akɛtaa abasa yɛ nɔ ko ni aleee bɔ ni enaa baayakpa lɛ he. Mɛi babaoo muɔ sane naa akɛ, bei abɔ ni shika ni akɛshwɛɔ asɔ lɛ ji asɔshwɛlɔ lɛ diɛŋtsɛ nɔ, ni agbɛnɛ hu asɔshwɛmɔ lɛ ebatsɔko su ni eka ehe lɛ, ejeee tɔmɔ. Yɛ anɔkwale mli lɛ, New Catholic Encyclopedia lɛ kɛɛ akɛ, asɔshwɛmɔ “jeee esha, ja ehaaa asɔshwɛlɔ lɛ atsu esɔ̃i ahe nii.” Shi etsɛɛɛ Ŋmalɛ mli wiemɔ ko kwraa kɛfiii enɛ sɛɛ. Belɛ, te esa akɛ Kristofonyo ana sane nɛɛ tɛŋŋ? Ani Biblia lɛ kpɛlɛɔ asɔshwɛmɔ nɔ aloo eguɔ?

Esa akɛ wɔkadi akɛ, Ŋmalɛ Krɔŋkrɔŋ lɛ etsiii asɔshwɛmɔ tã tɛ̃ɛ. Shi enɛ etsɔɔɔ akɛ, ehaaa wɔle nɔ ko kwraa yɛ sane nɛɛ he. Yɛ nɔ najiaŋ ni Biblia lɛ aaawo mlai yɛ nifeemɔ loo shihilɛ fɛɛ shihilɛ he lɛ, ewoɔ wɔ hewalɛ ni ‘wɔyoo nii ni ji Nuŋtsɔ lɛ suɔmɔnaa nii lɛ.’ (Efesobii 5:17) Biblia he nilelɔ ko ni atsɛɔ lɛ E. W. Bullinger lɛ tsɔɔ mli akɛ, Hela wiemɔ ni atsɔɔ shishi akɛ “nyɛyoa” lɛ tsɔɔ “nilee ni anáa yɛ nɔ ko he kɛtsɔ nakai nɔ lɛ he ni asusuɔ jogbaŋŋ” koni anyɛ ana bɔ ni sane lɛ ji diɛŋtsɛ lɛ nɔ. No hewɔ lɛ, Kristofonyo ko baanyɛ ayoo nɔ ni ji Nyɔŋmɔ suɔmɔnaa nii yɛ sane nɛɛ he kɛtsɔ Biblia mli shishitoo mlai ni kɔɔ asɔshwɛmɔ he lɛ ni eeesusu he jogbaŋŋ lɛ nɔ. Beni okaneɔ ŋmalɛi ni atsɛ yɛ niiahesusumɔ ni nyiɛ sɛɛ nɛɛ amli lɛ, obaanyɛ obi ohe akɛ: ‘Ani ŋmalɛ nɛɛ kɛ asɔshwɛmɔ kpãa gbee? Mɛni Nyɔŋmɔ Wiemɔ lɛ tsɔɔ akɛ eji Nyɔŋmɔ suɔmɔnaa nii yɛ sane nɛɛ he?’

Shade Lakamɔ Lɛ

Akɛni asɔshwɛmɔ biɔ ni ata abasa yɛ nɔ ko ni aleee bɔ ni enaa baayakpa he hewɔ lɛ, ehaa mɛi kɛ amɛhe fɔ̃ɔ shade—hewalɛ ko ni aleee ni akɛɛ no kudɔɔ nibii ni baa trukaa lɛ—nɔ waa,  titri lɛ kɛ́ akɛ shika wo mli. Akɛ nɔkwɛmɔnɔ lɛ, ahalaa nɔmbai ni asusuɔ akɛ ebaaha aye omanye kɛhaa lototsemɔ; yɛ shwɛmɔ ko ni atsɛɔ lɛ mah-jongg lɛ mli lɛ, aŋmɛɛɛ gbɛ ni shwɛlɔi lɛ awie wiemɔi komɛi yɛ apasa hemɔkɛyeli hewɔ; ni mɛi komɛi hu filiɔ kɔɔyɔɔ amɛwoɔ ludutɛ he dani amɛfɔ̃ɔ. Mɛni hewɔ amɛfeɔ nakai? Bei pii lɛ, asɔshwɛlɔi heɔ amɛyeɔ akɛ, kɛ́ hooo kwraa lɛ, shade baanyɛ akudɔ nɔ ni baajɛ mli kɛba lɛ.

Ani tɔmɔ ko kwraa bɛ he akɛ mɔ ko kɛ ehe aaafɔ̃ shade nɔ? Blema Israelbii lɛ ateŋ mɛi komɛi susu nakai. Amɛsusu akɛ shade baanyɛ aha amɛná nii. Te Yehowa Nyɔŋmɔ na sane nɛɛ eha tɛŋŋ? Nyɔŋmɔ tsɔ egbalɔ Yesaia nɔ ekɛɛ amɛ akɛ: “Nyɛ mɛi ní nyɛkwa Yehowa, ní nyɛhiɛ ekpa egɔŋ krɔŋkrɔŋ lɛ nɔ, ní nyɛŋmɛɔ okpɔlɔ nyɛhaa shade wɔŋ, ní nyɛfɔseɔ wein ní afutu mli nyɛshwieɔ shi nyɛhaa shɛɛ mli wɔŋ lɛ.” (Yesaia 65:11) Nyɔŋmɔ buɔ shade ni aheɔ ayeɔ lɛ akɛ eji wɔŋjamɔ, ni ekɛ anɔkwa jamɔ kpãaa gbee. Etsɔɔ akɛ, mɔ ni feɔ nakai lɛ kɛ ehe fɔ̃ɔ hewalɛ ko ni aleee nɔ moŋ fe anɔkwa Nyɔŋmɔ lɛ nɔ. Nɔ ko bɛ ni tsɔɔ akɛ Nyɔŋmɔ etsake esusumɔ yɛ enɛ he ŋmɛnɛ.

Bɔ ni Afeɔ Ayeɔ Asɔ Lɛ

Kɛ́ asɔshwɛlɔi lɛ ta abasa yɛ Intanɛt lɛ nɔ jio, amɛtse loto jio, amɛta abasa yɛ kpɔiaŋgbɔlemɔ akaŋshii ko he jio, amɛshwɛ asɔ yɛ asɔshwɛmɔtsũ ko mli jio lɛ, bei pii lɛ, amɛsusuuu he ni nɔ ni amɛtaoɔ lɛ jɛ lɛ he. Esoro asɔshwɛmɔ yɛ jarayeli nitsumɔ loo nihemɔ kpakpa he ejaakɛ asɔshwɛlɔ lɛ miitao ni eye shika ni eŋmɛɛ asɔshwɛlɔi krokomɛi lɛ. * Canada nitsumɔhe ko ni ji Centre for Addiction and Mental Health lɛ tsɔɔ akɛ: “Be fɛɛ be ni mɔ ko baaye loto ni ebaatsɔ niiatsɛ lɛ, belɛ mɛi akpekpei abɔ ashika eŋmɛɛ amɛ!” Mɛɛ Biblia mli shishitoo mlai baanyɛ aye abua Kristofonyo koni enu bɔ ni Nyɔŋmɔ naa enɛ ehaa lɛ shishi?

Kitai Nyɔŋma ni akɛha Israelbii lɛ mli naagbee nɔ lɛ kɛɔ akɛ: ‘Ohiɛ akakɔ̃ onaanyo ŋa, loo etsina, loo eteji, aloo nɔ ko ni ji onaanyo nɔ̃ nɔ.’ (2 Mose 20:17) Atsi mɔ hiɛ ni kɔ̃ɔ enaanyo  nibii anɔ, tamɔ nibii ni enaanyo lɛ yɔɔ, eshika, kɛ eŋa lɛ fɛɛ atã akɛ eji esha ni yɔɔ hiɛdɔɔ. Afii ohai komɛi asɛɛ lɛ, bɔfo Paulo saa eti kita nɛɛ mli eha Kristofoi akɛ: “Ohiɛ akakɔ̃ nii anɔ.” (Romabii 7:7) Kɛ́ Kristofonyo ko miitao akɛ ená nɔ ko ni ji mɔ kroko nɔ lɛ, ani jeee nii anɔ ehiɛ kɔ̃ɔ lɛ?

Niŋmalɔ J. Phillip Vogel ŋma akɛ: “Kɛji [asɔshwɛlɔi lɛ] le jio, amɛleee jio, dani amɛbayashwɛ asɔ lɛ, amɛgbɛkpamɔ ji akɛ, nɔ fɛɛ nɔ ni amɛkɛaashwɛ asɔ lɛ baaha amɛná nii babaoo, kɛ́ eji shika fioo po.” Asɔshwɛlɔi nɛɛ kpaa gbɛ akɛ amɛbaatsɔmɔ niiatsɛmɛi kpanakpanaa yɛ be kukuoo mli ni amɛgbooo he deŋme kwraa. Enɛ kɛ ŋaawoo ni Biblia lɛ kɛhaa akɛ Kristofoi ‘abɔ mɔdɛŋ ni amɛkɛ amɛniji atsu nitsumɔ kpakpa, koni amɛná nɔ ko ni amɛkɛha mɔ ni ehia lɛ lɛ’ kpãaa gbee. (Efesobii 4:28) Bɔfo Paulo fee lɛ faŋŋ akɛ: “Kɛ́ mɔ ko sumɔɔɔ akɛ etsuɔ nii lɛ, ekaye nii hu.” Ekɛshi sɛɛ akɛ: “Amɛye amɛ diɛŋtsɛ amɛdɛŋ ŋmaa.” (2 Tesalonikabii 3:10, 12) Shi ani abaanyɛ abu asɔshwɛmɔ akɛ nitsumɔ kpakpa?

Eyɛ mli akɛ asɔshwɛmɔ baanyɛ afee nɔ ni wa moŋ, shi shika ni mɔ náa yɛ mli lɛ ji nɔ ni mɔ lɛ eye, jeee nɔ ni etsu loo nyɔmɔwoo ni ená kɛjɛ nɔ ko ni etsu mli. Kɛ́ aashwɛ asɔ lɛ, akɛ shika taa abasa yɛ nɔ ko ni aleee bɔ ni enaa baayakpa ní asusuɔ akɛ abaaye yɛ heniianaa kɛkɛ lɛ he, ni edamɔ gbɛkpamɔ ni ayɔɔ akɛ etsɛŋ ni nibii baahi jogbaŋŋ lɛ nɔ. Kɛ wɔɔfo lɛ kuku lɛ, asɔshwɛlɔ lɛ taoɔ akɛ ená nɔ ko be mli ni etsuko nɔ ko kwraa. Nɔ ni tamɔɔɔ nakai lɛ, awoɔ anɔkwa Kristofoi aŋaa akɛ amɛtsu nitsumɔ kpakpa ni amɛná shika kɛjɛ mli. Nilelɔ Maŋtsɛ Salomo ŋma akɛ: ‘Nɔ̃ kpakpa ko bɛ ha gbɔmɔ fe enɛ, akɛ eye ni enu, ni eha esusuma aye nii kpakpai amli ŋɔɔmɔ yɛ edeŋmegbomɔ lɛ mli.’ Ni ekɛfata he akɛ: “Enɛ hu mina, akɛ Nyɔŋmɔ dɛŋ ejɛ.” (Jajelɔ 2:24) Hɛɛ, Nyɔŋmɔ tsuji kɛ amɛhiɛ efɔ̃ɔɔ nɔ ko ni aleee bɔ ni enaa baayakpa nɔ, ni amɛtsɔɔɔ gbɛi gbohii anɔ koni amɛná shika oya, shi moŋ amɛkwɛɔ Nyɔŋmɔ gbɛ kɛha miishɛɛnamɔ kɛ jɔɔmɔ.

“Tsɔne” ni Esa akɛ Akwa

Kɛji asɔshwɛlɔ ko nyɛ eye asɔ lɛ yɛ heniianaa po lɛ, ebaahi jogbaŋŋ akɛ eeesusu bɔ ni asɔshwɛmɔ baanyɛ aná enɔ hewalɛ sɛɛ mli lɛ he, shi jeee amrɔmrɔ miishɛɛ ni ebaaná lɛ he kɛkɛ. Abɛi 20:21 lɛ kɛɔ akɛ: “Gboshinii ní aha gidigidi yɛ shishijee mli lɛ, enaagbee lɛ, jɔɔmɔ baŋ nɔ.” Mɛi babaoo ni eye loto kɛ asɔ henɔi krokomɛi pɛŋ lɛ shwaa amɛhe loo amɛwerɛ hoɔ amɛhe yɛ sɛɛ mli, ejaakɛ nii babaoo ni amɛná kɛjɛ mli lɛ hako amɛná miishɛɛ ni amɛkpa gbɛ lɛ. Kwɛ bɔ ni ehi jogbaŋŋ akɛ wɔɔbo Biblia mli ŋaawoo akɛ wɔkaŋɔ wɔhiɛ wɔfɔ̃ “nifalɛ ni bɛ shweshweeshwe lɛ nɔ, shi moŋ Nyɔŋmɔ hiɛkalɔ lɛ nɔ, mɔ hu ni ŋɔɔ nibii fɛɛ ehaa wɔ babaoo, akɛ wɔye mli ŋɔɔmɔ lɛ” toi.—1 Timoteo 6:17.

Yɛ asɔ ni mɔ baaye loo abaaye lɛ lɛ sɛɛ lɛ, tsɔne kroko hu yɛ ni esa akɛ ekwa. Nyɔŋmɔ Wiemɔ lɛ kɛɔ akɛ: “Mɛi ni taoɔ nii pii aná lɛ gbeeɔ kaa kɛ tsɔne kɛ kwashiai akɔnɔi pii ni fiteɔ mɔ ní tsiɔ mɛi ewoɔ hiɛkpatamɔ kɛ laajemɔ mli lɛ amli.” (1 Timoteo 6:9) Atsɔɔ tsɔne koni akɛdu mɔ ko loo nɔ ko. Asɔshwɛmɔ tsɔne lɛ edu mɛi babaoo ni kɛ shika fioo pɛ yata abasa shikome loo nɔ, aloo amɛyasa asɔshwɛmɔ naa fioo kɛkɛ lɛ, ni amɛnyɛɛɛ amɛkpa dɔŋŋ. Eha mɛi anitsumɔi efite, efite suɔlɔi ateŋ, ni efite wekui hu.

Yɛ ŋmalɛi babaoo ni kɔɔ asɔshwɛmɔ he ni wɔsusu he nɛɛ amli lɛ, ani ona nɔ ni Nyɔŋmɔ suɔmɔnaa nii ji yɛ sane nɛɛ he? Bɔfo Paulo wo enanemɛi Kristofoi lɛ ahewalɛ akɛ: “Nyɛjeŋba akatamɔ jeŋbii ajeŋba, shi moŋ nyɛkɛ nyɛjwɛŋmɔ ní etsɔ ehee lɛ atsakea nyɛhe, koni nyɛyoo nii ni ji Nyɔŋmɔ suɔmɔnaa nii kpakpai ní sa ehiɛ jogbaŋŋ ní hi kɛwula shi lɛ.” (Romabii 12:2) Esa akɛ Nyɔŋmɔ suɔmɔnaa nii akudɔ bɔ ni Kristofonyo ko hiɔ shi ehaa lɛ, shi jeee nɔ ni mɛi babaoo susuɔ. Yehowa, ni ji “miishɛɛ Nyɔŋmɔ lɛ” miisumɔ ni wɔná miishɛɛ yɛ shihilɛ mli ni wɔye wɔhe kɛjɛ nibii gbohii ni jɛɔ asɔshwɛmɔ mli kɛbaa lɛ ahe.—1 Timoteo 1:11, NW.—w11-E 03/1.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 23]

Nyɔŋmɔ tsuji tsuɔ nitsumɔ kpakpa kɛnáa shika

[Akrabatsa ni yɔɔ baafa 22]

Miishɛɛ ni Anáa kɛ́ Aye Asɔ

Ani asɔshwɛmɔ baanyɛ atsɔ mɔ ko su, ni eka ehe? Beni Dr. Hans Breiter pɛi bɔ ni asɔshwɛlɔi feɔ amɛ nii amɛhaa kɛji amɛye asɔ loo aye amɛ lɛ mli lɛ, eyɔse akɛ, “shika ni asɔshwɛlɔ náa kɛjɛɔ asɔshwɛmɔ mli lɛ náa ejwɛŋmɔ nɔ hewalɛ tamɔ bɔ ni efeɔ mɔ ko fuɔ kokein lɛ nɔŋŋ.”

[Mfoniri ni yɔɔ baafa 22]

Namɔ shika asɔshwɛlɔi taoɔ ni amɛye lɛ?