Kasemɔ Nii Kɛjɛ Nyɔŋmɔ Wiemɔ Lɛŋ

Namɔ Ji Yesu Kristo?

Sane nɛɛ teɔ sanebimɔi komɛi ni ekolɛ osusu he pɛŋ lɛ ashi, ni etsɔɔ he ni obaanyɛ ona hetoi lɛ yɛ, yɛ o-Biblia lɛ mli. Yehowa Odasefoi baaná he miishɛɛ akɛ amɛ kɛ bo aaasusu hetoi nɛɛ ahe.

1. Namɔ ji Yesu Kristo?

Yesu hi shi yɛ ŋwɛi akɛ mumɔŋ bɔɔ nɔ dani afɔ lɛ yɛ shikpɔŋ lɛ nɔ akɛ adesa. (Yohane 8:23) Lɛ Nyɔŋmɔ bɔ klɛŋklɛŋ, ni eye ebua Nyɔŋmɔ kɛbɔ nibii krokomɛi fɛɛ ni eshwɛ lɛ. Lɛ pɛ Yehowa kome too bɔ lɛ, ni no hewɔ lɛ atsɛɔ lɛ Nyɔŋmɔ Bi “koome.” Yesu sɔmɔ akɛ Nyɔŋmɔ Naawielɔ, ni no hewɔ lɛ atsɛɔ lɛ ‘Wiemɔ lɛ.’—Yohane 1:1-3, 14; kanemɔ Abɛi 8:22, 23, 30; Kolosebii 1:15, 16.

2. Mɛni hewɔ Yesu ba shikpɔŋ lɛ nɔ?

Nyɔŋmɔ tsu e-Bi lɛ kɛba shikpɔŋ lɛ nɔ kɛtsɔ ewala ni ejie kɛjɛ ŋwɛi kɛbawo Yudanyo oblayoo fro ko ni atsɛɔ lɛ Maria lɛ musuŋ lɛ nɔ. No hewɔ lɛ, Yesu bɛ adesa tsɛ ko. (Luka 1:30-35) Yesu ba shikpɔŋ lɛ nɔ (1) koni ebatsɔɔ mɛi Nyɔŋmɔ he anɔkwalei, (2) koni ebafee Nyɔŋmɔ suɔmɔnaa nii ni ekɛfee nɔkwɛmɔnɔ eha mɛi, kɛ agbɛnɛ hu (3) koni ekɛ ewala ni eye emuu lɛ aha akɛ ‘kpɔmɔnɔ.’—Kanemɔ Mateo 20:28; Yohane 18:37.

3. Mɛni hewɔ kpɔmɔnɔ he hiaa wɔ?

Kpɔmɔnɔ ji nyɔmɔ ko ni awoɔ koni akɛha mɔ ko aye ehe. Nyɔŋmɔ etooo eyiŋ akɛ adesai agbɔlɔ ni amɛgboi. Te wɔfeɔ tɛŋŋ wɔleɔ enɛ lɛ? Nyɔŋmɔ kɛɛ Adam ni ji klɛŋklɛŋ gbɔmɔ lɛ akɛ, kɛ́ efee nɔ ni Biblia lɛ tsɛɔ lɛ akɛ esha lɛ, ebaagbo. Eji Adam efeee esha kulɛ, egboŋ kɔkɔɔkɔ. Eyɛ mli akɛ ehe afii ohai abɔ dani Adam wala sɛɛ fo moŋ, shi abaanyɛ akɛɛ akɛ egbo yɛ gbi ni egbo Nyɔŋmɔ nɔ toi lɛ nɔ nɔŋŋ. (1 Mose 2:16, 17; 5:5) Adam kɛ esha kɛ ehe nyɔmɔwoo ni ji gbele lɛ tsɛŋe eshwiei fɛɛ. No hewɔ lɛ, gbele “tsɔ” Adam “nɔ kɛba” je lɛŋ. Enɛ hewɔ ni kpɔmɔnɔ he hiaa wɔ lɛ.—Kanemɔ Romabii 5:12; 6:23.

 4. Mɛni hewɔ Yesu gbo?

Namɔ aaanyɛ wɔ akpɔ̃ kɛjɛ gbele dɛŋ? Kɛ́ wɔgboi lɛ, wɔwo wɔ diɛŋtsɛ wɔhe esha pɛ he nyɔmɔ. Akɛni adesai yeee emuu hewɔ lɛ, amɛteŋ mɔ ko nyɛŋ awo mɛi krokomɛi ahe eshai ahe nyɔmɔ.—Kanemɔ Lala 49:8-10.

Akɛni Yesu bɛ adesa tsɛ hewɔ lɛ, eye emuu, ni no ha enyɛ egbo yɛ mɛi krokomɛi ahe eshai ahewɔ, shi jeee lɛ diɛŋtsɛ enɔ hewɔ. Nyɔŋmɔ jie suɔmɔ ni nɔ bɛ kpo etsɔɔ adesai kɛtsɔ e-Bi lɛ ni eha ebagbo eha wɔ lɛ nɔ. Yesu hu jie suɔmɔ kpo etsɔɔ wɔ kɛtsɔ e-Tsɛ toi ni ebo ni ekɛ ewala ha yɛ wɔhe eshai lɛ ahewɔ lɛ nɔ.—Kanemɔ Yohane 3:16; Romabii 5:18, 19.

5. Mɛni Yesu feɔ amrɔ nɛɛ?

Yesu tsɔ helai ni etsa, gbohii ashi ni etee, kɛ kpɔ̃ ni ekpɔ̃ mɛi kɛjɛ esha kɛ gbele dɛŋ lɛ nɔ eha ana nɔ ni ebaafee eha adesai fɛɛ ni feɔ toiboo lɛ wɔsɛɛ. (Luka 18:35-42; Yohane 5:28, 29) Beni Yesu gbo sɛɛ lɛ, Nyɔŋmɔ tee lɛ shi akɛ mumɔŋ bɔɔ nɔ. (1 Petro 3:18) No sɛɛ lɛ, Yesu mɛ yɛ Nyɔŋmɔ ninejurɔ nɔ kɛyashi beyinɔ ni Yehowa ha lɛ hegbɛ akɛ eye shikpɔŋ lɛ fɛɛ nɔ Maŋtsɛ. (Hebribii 10:12, 13) Amrɔ nɛɛ lɛ, Yesu miiye nɔ akɛ Maŋtsɛ yɛ ŋwɛi, ni esɛɛnyiɛlɔi ni yɔɔ shikpɔŋ lɛ nɔ lɛ miitswa sanekpakpa lɛ he adafi yɛ jeŋ fɛɛ.—Kanemɔ Daniel 7:13, 14; Mateo 24:14.

Etsɛŋ, Yesu kɛ hegbɛ ni eyɔɔ akɛ Maŋtsɛ lɛ baatsu nii kɛfo nɔnai fɛɛ sɛɛ, ni ebaajie mɛi ni haa anaa nɔ lɛ hu kɛya. Mɛi akpekpei abɔ ni náa hemɔkɛyeli yɛ Yesu mli, ni amɛboɔ lɛ toi lɛ baaná wala yɛ shikpɔŋ lɛ nɔ paradeiso mli.—Kanemɔ Lala 37:9-11.—w11-E 03/1.

Kɛ́ ootao ole enɛ he sane babaoo lɛ, kwɛmɔ wolo nɛɛ, Mɛni Biblia Lɛ Tsɔɔ Diɛŋtsɛ? ni Yehowa Odasefoi fee lɛ yitso 4 lɛ mli.

[Mfoniri ni yɔɔ baafa 25]

Mɛi akpekpei abɔ ni náa hemɔkɛyeli yɛ Yesu mli, ni amɛboɔ lɛ toi lɛ baaná wala yɛ shikpɔŋ lɛ nɔ paradeiso mli